2 Is Amey tew he Megbevayà wey is Nengazen tew he si Jesu Kristu,

berakat he ikeǥaǥew kew zan wey tuvazi kew zan te melinawen he kebpekesavuk.

3 Dekelà utew is kebpeselemati tew te Megbevayà he Amey te Nengazen tew he si Jesu Kristu su tenged te kebpekidsevaha tew ki Kristu,

intuvad din kenitew ziyà te langit is minsan hengkey he meupiya pinaaǥi te ked-ulini kenitew te Waǥas he Mulin-ulin.

4 Dengan te wazè pa limbaǥa is kelibutan,

mibpilì kiw en te Megbevayà.

Iyan impilia zin kenitew su wey kiw mehimu he menge sakup din he wazà igkesewayi zuen.

5 Ne tenged te utew zekelà is gaǥew zin kenitew,

dengan te wazè pa is kelibutan,

mid-isip din he pinaaǥi ki Jesu Kristu edhimuwen kiw zin he menge anak din su iyan egkesuatan din wey tuyù din.

6 Edeliǥen tew is Megbevayà tenged te utew zekelà he mekeǥeǥehem he ǥaǥew zin he intuvad din kenitew pinaaǥi te kebpekidsevaha tew te mahal he Anak din he si Jesus.

7 Su tenged te utew zekelà is gaǥew zin kenitew,

midlibri kiw zin te silut pinaaǥi te kedtiǥis te lengesa zutun te kebpehimatey ni Kristu,

ne mibpesaylu zin is menge salè tew.

8 Kenà pinaaǥi te sukud is kegkeǥeǥawi zin kenitew,

kekenà,

utew subra is gaǥew zin kenita.

Ne imbeǥey zin daan kenita is kedsavut wey ketau su wey tew metueni ke hengkey is paaǥi zin.

9 Ne impesavut din kenitew is daan he in-eles he edhimuwen din su iyan tuyù wey egkesuatan din.

Ne mid-isip din he zaan he pinaaǥi ki Kristu

10 edhimuwen din heini zutun te hustu he timpu.

Su mid-isip te Megbevayà he zutun edhimuwen din he sebsevaha zà si Kristu he ebayàbayà te minsan hengkey he linimbag diyà te langit wey zini te tanà.

11-12 Is langun he ed-ul-ulahan te Megbevayà,

ne iyan kedtumana te tuyù din wey egkesuatan din.

Ne tenged te iyan tuyù din,

mibpilì key zin is menge tumutuu he Hudiyu wey key mehimu he menge sakup din he ebpekidsevaha ki Kristu.

Iyan heini tuyù din he zaan he mid-isip din.

Ne sikami is menge Hudiyu he nengehuna he nemeketuu ki Kristu,

umba mibpilì key zin su iyan egkesuatan din he pinaaǥi kenami edeliǥen sikandin he utew mekeǥeǥehem.

13 Ne iring din ded daan diyan te keniyu su hein impesavut keniyu is tutuu he tuluuwen he iyan kes Meupiya he Tudtulanen mehitenged te kedlibriya kenitew te silut,

nemeketuu kew ki Kristu,

ne midhimu kew zaan te Megbevayà he menge sakup din pinaaǥi te kebeǥaya zin keniyu te Waǥas he Mulin-ulin he zaan he impenaad din.

14 Is ked-ulini kenitew te Waǥas he Mulin-ulin,

ne iyan tuus kenitew he keuzemà ibeǥey zin kenitew te menge sakup din is langun he impenaad din kenitew.

Ne pinaagi kayi egketuenan tew he keuzemà edhimesazen din is kedlibriya kenitew te kebpekesalè tew.

Edeliǥen tew sikandin is mekeǥeǥehem!

15 Ne tenged kayi,

menge suled,

geina te netudtulan a he mezesen is kedtuu niw te Nengazen tew he si Jesus wey zekelà is gaǥew niw te minsan hentei he tumutuu kandin,

16 kenà egkeamin is kebpeselemati ku te Megbevayà tenged keniyu.

Layun ku sikiyu id-ampù.

17 Is Megbevayà te Nengazen tew he si Jesu Kristu he iyan daan Amey tew he zait he ebentuǥen,

edhengyuan ku layun sikandin he pinaaǥi te Waǥas he Mulin-ulin,

ne iveǥey zin keniyu is ketau wey ipeǥawaǥawa zin keniyu is kegketueni niw te menge ulaula zin.

18 Id-ampù ku he iveǥey zin daan keniyu is kebpurung kedsavut su wey niw metueni ke hengkey is langun he meupiya he egkeperateng tew keuzemà tenged te midhimu kiw en he menge tumutuu zin,

ne wey niw zaan metueni he utew mezakel zutun is menge meupiya he idtuvad din kenitew.

19 Ne id-ampù ku zaan he ipesavut din keniyu ke hengkey is kenà egkesukud he utew lavew he zekelà he ǥehem te Megbevayà he zini edterebahu te kenitew te menge tumutuu kandin.

Ne iyan heini sikan is utew zekelà he ǥehem

20 he migamit te Megbevayà dutun te kebenhawa zin ki Kristu wey is kebpepinuuwa zin kandin diyà te egkekewanan din diyà te langit.

21 Ne zutun utew lavew si Kristu kenà is minsan hentei he hadì,

wey egalen,

wey minsan hentei he zuen din keǥehem wey kebayàbayà.

Lavew pa is inggerar ki Kristu te minsan hengkey he ǥerar te minsan hentei ǥuntaan wey te wazè din pidtemanan.

22 Ne is Megbevayà,

midhimu zin he sakup ni Kristu is minsan hengkey he linimbag.

Umba midhimu zin si Kristu he egalen te minsan hengkey su wey kiw metevangi is langun he menge tumutuu.

23 Sikitew is edsarig ki Kristu,

ne iring kiw te lawa zin ne iyan sikandin ulu tew.

Ne sikitew is lawa zin,

ne wazà kurang te ked-ulini zin kenitew su ziyà sikandin te minsan hendei te tivuuk he kelimbaǥan.