Is Ked-uyun ni Pablo wey te Zuma he Menge Epustul
2
Ne sepulù wey heepat pa he tuig dutun ne human a medlikù diyà te Hiruselim.
Mibpezumehè key ki Bernabe ne miduma ku zaan si Tito.
2 Umba midhendiyà a su impinted kedì te Megbevayà haazà is kedhendiyè ku.
Ne kebpekeuma zey zutun ne midtiǥum is menge egalen te menge tumutuu he iyan dan dà ne impesavut ku kandan ke hengkey is Meupiya he Tudtulanen he ibpenurù ku ziyà te menge etew he kenà menge Hudiyu.
Egkesuatan ku zutun he kenà maawà is pulus te nengeveelan ku en wey is kemulu ku pa ebeeli.
3 Iyan,
nesuatan dan ded is baal ku su si Tito,
is duma ku,
minsan te kenà sikandin Hudiyu,
wazè dan iteǥel is kedsirkunsidar kandin sumalà is insuǥù ni Moises.
4 Iyan,
duen menge etew he kenà tutuu he menge tumutuu te tutuu he tuluuwen he midtampu kenami.
Egkesuatan dan dutun he sirkunsidara si Tito.
Umba midtampu zan he id-eles dan he kenè dan tutuu he tumutuu su wey zan maahà ke edtumanen tew is menge suǥù he imbilinbilin ni Moises.
Su egkesuatan dan he meiring kiw te uripen pinaaǥi te kedtuman te kesuǥuan minsan te nelibri kiw en ni Jesu Kristu ne wazè en kinahanglan he ebenteyanan tew pa is kesuǥuan.
5 Ne wazè dey ituǥut he meveyveyai key zan te minsan hengkey he paaǥi su wey kenà meumani te tarù is tutuu he Meupiya he Tudtulanen,
ne kenà egkezeetan is kedtuu niw.
6-7 Ne zutun,
minsan sikan is menge etew ziyà te Hiruselim he henduen be te menge egalen te tumutuu,
wazè dan ingkepenurù kediey he idheǥet te ibpenurù ku.
Umba egkeǥiyen ku he henduen dan te menge egalen su wazà bali ziyà te Megbevayà te igerar kenita te menge etew.
Wazà id-uman dan te kediey he ibpenurù,
kekenà,
nesavut dan dutun he insarig kediey te Megbevayà is kedsengyawa te Meupiya he Tudtulanen diyà te menge etew he kenà Hudiyu iring te insarig din daan ki Pedro is kedsengyawa kayi ziyà te menge Hudiyu.
8 Su is Megbevayà,
mid-ulinan din si Pedro wey mehimu sikandin he epustul he iyan ebpenudtul ziyà te menge Hudiyu,
ne iring din ded,
mid-ulinan e zin daan wey a mehimu he epustul he iyan suǥù din diyà te menge etew he kenà menge Hudiyu.
9 Ne si Santiago,
si Pedro,
wey si Juan,
haazà is menge egalen dutun,
hein nesavut dan he insarig kediey te Megbevayà heini is baal ku,
mibpekigkumusta zan kenami ki Bernabe he tuus te teltelezuma key pudu is edtuman te ebpeveelan te Megbevayà.
Neuyunan dey he iyan key ebpenudtul ziyà te menge etew he kenà Hudiyu ne iyan dan ebpenudtul ziyà te menge Hudiyu.
10 Iyan dan dà intelaan kenami is kedtevangi zey te menge tumutuu he egkengeayuayu ziyà te Hiruselim,
iyan,
daan ku en heini midheǥet dini te ǥehinawa ku.
Is Kedewaya ni Pablo ki Pedro
11-12 Ne malù pa neuǥet dutun nekeuma si Pedro ziyà te kenami,
te ziyè key te inged he Entiyukya.
Ne hein aney sikandin mekeuma,
hustu is mid-ulaula zin su mid-amur he egkaan te menge tumutuu he kenà menge Hudiyu.
Iyan,
hein nekeuma is menge tumutuu he Hudiyu he midsuǥù ni Santiago,
midlikayan din he mekekaan duma te kenà menge Hudiyu.
