Utew kew sepian! Iyan heini ibpesavut ni Pablo hein mibpesuratan din is menge tumutuu ziyà te Ipisu wey is minsan hentei he ebpekevasa kayi he surat. Piru kenè din iyan ibpesavut he zekelà is selapì dan. Su is ketigeyunan dan, ne lavew pa te selapì su is ketiǥeyunan he imbeǥey kandan ni Jesu Kristu, ne kenà kelibutanen he azen (umbe ebpulus te wazè din pidtemanan). Pinaaǥi te Waǥas he Mulin-ulin imbeǥey kandan is langun he kelasi te tavang he kenà kelibutanen. Ne umba iyan heeyan su ǥeine te is langun he midtuu ki Jesus Kristu, nekepekidsevaha kandin. Ne nehimu zaan sikandan he menge anak te Megbevayà, umba egkehimu ke ebuyù dan diyà te amey zan te minsan hengkey he egkinehenglanen dan ne egkelipey sikandin he edtavang kandan.

Ne ǥeine te amey is Megbevayà te langun he midtuu kandin, ebpesavut he menge anak sikandan te Megbevayà. Umba utew kinahanglan he edhimuwen dan is taman te egkehimu zan he ebpekepeupiya te kedezepitè dan su wey kenà mezeeti is kegkesevaha zan. Dutun te kedseysaya ni Pablo te kegkesevaha te menge tumutuu, migamit sikandin te menge petug-iringan. Is langun he menge tumutuu impetug-iring din te sevaha zà he lawa he iyan si Jesu Kristu ulu. Impetug-iring din daan is langun he menge tumutuu te valey ne iyan si Kristu vatu he zutun benguna haazà. Si Kristu, impetug-iring din daan te ebpengesawa ne iyan impetug-iring te ed-esewaan din is langun he midtuu kandin.

Ne ǥeine te netuenan te menge tumutuu kandin is menge ulaula he ebpekepenunuat te Megbevayà, utew kinahanglan he iyan dan ed-ul-ulahan is sungkad te netuenan dan. Ke và dà kumbalà kinahanglan he edluwasen dan is mezaat he menge ulaula ne insun-ud dan is beǥu he kineiya he imbeǥey kandan te Megbevayà. Ne kinahanglan daan egemiten dan is menge ǥumaan wey pengalang he inhiman kandan te Megbevayà te kebpekidtebek dan ki Setanas.