Is Ked-imbistigaha ni Pilatu ki Jesus
23
Ne zutun,
haazà is langun he menge punuan he nengetiǥum dutun,
ne mid-uwit dan si Jesus diyà te ki Gubirnedur Pilatu su wey zin mehukumi.
2 Ne hein nekeuma zan dutun ne impezineg dan ki Pilatu is menge sumbung dan.
Ke sikandan te,
“Midsusi zey heini is etew ne netuenan dey he edsinamuk kayi te inged tew su ibpeengked din is menge etew he ebayad te vuhis diyà te lavew he hadì tew ziyà te inged he Ruma.
Ne kenà duen dà taman su egkeǥiyen din he iyan sikandin si Kristu,
he ke và dà egkeǥiya,
hadì.”
3 Ne si Pilatu,
mid-insaan din si Jesus te,
“Hadì ke ve te menge Hudiyu?”
Ne midtavak si Jesus te,
“Uya,
iyan is migkaǥi nu.”
4 Ne zutun migkaǥi si Pilatu ziyà te menge punuan he memumuhat wey menge etew te,
“Wazà netuenan ku he engayan he idsiluti kayi te etew,”
ke sikandin.
5 Iyan,
nasì nememensag is menge etew zutun he egkaǥi te,
“Edsinamuk is menge etew he ebpemineg te menge penurù keniyan!
Mibpuunan din is kebpenurù din diyà te prubinsya he Geliliya ne midtukid din daan is menge inged dini te prubinsya he Hudiya,
Ne ǥuntaan,
dini en maan sikandin te Hiruselim.”
Is Ked-imbistigaha ni Hirudis ki Jesus
6 Ne hein nezineg ni Pilatu heini ne mid-insà sikandin te,
“TigGeliliya ve heini is etew?”
7 Ne midtavak dan te,
“Uya,
tigGeliliya heeyan.”
Ne hein netuenan din he sakup si Jesus te prubinsya he ebeyveyaan ni Hirudis ne impeuwit din si Jesus diyà te ki Hirudis.
Su neserengà he zutun daan si Hirudis te Hiruselim.
Jesus is Brought To Pilate
8 Ne si Hirudis,
ne utew nesuatsuat hein neehè din si Jesus su neuǥet dà he egkesuatan din si Jesus te ed-ahà.
Egkesuatan din he meehè din is menge egkein-inuwan he nezineg din he ebpemeelan ni Jesus.
9 Ne zutun mezakel is menge insà ni Hirudis ki Jesus,
iyan,
wazà si Jesus medtavak.
10 Ne zutun,
haazà is menge punuan he menge memumuhat wey is menge menunudlù te kesuǥuan,
ne mid-uvey zan ne utew meinit is gehinawa zan te kedsumbunga zan ki Jesus.
11 Ne zutun si Hirudis wey is menge sundaru zin,
ne mibaleyvaley zan si Jesus ne mid-eled-eled dan sikandin.
Ne midsun-uzan dan te meupiya he bisti su uvag kun hadì,
ne zutun impelikù dan diyà te ki Pilatu.
12 Ne iyan haazà andew te kebpeked-emiǥu ni Pilatu wey si Hirudis su zutun te nengehuna he timpu ne kenà meupiya is kedepitè dan.
Jesus is Brought to Herod
Is Kedhukumi ki Jesus te Kemetayen
13 Ne hein diyè en maan si Jesus te ki Pilatu ne midtiǥum ni Pilatu is menge punuan he memumuhat wey is menge ebmeǥurangen te menge Hudiyu wey is menge mezakel he etew.
14 Ne ke sikandin diyà te kandan te,
“Heini is etew he in-etuvang niw kayi te kedì,
migkaǥi niw he edsinamuk sikandin te inged tew,
iyan,
mibpurungan ku sikandin susiya kayi te etuvangan te langun te sikiyu ne wazè ku egkeahà he salè din.
15 Ne si Hirudis daan,
wazè din egkeahà he salà kayi te etew su impelikù din kayi te kedì.
Wazà iyan ulaula kayi te etew he zait he idhimetayi kandin.
16 Ne ibpevuǥel ku zà sikandin ne ibpeǥawas ku en.”
17 Ne iyan ingkekeǥiya kayi ni Pilatu su neleyaman te menge Hudiyu he kada egketuman haazà is Pista te Kedlevayi ne kinahanglan he ibpeǥawas ni Pilatu is sevaha he pirisu he Hudiyu.
18 Ne hein nezineg te mezakel he etew haazà is migkaǥi ni Pilatu ne mibpememensag dan te,
“Ipehimetayi nu heeyan he etew,
ne iyan nu ipeǥawas si Berabas!”
