Nepauk si Pablo su nezineg din he midsuwayan te menge tumutuu ziyà te prubinsya he Gelasya is impenurù din kandan. Hein aney medwali si Pablo ziyà te kandan te kenà menge Hudiyu, nengelipey sikandan te kedawat kandin ne iyan impenurù din kandan is: iyan igkezewata te Megbevayà te etew is pinaaǥi te kedtuu zin ki Jesu Kristu. Iyan, hein mid-awè en si Pablo ziyà te kandan ne zuen menge Hudiyu he midsulisul kandin. Ne iyan kandan he penurù is: kinahanglan he edtumanen te etew is langun duen te kesuǥuan wey tulumanen te menge Hudiyu su wey sikandin mezawat te Megbevayà.

Ne tenged kayi segugunà sikandan mibpesurati ni Pablo te kedsawey kandan. Ke sikandin te, “Emun edsunuzen niw heini is penurù dan ne kenà ebpulus si Kristu ziyà te keniyu!”

Ne zuen daan menge etew ziyà te Gelasya he egkaǥi te kenà tutuu he epustul si Pablo su wazà sikandin mekepekiduma ki Jesus hein dini pa si Jesus te kelibutan. Iyan, midtavak heini ni Pablo pinaaǥi te kegkaǥi he mibpeehè kandin si Jesus hein diyà sikandin te zalan pehendiyà te Demasku. Wey elin daan nekaǥi zin he midawat te menge epustul ziyà te Hiruselim is kandin he kegkeepustul. Egkeseriǥan is nekaǥi zin su iyan is Megbevayà mibeǥey kandin te keǥehem wey iyan edumala kandin.

Impesavut ni Pablo he is menge etew he ebpevayàbayà te mezaat he kebayà te lawa zan ne egkeveelan dan is langun he mezaat. Umbe utew ta kinahanglan is layun kebpezumala te Waǥas he Mulin-ulin. Pinaaǥi kayi egkehimu ta te ebmahal is Megbevayà wey is menge etew wey zuen ta meupiya, melinawen wey melipayen he ked-ubpà.