Is Kedhukum
14
Ne ke zuen duma niw he edtuu ki Kristu,
iyan,
kenè pa meheǥet is kedtuu zin,
dewata niw sikandin,
iyan,
kenè kew mebpekidlewanà kandin ke is ulaula zin tenged te kedtuu zin,
ne kenà utew ebpekeiring te keniyu.
2 Is etew he meheǥet en is kedtuu zin,
ne iyan ed-isipen din is:
egkehimu ke egkeenen ta is minsan hengkey he egkeenen,
iyan,
is etew he kenè pa meheǥet is kandin he kedtuu,
ne kunaan din ke wazà ituǥut kenitew is kegkaan te minsan hengkey he usa,
ne menge lumbey zà is idsezè din.
3 Ne is etew he egkeenen din is minsan hengkey,
kinahanglan he kenè din isipa he lavew sikandin te etew he menge lumbey zà is idsezè din.
Ne iring din ded daan su is etew he menge lumbey zà is idsezè din,
ne kinahanglan he kenè din isipa he lavew sikandin te etew he egkaan te minsan hengkey,
su midawat sikandan pudu te Megbevayà.
4 Kenà egkehimu he edsusiyen ta is menge ulaula te suluǥuen te sengeeetew en su haazà is egalen din,
iyan edsusi kandin ke netuman din en be is ebpeveelan kandin wey ke wazà.
Ne iring din ded daan,
kenà egkehimu he edsusiyen ta is menge ulaula te zuma ta he tumutuu su iyan edsusi kandin is Megbevayà.
Siguradu he egketuman din is ebpeveelan kandin te Megbevayà su edtavang kandin is Megbevayà.
5 Ne iring din ded daan,
ed-isipen te sevaha he etew he zuen menge andew he utew mahal ziyà te Megbevayà,
ne ed-isipen daan te sevaha pa maan he wazà ibpelavi te Megbevayà te minsan hengkey he andew.
Kinahanglan he mevenari is kada sevaha he is egkeisip din wey ed-ul-ulahan din,
ne iyan hustu he ed-ul-ulahan.
6 Su is etew he egkeisip din he utew mahal is sevaha he andew,
ne umba egkeisip din is iring dutun su wey mesuat is Megbevayà.
Ne iring din ded daan is etew he egkaan te minsan hengkey,
umba egkeenen din su egkeisip din he iyan haazà egkesuatan te Megbevayà ne egkepeselematan din haazà te Megbevayà.
Ne is etew he menge lumbey zà is idsezè din,
ne umba iyan dà haazà idsezè din su egkeisip din he iyan haazà egkesuatan te Megbevayà ne egkepeselematan din daan haazà te Megbevayà.
7 Su wazà minsan sevaha kenitew te menge tumutuu he kenà layun gaked te Megbevayà ke zini ki pa te kelibutan wey ke minatey ki en be.
8 Su emun uuyag ki pa ne sakup ki te Megbevayà,
ne emun ebpatey ki ne iring din ded daan.
Ne umba,
ke uuyag ki pa wey ke minatey ki en be,
gaked ki ǥihapun te Megbevayà.
9 Su umba mibpehimatey si Kristu wey nevanhew sikandin su wey mekevayàbayà sikandin te menge tumutuu kandin he uuyag pa wey minatey en.
10 Ne ǥeina te iyan heini,
kenà meupiya ke iyan ki edsawey te menge ulaula te menge suled ta te kedtuu wey ke egkeminusan ki kandan su keuzemà sikitew is langun,
ebpekeetuvang te Megbevayà ne iyan sikandin edsusi kenitew te langun.
11 Su zuen insurat he Lalag te Megbevayà,
ne zutun migkaǥi is Nengazen te,
“Iyan a wazè din kemetayen he Megbevayà
ne tenged kayi tutuu iyan he edluhuzan a te tivuuk he menusiyà,
ne ebpekeazap kediey is langun.”
