2 Ne ke sikandan te,

“Kenè tew edekepen sikandin te timpu te pista su kela ke edsinamuk is menge etew.”

3 Ne sevaha he timpu zutun he ziyà si Jesus te inged he Bitanya,

diyà sikandin te valey ni Simon te it-iten he neulian en.

Ne zutun te egkaan dan,

nekeuma is bahi he ed-uwit te pelenahan he mibeelan puun te vatu he elebastru he midteǥuan haazà is pelenahan te mehemut he agwa he mahal utew su lunsey he nardu.

Ne mid-uvayan si Jesus dutun te vahi ne midrupet din haazà is bivig dutun te pelenahan ne imbusbus din diyà te ulu ni Jesus haazà is agwa.

4 Ne is duma he etew he nekeahà dutun,

wazè dan ikesuat haaza,

ne mibpelelelaǥè dan te,

“Maan is mid-us-usikan din heeyan is agwa te wazà pulus?

5 Mahal utew heeyan su is bali zin,

ne subra he tetelu he ǥatus he elad he selapì.

Meupiya pa pezem ke imbelegyà,

ne is halin,

igkepemeǥey ziyà te egkengeayuayu.”

Ne midsawey zan haazà is mid-ulaula zutun te vahi.

6 Ne migkaǥi zutun si Jesus te,

“Pesegdana niw sikandin.

Maan is edsewayen niw sikandin?

Utew meupiya heini is mid-ulaula zin dini te kediey.

7 Layun niw egketevangi is egkengeayuayu su kenè niw mulà sikandan egkesuwey,

iyan,

siak,

meǥaan ku en sikiyu egkesuwey.

8 Sumalà is egkehimu kayi te vahi ne midhimu zin en dini te kedì.

Mid-egwahan e zin he zaan wey meteǥana is lawa ku te kedlevenga kedì.

9 Tenuzi niw he kenà sikandin egkelipatan.

Su minsan hendei idsangyew is Meupiya he Tudtulanen dini te tivuuk he kelibutan,

egketudtul zaan heini is mid-ulaula zin kedì.”

10 Ne zutun,

si Hudas he tigKeriyuti,

sevaha zutun te sepulù wey zezuwa he menge sumusundan din,

midhendiyà sikandin te menge punuan he memumuhat su ibpalad din si Jesus diyà te kandan.

11 Ne hein netuenan dutun te menge punuan ke hengkey is inhendutun din,

ne utew zan nengesuat.

Ne mibpesarig sikandan he ebeǥayan dan si Hudas te selapì.

Ne puun dutun mibpengahà si Hudas te paaǥi te ked-ekali zin ki Jesus.

12 Ne zutun neume en is nehuna he andew te Pista te Kegkeena te Supas he Wazè Din Tapey.

Iyan haazà andew te kedlepaa te menge Hudiyu te ibpemuhat he nati he kerehidu he egkeenen dan dutun te Pista te Kedlevayi.

Ne zutun mid-insaan si Jesus te menge sumusundan din te,

“Hendei is egkesuatan nu he valey he edhilutuan dey wey zey meteǥana is idlavung nu te Pista te Kedlevayi?”

13 Ne midsuǥù ni Jesus is dezuwa zutun te menge sumusundan din ne migkeǥiyan din te,

“Hendiyan kew te inged ne egkeuma niw is maama he ed-uwit te umuy he nepenù te wahig.

14 Tundug kew kandin pehendiyà te valey he edselezan din,

ne keǥiyi niw is teǥiǥaked dutun te valey te,

‘Ibpeinsà te zatù tew kenikew ke hendei he ruǥu sikandin egkaan duma te menge sumusundan din kayi te Pista te Kedlevayi.’

15 Ne zutun ibpeehè din keniyu is meluag he ruǥu ziyà te zivavew zutun he zaan en nehimani.

Ne zutun niw teǥenaha is idlavung tew.”

16 Ne haazà is menge sumusundan din,

migenat dan pehendutun te inged ne langun duen te migkaǥi ni Jesus ne iyan en iyan neehè dan ne zutun dan teǥenaha is idlavung te Pista te Kedlevayi.

17 Ne hein mezukilem dutun,

si Jesus wey is sepulù wey zezuwa he sumusundan din,

nekeuma zan dutun te valey.

18 Ne te ziyè dan te lemisahan su kemulu zan pa egkaan,

migkaǥi si Jesus te,

“Duen egkeǥiyen ku keniyu.

