5 Ne heini is menge uvag kun lavew he epustul ni Kristu,

kunaan dan ke utew zan lavew,

iyan,

netuenan ku he wazè e zan melevawi

6 su minsan ke kenà a metau he egkaǥi netuenan ku mulà ke hengkey is tutuu he tuluuwen.

Ne iyan heini impesavut dey keniyu zengan te minsan keenu he timpu wey te minsan hengkey he paaǥi.

7 Hein impesavut ku ziyan te keniyu is Meupiya he Tudtulanen,

wazà a mebpesuhul keniyu te minsan sengesintabus dà.

Ne iyan benar is:

mibpekeminus ku en is pid-etawan ku su wey ku sikiyu ikepelavew.

Sayep ku ve heeyan?

8 Dutun te kebpenurua ku keniyu ne iyan midsuhul kedì is menge tumutuu ziyà te zuma pa he menge inged.

Henduen be te midtekawan ku sikandan wey ku sikiyu iyan metevangi.

9 Ne hein diyan a te keniyu ke zuen kinahanglan ku he selapì,

wazè ku vuyua ziyan te keniyu su is menge suled tew he ebpuun diyà te prubinsya he Mesidunya,

imbeǥey zan kedì is minsan hengkey he egkinehenglanen ku.

Sikiyu is tigGerisya,

wazè ku pa sikiyu vuyui te igkeuyag ku,

ne kenà daan egkehimu he ebuyù a ziyan te keniyu te minsan keenu he timpu.

10 Ne heini is idantal ku,

kenà egkehimu he egkehalin te minsan keenu he timpu su kenà a edawat te selapì te minsan hentei he ziyan te tivuuk he prubinsya he Gerisya.

Tutuu heini iring te netuenan ku he tutuu is impesavut ni Kristu.

11 Kunaan niw vuwa ke umba egkeǥiyen ku he kenà a ebuyù diyan te keniyu su wazà gehinawa ku keniyu,

iyan,

utew kew mahal zini te ǥehinawa ku.

Netuenan te Megbevayà he mahal kew zini te ǥehinawa ku.

12 Kenè ku edlekaan heini is lalag ku he kenè ku kebuyù diyan su wey haazà is menge uvag kun lavew he epustul ni Kristu,

kenè dan mekekaǥi he iring te kenami is menge paaǥi zan te kebaal.

13 Kenà sikandan tutuu he menge epustul ni Kristu,

kekenà,

tarù sikandan he menge suluǥuen ni Kristu.

Edterteruan kew zan pinaaǥi te menge vaal zan ne egkeǥiyen dan he tutuu sikandan he menge epustul ni Kristu.

14 Ne kenè ku heini igkeinuinu su minsan si Setanas,

egkehimu zin is dagwey zin he iring te utew merayag he velinsuǥuen te Megbevayà he ebpuun te langit.

15 Umba,

kenè ki egkeinuinu ke egkehimu zaan is menge suluǥuen ni Setanas he iring te menge metazeng he suluǥuen te Megbevayà.

Iyan,

keuzemà edsilutan sikandan sumalà is menge mezaat he vaal zan.

16 Edsublien ku te egkaǥi he kinahanglan he kenà isipa te minsan hentei keniyu he tulebung a tenged te menge lalag ku keniyu.

Iyan,

minsan ke ed-isipen niw he tulebung a,

entusa niw te ebpemineg su wey a mekezantal te kenà utew egkeuǥet.

17 Heini is egkeǥiyen ku keniyu,

ne kenà iyan ibpekaǥi kedì te Nengazen,

su iring a te tulebung is edantal.

18 Ne ǥeina te zuen mezakel he idantal zan is menge ulaula zan dini te kelibutan egkehimu vuwa taman te meǥaan dà ke idantal ku zaan is kedì.

19 Ne ǥeina te menge uluwanen kew he etew,

utew kew metau he ed-antus te menge lalag te tulebung diyà te keniyu.

20 Su ke zuen minsan hentei he ebmandarmandar keniyu wey ke zuen ed-aǥew te menge azen niw wey ke zuen edlimbung keniyu wey ke edlupiǥen kew zan wey ke ebuǥelen kew zan ne ed-entusen niw.

