Is Impezayag te Megbevayà Diyà te ki Pablo
12
Minsan pa te wazà pulus te kedantal ku,
edantal e zed gihapun.
Ne ǥuntaan egkeǥiyen ku keniyu is impezayag wey is impaahà kedì te Nengazen.
2 Dengan,
duen tumutuu he nekilala ku he mibpengelinteuwan he mekepenumbaley sikandin diyà te utew metikang he langit he ed-ubpaan te Megbevayà.
Sepulù en wey heepat he tuig heini is kegkehitavù kayi.
Wazè ku metueni ke nekehendiyè be is lawa zin wey ke impeehè dè be heini kandin te Megbevayà pinaaǥi te teǥeinep;
iyan dà nesayud kayi is Megbevayà.
3 Iyan dà netuenan ku is:
diyà sikandin mekeseled te utew mekempet he inged te Megbevayà ne edsublien ku te egkaǥi he wazè ku metueni ke nekehendiyè be is lawa zin wey ke impeehè dà heini kandin te Megbevayà pinaaǥi te teǥeinep;
iyan dà nesayud is Megbevayà.
4 Ne zutun te kebpenumbaley zin diyà te langit duen nezineg din he kenà egkekaǥi pinaaǥi te kelibutanen he lalag ne kenà daan idtuǥut he egkeǥiyen te etew zà duen.
5 Ne egkehimu he idantal ku heini is nehitavù kandin,
iyan,
kenè ku iyan idantal is menge ketau ku,
kekenà,
iyan ku idantal haazà is ebpekepaahà te kurang ku te ketau.
6 Ne penenglitan ke egkesuatan ku he edantal a,
kenà egkehimu he egkeǥiyen niw he wazà pulus te zantal ku su tutuu is idantal ku,
iyan,
kenà a edantal su kenè ku egkesuatan he isipa a te menge etew he utew lavew.
Meupiya ke zutun dà ebpuun is ked-isipa zan kedì te menge ulaula ku he neehè dan wey menge penurù ku he nezineg dan.
7 Mibeǥayan a te Megbevayà te utew merasey he zaru su wey ku kenà ikezantal is utew meupiya he nengeehè ku ziyà te langit.
Ne heini is daru,
ne egemiten ni Setanas he idrasey kedì,
ne pinaaǥi kayi kenà a ebpekepelavew.
8 Ketetelu ku en iampù diyà te Megbevayà he iawè din,
9 iyan,
iyan tavak din kediey is,
“Edtevangan ku sikew wey nu maantus ne hustu en.
Su zekelà is egkehimu te ǥehem ku ziyan te kenikew emun wazè nu en egkehimu,”
ke sikandin.
Ne tenged kayi utew ku egkesuati he idantal ku is kurang ku te ketau su wey a melig-eni te ǥehem ni Kristu.
10 Ne meupiya en utew te ǥehinawa ku is kurang ku te ketau,
is kedsumpelita wey is pesipala kediey te menge etew,
wey is menge kemereǥenan wey is kemeresayan tenged te kedtuu ku ki Kristu.
Su netuenan ku he emun wazè en kediey he ketau,
dekelà is ibeǥey kediey ni Kristu he ketau.
Is Ingkesemuki ni Pablo te Menge Tumutuu
11 Henduen a te tulebung he etew su edantal a,
iyan,
neteǥel a keniyu su iyan kew pezem ebeǥey te menge ketezengan ku he idtavak keniyan te menge uvag kun epustul ni Kristu.
Ne minsan pa te wazà kediey he ketau wazà a ǥihapun melevawi kayi te uvag menge utew lavew he kenà tutuu he epustul ni Kristu.
12 Ne hein diyan a te keniyu impeehè ku keniyu he tutuu a he epustul ni Kristu su minsan nereǥenan a,
mid-antus a su wey ku ikepaahà is menge singyal wey menge egkengein-inuwan he iyan tuus te tutuu he epustul.
