6 Iring din ded daan is nehitavù ki Abraham he kepuun tew zengan su zuen insurat he Lalag te Megbevayà he edhenduen te,

“Midtuu sikandin te migkaǥi te Megbevayà ne tenged kayi,

is Megbevayà,

midawat din si Abraham ne mid-isip din sikandin he metazeng.”

7 Ne sikiyu zaan,

kinahanglan he sevuta niw he iyan ded heini ǥuntaan kayi te kenitew su ke zuen etew he edtuu te Lalag te Megbevayà ne nehimu en sikandin he kevuwazan ni Abraham,

8 Daan he migkaǥi is Megbevayà diyà te insurat he lalag din he minsan is menge etew he kenà menge Hudiyu,

ne ed-isipen din sikandan he metazeng emun edtuuwan dan sikandin.

Impesavut din he zaan ki Abraham is Meupiya he Tudtulanen,

ke sikandin te,

“Tenged te midtuu ka te migkaǥi ku,

midtuvazan ku sikew.

Ne pinaaǥi zaan kayi te kedtuu nu edtuvazan ku is tivuuk he menusiyà dini te kelibutan.”

9 Ne midtuu si Abraham dutun te Lalag te Megbevayà,

ne tenged dutun midtuvazan sikandin te Megbevayà;

ne iring din ded daan ke edtuu is minsan hentei te Lalag te Megbevayà,

edtuvazan daan sikandin te Megbevayà.

10 Iyan,

is minsan hentei mulà he edsarig te kedtumana te kesuǥuan he imbilinbilin ni Moises,

nesuǥat en te rawak te Megbevayà su zuen insurat he Lalag te Megvevayà he edhenduen te,

“Is minsan hentei he kenà din egkepurung egketuman is minsan hengkey he suǥù he insurat dutun te kesuǥuan,

ne nesuǥat en sikandin te rawak te Megbevayà.”

11 Ne emun iyan haazà,

ne egkesavut ta he wazà minsan hentei he metazeng is ked-isipa kandin te Megbevayà pinaaǥi te kedtumana te kesuǥuan su zuen insurat he Lalag te Megbevayà he edhenduen te,

“Is minsan hentei he metazeng is ked-isipa kandin te Megbevayà pinaaǥi te kedtuu zin te Lalag te Megbevayà,

iyan sikandin ebeǥayan te untung he wazè din pidtemanan,”

ke sikandin.

12 Iyan,

ke zuen etew he egkepurung din egketuman is langun he suǥù dutun te kesuǥuan,

kenè en kinahanglan he edtuu pa sikandin wey meveǥayi te untung he wazè din pidtemanan,

su zuen insurat he Lalag te Megbevayà he edhenduen te,

“Is etew he egkepurung din egketuman is langun he suǥù dutun te kesuǥuan,

ebeǥayan sikandin te untung he wazè din pidtemanan.”

13 Minsan pa te nesupak te en is kesuǥuan,

nelibri ki ni Jesus te silut su midrewakan en si Jesus he elili kenitew zutun te kedrensanga kandin te krus,

su zuen insurat he Lalag te Megbevayà he edhenduen te,

“Ke zuen etew he edhimetayan ne idtaud te impasek he kayu ne tuus heini te rawak kandin te Megbevayà.”

14 Ne umba mibpehimatey si Jesu Kristu te iring dutun su wey pinaaǥi kandin ikeveǥey zaan diyà te menge etew he kenà menge Hudiyu is ketazeng he intuvad te Megbevayà ki Abraham.

Ne pinaaǥi zutun sikitew is langun he edtuu ki Jesus,

ebeǥayan kiw zin te Waǥas he Mulin-ulin he impenaad dengan te Megbevayà.

15 Menge suled,

duen penenglitan he ibpesavut ku keniyu.

Su ke zuen ibpenaad te sevaha he etew he insurat diyà te dukumintu he mibpirmahan din ne mibpirmahan daan te menge tistiǥus,

ne kenà egkehimu he edhelinan wey ed-umanan haazà te minsan hentei su nelig-enan.

16 Ne iring din ded daan su zuen impenaad te Megbevayà diyà te ki Abraham wey ziyà te kevuwazan ni Abraham he egkeuǥet pa zutun id-anak.

Wazè din iyan keǥiya he zuen penaad din diyà te menge kevuwazan ni Abraham su kenà mezakel is egkeǥiyen din,

kekenà,

ke sikandin diyà te ki Abraham te,

“diyà te kevuwazan nu.”

Umba migkaǥi zin heini su sebsevaha zà he etew zutun te kevuwazan ni Abraham is ibpesavut din he iyan si Kristu.

