4
Penenglitan duen anak he minatey is amey zin te vatè pa utew sikandin.
Ne minsan pa te sumusunud sikandin te langun he azen te amey zin he minatey,
ne zutun te vatè pa sikandin,
iring sikandin te suluǥuen dà su zuen pa ebayàbayà kandin.
2 Duen ed-uyamu kandin he ebantey zaan dutun te menge azen din taman te kenè pa egketuman is timpu he midtelaan te amey zin,
ne human sikandin ebpekezawat te keǥehem te kebayàbayà te menge azen din.
3 Ne iring kiw zaan dutun su neveyveyaan kiw zengan te menge kenè pa hustu he tuluuwen dini te kelibutan su iring kiw pa te menge vatà is ebantey te langun dutun.
4 Ne hein netuman en is hustu he timpu he netagnà dengan,
is Megbevayà,
midsuǥù din dini te kelibutan is Anak din.
Ne heini is Anak din,
nehimu he etew pinaaǥi te ked-enaka kandin te vahi.
Ne pinaaǥi kayi nehimu zaan sikandin he nezizalem te kesuǥuan he imbilinbilin ni Moises,
5 su wey kiw zin melibri is langun he zizalem te kesuǥuan ne wey kiw zaan mehimu he menge anak te Megbevayà.
6 Ne zutun wey ta metueni he anak ki iyan te Megbevayà,
midsuǥù te Megbevayà he ibpeubpà dini te kenita is Waǥas he Mulin-ulin he ziyà te ki Jesus,
ne ibpinted din kenita he mekekaǥi ki te,
“Amey ku he Megbevayà.”
7 Ne ǥuntaan kenè ki en iring te menge suluǥuen dà,
kekenà,
anak ki en te Megbevayà.
Ne ǥeina te iyan heini,
egkezawat ta is minsan hengkey he ibeǥey zin diyà te anak din.
Is Samuk ni Pablo
8 Dengan te wazè niw pa tuuwi is tutuu he Megbevayà,
neuripen kew te menge edtuuwan he kenà hustu he megbevayà.
9 Iyan,
guntaan te nekilala niw en is Megbevayà iring te kegkekilelaa zin keniyu,
maan is edlikuan niw is wazà pulus he menge tuluuwen he kenà ebpekelibri keniyu te silut?
Maan is egkesuatan niw he meuripen kew en maan kayi?
10 Maan is ebenteyanan niw is menge andew,
menge vulan,
wey menge tuig he ibpetuman te kesuǥuan he imbilinbilin ni Moises?
11 Utew ku sikiyu igkeipeng su kela ke kenà ebpulus is langun he impenurù ku keniyu.
12 Menge suled,
edhengyuan ku sikiyu he ul-ulaha niw is mid-ulaula ku su siak is Hudiyu,
mid-engkezan ku en is kedseriǥi te kesuǥuan te menge Hudiyu.
Nehimu a he iring keniyu zengan te kenà menge Hudiyu.
Tutuu iyan he wazà a keniyu meselai,
kekenà,
mibpurungan a keniyu.
13 Netuenan niw he umba nehimu is aney ku en kebpenudtuli keniyu te Meupiya he Tudtulanen su nezeruwan a.
14 Ne minsan te zuen ku mezaat he zaru ne wazà a keniyu ikeremerik minsan ke heini is daru ku ne nekesamuk keniyu,
iyan,
midawat a keniyu iring te velinsuǥuen te Megbevayà he ebpuun te langit.
Impeiring niw is kedewata niw kedì te kedewata niw ki Jesu Kristu.
15 Utew a zengan keniyu ingkeǥalew,
su ke egkehimu zà ne egkeluten niw is mata niw ne ibeǥey niw kedì.
Iyan e en mismu ebpekekaǥi kayi mehitenged keniyu.
Ne ǥuntaan,
maan is nahalin en is gehinawa niw?
16 Maan is egkepeukan a keniyu ǥuntaan?
Kela ke nehimu kew en he kuntada ku tenged dà te migkaǥi ku keniyu ke hengkey is tutuu he tuluuwen.
17 Haazà is menge etew he kenà tutuu is ibpenurù dan keniyu,
ebpurungan kew zan,
iyan,
kenà meupiya is tuyù dan diyan te keniyu.
Egkesuatan dan he maawà is upakat niw kediey su wey iyan niw zà sikandan mepurungi.
