Is Kegkevanhew ni Jesus
24
Ne hein neiwas is Andew te Kedhimeley te kegkepawè din dutun te andew he Duminggu,
mibpehendiyè en maan haazà is menge vahi te midlevengan ki Jesus ne mid-uwit dan sikan is menge mehemut he idhaplas he mid-andam dan.
2 Nekeuma zan dutun ne neehè dan he in-awè en sikan is batu he inlekeb dutun te surung he penlevengà.
3 Ne mid-ahuk dan dutun ne ebpenlenglenguwen dan kes lawa te Nengazen he si Jesus ne wazè en dutun.
4 Ne zutun utew zan egkengereǥenan he ebpen-isip-isip;
ne netik-ew mebpaahà kandan is dezuwa he maama he ebpemengenamag te keputì is bisti zan.
5 Ne haazà is menge vahi,
ne midluhud dan is edungul su utew zan nengehandek.
Ne migkaǥi kandan haazà is menge maama te,
“Maan is kayi niw ebpen-ahaa te edlevengan te minatey is etew he uuyag?
6 Su si Jesus,
ne wazè en kayi su nevanhew en.
Tentenuzi niw ke hengkey is migkaǥi zin keniyu hein diyè kew pa te Geliliya
7 su migkaǥi zin he sikandin is Kakey te Menusiyà,
ne ibpalad diyà te menge lalung he etew ne idransang sikandin diyà te krus ne seled te tetelu he andew ne egkevanhew sikandin.”
8 Ne human metenuzi zutun te menge vahi haazà is migkaǥi ni Jesus.
Angels at the Tomb
9 Ne zutun mid-ulì haazà is menge vahi ne mibpenudtulan dan sikan is sepulù wey sevaha he menge epustul ni Jesus wey is duma pa he menge etew.
10 Haazà is menge vahi,
ne iyan si Maria Megdelina,
si Juana,
wey elin daan si Maria he iney ni Santiago,
ne zuen pa menge zuma zan he vahi.
Iyan sikandan mibpenudtul ziyà te menge epustul te nengehitavù kandan.
11 Iyan,
sikan is menge epustul ni Jesus,
kunaan dan ke kenà tutuu haazà ne wazè dan medtuu zutun te tudtul te menge vahi.
12 Iyan,
si Pedro,
hein nezineg din haazà is tudtul ne mibpelelaǥuy sikandin is ebpehendiyà te surung he penlevengà.
Ne hein nekeuma zutun ne midsiniling sikandin ne iyan din dà naahà kes meputì he manggad he imbukus te lawa ni Jesus ne mid-awà dutun sikandin is mid-ulì ne utew neinuinu ke maan is wazà dutun is lawa ni Jesus.
The Tomb Is Empty
Is Kebpaahà ni Jesus Duen te Zezuwa he Etew
13 Ne zutun daan he andew ne zuen dezuwa he sumusundan he ebpuun diyà te Hiruselim he edhendiyà te inged he egngezanan te Imawus.
Ne haazà he inged,
ne menge sepulù wey tetelu he kilumitru is keziyù din diyà te inged he Hiruselim.
14 Ne zutun te edhipanew sikandan ne iyan dan edhisgutan is mehitenged te langun he neulaula ki Jesus.
15 Ne zutun te kebitiyara zan dutun ne midlambag si Jesus kandan ne mibpekiduma kandan.
16 Neehè dan sikandin,
iyan,
wazà mebpekilala kandan si Jesus.
17 Ne migkaǥi si Jesus diyà te kandan te,
“Hengkey is edhisgutan niw te edhipanew?”
Ne neketeren dan dutun ne egkeahà diyà te kebuvuked dan he utew zan egkeseeng.
18 Ne midtavak is sevaha zutun he egngezanan ki Keliyupas,
ke sikandin te,
“Iyan ke zà buwa etew he nekehengkayi te inged he Hiruselim he wazà metau kayi te veǥu pa he nehitavù.”
19 Ne mid-uman med-insà si Jesus kandan te,
“Maan?
Hengkey is nehitavù?”
