Menge Telaan ni Pablo
13
Iketelu en heini te kebpenumbaley ku ziyan.
Ke zuen etew he ebpehusey kedì ne zuen idsumbunga zin te zuma zin he tumutuu,
kinahanglan he ebentayan ta is suǥù diyà te insurat he Lalag te Megbevayà he edhenduen te,
“Ke zuen idsumbunga niw te zuma niw kinahanglan he edtistiǥusan te menge tetelu ne emun kenà ne menge zezuwa he etew.”
2 Dutun te ikezuwa he kebpenumbelayi ku keniyu,
sikiyu is memezaat is ulaula zengan,
migkaǥi ku keniyu he emun kenè niw ed-engkezan haazà is memezaat he ulaula niw ne edsilutan ku sikiyu emun ebpekelikù a.
Ne ed-umanan ku egkeǥiya ǥuntaan diyan te keniyu wey ziyà te minsan hentei pa he ed-ulaula te mezaat.
Ke ebpekeuma a,
wazà minsan hentei he ed-ulaula te mezaat he ebpekelikey te kedsiluti ku kandin.
3 Dutun,
ne egkevenaran kew human he is egkeǥiyen ku keniyu,
iyan is impekaǥi kediey ni Kristu.
Ne kenà sikandin telawen,
kekenà,
emun duen ed-ul-ulahan din keniyu dekelà is gehem din he ibpeehè din keniyu.
4 Su minsan ke henduen be te wazà egkehimu ni Kristu zutun te kedrensanga kandin diyà te krus,
nevanhew zed sikandin ne zuen din en beǥu en he untung pinaaǥi te ǥehem te Megbevayà.
Ne sikami zaan,
henduen be te wazè dey egkehimu su layun key zaan ebpekeantus te kemeresayan,
iyan,
pinaaǥi te ǥehem te Megbevayà he edtavang kenami,
duen dey zaan beǥu en he untung ne ebpeketavang key pa keniyu.
5 Susiya niw is gehinawa niw wey niw metueni ke tutuu ve is kedtuu niw ki Kristu.
Wazè niw ve metueni he midlumunan kew ni Kristu?
Ne emun wazà,
ne tarù is kedtuu niw ne wazè kew mezawat ni Kristu.
6 Egkesuatan ku he metueni niw he tutuu key iyan he menge epustul ni Kristu.
7 Id-ampù dey ziyà te Megbevayà he wazà ulaula niw he mezaat.
Ne kenè dey iyan id-empua keniyu su wey metueni te menge etew he edtumanen niw is impenurù dey keniyu su maambe ke kenè niw ed-isipen he epustul key ni Kristu,
asal,
ed-ul-ulahan niw is hustu.
8 Su emun hustu is ed-ul-ulahan niw,
sikami is epustul,
kenà egkehimu he ibpeehè dey is keǥehem dey keniyu su wey zey zà ibpaahà is keǥehem dey ke edsupaken niw is hustu he ulaula.
9 Egkelipey ad emun wazè niw supak,
minsan ke henduen te wazè dey keǥehem.
Ne kenà duen dà taman su id-ampù dey he mepurung meheǥet is ked-ul-ulaha niw te hustu.
10 Umba ebpesuratan ku sikiyu te zini e pa te meziyù su ke ebpekeuma a ziyan kenè en kinahanglan he meǥamit ku is keǥehem ku te epustul te kedsilut.
Imbeǥey kedì te Megbevayà heini is keǥehem.
Kenà iyan imbeǥaya zin kayi te keǥehem su wey maawà is upakat niw te tumutuu,
kekenà,
wey meheǥet is upakat niw.
Is Kebpengemusta
11 Menge suled,
iyan dà heini menge lalag ku keniyu;
berakat he mebmelipayen kew.
Purungi niw is menge ulaula niw;
tumana niw is menge sambag ku keniyu.
Kinahanglan he mesevaha is gehinawa niw ne mebmelinawen is ked-ubpè niw.
Su emun ebeelan niw heini,
is Megbevayà he iyan puunà te ǥaǥew wey kelinew,
layun eduma keniyu.
12 Mebpelimlimuey kew he iyan tuus he teltelesuled kew tenged te kedtuu niw.
13 Ebpengemusta keniyu is langun he menge tumutuu te Megbevayà dini.
14 Berakat he ikeǥaǥew kew te Nengazen tew he si Jesu Kristu wey verakat he ipeehè keniyu te Megbevayà he mahal kew ziyà te ǥehinawa zin wey verakat daan he meheǥet is upakat niw te Waǥas he Mulin-ulin.
Iyan a si Pablo.