12 Ne zutun diyè kiw ebpekeetuvang te Megbevayà su edsusiyen kiw zin ne egkekaǥi ta kandin is langun he mid-ulaula ta zini te kelibutan.
Is Ebpekezezaat te Isip
13 Ne tenged dutun,
menge suled,
ed-engkezan te en is kedsawey ta te menge ulaula te menge zuma ta he tumutuu.
Su kinahanglan he ed-ahaan ta is kenita he menge ulaula su wey wazà minsan hengkey he ulaula ta he ibpekesalà te menge zuma ta.
14 Tenged te kebpekidsevaha ku te Nengazen tew he si Jesus,
impesavut kedì he wazà minsan hengkey he egkeenen he idawey te Megbevayà.
Iyan,
ke zuen etew he edtuuwan din he indawey te Megbevayà is sevaha he egkeenen ne kenà meupiya ke egkeenen din.
15 Ne emun egkeenen niw haazà is kunaan din ke indawey,
utew ibmesakit haazà te ǥehinawa zin ne iring te wazè kew megeǥawi.
Ne kenà meupiya,
emun egkepenulayan haazà is etew pinaaǥi te kegkaan niw zutun su zuma niw man he tumutuu ne mibpehimatey si Kristu he elili zaan kandin.
16 Ne ke zuen ulaula he egkeisip te zuma he tumutuu he indawey te Megbevayà,
iyan,
netuenan niw he wazà izawey te Megbevayà haazà is ulaula,
kenè niw ul-ulaha su wey kenà ebpekekaǥi is minsan hentei he mezaat is mid-ulaula niw.
17 Su is kedhedii kenita te Megbevayà,
ne kenà pinaaǥi te kedtumana ta te menge suǥù mehitenged te menge keenen wey inumen he idawey,
kekenà,
pinaaǥi te kebpeketezenga kenita te Megbevayà he metazeng wey pinaaǥi te melinawen he kebpekidepitè ta te menge zuma ta,
wey pinaaǥi zaan te kelipey he ibeǥey te Waǥas he Mulin-ulin.
18 Ne ke pinaaǥi kayi edsundanan ta si Kristu,
igkesuat ki utew te Megbevayà,
ne egkesuatan daan te menge etew is menge ulaula ta.
19 Umba ebpurungan ta is menge ulaula ta su wey kenà maawà is melinawen he kebpekidepitè ta te menge zuma ta ne wey zaan meheǥet is kedtuu te kada sevaha kenitew.
20 Ne kenè niw zèdeeti is ed-ul-ulahan te Megbevayà pinaaǥi te kegkaan niw te egkeenen he kunaan te zuma ke indawey kenita.
Egkehimu ke egkaan ki te minsan hengkey he egkeenen,
iyan,
emun iyan ibpekesalà te zuma is kegkaan ta ne kenà haazà meupiya.
21 Ne iyan meupiya he ulaula is kenè ki egkaan te egkeenen he kunaan te zuma ke indawey,
ne kenè ki ed-inum te vinu,
wey kenè ta ed-ul-ulahan is minsan hengkey emun pinaaǥi zutun egkepenulayan is minsan hentei.
22 Ne ke minsan hendei zapit is edtuuwan niw mehitenged kayi kenè niw petueni te menge zuma niw su iyan ebayàbayà keniyu is Megbevayà.
Utew zeyzey is etew he kenà egkesewayan te ǥehinawa zin is menge ulaula zin.
23 Ne ke zuen etew he egkevahinbahin is gehinawa zin su wazè din metueni ke supak is kegkaan din wey ke kenà,
ne emun egkeenen din haazà is kunaan din ke indawey ne ebpekesalà sikandin te Megbevayà su edsupaken din is netaǥù diyà te ǥehinawa zin.
Emun ed-ul-ulahan ta is midtuuwan ta he kenà meupiya,
ne ebpekesalè ki.