19 Ne heini si Berabas,
ne iyan ingkepirisu zin su impepekidtebek din te gubirnu is menge etew ne kenà dutun dà taman su nekevunù daan sikandin te etew.
20 Ne si Pilatu,
ne iyan din egkesuatan he iyan ibpeǥawas si Jesus,
ne mid-uman sikandin med-insà diyà te nengetiǥum he menge etew ke hengkey is egkesuatan dan,
21 iyan,
nasì mid-iseg sikandan mebpememensag he egkaǥi te,
“Iransang te krus!
Iransang te krus!”
22 Ne migkaǥi si Pilatu te iketelu,
ke sikandin te,
“Maan?
Duen be mezaat he mid-ulaula zin?
Wazè ku man egkeahà he salà he zait he idhimetayi kandin.
Ibpevuǥel ku zà ne ibpeǥawas ku en.”
23 Ne zutun mid-iseg is kebpememensag dan he ibperansang dan si Jesus diyà te krus.
Ne hein neuǥet kenè en ebpeketigker si Pilatu,
24 ne midtuǥut sikandin he idransang si Jesus te krus.
25 Ne zutun midlibri ni Pilatu si Berabas he mibpirisu tenged te kedsinamuk din wey kebunua zin te etew.
Ne si Jesus,
insuǥù en ni Pilatu he meulaula ziyà te kandin is egkesuatan te menge etew.
Jesus is Sentenced
Is Kedrensanga ki Jesus Diyà te Krus
26 Ne zutun migkuwa zan si Jesus ne migenat dan su ed-uwiten dan pehendiyà te ǥawas dutun te inged.
Ne ziyà te zalan nesinuǥung dan is etew he tigSirini he egngezanan ki Simon.
Heini si Simon,
diyà ebpuun te unayan ne edhendiyà te inged.
Ne mibpeǥes dan ipetiang dutun te krus he edtiangen ni Jesus.
27 Ne zutun te ked-uwita zan ki Jesus,
utew mezakel is menge etew he nemenduma.
Ne zuen dutun menge vahi he ebpemenlelendag su edsineǥawan dan si Jesus.
28 Ne midlilingey si Jesus diyà te kandan ne migkaǥi te,
“Sikiyu is menge vahi he tigHiruselim,
kenà a iyan keniyu sineǥawi,
kekenà,
iyan niw sineǥawi is egkeulaula niw wey te menge anak niw.
29 Su egkeuma is andew he egkehitavù kayi te keniyu is dekelà he kemeresayan.
Ne zutun egkaǥi is menge etew he utew zeyzey sikan is bahi he wazè din anak wey wazà edleǥimuwen.
30 Ne zutun he timpu egkeǥiyan te menge etew is menge vuntud te,
‘Ketempaǥi key.’
Ne egkeǥiyan dan daan is menge vuvungan te,
‘Bumbuni key.’
31 Su,”
ke si Jesus diyà te kandan te,
“emun iyan heini ed-ul-ulahan dan kedì te iring te kayu he wazà meǥangu su wazà mulà kedì he salà,
ne edhuna pa kayi is ed-ul-ulahan dan keniyu te iring te kayu he neǥangu en.”
Jesus Carries His Cross
32 Ne zuen daan dutun dezuwa he tulisan he ed-uwiten dan su edhimetayan dan duma ki Jesus.
33 Ne nekeuma zan dutun te vuvungan he egngezanan te Tulan te Ulu ne zutun dan iransang si Jesus te krus ne inransang dan daan haazà is menge tulisan te zezuwa zaan he krus.
Impasek dan is sevaha he krus diyà te egkekewanan ni Jesus,
ne is sevaha,
impasek dan diyà te egkeǥivang din.
34 Ne zutun te kemulu zan pa idransang si Jesus,
ne mid-ampù sikandin diyà te Megbevayà,
ke sikandin te,
“Amey ku,
peseyluwa nu sikandan su wazè dan metueni ke hengkey heini is ed-ul-ulahan dan.”
Ne zutun,
haazà is midransang kandin,
midripa zan ke hentei is ebpekeangken te menge ugelingen ni Jesus.
Jesus is Crucified
Soldiers Gamble for Jesus's Clothes
35 Ne is menge etew,
ne ebpemenhitindeg dan dutun he ebantey;
ne is menge punuan te menge Hudiyu,
ne ed-undaunda kandin,
ke sikandan te,
“Wey zè be!
Nelibri zin is duma;
ne emun tutuu he iyan sikandin sikan is hadì he mibpilì te Megbevayà,
ed-ahaan ta ke egkelibri zin is keugelingen din.”
36 Ne kes menge sundaru zaan,
ne ebpen-undaunda zaan kandin.
Mid-uvey zan diyà te kandin su ibpeinum dan te vinu.
