3 Ne zutun he timpu si Hudas,

is sevaha zutun te sepulù wey zezuwa he sumusundan ni Jesus,

ne mid-ulinan sikandin ni Setanas.

4 Ne heini si Hudas,

ne midhendiyà te menge punuan te menge memumuhat wey menge kepitan te menge ebantey zutun te zekelà he simbahan ne migkeǥiyan din sikandan he egkehimu he ibpalad din si Jesus diyà te kandan.

5 Ne utew zan dutun nengesuat ne mibpesarig dan he ebeǥayan dan si Hudas te selapì.

6 Ne mid-uyun dutun si Hudas;

ne puun dutun ne mibpengahà sikandin te paaǥi wey zin meekali si Jesus wey zan mezakep he kenà egketuenan te menge mezakel he etew.

7 Ne neume en dutun is andew te pista te kegkeena te supas he wazè din tapey.

Ne iyan haazà andew te kedlepaa te menge Hudiyu te ibpemuhat he menge nati he kerehidu he egkeenen dan dutun te Pista te Kedlevayi.

8 Ne zutun midsuǥù ni Jesus si Pedro wey si Juan he ibpehuna zin sikandan ne migkeǥiyan din te,

“Huna kew en ne teǥenaha niw en is idlavung tew kayi te Pista te Kedlevayi.”

9 Ne mid-insà sikandan ki Jesus te,

“Hendei he valey is edhilutuan dey te idlavung te Pista te Kedlevayi?”

10 Ne midtavak si Jesus te,

“Emun ebpekeuma kew en diyà te inged,

egkesinuǥung niw is maama he ed-uwit te umuy he nepenù te wahig.

Tundug kew kandin diyà te valey he edselezan din.

11 Ne keǥiyi niw,”

ke si Jesus,

“is teǥiǥaked dutun te valey,

ke sikiyu te,

‘Ibpeinsà te zatù tew kenikew ke hendei he ruǥu sikandin egkaan duma te menge sumusundan din kayi te Pista te Kedlevayi.’ ”

12 Ne ke si Jesus maan te,

“Ne zutun ibpeehè din keniyu is meluag he ruǥu ziyà te zivavew he zaan he nehimani.

Ne zutun niw teǥenaha is idlavung tew.”

13 Ne migenat dutun haazà is midsuǥù din,

ne langun dutun te migkaǥi ni Jesus,

ne iyan en iyan neehè dan ne zutun dan teǥenaha is idlavung te pista.

14 Ne hein iyan en uras te kedlavung ne mibpinuu si Jesus wey is menge epustul zin is ebpemengaan.

15 Ne migkaǥi si Jesus diyà te kandan te,

“Utew zekelà dini te ǥehinawa ku heini is kegkesevaha tew te kegkaan te idlavung kayi te Pista te Kedlevayi te kenè e pa ebpatey.

16 Su venar is egkeǥiyen ku,

kenà ad maan egkaan te idlavung te kedlevayi taman te timpu keuzemà ke egketuman is hustu he kehuluǥan din dutun te kedhedii te Megbevayà te menusiyà.”

17 Ne zutun ne migkuwa ni Jesus is tasa he midteǥuan te vinu ne mibpeselematan din te Megbevayà ne migkaǥi sikandin diyà te menge sumusundan din te,

“Med-inum is kada sevaha keniyu.

18 Ne egkeǥiyen ku keniyu he kayi zà taman is ked-inum ku kayi te vinu taman dutun keuzemà te egkeume en is kedhadì te Megbevayà.”

19 Ne zutun mid-amì si Jesus dutun te egkeenen dan he supas ne mibpeselematan din daan haazà te Megbevayà.

Ne mibpenevìtevì din ne impenduwal zin kandan,

ke sikandin te,

“Iyan heini lawa ku he ibelukas keniyu.

Emun egkeenen niw heini isipa a keniyu.”

20 Ne hein neipus dan dutun is egkaan ne migkuwa en maan ni Jesus is tasa ne migkaǥi te,

“Heini ve is inumen,

ne tuus te veǥu en he paaǥi te kegkelibri he midtukud te Megbevayà ne egkehimu heini pinaaǥi te lengesa ku he ibpaaǥas tenged keniyu.

