Hein insurat ni Mateo heini is surat din subre en he heenem he ǥatus he tuig he wazà keugelingen he hadì te menge Hudiyu. Midaagdaag sikandan te zuma he menge nasud. Ne zuen neuǥet en he penaad te Megbevayà kandan pinaaǥi te ebpemeneuven din he iyan is: duen edsuǥuen din he egkehimu he hadì dan he iyan edlibri kandan.

Ne iyan insurata ni Mateo kayi te surat din is: ibpesavut din te menge Hudiyu is meupiya he tudtul he iyan is: Iyan en si Jesus sikan is hadì he impenaad te Megbevayà kandan su nepurung din memetmetahi si Jesus wey is menge vaal zin wey nezineg din daan is menge penurù ni Jesus.

Kayi te surat ni Mateo zuen mahabet he tagnà te ebpemeneuven te Megbevayà he impesavut din he nengetuman en pinaaǥi ki Jesus. (Iyan haazà tuus he iyan en sikandin kes hadì dan.) Penenglitan is kegkehimuwa kandin he kevuwazan ni hadì David, is ked-enaka kandin diyà te Bitlihim wey is kebpekeselet din diyà te Ihiptu. Is kegkevantug din pinaaǥi te kebpemawì din wey is kebpaahaa zin te utew zekelà he hizu zin te menge etew. Iyan, wazè dan sikandin dewata, kekenà, impehimetayan dan. Ne is langun kayi, pudu neuǥet en is kedtegnaa zuen, ne pudu netuman pinaaǥi ki Jesus.

Pinaaǥi kayi te surat ni Mateo edhengyuan din is menge Hudiyu he tuuwi zan si Jesus he iyan hadì dan wey menluluwas dan ne mebpengegalen dan kandin.