Is Kebpetebtevangà
6
Menge suled,
ke zuen duma niw he tumutuu he netuenan niw he nesupak din is Megbevayà,
sikiyu is mid-ulinan te Waǥas he Mulin-ulin,
tevangi niw sikandin su wey zin kenà meengkezi is kedtumana zin te egkesuatan te Megbevayà.
Asal,
kinahanglan he utew kew mepelevayen is edtavang kandin.
Mebpekevantey kew su kela ke mepenulayi kew zaan ni Setanas.
2 Layun kew mebpetebtevangà te uman sevaha keniyu su emun ed-ul-ulahan niw heini egketuman niw is insuǥù kenitew ni Kristu.
3 Ke zuen minsan hentei he kunaan din ke wazà kurang te menge ulaula zin su pudu meupiya,
nelimbungan din is gehinawa zin.
4 Deyzey ke ebpurungan edsusiya te uman sevaha is menge ulaula zin.
Ne emun meupiya,
egkehimu he ibmeupiya te ǥehinawa zin.
Iyan,
kenè din isukud is menge ulaula te zuma zin te kandin he ulaula.
5 Su kinahanglan he bevaa te kada sevaha is kandin he keugelingen he bevaan.
6 Ne sikan is etew he ebpepenurù te Lalag te Megbevayà,
kinahanglan he veǥayi zin is ebpenurù kandin te menge meupiya he nezawat din.
7 Kenè kew pelimbung te ulaula niw su kenè ta egkeelesan is Megbevayà te minsan hengkey he ulaula.
Is ibpemula te etew,
iyan daan egkeraǥun din.
Ne iring din ded daan is menge ulaula te etew,
su ed-ahaan heini te Megbevayà ne edsuhulan din is etew keuzemà sumalà is neulaula te uman sevaha.
8 Emun edtumanen te etew is kandin he egkesuatan,
iyan egkezawat din is kemetayen he wazà pidtemanan.
Emun edtumanen din is egkengesuatan te Waǥas he Mulin-ulin,
ibeǥey kandin is untung he wazà pidtemanan.
9 Umba kenè ki ebpepepeǥul te ked-ulaula te meupiya su emun ebpeniguduwan ta heini,
egkeuma is timpu keuzemà he zuen idsuhul kenita te Megbevayà he utew meupiya.
10 Ebpurungan ta layun is minsan hentei he etew,
lavew en is menge zuma ta he tumutuu ki Kristu.
Is Huziyan he Intelaan ni Pablo
11 Kayi te ketepusan te surat he ibpeuwit ku ziyan,
siak si Pablo is midsurat.
Egketuusan niw su egkeehè niw he utew zezekelà is kedsurat ku.
12 Ne sikan is menge etew he egkesuatan dan he mebpesirkunsidar kew,
egkesuatan dan he zeliǥa zan te menge zuma zan.
Egkehandek dan te menge zuma zan he Hudiyu su kenè dan egkesuat he pesipelahi sikandan tenged te kedsarig dan te kebpehimatey ni Kristu.
13 Haazà is menge etew,
ne ibpenurù dan he kinahanglan he mebpesirkunsidar kew sumalà is penurù te kesuǥuan,
ne minsan pa zutun kenè dan ebpurungan edtumana is kesuǥuan.
Umba egkesuatan dan he mebpesirkunsidar kew su wey mezalig sikandan tenged te nehimu kew he menge kabig dan.
14 Siak mulà,
iyan ku zà ibpezalig is Nengazen tew he si Jesu Kristu he mibpehimatey he elili kenitew.
Ne tenged te kebpehimatey zin,
wazè e en meuripen te menge kelibutanen he kebayà,
ne wazè en kayi ǥehem te kebayàbayà kediey.
15 Kenà ebpulus is kebpesirkunsidar ne kenà daan ebpulus is kenà kebpesirkunsidar.
Iyan dekelà is pulus din is kegkehimu kenita he veǥu en he linimbag.
16 Is minsan hentei he ed-ikul kayi te ibayà he impenurù ku pinaaǥi kayi te surat,
berakat he mehizuwi te Megbevayà wey veǥayi te melinawen he kebpekesavuk,
ne kenà iyan dà sikandin,
kekenà,
elin daan is langun he menge tutuu he tumutuu te Megbevayà.
17 Puun dà guntaan,
kinahanglan he wazà minsan hentei he megkaǥi he wazà iveǥey kediey ni Jesus is keǥehem te kebpenurù.
Egketuusan kayi te lawa ku is kedtumana ku te menge suǥù ni Jesus.
Mezakel is menge tulak te menge palì ku he nehimu te menge kuntada ni Jesus.
18 Menge suled,
berakat he ikeǥaǥew kew is langun te Nengazen tew he si Jesu Kristu.
Iyan a si Pablo.