18 Utew meupiya ke ebpekid-emiǥu zan keniyu emun kenà mezaat is tuyù dan.
Egkesuatan ku he kenà iyan e zà ebpekid-emiǥu keniyu.
Emun kenà a ziyan,
meupiya ke zuen pa ebpekid-emiǥu keniyu.
19 Henduen be te menge anak ku en sikiyu su minahal ku sikiyu.
Iring te edlised is bahi ke ed-anak,
egkereǥenan a zaan te ked-isipa ku keniyu su egkesuatan ku he meǥaan niw ituǥut he iyan ebayàbayà keniyu si Kristu.
20 Angin ke ziyan a te keniyu su wey ku sikiyu melelaǥi;
kenè ku egketuenan ke hengkey is meupiya he idsurat ku he ibpeuwit ku ziyan su egkeipeng a keniyu.
Is Sempità Mehitenged ki Sara wey ki Hagar
21 Sikiyu is egkesuat he ebpezizalem te kedtuman te kesuǥuan,
ibpesavut ku keniyu ke hengkey is kehuluǥan kayi.
22 Su miguǥud dutun te kesuǥuan he zuen dezuwa he anak he maama ni Abraham.
In-anak haazà is sevaha ni Hagar,
kes esawa zin he uripen,
ne in-anak haazà is sevaha te esawa zin he kenà uripen he iyan si Sara.
23 Is ked-enaka te anak te vahi he uripen,
ne iring ded te ked-enaka te minsan hengkey he vatà,
iyan,
kes ked-enaka zutun te sevaha he in-anak te vahi he kenà uripen,
ne kenà egkehimu emun wazà ipenaad te Megbevayà diyà te ki Abraham.
24 Ne sempità heini is dezuwa he vahi.
Iyan kehuluǥan din is dezuwa he paaǥi he midtukud te Megbevayà te kebpekidsevaha zin te menusiyà.
Si Hagar is bahi he uripen,
ne iyan alung te paaǥi he imbeǥey te Megbevayà ki Moises diyà te vuntud he Siney.
Iyan heini kes kesuǥuan.
Su is menge anak ni Hagar,
he ke và dà egkeǥiya,
is langun he nekesarig te kedtuman te kesuǥuan,
ne menge uripen sikandan.
25 Diyà haazà is buntud he Siney te tanà he egngezanan te Erabya.
Ne alung heini is buntud he Siney ki Hagar.
Ne iyan kehuluǥan ni Hagar is inged he Hiruselim su neuripen is langun he meǥinged dutun te kedtumana te kesuǥuan.
26 Ne si Sara,
haazà is esawa ni Abraham he kenà uripen,
ne iyan kiw alung te kandin he menge anak su kenè kiw menge uripen te kesuǥuan.
27 Su zuen insurat he Lalag te Megbevayà he edhenduen te,
“Sikew is bahi he kenà ed-anak,
lipey ka.
Minsan ke wazè ka belilita,
derag-ey ka te kegkelipey
su minsan ke mid-ewaan ka te esawa nu,
ed-ulian ke zin ne mezakel is menge kevuwazan nu
kenà te vahi he zuen din esawa.”
28 Na,
menge suled,
iring din ded daan,
nehimu kiw en he menge anak te Megbevayà tenged te netuman din is penaad din.
Iring heini zuen te ked-enaka ki Isaak ni Sara tenged te netuman is pesarig te Megbevayà diyà te ki Abraham.
29 Ne zutun he timpu zengan,
haazà is anak ni Abraham he in-anak pinaaǥi zà te kelibutanen he paaǥi te kegkevuwad,
midhimu zin he mereǥeni is hazi zin he in-anak pinaaǥi te tavang te Waǥas he Mulin-ulin.
Ne iring din guntaan edregreǥenen kiw te menge etew he neuripen te kedtumana te kesuǥuan.
30 Ne hengkey is sambag te insurat he Lalag te Megbevayà?
Duen insurat he lalag din he edhenduen te,
“Ipaawè nu is bahi he uripen wey is anak din su is anak te uripen,
kenà egkehimu he ebeǥayan sikandin te menge azen te amey zin.
Iyan dà ebpekeangken kayi is anak te vahi he kenà uripen.”
31 Umba,
menge suled,
sikitew,
iring kiw te anak te vahi he kenà uripen,
kenè kiw iring te anak te uripen.