37 Ne ke sikandan te,
“Emun tutuu iyan he hadì ka te menge Hudiyu ne libriya nu is keugelingen nu!”
38 Ne impezeket dan is surat te zivavew zin diyà te krus he edhenduen haazà is surat te,
“Iyan heini sikan is Hadì te menge Hudiyu.”
Sign on the Cross
39 Ne is sevaha zutun te zezuwa he tulisan he inransang diyà te pesikilizà ni Jesus,
ne edsumpalit en daan kandin.
Ke sikandin te,
“Emun tutuu iyan he iyan ka sikan is hadì he mibpilì te Megbevayà ne hante kun be iyan,
libriya nu is lawa nu keniyan ne libriya key zaan kenikew.”
40 Ne haazà is sevaha,
ne migkeǥiyan din haazà is duma zin te,
“Maan is egkaǥi ka te iring keniyan?
Wazè nu ve kegkehandek te Megbevayà?
Sikitew is tetelu,
ne pudu kiw ebpatey kayi,
41 iyan,
sikita is dezuwa,
ne engayan en he edhimetayan ki su id-ulì dini te kenita is kelelalung ta.
Iyan,
heini he etew mulà,
ne wazè nehimu zin he mezaat.”
42 Ne zutun migkeǥiyan din si Jesus te,
“He Jesus,
kenà a kenikew lipati zutun te kedhadì nu en keuzemà.”
43 Ne migkaǥi si Jesus diyà te kandin te,
“Benar heini is egkeǥiyen ku kenikew he ǥuntaan dà ebpezumehè ki zutun te inged te edtulusen.”
Crucified Convicts
Is Kebpatey ni Jesus
44 Ne hein neudtu is andew zutun ne midtik-ew mebmerusirem is tivuuk he kelibutan seled te menge tetelu he uras.
45 Ne zutun te iyan daan haazà he uras,
kes utew mekepal he manggad he ingkurtina zuen te simbahan he Valey te Megbevayà,
ne netik-ew mevindas diyà te liwezaan.
46 Ne zutun ne migkulahì si Jesus is egkaǥi te,
“Amà,
ibpeǥewezan ku en kenikew is gimukud ku.”
Ne iyan dà haazà ne naawà is gehinawa zin.
47 Ne zutun,
sikan is kepitan te menge sundaru zutun,
hein neehè din heini is neulaula ne nekezalig te Megbevayà,
ke sikandin te,
“Tutuu ves iyan he wazà mezaat he ulaula kayi he etew!”
48 Ne haazà is menge etew he nengevurun dutun su ebantey zan,
ne hein neehè dan haazà is neulaula,
mid-ulì dan he utew memeveǥat is gehinawa.
49 Ne is langun he menge emiǥu ni Jesus,
ragkes is menge vahi he nemendumazuma kandin he ebpemuun te Geliliya,
ne ziyè dan te malù meziyù is ebantey zutun te langun he neulaula.
Death of Jesus
Is Kedlevenga ki Jesus
50-51 Ne zuen sevaha zutun he etew he egngezanan ki Jose he meǥinged diyà te inged he Erimetiya he ziyà te prubinsya he Hudiya.
Heini si Jose,
ne metazeng he etew ne telehuzen daan.
Sevaha sikandin te menge Hudiyu he edtaǥad te kedhadì te Megbevayà dini te kelibutan.
Sevaha zaan sikandin te menge zatù te menge Hudiyu,
iyan,
wazà sikandin mekeuyun te kedhimetayi ki Jesus.
52 Ne heini si Jose,
ne midhendiyà sikandin te ki Pilatu ne midhangyù din he egkuwaan din is lawa ni Jesus;
ne intuǥut kandin ni Pilatu.
53 Ne migkuwa ni Jose haazà is lawa ni Jesus ne mibukusan din te malung he meputì.
Ne zuen surung he penlevengà he ingkalut diyà te kelendiǥan he paǥang he wazè pa meselezi te minatey.
Ne zutun iseled ni Jose is lawa ni Jesus.
54 Mahapun en haazà dutun te andew he Birnis ne emun edsanlep en dutun is andew ne iyan puunà te Andew te Kedhimeley.
55 Ne sikan is menge vahi he ebpemuun diyà te Geliliya he nemenduma ki Jesus,
ne miduma zan ki Jose te edleveng dutun te lawa ni Jesus.
Ne neehè dan is midsevukan ki Jesus dutun te penlevengà.
56 Ne zutun mid-ulì dan su ed-endamen dan is menge mehemut he sulù wey lana he idhaplas te lawa ni Jesus.
Ne zutun te Andew te Kedhimeley,
wazè dan mebaal su edtumanen dan is insuǥù dutun te kesuǥuan he imbilinbilin kandan.
Burial of Jesus