Ne midsawey ku sikandin su utew keladu he kenà hustu is ed-ul-ulahan din.
Umba midlikayan din su nahandek sikandin su kela ke ikesewayi kandin haazà is ulaula zin dutun te menge tumutuu he Hudiyu he egkaǥi he kinahanglan he ebpesirkunsidar is menge tumutuu he kenà menge Hudiyu.
13 Ne iring din ded daan dutun is mid-ulaula te zuma he menge tumutuu he Hudiyu su midlikey zan daan,
ne minsan si Bernabe,
ne neuwit daan dutun.
14 Ne hein nesavut ku he ed-ul-ulahan dan is supak te tutuu he impenurù te Meupiya he Tudtulanen,
migkeǥiyan ku si Pedro ziyà te etuvangan te langun kandan,
ke siak te,
“Sikew,
Pedro,
sikan is menge tumutuu he kenè tew zuma he Hudiyu,
maan is ibpetuman nu kandan is kesuǥuan tew te menge Hudiyu?
Su minsan Hudiyu ka,
mid-engkezan nu en is kedtumana nu kayi he kesuǥuan,”
ke siak.
15 Ne impelaus ku haazà is lalag ku te,
“Sikita is etew he in-anak he Hudiyu,
ne kenè ki iring te menge etew he kenà Hudiyu he egngezanan ta he ‘menge mesinupaken’.
16 Ne minsan pa zutun,
netuenan ta he kenè ki egkeisip he metazeng te Megbevayà pinaaǥi te kedtumana ta te kesuǥuan he imbilinbilin ni Moises,
kekenà,
pinaaǥi zà te kedsarig ta ki Jesu Kristu.
Sikita is Hudiyu,
nekesarig ki zaan ki Jesu Kristu su wey pinaaǥi te kedtuu ki Jesu Kristu meisip ki zaan te Megbevayà he metazeng.
Netuenan ta he kenà heini egkehimu pinaaǥi te kedtumana te kesuǥuan.
Su wazà minsan hentei he ed-isipen he metazeng te Megbevayà tenged te kedtumana zin te kesuǥuan.
17 Guntaan,
egkesuatan ta he isipa ki te Megbevayà he metazeng pinaaǥi ki Kristu.
Ne pinaaǥi te kedtuu ta kandin ibpesavut kenita he mesinupaken ki ves daan he iring te kenà menge Hudiyu.
Ne emun iyan heini,
ne sikita is Hudiyu,
egkehimu ve he ebpekekaǥi ki he pinaaǥi ki Kristu nehimu ki en he mesinupaken?
Kenà daan egkehimu!
18 Su emun edlikuan ku ne egkeǥiyen ku he hustu he paaǥi haazà is kesuǥuan he mid-engkezan ku,
igkepeehè ku pinaaǥi kayi he venar iyan he mekesesalà a su nesupak ku is kesuǥuan.
19 Siak,
nesavut ku en he kenà a egkeveǥayan te untung he wazè din pidtemanan pinaaǥi te kedtumana ku te kesuǥuan,
ne tenged dutun mid-engkezan ku is kedsarig ku te kedtumana ku te kesuǥuan su wey ku iyan metuman is menge suǥù te Megbevayà.
20 Tenged te kedsarig ku ki Kristu,
inransang a te krus duma kandin su elili ku sikandin.
Minatey a,
iyan,
uuyag a ǥihapun su zini ed-ubpà te kediey si Kristu ne heini is kebpengungubpaan ku zini te kelibutan,
pinaaǥi zà te kedsarig ku kandin te Anak te Megbevayà.
Mahal a ziyà te ǥehinawa zin ne mibpehimatey sikandin he elili kediey su wey a melibri.
21 Kenà egkehimu he kenè ku edewaten is gaǥew te Megbevayà kedì su ke egkehimu he ed-isipen ki zin he metazeng pinaaǥi te kedtumana ta te kesuǥuan,
wazè bes pulus te kebpehimatey ni Kristu!”