21 Sevuta niw heini,”

ke si Jesus,

“he sikan is etew he ebpalad kedì diyà te menge kuntada ku,

ne kayi zed guntaan duma tew te ebpememimpinuu!

22 Siak is Kakey te Menusiyà,

ebpatey e zed gihapun sumalà is imbanglis kedì te Megbevayà,

iyan,

kehizu utew te etew he ed-akal kedì.”

23 Ne zutun mibpein-inseey haazà is menge sumusundan din ke hentei kandan haazà is egkeǥiyen din he ebpalad kandin.

24 Ne zutun mibpelewlewanà haazà is menge sumusundan din ke hentei is lavew kandan keuzemà.

25 Ne zutun migkaǥi si Jesus te,

“Dini te kelibutan,

is hadì te kada inged,

ne iyan dà ulaula zan is edsuǥùsuǥù dà te menge sakup dan su tuus he zekelà is pid-etawan dan.

Ne minsan pa zutun egeraran sikandan te,

‘Menenavang te menge Etew.’

26 Iyan,

sikiyu mulà,”

ke si Jesus,

“ne kenà egkehimu he iring kayi is ulaula niw.

Su sikan is lavew keniyu,

ne isipa zin he iyan en sikandin kinevevaan;

ne sikan is egalen,

ne isipa zin he suluǥuen sikandin te langun.

27 Ne penenglitan,

hentei is lavew?

Iyan be is ebpinuu su egkaan wey ke iyan be haazà is suluǥuen he edtangel kandin?

Ne siguradu iyan lavew is ebpinuu,

ne minsan pa zutun,

siak is egalen niw,

ne iring a te edtangel keniyu.”

28 Ne mid-uman megkaǥi si Jesus te,

“Sikiyu,

iyan kew nekid-uunungen kedì te langun he menge kemereǥenan ku.

29 Mibeǥayan a te Amey ku he Megbevayà te ketenged te kedhadì keuzemà.

Ne iring din ded daan ne ebeǥayan ku zaan sikiyu te ketenged te kedhadì.

30 Keuzemà ke edhadì a ne ebpinuu kew zuma kedì su ebpetugtuǥenè kiw is egkaan wey ed-inum.

Ne ibpehadì ku sikiyu te menge kevuwazan duen te sepulù wey zezuwa he menge anak ni Israyil.”

31 Ne migkaǥi si Jesus diyà te ki Simon Pedro te,

“He Simon,

duen egkeǥiyen ku kenikew.

Midtuǥutan si Setanas te Megbevayà he ebpenggezam keniyu te langun.

Is kebpenggezam din ne iring te ked-ukap te parey su kela ke iring te ukap is kedtuu niw.

32 Iyan,

in-ampù ku sikew,

Simon,

diyà te Megbevayà he kenà maawà is kedtuu nu kediey.

Ne emun melig-en en is kedtuu nu kediey ne himuwa nu he mebmelig-en daan is kedtuu te menge zuma nu.”

33 Ne midtavak si Pedro te,

“Kenà a edsuwey kenikew!

Su minsan ke egkepirisu ka ne eduma e en kenikew;

ne ke edhimetayan ka ne ed-unung e en kenikew!”

34 Ne zutun midtavak si Jesus te,

“Utew venar,

Simon,

is egkeǥiyen ku kenikew he kengkuwan te mezukilem te kenè pa ed-ukarà is manuk ne ketetelu ke en ebpekekaǥi he kenà a kenikew egkekilala.”

35 Ne zutun migkaǥi si Jesus diyà te kandan te,

“Hein midsuǥù ku sikiyu zengan he indawey ku keniyu he wazà med-uwit te selapì,

ne wazà med-uwit te ed-ilisan,

ne wazà daan med-uwit te ed-ilisan he sepatus,

ne hengkey is kurang niw zutun te kedhipanew niw?”

Ne midtavak dan te,

“Wazè dey kurang.”

