Is Kebpezumazuma te Gubirnu
13
Ne kinahanglan he edtuman kiw te velaud te gubirnu is minsan hentei kenitew.
Su wazà ebpemunuan te inged he wazà ituǥut te Megbevayà he mekepemunuan wey wazà gubirnu he wazà tukuza te Megbevayà.
2 Ne is menge etew he edsukul te gubirnu,
ne iyan edsukulan dan is midtukud te Megbevayà ne tenged dutun edsilutan sikandan te Megbevayà.
3 Su wazà kinahanglan he egkehandek ki te ebpemunuan kenita ke meupiya is menge ulaula ta;
wey ki zà egkehandek ke ebaal ki te mezaat.
Emun egkesuat kew he kenè kew mahandek te menge ebpemunuan ne ul-ulaha niw is meupiya he ulaula ne edeliǥen kew zan.
4 Ne haazà is etew he ed-uwit te velaud,
ne suluǥuen sikandin te Megbevayà su wey mebmeupiya is kebpekesavuk tew.
Ne emun mezaat is ulaula tew ne hustu iyan he igkehandek tew su egkehimu he meveǥat is idsilut din.
Suluǥuen sikandin te Megbevayà ne edtumanen din is egkesuatan te Megbevayà ke edsilutan din is menge mesinupaken.
5 Tumana niw is menge suǥù te gubirnu,
kenà tenged dà te egkehandek kew te silut te Megbevayà,
kekenà,
tenged te netuenan niw he iyan heini hustu he ed-ul-ulahan.
6 Ne iyan daan heini ketezengan ke maan is ebayad ki te vuhis,
su is menge upisyal,
ne iring te iyan egalen dan is Megbevayà ke hustu is kedtumana zan te ebpeveelan kandan.
7 Ne tenged kayi kinahanglan he ebeyazan ta is buhis wey is duma pa he ebpeveyazan kenita te gubirnu.
Ne edtehuzen ta zaan is menge etew te gubirnu,
ne ibpeehè ta is dekelà he kedtehuza ta te pid-etawan dan.
Is Dait te Kerayag
8 Kenè niw pekeluǥeyaza is kebeyazi niw te menge utang niw ziyà te minsan hentei,
kekenà,
iyan niw pekeluǥeyaza te wazè din en taman is kebmahala niw ziyà te ǥehinawa niw te menge zuma niw,
su is etew he ebmahalen din is menge zuma zin,
ne netuman din en is menge suǥù te Megbevayà.
9 Su zuen insurat dutun te kesuǥuan he edhenduen te,
“Kenè niw selselai is esawa niw;
ne kenè kew pemumunù;
ne kenè kew penakew;
ne kenè niw isipa he egkesuatan niw is azen te zuma he etew.”
Ne heini is menge suǥù wey is duma pa,
ne egketuman ta heini is langun ke edtumanen ta is suǥù he edhenduen te,
“Kinahanglan he mahala nu is duma nu ziyà te ǥehinawa nu;
irepeng nu sikandin te kenikew he ǥehinawa.”
10 Su emun ebmahalen ta is duma ta ne kenà egkehimu he ebpesipelahan ta sikandin,
ne netuman te en heini is tivuuk he kesuǥuan.
11 Kinahanglan he iyan heini ed-ul-ulahan ta su netuenan ta ke hengkey is hustu he ed-ul-ulahan kayi te timpu.
Su puun guntaan,
is timpu keuzemà he zutun edhimesazen te Megbevayà is kedlibriya zin kenitew,
uvey en kenà dutun te timpu zengan he neketuu kiw.
Ne tenged kayi kinahanglan he kenè kiw iring te etew he nekelipezeng,
kekenà,
iring te etew he ed-andam.
12 Su zini te kelibutan,
iring te utew merusirem tenged te mezaat he ulaula,
iyan,
meǥaan en egketapus is kezukileman su meǥaan en egkepawà,
he ke và dà egkeǥiya,
meǥaan en edlikù si Kristu.
Ne tenged kayi,
ed-engkezan tew en is menge mezaat he ulaula he zait te kezukileman ne idsun-ud tew is limbutung he iyan is kerayag,
he ke và dà egkeǥiya,
ed-ul-ulahan tew is meupiya he ulaula.
13 Ed-ul-ulahan tew is hustu su iyan heini ulaula he zait te menge etew he neteyawan te Megbevayà.
Kenè ki en edtampu te ketiǥuman te ebpemelelangut ne kenè ta egkevuten is kenè ta esawa.
Kenè ki ebpekid-eǥet wey kenè ki egkesina.
14 Ne idsun-ud ta is Nengazen tew he si Jesu Kristu,
he ke và dà egkeǥiya,
ed-ul-ulahan ta is ulaula zin.
Ne kenè te en maan ed-isipen is kedtumana te menge mezaat he kebayà te lawa ta.