Ne midtavak dan te,
“Iyan is nehitavù ki Jesus he tigNeserit.
Ebpeneuven sikandin te Megbevayà ne midtuuwan sikandin te langun he menge etew.
Dekelà is gehem din te ebpenurù ne mekeǥeǥehem daan sikandin he ebaal te menge egkengein-inuwan.
20 Is menge punuan he memumuhat wey is menge ebmeǥurangen tew,
ne impalad dan sikandin diyà te ki Pilatu.
Ne midhukuman sikandin he edhimetayan.
Ne zutun midhimetayan dan pinaaǥi te kedrensanga kandin te krus.
21 Ne netaǥù diyà te ǥehinawa zey he iyan en pezem sikandin kes midsuǥù te Megbevayà he edlibri te langun he kevuwazan ni Israyil,
iyan,
seled en guntaan te tetelu he kezukileman is kedhimetayi kandin.
22 Ne ǥeina te meselem neumanan is kegkeinuinu zey su zuen menge zuma zey he menge vahi he midselem dan diyà te midlevengan kandin.
23 Ne nekeuma zan dutun ne wazè dan maahà sikan is lawa zin.
Ne midlikù dan diyà te kenami ne mibpenudtul zan he zuen menge velinsuǥuen te Megbevayà he mibpaahà kandan.
Ne migkaǥi kun dutun te menge velinsuǥuen he nevanhew en si Jesus.
24 Ne zuen pa zuma zey zutun he midsuvar mebpehendutun te surung he penlevengà ne iring ded daan dutun is neehè dan te migkaǥi zutun te menge vahi,
iyan,
wazè dan maahà is lawa ni Jesus.”
25 Ne zutun migkaǥi si Jesus diyà te kandan te,
“Kurang kew pe bes te ked-isip.
Maan is utew mereǥen diyan te keniyu is kebpeketuu niw te langun he netagnà dengan te menge ebpemeneuven te Megbevayà?
26 Su kinahanglan he ebpekeaǥi pa te kemeresayan sikan is hadì he mibpilì te Megbevayà ne human ibeǥey kandin is kebayàbayà te minsan hengkey.”
27 Ne zutun midseysey ni Jesus kandan ke hengkey is langun he menge lalag te Megbevayà mehitenged kandin he insurat te langun he menge ebpemeneuven te Megbevayà igenat dà ki Moises dengan taman te huziyan he menge ebpemeneuven.
28 Ne hein ebpekeuma zan en dutun te ebpeveyaan dan he inged ne henduen be te edlaus pa si Jesus,
29 iyan,
migkeǥiyan dan sikandin te,
“Kenè ke pa laus,
ne zini ka hulavung su mahapun en utew.”
Ne iyan dà haazà,
ne mibpekiduma si Jesus kandan.
30 Ne hein diyè dan en te valey ne mibpinuu zan is egkaan.
Ne si Jesus,
migkuwa zin is egkeenen dan he supas.
Ne mibpeselematan din te Megbevayà ne mibpenevì din ne human din ipemeǥey kandan.
31 Ne zutun,
human dan mekilala si Jesus su nemelmeleǥan dan te ed-ahà.
Iyan,
netekew maawà dutun si Jesus diyà te ked-ehè dan.
32 Ne mibpelelaǥà haazà is dezuwa he etew he egkaǥi te,
“Umba ves utew ta nesuati ǥeina ziyà te zalan te ebpemineg is kedseysayi zin kenita zuen te Lalag te Megbevayà.”
33 Ne zutun ne midhitindeg dan ne migaanggaan dan medlikù diyà te Hiruselim.
Ne hein nekeuma zan ne neumahan dan sikan is sepulù wey sevaha he menge epustul ni Jesus wey is menge zuma he sumusundan he nengetiǥum diyà te sengevaley.
34 Ne iyan ingketiǥum dan su ebpetudtudtulè dan he egkaǥi te,
“Benar ves iyan he nevanhew is Nengazen su mibpaahà ki Pedro.”
35 Ne zutun,
haazà is dezuwa he ebpuun te Imawus,
ne mibpenudtul zan ke hengkey is nehitavù kandan diyà te zalan.