Iyan is:

sevaha keniyu kayi te ebpemengaan guntaan he zuma ku is ed-akal kedì wey a mehimetayi.”

19 Ne zutun utew nengeseeng haazà is menge sumusundan ni Jesus,

ne is kada sevaha zutun,

mid-insè dan kandin te,

“Kela ke iyan a?”

20 Ne ke si Jesus te,

“Iyan is sevaha keniyu te sepulù wey zezuwa he ebpekidtuǥen kedì kayi te edtengelan.

21 Siak is Kakey te Menusiyà,

ebpatey a sumalà te netagnà duen te insurat he Lalag te Megbevayà,

iyan,

kehizu utew te etew he ed-akal kedì.

Meupiya pa ziyà te kandin ke wazè en sikandin ianak.”

22 Ne zutun te kemulu zan pa egkaan,

mid-amì si Jesus duen te supas,

ne mibpeselematan din diyà te Megbevayà ne mibpenevìtevì din haazà ne impemeǥey zin dutun te menge sumusundan din.

Ne ke sikandin te,

“Iyan heini lawa ku;

keena niw.”

23 Ne mid-amì din dutun is tasa he midteǥuan te vinu he paras ne mibpeselematan din daan te Megbevayà ne induwal zin diyà te kandan.

Ne pudu sikandan mid-inum dutun.

24 Ne migkaǥi si Jesus te,

“Iyan heini lengesa ku he ibpetiǥis wey mepelisi is mezakel he menge etew.

Tuus heini te paaǥi te kegkelibri he midtukud te Megbevayà.”

25 Benar is egkeǥiyen ku he puun guntaan,

ne kenà ad maan ed-inum kayi te vinu taman dutun te timpu keuzemà he ed-iinumè kiw te veǥu en he vinu emun edhadì is Megbevayà.

26 Ne zutun migkanta zan te kedalig te Megbevayà ne hein nepasad haazà,

migawas dan ne midhendiyè dan te vuvungan dutun he egngezanan te Ulivuwan.

27 Ne migkeǥiyan ni Jesus haazà is menge sumusundan din te,

“Is langun te sikiyu,

edluyahan is kedsarig niw kediey su zuen insurat he Lalag te Megbevayà he edhenduen te,

‘Edhimetayan ku is ed-elima te menge kerehidu ne ebpekedsusuwey is menge kerehidu.’

28 Iyan,”

ke si Jesus,

“dutun te kegkevanhew ku,

edhuna a keniyu ziyà te prubinsya he Geliliya.”

29 Ne zutun migkaǥi si Pedro ziyà te kandin te,

“Minsan ke edluyahan is kedsarig kenikew kayi te langun he menge zuma ku ne kenà mulà edluyahan is kedì,

minsan egkemenumenu.”

30 Ne ke si Jesus diyà te ki Pedro te,

“Benar is egkeǥiyen ku he te kenè pe kan ed-ukarà is manuk te kezezuwa ǥuntaan te mezukilem ne ketetelu ke en ebpekekaǥi he kenà a kenikew egkekilala.”

31 Ne wazà mevenari zutun si Pedro,

ke sikandin te,

“Minsan pa ke edhimetayan a zuma kenikew ne kenà a egkaǥi he wazè ku sikew mekilala.”

Haazà he lalag,

iyan daan pesarig dutun te menge zuma zin he menge sumusundan.

32 Ne nekeuma ensi Jesus diyà te lugar he migngezanan te Gitsimeni.

Migkeǥiyan din is menge sumusundan din te,

“Kayi kew zà pinuu taman te ebpekepasad a is ed-ampù.”

33 Ne zutun miduma zin si Pedro,

si Santiago,

wey si Juan,

ne midlaus dan pa ziyà te egkehunaan dutun.

Utew neseeng sikandin wey mibmesakit utew is gehinawa zin.

34 Ne migkaǥi sikandin diyà te kandan te,

“Utew mesakit is gehinawa ku.

Henduen be te egkevidtew en.

Kayi kew zà ne kenè kew medlipezeng.”

35 Ne midlaus pa sikandin diyà te egkehunaan dutun ne midlangkeb diyà te tanà ne mid-ampù diyà te Megbevayà he ke egkehimu pa ne kenè en kandin ipeseǥazan haazà is merasey he imbanglis kandin.

