3 Ne tenged te imbeǥey kedì te Megbevayà is keǥehem te kedsengyawa te lalag din,

egkeǥiyen ku keniyu te langun he kinahanglan he kenè niw isipa he lavew kew te menge zuma niw,

kekenà,

kinahanglan he hustu is ked-isipa niw te ketau niw sumalà is kedtuu he imbeǥey te Megbevayà diyà te kada sevaha keniyu.

4 Su is kada sevaha kenitew ne zuen din lawa,

ne is menge parti kayi,

ne kenà ed-iiring-iring is baal te kada sevaha.

5 Ne iring din ded daan,

sikitew is menge tumutuu ki Kristu,

ne nehimu kiw he iring te lawa zin,

ne iyan kiw menge parti zutun.

Neubpu is kada sevaha he parti te menge zuma zin he parti.

6 Ne zuen ketau he imbeǥey te Megbevayà diyà te kada sevaha he parti,

asal,

kenà ebpeked-iiring haazà is ketau te kada sevaha.

Kinahanglan he egemiten ta is ketau he imbeǥey kenita.

Ne penenglitan ke imbeǥey ziyà te sevaha is ketau te kebpesevuta te Lalag te Megbevayà ne kinahanglan he mekeikul heini te tuluuwen he midtuuwan ta.

7 Ne emun iyan imbeǥey kenita is ketau te kedtavang te menge zuma ta,

kinahanglan he ebpeniguduwan ta is kedtavang.

Ne emun duen ketau ta te kebpenurù te Lalag te Megbevayà,

ne ebpurungan ta is kebpenurù ta.

8 Ne emun iyan imbeǥey kenita is ketau te kedheǥeta te kedtuu te menge zuma ta ne iyan heini ed-ul-ulahan ta.

Ne emun iyan imbeǥey kenita is ketulanged ta te kedtavang te menge etew he egkengeayuayu,

ne kinahanglan he edtulanged ki te kedtavang kandan.

Ne emun iyan imbeǥey kenita is kedumelaha te menge tumutuu ne kinahanglan he ebpurungan ta is kedumala ta.

Ne emun iyan imbeǥey kenita is kedtavang te menge etew he edlised ne kinahanglan he kenà pinaaǥi te ked-usur is ked-ul-ulaha ta kayi.

9 Kinahanglan he kenà tarù is kegkeǥeǥawi ta te menge zuma ta.

Kinahanglan he utew ta igkeepes is mezaat he ulaula.

Edhemenan ta is meupiya he ulaula.

10 Sikitew is midsusuled pinaaǥi ki Kristu,

ibpeehè tew he mahal zini te ǥehinawa tew is kada sevaha kenitew,

ne ibmeupiya te ǥehinawa tew is kedtahud tew te menge zuma tew.

11 Kenè kiw ebpepepeǥul,

kekenà,

edheǥeten tew ziyà te ǥehinawa tew is kedtumana tew te menge suǥù te Megbevayà.

12 Kinahanglan he layun kiw edlipey su zuen utew meupiya he egkezawat tew keuzemà.

Ed-entusen tew is menge kemereǥenan ne layun kiw ed-ampù diyà te Megbevayà.

13 Ebeǥayan tew te tavang is menge suled tew he egkengeayuayu.

Ne ibpepemenahik ta ziyà te valey ta is etew he humuhulevungà.

14 Is ebpesipala kenita,

id-ampù ta ziyà te Megbevayà he tuvazi zin.

Ne kenè ta iyan id-ampù he siluti zin.

15 Ke zuen etew he zuen din igkelipey,

melipey kew zaan tenged dutun te kelipey zin.

Ne ke zuen etew he zuen igkeseeng din,

keseeng kew zaan tenged dutun te igkeseeng din.

16 Kinahanglan he mesevaha is gehinawa niw te menge tumutuu.

Kenè kew mebmepelevawen,

kekenà,

mebpekiduma kew te menge etew he minus is pid-etawan dan.

Ne kenè niw isipa he uluwanen kew kenà sikandan.

17 Ke zuen ebpesipala keniyu kenè kew mebales.

Peniguduwi niw te ed-ulaula is menge ulaula he kenà egkesewayan te minsan hentei.

18 Himuwa niw is taman te egkehimu niw su wey melinawen is kebpekesavuk niw,

ne wazà igkepeuki keniyu te minsan hentei.

19 Kenè niw,

menge minahal ku he suled,

velesi is etew he ed-ulaula te mezaat diyà te keniyu,

kekenà,

pesegdana niw he iyan edsilut is Megbevayà su zuen insurat he Lalag te Megbevayà he edhenduen te,

“Iyan a ebales;

iyan a edsilut.”

20 Iyan ed-ul-ulahan ta is sambag te insurat he Lalag te Megbevayà he edhenduen te,

“Emun egkevitil is kuntada nu,

ipekaan nu.

Emun egkemezahan,

ipeinum.

Su emun iyan heini ed-ul-ulahan nu,

utew sikandin egkeeled tenged te pesipala zin kenikew.”

21 Minsan ke utew mezaat is pesipala kenita kenè ta ebelesan te mezaat su emun ebelesan ta,

egkezaag ki su egkeuwit ki te mezaat.

Iyan ed-ul-ulahan ta is meupiya he vales ne tenged kayi iyan egkezaag is kuntada ta su egkeuwit sikandin te meupiya.