3 Berakat he ikeǥaǥew kew te Amey tew he Megbevayà wey te Nengazen tew he si Jesus wey veǥayi kew zan te melinawen he kebpekesavuk.

4 Si Kristu,

imbelavag din is untung din su wey mepalis is menge salè tew su wey kiw melibri,

ne kenè tew meiringi is menge etew he ed-ulaula te mezaat te ǥuntaan he timpu kayi te kelibutan.

Umba mibeelan heini ni Kristu su edtumanen din is egkesuatan te Amey tew he Megbevayà.

5 Berakat he zeliǥa is Megbevayà te wazà pidtemanan.

6 Utew ku sikiyu igkeinuinu su wazè en utew meuǥet ne henduen be te nahalin en is kedtuu niw,

ne is Megbevayà he iyan mibpetuu keniyu pinaaǥi te ǥaǥew ni Kristu,

ed-iniyuǥan niw ne edtuuwan niw is selakew he tuluuwen he egngezanan daan te menge etew he Meupiya he Tudtulanen.

7 Iyan,

kenà egkehimu he zuen selakew pa he tuluuwen he egngezanan te Meupiya he Tudtulanen.

Egkeǥiyen ku heini su zuen menge etew ziyan he ebpenurù te tarù,

ne pinaaǥi kayi egkesemukan is isip niw su edhelinen dan te tarù is Meupiya he Tudtulanen mehitenged ki Kristu.

8 Iyan,

egkeǥiyen ku keniyu he ke zuen minsan hentei,

minsan ke sikami,

wey minsan ke velinsuǥuen he ebpuun te langit,

ne zuen ibpesavut din keniyu he egkeǥiyen din he Meupiya he Tudtulanen,

iyan,

selakew,

ne kenà iyan heini is tutuu he tuluuwen he impesavut dey keniyu,

ne verakat he meimpirnu sikandin.

9 Daan dey en keniyu heini migkaǥi,

iyan,

ed-umanan ku egkeǥiya ǥuntaan he ke zuen ibpesavut te minsan hentei he egkeǥiyen din he Meupiya he Tudtulanen,

iyan,

kenà iyan is tutuu he tuluuwen he impesavut dey keniyu,

ne verakat he meimpirnu sikandin.

10 Kunaan niw vuwa ke iyan netaǥù te ǥehinawa ku is:

egkesuat a he zeliǥa a te menge etew.

Iyan,

kenà iyan heini netaǥù te ǥehinawa ku,

kekenà,

iyan is kebpenunuata ku te Megbevayà.

Kunaan niw vuwa zaan ke egkesuatan ku he ibmeupiya te ǥehinawa te menge etew is menge ulaula ku,

iyan,

kenà daan iyan egkesuatan ku su emun iyan egkesuatan ku,

kenà egkehimu he suluǥuen a ni Kristu.

11 Egkesuatan ku,

menge suled,

he mesavut niw he heini is migngezanan he Meupiya he Tudtulanen he impesavut ku keniyu ne kenà ebpuun te etew zà duen

12 su wazà keǥiya kediey te minsan hentei he etew ne wazà daan ipenurù kediey te etew,

kekenà,

impinted kediey ni Jesu Kristu.

13 Nezineg niw is daan he menge ulaula ku zengan te kemulu ku pa kebenteyani te tuluuwen te menge zuma ku he Hudiyu.

Is langun he menge tumutuu ki Jesus,

mibpesipelahan ku su ebpeǥesen ku pezem sikandan he meengkezi zan is kedtuu zan.

14 Is menge zuma ku he menge Hudiyu he serenganè ku te penuiǥen,

wazà nekerepeng kedì te kebenteyani ku te menge tuluuwen dey te menge Hudiyu.

Ne wazà kandan kedì nekerepeng te kebenteyani te imbilinbilin he menge vetasan te ǥinepuan dey.

15 Ne minsan pa zutun,

ingkeǥaǥew a te Megbevayà ne mibpilì e zin he suluǥuen din te wazè e pa ianak ne nehimu zin he meketuu a kandin.

16 Ne hein neisip din he ibpekilala zin en kediey is Anak din he si Jesus su wey ku ikepenudtul is keaǥi ni Jesus diyà te menge etew he kenà menge Hudiyu,

wazà a mebpepenurù te minsan hentei he etew;

17 ne wazà a zaan medhendiyà te inged he Hiruselim su wey ku mesampit kes nengehuna he epustul ni Jesu Kristu,

kekenà,

midhendiyà a te prubinsya he Erabya ne zutun,

midlikù a ziyà te inged he Demasku.

18 Ne tetelu pa zutun he tuig ne human a medhendiyà te inged he Hiruselim wey a mekepenumbaley ziyà te ki Pedro ne ziyà a te kandin taman dà te zezuwa he simana.

19 Ne neehè ku zaan dutun si Santiago,

sikan is hazi te Nengazen tew he si Jesus,

ne wazà duma he epustul he neehè ku zutun,

iyan dà sikandan is dezuwa.

20 Tutuu heini is edtudtulen ku keniyu.

Netuenan te Megbevayà he kenà tarù.

21 Ne zutun mibeyaan ku is prubinsya he Sirya wey Silisya.

22 Ne wazè e pa zutun mekilala te menge gurupu te menge tumutuu ki Jesus he ziyà te prubinsya he Hudiya.

23 Netudtulan dà sikandan te menge etew he siak is ebpendakep te menge tumutuu ki Jesus dutun te nengehuna he andew,

ne ǥuntaan idsangyew ku en is tinuuwan he iyan ibpendekepa ku kandan su wey zan meewai.

24 Ne tenged dutun midalig dan is Megbevayà tenged te neketuu a ki Jesus.