36 Ke sikandin dutun te ked-ampù din te,

“Amey ku,

egkehimu nu is minsan hengkey ne emun egkehimu zà ne kenà a kenikew ipehimetayi,

iyan,

kenà egkesunud is kediey he egkesuatan,

kekenà,

iyan egkesunud is kenikew.”

37 Ne midlikù si Jesus ne neehè din haazà is tetelu he sumusundan din he nemekelipezeng,

ne migkeǥiyan din si Pedro te,

“Simon,

nekelipezeng ke ve?

Wazè nu ve metigker he kenè ka edlipezeng te minsan sengeuras dà?”

38 Ne migkeǥiyan sikandan ni Jesus te,

“Kenè kew lipezeng,

kekenà,

ampù kew wey kew mekelikey te menge penggezam keniyu.

Edsunud pezem is gehinawa niw,

iyan,

meluya is lawa niw.”

39 Ne zutun midlikù si Jesus ne mid-uman med-ampù te iyan ded gihapun sikan is in-ampù din.

40 Ne zutun midlikuan din haazà is menge sumusundan din,

ne neehè din he nemekelipezeng dan su wazè dan maantus is kebpemetpetayi kandan te tuzug.

Ne zutun wazè dan egketuenan ke hengkey is ibpengetezengan dan diyà te ki Jesus.

41 Ne netegteǥaad pa zutun midlikuan din en maan sikandan te iketelu,

ne ke sikandin diyà te kandan te,

“Kemulu kew ves nehurep he ebpemenhidhizeǥà?

Netengkaan en heeyan su iyan en heini timpu he siak is Kakey te Menusiyà,

ibpalad a ziyà te menge lalung he etew.

42 Enew kew su heini en sikan is etew he ed-akal kedì.

Edsinuǥungen tew.”

43 Ne zutun te kemulu pa egkaǥi si Jesus,

nekeuma si Hudas is sevaha zuen te sepulù wey zezuwa he menge epustul.

Duma zin is menge etew he nengeǥumeenan te ubpit wey lagkut.

Menge suǥù haazà te menge punuan te memumuhat wey menge menunudlù te kesuǥuan wey menge ebmeǥurangen te menge Hudiyu.

44 Si Hudas,

is giya zan diyà te ki Jesus,

migkaǥi zin he zaan ke hengkey is tuus te kegketueni zan ki Jesus,

ke sikandin te,

“Is etew he edhezekan ku,

ne iyan en ebpen-ahaan niw.

Ne zekepa niw en ne purungi niw ventayi ke ed-uwiten niw.”

45 Ne zutun te kebpekeuma ni Hudas,

segugunè din mid-uvayi si Jesus ne migkaǥi te,

“Na!

Menunudlù!”

Ne midhezekan din.

46 Ne midakep dutun te menge etew si Jesus ne mibpekehemenan dan te egawed.

47 Iyan,

sevaha te zaan he etew zutun,

midhulavut din is sundang din ne midtibas din is suluǥuen te lavew he memumuhat ne netenaan haazà diyà te telinga ne nesapla haazà is telinga zin.

48 Ne zutun migkaǥi si Jesus diyà te menge edakep kandin te,

“Tulisan e ve?

Su maan is neǥumeenan kew te menge ubpit wey lagkut is edakep kedì?

49 Kada andew ne zuma a keniyu ziyà te Valey te Megbevayà is ebpenurù ne wazà a keniyu zutun dà dekepa.

Iyan,

egkeulaula heini su egketuman sikan is menge tagnà diyà te insurat he Lalag te Megbevayà.”

50 Ne zutun mid-ewaan sikandin te menge sumusundan din su mibpemelaǥuy zan.

51 Ne zuen dutun kenakan he ebmemalung dà is midtelukun ki Jesus.

Ne edekepen pezem haazà dutun te menge etew,

52 iyan,

midleǥuwat ne nekepelaǥuy sikandin is wazè en seseberen din su netaǥak haazà is malung din he neǥewezan dutun te menge etew.

53 Mid-uwit dan si Jesus diyà te valey ni Keyipas he iyan lavew he memumuhat,

ne zutun netiǥum he zaan is menge punuan he memumuhat,

menge menunudlù te kesuǥuan,

wey is menge ebmeǥurangen te menge Hudiyu.

54 Ne si Pedro,

midtinundug daan asal kenà utew ed-uvey ne ziyè dà medtaman te lama zutun te valey te lavew he memumuhat.

Ne mibpinuu sikandin dutun is ed-amur ziyà te menge guwardya ne midhizazang diyà te hapuy zutun.

