2 Ne te meselem dutun te iyan pa kedsilà te andew zutun te egkehuna he andew te simana,

nemenhendutun dan te midlevengan ki Jesus.

3 Ne ebpein-inseey zan te,

“Hentei is ebpekelilid kenitew zuen te zekelà he vatu he inlekeb duen te idselang te penlevengà?”

4 Iyan,

hein midlingehè dan,

neehè dan he nelilid en sikan is batu zutun he utew zekelà.

5 Ne mid-ahuk dan dutun te idselang te penlevengà ne neehè dan is ebpimpinuu he menguhed he etew ziyà te egkekewanan dan he kukumbalà te meputì he manggad.

Ne zutun nekehuyab is gehinawa zan.

6 Ne migkaǥi haazà is etew te,

“Kenè kew mahandek.

Ebpen-ahaan niw si Jesus he tigNeserit,

sikan is inransang te krus,

iyan,

wazè en dini su nevanhew en.

Ahaa niw man kayi te midsevukan kandin.”

7 Ne te kegkeipus te ked-ahaa zan dutun,

ke sikandin te,

“Hendiyan kew en te menge sumusundan din ne keǥiyi niw sikandan wey si Pedro he si Jesus,

edhuna sikandin diyà te Geliliya ne ziyè niw sikandin egkeahà,

sumalà is migkaǥi zin keniyu.”

8 Ne zutun nemengguwè dan dutun te penlevengà is ebpemelelaǥuy su utew zan nengeinuinu wey nengehandek.

Ne tenged kayi wazè dan tudtula heini ziyà te minsan hentei su nengehandek dan.

9 Ne te meselem pa utew zutun te andew he Duminggu hein nevanhew en si Jesus,

midhuna sikandin mebpaahà diyà te ki Maria Megdelina,

sikan is bahi he mibpeǥuwaan din dengan te pitu he mezaat he mulin-ulin.

10 Ne heini si Maria,

mibeyaan din is menge sumusundan ni Jesus.

Ebpemenineǥew he egkengeseeng haazà is menge sumusundan ni Jesus tenged te kedhimetayi ki Jesus.

11 Ne hein midtudtulan sikandan ni Maria he neehè din si Jesus su nevanhew en,

wazè dan tuuwi.

12 Ne neiwas haazà mibpaahà si Jesus is nahalin is dagwey zin diyà te zezuwa he menge sumusundan din dutun te edhendiyà haazà is dezuwa te unayan.

13 Ne midlikù dan diyà te Hiruselim ne mibpenudtulan dan is menge zuma zan he neehè dan si Jesus,

iyan,

minsan pa zutun wazà medtuu is menge zuma zan.

14 Ne zutun,

mibpaahà daan si Jesus dutun te sepulù wey sevaha he menge sumusundan din te timpu he egkekaan sikandan.

Midsawey zin sikandan tenged te kezesen te isip dan su wazè dan medtuu te menge etew he nemenudtul he nekeahà kandin he nevanhew.

15 Ne zutun migkeǥiyan ni Jesus sikandan te,

“Penhipanew kew ziyà te tivuuk he kelibutan,

ne ipesavut niw is Meupiya he Tudtulanen diyà te minsan hentei he etew he linimbag te Megbevayà.

16 Ne sikan is edtuu kayi wey ebpebewtismu,

ebeǥayan te untung he wazà pidtemanan.

Ne sikan is kenà edtuu ne edhukuman te silut.

17 Ne sikan is etew he edtuu kediey,

duen menge singyal he egkehimu zan.

Pinaaǥi te keǥehem te ngazan ku igkepeǥuwè dan is menge mezaat he mulin-ulin he ebpenlalung te menge etew.

Ne ebpekekaǥi sikandan te kineǥiyan he kenè dan egketuenan.

18 Ne minsan ke ebpekeǥawed sikandan te menge uled wey ebpekeinum sikandan te minsan hengkey he edhilu,

kenà sikandan egkekeizan.

Ne emun edempaan dan is egkengezeruwan,

ne egkengeulian.”

19 Ne te kegkeipusa te Nengazen he si Jesus dutun te menge lalag din,

mibatun sikandin pehendiyà te langit,

ne mibpinuu ziyà te egkekewanan te Megbevayà.

20 Ne zutun nemenhipanew is menge sumusundan te Nengazen he si Jesus ne impesavut dan is Meupiya he Tudtulanen diyà te minsan hendei.

Ne is gehem te Megbevayà,

mid-uǥup kandan su nemekehimu zan te menge egkengein-inuwan su wey memeketuu is menge etew zutun te ibpesavut dan.