13 Is kedtavang ku keniyu ne iring ded te kedtavang ku te menge tumutuu ziyà te zuma he menge inged.
Asal kela ke kunaan niw ke kenè ku idtavang keniyu is kenè ku keniyu kebuyui te selapì.
Emun nekesalà a keniyu pinaaǥi kayi peseyluwa a keniyu.
14 Ed-endaman ku en is kedhendiyan ku ne iketelu en heini is kebpenumbaley ku ziyan te keniyu.
Ne iring ded te nehuna,
kenà egkehimu he ebuyù a keniyu te selapì.
Kenè ku egkesuatan is selapì niw,
kekenà,
egkesuatan ku he mahala a keniyu ziyà te ǥehinawa niw.
Nehimu a he amey niw su pinaaǥi kedì neketuu kew te Megbevayà.
Ne kenà egkehimu he ebuyuan is menge vatà te amey zan,
kekenà,
iyan ebuyù is menge vatà.
15 Egkelipey a utew ke igkeveǥey ku is menge azen ku wey is desen ku wey ku sikiyu metevangi.
Iyan,
minsan pa te mahal kew zini te ǥehinawa ku henduen be te kenà a mulà mahal ziyan te ǥehinawa niw.
16 Duen duma keniyu he ke sikandan te,
“Tutuu iyan he wazà si Pablo mebuyù te selapì,
iyan,
duen paaǥi zin he meeles wey kiw zin melimbungi.”
17 Ne emun iyan heeyan egkeisip niw,
ipetueni niw kedì ke hengkey he paaǥi is kegkelimbungi ku keniyu.
Duen be nekuwa ku zutun te kedsuǥua ku te menge zuma ku ziyan te keniyu?
Nelimbungan kew zan be?
18 Midhengyuan ku si Tito he medhendiyan te keniyu,
ne impezuma ku zaan kandin is sevaha he menge suled tew.
Midlimbungan kew zan be?
Wazè niw egkekaǥi he iring kayi,
su si Tito wey siak ne neked-iring is paaǥi zey wey ed-ul-ulahan dey su pudu memetazeng.
19 Kunaan niw vuwa ke pinaaǥi kayi te egkeǥiyen ku ibpesavut ku keniyu he wazè dey menge sayep,
iyan,
kenà iyan heeyan tuyù ku.
Su ebpeketistiǥus is Megbevayà he heini is migkaǥi ku keniyu,
ne iyan hustu he egkeǥiyen tenged te kebpekidsevaha ku ki Kristu.
Ne,
minahal ku he menge suled,
insurat ku heini is langun,
su wey meheǥet is kedtuu niw.
20 Egkesamuk is gehinawa ku su kela ke zutun te kebpekeuma ku ziyan ne iyan ku egkeahà diyan te keniyu is menge ulaula he kenè ku egkesuatan.
Ne emun iyan haazà ne zuen ed-ul-ulahan ku zutun he kenè niw zaan egkesuatan su kinahanglan he edsewayen ku is keniyu he ulaula.
Su kela ke zuen ebpekigkuntada ziyan te menge zuma zin,
kela ke zuen egkesina,
duen petuluy egkepauk,
wey leǥezen,
kela ke zuen diyan ebpenemperasà wey edsulà te zuma zin,
kela ke zuen bereituk.
Kela ke zuen diyan te keniyu gelbuwen,
wey kela ke wazè niw kebpekid-uyun te menge tumutuu.
21 Egkesemukan a su kela ke zutun te kebpekeuma ku ziyan ne igkeeled ku sikiyu ziyà te Megbevayà ne kela ke utew a egkeseeng tenged te mezakel he netuenan ku zengan he nekevaal te mezaat ne wazè dan pa engkezi is menge mahawag he ulaula zan iring te kedhilavet te kenè dan esawa wey is kedtumana zan te mezaat he kebayè dan.