36 Ne migkaǥi si Jesus te,

“Iyan,

guntaan,

emun duen selapì niw wey ed-ilisan niw ne uwita niw en.

Ne sikan is wazè din ubpit ne ivelegyè din is kumbalè din wey mekepemasa te sundang.

37 Su kinahanglan he egketuman en dini te kedì sikan is insurat he Lalag te Megbevayà he edhenduen te,

‘Inragkes sikandin dutun te menge selaan he etew.’ ”

38 Ne zutun migkaǥi is menge sumusundan din te,

“Ahaa nu man su zuen dey en dezuwa he sundang.”

Ne ke si Jesus te,

“Ne netengkaan en heeyan.”

39 Ne zutun migawas si Jesus puun te valey ne midhendiyà te vuvungan he egngezanan te Ulivuwan su zutun dan layun edhizeǥà ne nemenduma kandin is menge sumusundan din.

40 Ne hein nekeuma zan dutun ne migkeǥiyan ni Jesus haazà is menge sumusundan din te,

“Ampù kew wey kew kenà mezaag te penuley keniyu.”

41 Ne zutun midlaus si Jesus diyà te uvey zà ne midluhud ne mid-ampù diyà te Megbevayà.

42 Ke sikandin te,

“Amey ku,

emun iyan egkesuatan nu ne kenè nu en kediey ipeseǥazi heini is merasey he imbanglis nu kediey,

iyan,

kenà egkesunud is kediey he egkesuatan,

kekenà,

iyan egkesunud is kenikew.”

43 Ne zutun te ked-ampù din ne nekeuma is belinsuǥuen te Megbevayà he ebpuun te langit su edlig-enan din is gehinawa ni Jesus.

44 Ne utew si Jesus dutun neseeng ne midheǥetan din is ked-ampù din te Megbevayà ne edteǥaktak is rimuseng din he iring te lengesa.

45 Ne mid-engked si Jesus is ed-ampù ne midhitindeg ne midlikuan din is menge sumusundan din.

Ne langun dutun te menge sumusundan din,

ne nemekelipezeng su utew zan mibmeluya tenged te kegkeseeng dan.

46 Ne zutun migkaǥi si Jesus diyà te kandan te,

“Maan is ebpemenlipezeng kew?

Enew kew wey med-ampù wey kew kenà mezaag te penuley keniyu.”

47 Ne zutun te kemulu pa egkaǥi si Jesus,

ne nekeume en si Hudas,

is sevaha zuen te sepulù wey zezuwa he menge sumusundan din.

Ne iyan sikandin edhuna te mezakel he menge etew.

Ne mid-uvey sikandin diyà te ki Jesus su edhezekan din.

48 Ne zutun migkaǥi si Jesus diyà te kandin te,

“Kenè be tutuu,

Hudas,

he heini is kedhazek nu kedì te Kakey te Menusiyà,

ne iyan en kebpezekepa nu kedì keniyan te menge zuma nu?”

49 Ne hein netuenan dutun te menge sumusundan ni Jesus ke hengkey is ed-ul-ulahan te menge etew,

migkaǥi zan diyà te ki Jesus te,

“Menu,

Datù,

egkesuatan nu ve he edsukul key su heini zed is sundang dey?”

50 Ne is sevaha zutun te menge sumusundan ni Jesus,

midtibas din is suluǥuen te lavew he memumuhat ne netenaan haazà diyà te kewanan he telinga ne nesapla haazà is telinga zin.

51 Ne zutun migkaǥi si Jesus diyà te menge sumusundan din te,

“Ereg kew!”

Ne zutun inlikù ni Jesus haazà is telinga zutun te nelepungan ne henduen te wazà piǥeyanan gihapun te telinga zin.

52 Ne elin daan dutun te nemenhendutun te kedakep ki Jesus is menge punuan te memumuhat wey is menge kepitan te ebantey zutun te zekelà he simbahan wey is menge ebmeǥurangen te menge Hudiyu.

Ne migkeǥiyan sikandan ni Jesus te,

“Tulisan e ve?

Su maan is neǥumeenan kew te ubpit wey lagkut is edakep kedì?