21 Utew zan mevurut,

iyan,

sikami,

telawen key ne egkeeled a su haazà is menge ulaula zan keniyu he kunaan niw ke utew meupiya,

wazè dey meulaula ziyan te keniyu.

Ne ǥeina te wazè dan en kegkehandek te edantal ne kenà a zaan egkehandek he edantal minsan ke ebpekeiring a te tulebung.

22 Haazà he menge etew,

egkeǥiyen dan he menge pinilì sikandan te Megbevayà su menge Hudiyu zan,

menge kevuwazan ni Israyil wey menge kevuwazan te kepuun ni Israyil he si Abraham.

Ne siak daan,

Hudiyu a he kevuwazan daan ni Israyil wey ni Abraham.

23 Netuenan ku he henduen a te ebuneǥen kayi te menge lalag ku,

iyan,

kenà egkesabpeng is bèbè ku kayi te egkeǥiyen ku.

Egkeǥiyen dan he menge suluǥuen sikandan ni Kristu.

Siak,

lavew e pa he metinumanen he suluǥuen ni Kristu.

Utew memereǥen is ebpeveelan din kediey.

Lelayun ad egkepirisu ne sikandan,

kenà layun.

Lelayun ad ebuǥela te menge etew he kuntada te Megbevayà,

kenà te sikandan.

Mezakel en is nengeeǥiyan ku he edhimetayan a pezem,

kenà te sikandan.

24 Kelelima e en buǥela te menge Hudiyu te menge ketluan wey siyew he lagkut.

25 Ketetelu ad buǥela pinaaǥi te menge tuked.

Midtuleng a te vatu te menge etew su edhimetayan e zan pezem.

Ketetelu en daan melavu is barku he mid-untuzan ku ne zuen timpu he sengekezukileman wey sengeandew ziyà a te lawed te zaǥat is nekeǥeǥentungan dà.

26 Ne zutun te menge kedhipanew ku ne nengeeǥiyan ku is mezakel he menge kemereǥenan tenged te kedalem te wahig,

wey tenged te menge tulisan,

wey tenged te menge kuntada ku he menge zuma ku he Hudiyu wey menge kenà Hudiyu.

Mezakel is menge hitavù kediey ziyà te menge inged wey ziyà te wazà meǥinged wey ziyà te zaǥat wey pinaaǥi te menge tarù he tumutuu.

27 Midhaǥù a is edterebahu;

layun a egkepurang;

layun a egkevitil;

ne layun a egkemezahi.

Layun a kurang te egkeenen wey layun a egkealang-alang te egkeubpaan wey ugelingen.

28 Ne kenà duen dà taman su andew-andew egkereǥenan a te kedumelaha ku te langun he menge gurupu te menge tumutuu ziyà te minsan hendei.

29 Su ke zuen tumutuu he edlised su ebmeǥuyà is kedtuu zin,

ne edlised a zaan su egkeipeng a kandin.

Ke zuen nepenulayan ne nekesalà,

ne haazà is etew he nekepenuley kandin,

utew ku igkeepes.

30 Kenè ku egkesuatan he edantal a,

iyan,

emun kinahanglan he ibpezantal a,

idantal ku is menge kemeresayan he nengeeǥiyan ku su pinaaǥi kayi egketuenan niw he zekelà is kurang ku te ketau.

31 Is Megbevayà wey Amey te Nengazen tew he si Jesus,

deliǥa sikandin te wazà pidtemanan.

Netuenan din he kenà tarù heini is egkeǥiyen ku.

32 Dengan,

hein diyà a te inged he Demasku,

is gubirnedur he intezù ni Hadì Eritas,

midsuǥù din is menge sundaru he ventayi zan is pultahan he idselang dutun te kutà te inged su wey e zan mezakep ke egawas a zutun.

33 Iyan,

duen menge etew he midtavang kediey ne in-ahuk e zan te zekelà he vinevey ne midheluǥan e zan diyà te sulawà he liyu te metikang he elavat he kutà dutun te inged ne nekeǥawas a zutun.