Is Tavang Diyà te Edlised
16
Ne zuen pa id-suǥù ku keniyu mehitenged te ked-emutè niw te selapì he idtavang niw te egkengeayuayu he menge zuma tew he tumutuu.
Insuǥù ku en daan heini te menge zuma tew ziyà te prubinsya he Gelasya.
2 Ne kada Duminggu ne kinahanglan he teǥenaha te kada sevaha keniyu is ibeǥey zin diyà te Megbevayà.
Sumalà is netiǥeyunan niw ne kinahanglan he iteǥeley niw is bahin te Megbevayà.
Ne tipiǥi niw heini su wey emun ebpekeuma ad diyan ne wazè en kinahanglan he ed-emutè kew pa su zaan en he naandam.
3 Ne emun ebpekeuma a ziyan edsuǥuen ku ziyà te inged he Hiruselim sikan is ebpilien niw he menge etew wey zan meuwit is ibeǥey niw.
Ne ibpeuwit ku zaan is menge surat su wey metueni te ebeǥayan ke hengkey is tuyù dan te ed-uwit.
4 Ne emun kinahanglan dutun he edhendiyà a zaan te Hiruselim,
ebpekezuma zan kediey.
Is Menge Telaan ni Pablo
5 Edhendiyan a te Kurintu emun egketapus ku is tuyù ku ziyà te prubinsya he Mesidunya su egkeisip ku he ziyà a ebayà te Mesidunya.
6 Ne malù a egkeuǥet ke ziyan e en te keniyu.
Kenà a vuwa ed-awà diyan taman te kenè pa egketapus is tipenguzan.
Ne zutun te kedlaus ku,
meupiya ke edtevangan a keniyu zutun te kedhipanew ku ke hendei a ebpevayà.
7 Kenè ku egkesuatan he meǥaan dà is kebpenumbaley ku ziyan,
kekenà,
iyan netaǥù te ǥehinawa ku is egketegteǥaad a ziyan ke edtuǥut is Megbevayà.
8 Egkeisip ku he kayi e pa ed-ubpà te inged he Ipisu taman te Pista te Pintikusti ne human a egenat.
9 Su mezakel pa zini is egkesuat he ebpemineg te Lalag te Megbevayà ne zekelà is pulus te ked-ubpè ku kayi,
asal,
mezakel zaan dini is menge kuntada te Megbevayà.
10 Ne emun ebpekeuma ziyan si Timoteo ne purungi niw sikandin su suluǥuen daan sikandin te Nengazen he iring kediey.
11 Kinahanglan he edtehuzen niw sikandin,
ne emun edlaus te hipenawan din ne tevangi niw sikandin,
ne ipeehè niw is gaǥew niw kandin su wey mekelikù sikandin dini te kedì,
su ebpeebuten ku sikandin wey is menge zuma zin he menge suled tew te kedtuu.
12 Ne si Epulus he suled tew zaan tenged te kedtuu,
kepipira ku en sikandin keǥiyi he meupiya ke ebisitahan kew zin duma zuen te menge suled tew he mibisita ziyan.
Iyan,
egkaǥi sikandin te wazè pa meseled te ǥehinawa zin is kedhendiyan din.
Iyan,
edhendiyan sikandin ke wazà ebpekesamuk kandin.
13 Layun kew,
menge suled,
med-andam;
hemeni niw te edtuu si Jesu Kristu;
kenè niw ikeeled is kedtuu niw,
kekenà,
ipeehè niw is kelig-en te kedtuu niw.
14 Ne minsan hengkey is ebeelan niw,
layun niw ipaahà is kebmahala niw te menge zuma niw.
15 Netuenan niw,
menge suled,
he iyan nehuna he nemeketuu ziyan te prubinsya he Gerisya ensi Istipenas.
Ne wazè dan meduwazuwa te kedtevangi zan te menge zuma zan he tumutuu.
16 Ne tenged dutun,
edhengyuen ku keniyu he pemineǥa niw is sambag te menge etew he iring engki Istipenas wey is minsan hentei he menge zuma tew he ebpurung edtuman te ebpeveelan kandan te Nengazen tew.
17 Utew ad neǥalew hein nekeuma si Istipenas,
si Fortunato wey si Ekeyiku su henduen be te netembaran is utew ku kebulunga keniyu.
18 Inmeupiya sikandan te ǥehinawa ku iring te inmeupiya zaan sikandan te ǥehinawa niw.
Tehuza niw is menge iring kayi he etew.
Menge Pengemusta
19 Ebpengemusta keniyu is langun he menge tumutuu te langun he menge inged dini te prubinsya he Asya.
Utew zaan meheǥet is kebpengemustaha keniyu ni Ekilu wey si Priscila wey elin daan is menge tumutuu he edtiǥum diyà te valey zan dini te Ipisu.
20 Is langun he menge tumutuu he menge zuma ku kayi,
ne ebpengemusta zan daan keniyu.
Ne sikiyu zaan diyan,
ne mebpelimlimuey kew.
21 Te kedtepusa ku kayi te surat,
egkeǥien ku he iyan e en si Pablo is midsurat kayi.
Ebpengemusta a keniyu te langun.
22 Ke zuen minsan hentei he wazà diyà te ǥehinawa zin si Jesus,
ne verakat he siluti sikandin te Megbevayà.
“Maran ata,”
he ke và dà egkeǥiya,
meǥaan ka,
Jesus,
medlikù.
23 Tuvazi kew is langun te Nengazen tew he si Jesus.
24 Utew kew mahal zini te ǥehinawa ku tenged te kedtuu tew ki Jesu Kristu.
Iyan a si Pablo.