53 Ne hein duma a keniyu kada andew ziyà te Valey te Megbevayà is ebpenurù ne wazà a keniyu zutun dà dekepa.

Iyan,

iyan heini ǥuntaan kes timpu he imbanglis keniyu wey niw meveeli is egkesuatan ni Setanas.”

54 Ne zutun midakep dan si Jesus ne mid-uwit dan diyà te valey te lavew he memumuhat.

Ne si Pedro,

midtinundug daan asal kenà utew ed-uvey.

55 Ne zuen hapuy ziyà te lama zutun te valey ne zuen menge etew he ebpemenhizazang.

Ne mid-uvey zutun si Pedro ne midhizazang daan.

56 Ne zuen dutun suluǥuen he vahi ne neehè din si Pedro is edhidhizazang.

Ne midtengtengan din si Pedro ne migkaǥi te,

“Minsan heeyan is maama ne zuma keniyan te midakep dan.”

57 Ne midtavak si Pedro te,

“Bayi,

kenè ku egkekilala heeyan is midakep dan.”

58 Ne netegteǥaad dutun ne zuen en maan etew he nekekilala ki Pedro.

Ne migkaǥi haazà te,

“Sikew,

duma ka zaan keniyà te midakep dan.”

Ne midtavak si Pedro te,

“Mama,

kenà a iyan duma zin.”

59 Ne netegteǥaad pa maan dutun ne zuen en maan sevaha he etew he nekekilala ki Pedro he ke sikandin te,

“Tutuu iyan he zuma zaan heeyan dutun te midakep su egketuusan he tigGeliliya zaan sikandin.”

60 Iyan,

midtavak en maan si Pedro te,

“Kenè ku egketuenan heeyan is migkaǥi niw.”

Ne zutun te kemulu pa egkaǥi si Pedro ne mid-ukarè en is manuk.

61 Ne zutun midlilingey ni Jesus si Pedro ne midtengtengan din.

Ne zutun human metenuzi ni Pedro sikan is migkaǥi ni Jesus kandin he,

“Te kenè pe kan ebpengukarà is manuk,

ne ketetelu ke en ebpekekaǥi he kenà a kenikew egkekilala.”

62 Ne zutun mid-awà si Pedro zutun te menge etew ne nekelelendag is edsineǥew.

63-64 Ne haazà is menge etew he ebantey ki Jesus,

ne mid-eled-eled dan sikandin.

Ne mibagkes dan is menge mata zin ne midsumbag dan sikandin,

ne ke sikandan te,

“Tegnaa nu ke hentei is midsumbag kenikew.”

65 Ne kenà iyan dà haazà su mezakel pa is memezaat he lalag dan kandin te kedsumpelita zan kandin.

66 Ne hein nepawà dutun,

netiǥum is langun he menge ebmeǥurangen te menge Hudiyu wey is menge punuan he menge memumuhat,

wey is menge menunudlù te kesuǥuan,

ne impeetuvang kandan si Jesus.

67 Ne mid-insaan dan si Jesus te,

“Hengkey,

iyan ke en be iyan sikan is mibpilì te Megbevayà he ibpahadì?”

Ne midtavak si Jesus te,

“Minsan ke egkeǥiyen ku keniyu he iyan a,

ne kenè kew edtuu te egkeǥiyen ku.

68 Ne emun id-insè ku heini keniyu ne kenè kew zaan edtavak.

69 Iyan,

heini zà is egkekaǥi ku keniyu,

‘Meǥaan en egketuman is andew he siaken,

is netagnà he Kakey te Menusiyà,

ne ebpekepinuu e en diyà te zapit te egkekewanan te Megbevayà he utew mekeǥeǥehem.’ ”

70 Ne migkaǥi zan is langun te,

“Ne emun iyan heeyan lalag nu ne hentei ke ve?

Anak ke ve te Megbevayà?”

Ne midtavak si Jesus te,

“Uya,

iyan is migkaǥi niw.”

71 Ne zutun migkaǥi zan te,

“Wazè en kinahanglan pa he zuen pa menge edsumbung kandin su nezineg tew en is menge lalag din he utew supak te Megbevayà.”