2 Utew tutuu heini is egkeǥiyen ku keniyu he ke iyan niw edseriǥan is kedsirkunsidara keniyu wey kew meluwas,

ne kenè kew egketevangan ni Kristu.

3 Ne kenà duen dà taman su tutuu iyan he ke zuen minsan hentei he kunaan din ke ebpulus kandin is kebpesirkunsidar,

kinahanglan daan he ebpurungan din te edtuman is minsan hengkey he suǥù dutun te tivuuk he kesuǥuan.

4 Is minsan hentei keniyu he kunaan din ke pinaaǥi te kedtumana te kesuǥuan is kebpeketezenga kandin te Megbevayà,

nekesuwey en sikandin ki Kristu.

Neewaan din en is gaǥew te Megbevayà kandin.

5 Iyan,

sikami mulà,

pinaaǥi te ǥehem te Waǥas he Mulin-ulin wey tenged te kedtuu zey kandin,

iyan ebpeebuten dey is kedhimuwa kenami he metazeng te Megbevayà.

6 Su emun tumutuu ki en ki Jesu Kristu,

neked-iiring kiw en diyà te Megbevayà is nengesirkunsidar wey is wazà mesirkunsidar.

Iyan dà duen din pulus diyà te Megbevayà is kedtuu ta kandin he egketuusan heini pinaaǥi te ǥaǥew ta te zuma ta.

7 Mibpurungan niw zengan te ed-ikul is hustu he ibayà.

Maan is idtuǥut niw he zuen ed-eǥen keniyu wey niw kenè en metuuwi is tutuu he tuluuwen?

8 Kenà heini vaal te Megbevayà is kebpekesuwey niw su iyan mid-umbita keniyu wey kew meketuu.

9 Haazà is tarù he tuluuwen he impenurù keniyu,

ne iring te tapey emun ebaal ki te supas su minsan deisek dà is id-amut dutun te zekelà he midhames he erina,

egketepayan gihapun is tivuuk he supas.

10 Ne minsan pa zutun,

dekelà is kedsarig ku te Nengazen he pinaaǥi te kedtavang din keniyu,

ebpemineǥen niw zed is hustu he impenurù ku keniyu.

Iyan,

haazà is etew he nekesamuk te isip niw pinaaǥi te penurù din he tarù,

siguradu he edsilutan sikandin te Megbevayà.

11 Menge suled,

duen egkaǥi he wazè ku pa engkezi is penurù he kinahanglan he ebpesirkunsidar ki,

iyan,

emun tutuu heini,

maan is kenà a ed-engkezan te ebpesipala te menge zuma ku he Hudiyu?

Su emun ibpenurù ku he kinahanglan is kebpesirkunsidar,

ne kenè dan egkepauk kediey minsan ke elin ku pa ibpenurù is kebpehimatey ni Jesus he elili kenitew.

12 Ne sikan is menge etew he edsamuk keniyu pinaaǥi te tarù he penurù dan,

egkesuatan ku pezem he kenà iyan dà is kebpesirkunsidar edtumanen dan,

kekenà,

elin daan ul-ulaha zan is kebpekapun!

13 Na,

menge suled,

tutuu iyan he impetuu ki te Megbevayà wey ki zin melibri ne wazè en kinahanglan he ebpeuripen ki te kesuǥuan.

Ne minsan pa zutun wazè ki melibri su wey iyan mebayàbayà kenita is mezaat he kebayà te lawa ta.

Kinahanglan he tenged te zekelà is gaǥew tew te menge zuma tew ne medtitinevangà is kada sevaha kenitew te menge tumutuu.

14 Is tivuuk he kesuǥuan he imbilinbilin ni Moises,

ne egkepurung egketuman pinaaǥi te sevaha zà he suǥù he iyan heini:

“Kinahanglan he purungi nu is duma nu.

Isipa nu sikandin he iring te kenikew en he ǥehinawa.”

15 Iyan,

emun iyan niw zà ed-ul-ulahan is kebpepespesipelehey wey kebpeeg-eǥetà,

ne egkepurung egkezeeti is upakat niw te menge tumutuu ki Kristu.

16 Iyan heini suǥù ku keniyu:

pevayàbayè kew te Waǥas he Mulin-ulin su emun ed-ul-ulahan niw heini,

kenà egkehimu he egketuman niw is mezaat he kebayà te lawa niw.

17 Kenà egkeuyun is mezaat he kebayà te lawa ta wey is egkesuatan te Waǥas he Mulin-ulin su telekuntada heini is dezuwa,

ne tenged dutun kenè ta layun egkeveelan is meupiya he egkesuatan ta.

18 Iyan,

ke ebpesakup ki te Waǥas he Mulin-ulin,

kenè ki egkesakup te kesuǥuan he imbilinbilin ni Moises.

19 Egketuusan ta is menge mezaat he ulaula he egkehimu pinaaǥi te mezaat he kebayà te lawa su iyan is kedhilavet te kenè ta esawa,

is meremerik wey mahawag he vaal,

20 is ked-ezapa te kenà hustu he ed-ezapen,

wey is kegemita te ǥehem he ibeǥey ni Setanas.

Ebpekigkuntada is menge etew;

ebpekidtebek dan;

egkesina zan;

egkengepauk dan;

iyan dà ed-isipen dan is kandan dà he egkesuatan.

Ne ed-engkezan dan is kebpekidsevaha zan te menge zuma zan.

21 Egkeimahan dan is menge azen te menge zuma zan.

Egkengelangut dan,

ne kenè dan ed-eǥenen is menge kebayè dan he mezaat,

kekenà,

edtumanen dan,

wey mezakel pa is ed-ul-ulahan dan he iring kayi.

Ed-umanan ku te egkaǥi is migkaǥi ku he zaan he is etew he ed-ul-ulahan din is menge iring kayi,

kenà sikandin ebpekeragkes te egkehedian te Megbevayà keuzemà.

22 Egketuusan ta zaan is menge ulaula he egkehimu pinaaǥi te ǥehem te Waǥas he Mulin-ulin.

Su emun ed-uwiten ki te Waǥas he Mulin-ulin,

mahal zini te ǥehinawa ta is menge zuma ta,

layun ki egkelipey,

melinawen layun is gehinawa ta,

mepelevayen ki,

beliǥeǥawen ki,

metulanged ki,

metinumanen ki,

23 kenè ki mevurut,

wey egkeeǥen ta is kebayà te lawa ta.

Ne emun iyan heini menge ulaula ta,

kenè ta egkesupak is menge suǥù kenita te Megbevayà.

24 Ne is minsan hentei he migaked en ni Jesu Kristu,

ne iring te inransang din en te krus is mekesesalà he lawa zin,

he ke và dà egkeǥiya,

mid-engkezan din en is menge mezaat he kebayè din wey egkesuatan din.

25 Ne is Waǥas he Mulin-ulin,

geina te mibeǥayan ki zin te veǥu en he untung,

kinahanglan he ebpevayàbayè ki zaan kandin.

26 Kinahanglan he kenè ki ebpelavew,

kenè ki zaan ebpekidtebek te menge zuma he etew,

kenè ki zaan egkesina te zuma ta.