17 Iyan ibpesavut ku kayi is:

duen untung he wazè pidtemanan he impenaad te Megbevayà ki Abraham he kenà duwazuwa he edtumanen din su midlig-enan din.

Daan en heini is penaad te wazè pa is kesuǥuan he imbilinbilin ni Moises su neuǥet pa zutun si Moises su menge heepat pa he ǥatus wey ketluan he tuig.

Ne kenà egkehimu he egkeawà is penaad te Megbevayà pinaaǥi te kesuǥuan he imbilinbilin ni Moises.

Kenà egkehimu he kenè edtumanen te Megbevayà is penaad din.

18 Si Abraham,

imbeǥey kandin te Megbevayà is untung he wazà pidtemanan tenged dà te impenaad heini kandin te Megbevayà.

Iyan,

emun egkehimu he ibeǥey kenita is untung pinaaǥi te kedtumana ta te kesuǥuan,

kenà daan egkehimu he ibeǥey heini kenita tenged dà te impenaad heini te Megbevayà.

19 Ne emun iyan heini,

ne hengkey is pulus te kesuǥuan?

Ibpesavut ku keniyu is pulus din.

In-uman te Megbevayà is kesuǥuan su wey zin ipesavut kenita ke hengkey is mezaat he ulaula ta;

ne egkesuatan din he zutun dà taman is kedseriǥi te kesuǥuan te kebpekeuma te kevuwazan ni Abraham he iyan si Kristu he iyan mibpenaazan te Megbevayà.

Midsuǥù te Megbevayà is menge velinsuǥuen din he ebpuun diyà te langit wey zan ikeveǥey is kesuǥuan diyà te ki Moises.

Ne si Moises,

nehimu sikandin he zatù te pid-elangan su imbeǥey zin daan is kesuǥuan diyà te menge etew.

20 Iyan,

dutun te kebpenaazi te Megbevayà ki Abraham wazà kinahanglan he zuen datù te pid-elangan su sebsevaha zà dutun is nekepenaad he iyan is Megbevayà.

21 Ne kunaan niw vuwa ke kenà egkeuyun is kesuǥuan wey is menge penaad dengan te Megbevayà,

iyan,

kenà egkehimu he kenà heini egkeuyun.

Su ke zuen kesuǥuan he pinaaǥi kayi egkeveǥayan kiw te untung he wazè din pidtemanan ne siguradu egkehimu kiw he metazeng pinaaǥi zaan kayi te kesuǥuan.

22 Iyan,

impesavut kenitew te insurat he Lalag te Megbevayà he sikitew is tivuuk he menusiyà,

sakup kiw en pudu te mezaat he kebayè tew.

Ne tenged kayi,

wey zà edtumana te Megbevayà is menge penaad din kenita ke edsarig kiw kandin.

Wey kiw zà egkeveǥayi te untung he wazà pidtemanan ke zuen tew kedtuu.

23 Ne te wazè pa ipezayag kenitew he egkekuwa tew is untung pinaaǥi te kedtuu ki Jesus,

iring te nepirisu kiw te kesuǥuan.

Nehimu is kesuǥuan he iring te guwardya he ebantey kenitew wey kiw kenà mekeawà taman te kenè pa ibpezayag kenitew is paaǥi he iyan is kedtuuwi ki Jesu Kristu.

24 Nehimu zaan is kesuǥuan he iring te ed-uyamu he iyan ebayàbayà kenitew te iring te menge vatà taman dà te kebpekeuma ni Kristu su wey,

ke ebpekeuma si Kristu,

meisip kiw te Megbevayà he metazeng pinaaǥi te kedtuu tew kandin.

25 Ne ǥuntaan,

te impezayag en kenitew is paaǥi he iyan is kedtuu,

kenè kiw en egkeveyveyaan te kesuǥuan.

26 Ne ǥeina te iyan haazà,

nehimu kew en pudu he menge anak te Megbevayà tenged dà te kedtuu niw ki Jesu Kristu.

27 Su midtuuwan niw si Jesu Kristu,

ne nebewtismuwan kew he tuus te sumusundan kew zin,

ne tenged dutun insun-ud niw si Kristu,

28 Ne tenged dutun kinahanglan he kenè niw isipa he ibpelavi te Megbevayà is menge Hudiyu,

ne emun kenà,

ne iyan is kenà menge Hudiyu,

su ziyà te kandin neked-iiring is langun he menge etew,

uripen se kenà uripen,

maama se vahi,

ne sikiyu zaan,

neked-iiring kew ziyà te Megbevayà su neked-iiring kew he edtuu ki Jesu Kristu.

29 Ne ǥeina te sakup kew ni Kristu,

nehimu kew en he iring te menge kevuwazan ni Abraham ne egkezawat niw zaan is impenaad te Megbevayà ki Abraham.