55 Ne is menge punuan te memumuhat wey is langun he nengetiǥum he ebmeǥurangen te menge Hudiyu,

ebpen-ehè dan te salà he id-ulug dan ki Jesus su wey zan mehimetayi,

iyan,

wazè dan egkeahà.

56 Mezakel is menge teruen he midsumbung te menge vaal ni Jesus,

iyan,

wazà mengeuyun haazà is ebpemenistiǥus dutun.

57 Ne zutun duen menge teruen he etew he mid-etuvang ne migkaǥi zan is sumbung dan mehitenged ki Jesus,

58 ke sikandan te,

“Nezineg dey heeyan he etew he egkaǥi te,

‘Edrundusen ku heini is simbahan he Valey te Megbevayà he vineelan te etew ne seled te tetelu he andew ebpekevangun ad te veǥu he kenà bineelan te etew,’ ”

ke sikandan.

59 Iyan,

haazà is ebpemenumbung,

kenà daan egkeuyun haazà is kedsumbunga zan ki Jesus.

60 Ne zutun,

midhitindeg diyà te teliwazà is lavew he memumuhat ne migkeǥiyan din si Jesus te,

“Tutuu ve heini is menge sumbung dan mehitenged kenikew?

Hengkey is igketavak nu?”

61 Ne wazà si Jesus medtavak.

Ne mid-uman megkaǥi haazà is lavew he memumuhat te,

“Iyan ke ve kes mibpilì he ibpahadì he Anak te Megbevayà?”

62 Ne zutun midtavak si Jesus te,

“Iyan a,

ne keuzemà,

egkeahà a keniyu is Kakey te Menusiyà he ziyà ebpinuu te zapit te egkekewanan te Megbevayà.

Ne egkeahà a zaan keniyu ziyà te menge ǥapun is ebulus he ebpuun diyà te langit.”

63 Ne zutun,

haazà is lavew he memumuhat,

mibpemindas din is kumbalè din he tuus te utew sikandin nepauk dutun te migkaǥi ni Jesus.

64 nezineg niw en is menge lalag din he utew supak te Megbevayà.

Hengkey is hukum niw?”

Ne zutun migkaǥi is langun he menge zuma zin te zekelà is salà ni Jesus ne kinahanglan he edhimetayan.

65 Ne is menge zuma zutun,

mid-ilevan dan si Jesus,

ne mibedbed dan is mata zin ne midsumbag dan te egkaǥi te,

“Tegnaa nu ke hentei is midsumbag kenikew!”

Ne migewezan sikandin te menge sundaru zutun ne mibpenabpì dan sikandin.

66 Ne si Pedro,

kemulu pa zutun te lama te valey ne zuen bahi he suluǥuen te lavew he memumuhat he mid-uvey ziyà te kandin.

67 Ne hein neehè din si Pedro is edhizazang midtengtengan din ne migkaǥi te,

“Sikew,

duma ka zaan ni Jesus he tigNeserit.”

68 Ne si Pedro,

mibarew zin haazà te,

“Wazè ku hanew ke hengkey is egkeǥiyen nu ne kenè ku zaan egkesavut ke hengkey is ibpesavut nu.”

Ne migawas si Pedro zutun pehendiyà te pultahan te lama.

Ne zutun mid-ukarà is manuk.

69 Ne neehè en maan si Pedro dutun te vahi ne mid-uman megkaǥi haazà is bahi ziyà te menge etew zutun te,

“Heini he etew,

duma eni Jesus.”

70 Iyan,

hein nezineg haazà ni Pedro mibarew zin pa.

Ne hein netegteǥaad dutun,

is menge etew he nerivurun dutun,

migkeǥiyan dan si Pedro te,

“Tutuu iyan he zuma ke zin.

Egketuusan su tigGeliliya ka zaan.”

71 Ne zutun,

mid-amin-amin si Pedro te sapà,

ke sikandin te,

“Siluti a te Megbevayà ke tarù is lalag ku he kenè ku egkekilala heeyan he etew is egkeǥiyen niw.”

72 Ne zutundutun mid-ukarà is manuk te ikezuwa ne human metenuzi ni Pedro sikan is migkaǥi kandin ni Jesus he ke sikandin te,

“Te kenè pe kan ed-ukarà is manuk te kezezuwa,

ne ketetelu ke en ebpekekaǥi he kenà a kenikew egkekilala.”

Ne zutun nekelelendag si Pedro su utew mibmesakit is gehinawa zin.