Ne midtudtul zan daan he zutun dan en mekilala si Jesus hein mibpenevì din en is supas dutun te kegkaan dan.
Is Kebpaahà ni Jesus te Menge Epustul
36 Ne zutun te kemulu zan pa ebpetudtudtulà kayi ne netekewtekew mebpeǥawaǥawa si Jesus diyà te teliwazè dan.
Ne migkaǥi sikandin te,
“Kenè kew mengeseeng.”
37 Ne utew zan dutun nengehandek su kunaan dan ke ǥimukud dà ni Jesus is mibpaahà kandan.
38 Iyan,
migkaǥi zutun si Jesus diyà te kandan te,
“Ne maan is egkengehandek kew kedì?
Maan is egkezuwazuwa kew kedì?
39 Ahaa niw man heini is palad ku wey paa ku su iyan e zed!
Semsama a keniyu ne egketuenan niw!
Su is gimukud,
ne wazè din lawa,
iyan,
siak,
ahaa niw man,
duen lawa ku,”
ke sikandin.
40 Ne impeehè din kandan is menge imbayà te ransang diyà te menge palad din wey paa zin.
41 Ne ǥeina te kemulu zan pa eduwazuwa,
asal,
utew zan nengeǥalew,
mid-insà si Jesus te,
“Duen be egkeenen niw kayi?”
42 Ne mibeǥayan dan sikandin te tinuug he pait.
43 Ne migkuwa zin haazà is pait ne migkaan din.
44 Ne zutun migkaǥi si Jesus diyà te kandan te,
“Iyan heini sikan is migkaǥi ku keniyu hein kemulu e pa zuma niw.
Is langun mehitenged kedì he impesurat dengan te Megbevayà ki Moises,
wey kes langun he impesurat din te zuma pa he ebpemeneuven din,
wey minsan kes insurat dengan duen te libru te menge Salmo,
ne kinahanglan he egketuman pinaaǥi te neulaula zini te kedì.”
45 Ne zutun impesavut din human kandan is langun te impemesurat he Lalag te Megbevayà.
46 Ke sikandin te,
“Ibpesavut duen te insurat he Lalag te Megbevayà he kinahanglan he siak is hadì he mibpilì te Megbevayà,
ne edhimetayan a ne seled te tetelu he andew zutun ne ebenhawen a te Megbevayà.
47 Ne ibpesavut daan dutun he kinahanglan he edsuǥuen ku sikiyu te kebpenudtul te Meupiya he Tudtulanen.
Ebpuunan niw is kebpenudtul niw zini te Hiruselim ne ieneb niw heini ipesavut te tivuuk he kelibutan.
Ipesavut niw he kinahanglan he ed-iniyuǥan te menge etew is memezaat he ulaula ne human dan ebpeseyluwa te Megbevayà.
48 Ne kinahanglan he iyan kew mebpesavut kayi te langun he impesurat he Lalag te Megbevayà he netuman kayi te kedì su nengeehè niw en.
49 Ne edsuǥuen ku zini te keniyu is Waǥas he Mulin-ulin he impesarig te Amey ku he Megbevayà.
Iyan,
dini kew taǥad te inged he Hiruselim taman te kenè kew pa egkevulusan te ǥehem din he ebpuun te langit.”
Resurrected Jesus Appears
Is Kegkevatun ni Jesus Diyà te Langit
50 Ne te nekepasad si Jesus dutun is egkaǥi ne mid-uwit din sikandan diyà te ǥawas te inged he Hiruselim,
ne hein diyè dan en te uvey te inged he egngezanan te Bitanya,
ne imbayew zin is menge velad din su ebpenubtuvazan din sikandan.
51 Ne zutun te kemulu pa sikandin ebpenuvadtuvad ne nevatun sikandin pehendiyà te langit.
52 Ne mid-azap dan sikandin ne utew zan nengelipey is mid-ulì diyà te Hiruselim.
53 Ne andew-andew ne layun sikandan diyà te simbahan he Valey te Megbevayà is edalig te Megbevayà.
Great Commission and Ascension
Invitation to Know Jesus Personally