Nekeuhang en human si Pablo te kegkesemuki te ǥehinawa zin mehitenged te menge tigKurintu he menge tumutuu. Subre en he sengetuig puun te kebpesurati zin kandan tenged te kegkeseeng din kandan dutun te kedluyahi te kedtuu zan wey te kegkengetebektebek dan. Iyan impekeuhang din su zutun te kebpekeulì ni Tito te midsuǥù din he ibpehendiyà te Kurintu netudtul zin he mahabet kandan is mid-iniyug en te menge salè dan wey meupiyè en daan is gehinawa zan ki Pablo.

Iyan, kemulu pa zuen duma kandan he kenà egkilala te kegkeepustul ni Pablo su kenè kun sikandin iring duen te zuma he nemekeuma ziyà te kandan he nemenurù kandan. Ne kayi te ikezuwa he surat din kandan midtavak din sikandan te utew en dekelà is menge kemereǥenan he naantus din te kedsangyew ziyà te kandan wey ziyà te zuma te Meupiya he Tudtulanen, wey neniǥis is menge luhè din tenged te kebmahala zin kandan.

Piru haazà is nenurù kandan he iyan edsunuzen dan, iyan dà baal zan is kebpegalbu wey kebpenurù te menge penurù he mibèbeelan dà te etew.

Ne elin daan migkaǥi ni Pablo ziyà te kandan is: kinahanglan he leusa zan is baal zan te kedtiǥum te tavang he para te edlilised he menge tumutuu ziyà te Hiruselim. Su zekelà is azen dan tenged te kedtuvazi kandan te Megbevayà ne ebpekehimu sikandan he edtavang te ereg he edtevangan.

Ne mezakel zaan is impenurù ni Pablo kandan he mehitenged te kebpenilbi te Megbevayà, ke sikandin te, “Is etew he ebpenilbi te Megbevayà, ne iring sikandin te ziniyun he midteǥuan te utew mahal, su insarig kandin te Megbevayà is mahal he lalag din mehitenged ki Jesu Kristu.”