2 Ne migkaǥi si Jesus diyà te kandin te,

“Heeyan is dekelà he simbahan,

he vatu is imbevaley zuen,

wazà keuzemà minsan sevaha he vatu he ebpekeuntud diyà te sevaha su egkewaǥey heeyan is langun.”

3 Ne hein diyè dan te vuvungan he egngezanan te Ulivuwan,

egkepantew zan sikan is dekelà he simbahan.

Ne mid-insaan si Jesus eni Pedro,

Santiago,

Juan,

wey Andres dutun te wazè dan duma,

4 ke sikandan te,

“Keǥiyi key ke keenu egkehitavù heini is langun wey ke hengkey is egkeulaula he tuus he iyan en timpu he egketuman sikan is langun he migkaǥi nu ǥeina.”

5 Ne migkaǥi si Jesus diyà te kandan te,

“Mebpekevantey kew wey kenè kew mekesundan te teruen he etew

6 su mezakel is ebpemenlepew he egamit te ngazan ku he egkaǥi is kada sevaha zutun he iyan sikandin sikan is mibpilì te Megbevayà he ibpahadì.

Ne mezakel is ebpeketuu te menge tarù dan.

7 Ne emun egkezineg niw ziyà te uvey niw is meǥurub tenged te gira ne egkezineg niw zaan is tudtul te menge gira ziyà te meziyù he tanà,

kenè kew mahandek su kinahanglan he egkeulaula is iring kayi te kenè pa edtepusen heini is timpu.

8 Su ebpekidtebek is sengeinged te zuma zin he inged ne egira is sengeǥinhedian te zuma zin he ǥinhedian.

Egkehitavù is linug diyà te mezakel he menge inged ne zuen menge inged he ebitilen.

Iyan,

heini he egkehitavù,

ne iring te ed-anak he sikan pa ebpuunà is belilit din.

9 Ne sikiyu,

kinahanglan he purungi niw endama is gehinawa niw,

su edekepen kew te menge etew ne ed-uwiten kew zan diyà te hukmanan ne ebuǥelen kew ziyà te menge simbahan dan.

Ebpekeetuvang kew te menge gubirnedur wey menge hadì tenged te kedtuu niw kediey wey niw ikewali is Meupiya he Tudtulanen diyà te kandan.

10 Su te kenè pa egketapus haazà is timpu,

kinahanglan he ihuna ipesavut is Meupiya he Tudtulanen diyà te menge etew ziyà te langun he menge ǥinhedian.

11 Ne zutun te kedekepa keniyu su ed-uwiten kew ziyà te hukmanan,

kenè niw igkesamuk ke hengkey is egkeǥiyen niw su emun dutun kew en,

iyan niw egkekaǥi is ibpekaǥi keniyu te Megbevayà su is menge lalag he egkekaǥi niw zutun ne kenè en keniyu,

kekenà,

lalag he ibpekaǥi keniyu te Waǥas he Mulin-ulin.

12 Ne zutun he timpu zuen menge etew he ibpehimetayan dan is menge suled dan.

Ne zuen daan menge amey he ibpehimetayan dan is menge anak dan.

Ne zuen menge etew he egkuntedahan dan wey ibpehimetayan dan is menge lukes dan.

13 Egkuntedahan kew te langun tenged te sumusundan ku sikiyu.

Iyan,

sikan is edhamen te kedtuu zin kedì taman te ketepusan dutun te menge kemeresayan,

ebeǥayan te untung he wazè din pidtemanan.

14 Ne is egngezanan te melimezang he ebpekekaid,

emun egkeehè niw he ziyè en haazà te simbahan he Valey te Megbevayà he wazà ituǥut kandin,

ne sikan is diyà te prubinsya he Hudiya,

mebpelaǥuy zan pehendiyà te vuntud.

(Is ebpekevasa kayi te tagnà dengan mehitenged kayi,

kinahanglan he sevuta zin.)

15 Ne sikan is etew he egkeserengà diyà te ǥawas te valey zin,

kenè en med-usik-usik pa te timpu te kedseled diyà te valey he egkuwa te minsan hengkey te azen din.

16 Sikan is etew he ziyà egkeserengà te pemuleey zin,

kenè en med-ulì pa ziyà te valey zin te kegkuwa te malung din.

17 Ne zutun he andew,

kehizu utew te menge vahi he memeǥingey wey ebpemenleǥimu su utew zan egkengereǥenan he ebpelaǥuy.

18 Iampù niw ziyà te Megbevayà he kenà heini mekeserengà is kebpelaǥuy zutun te timpu te meǥenew.

19 Su wazè en ebpekerepeng te kemeresayan he egkehitavù dutun he andew.

Ne puun pa te aney en kedlimbaǥa te kelibutan wazè pa meeǥiyi is iring dutun.

Ne emun egkehitavù en haazà ne kenè en egkehitavù pa maan is iring dutun minsan keenu.

20 Midterinan en te Nengazen haazà is timpu te kemeresayan su emun wazà,

ne egkelimas dutun is tivuuk he menusiyà.

Iyan,

tenged te hizu zin te menge pinilì din he menge etew,

midterinan din haazà is timpu te kemeresayan.

21 Ne ke zuen egkaǥi keniyu te,

‘Ahaa niw,

heini en kes hadì he mibpilì te Megbevayà,’

wey ke zuen be egkaǥi te,

‘Heeyan en sikandin,’

ne kenè kew mebpemineg dutun te egkaǥi.

22 Su ebpenlepew is teruen he etew he egkeǥiyen dan he iyan sikandan sikan is hadì he mibpilì te Megbevayà wey ke egkeǥiyen dan be he ebpeneuven sikandan te Megbevayà.

Ne ebpemeehè dan te egkengein-inuwan wey menge singyal su ibpetuu zan pezem te menge tarù dan,

ke egkehimu,

is menge pinilì te Megbevayà.

23 Umba mebpekevantey kew su midtudtul ku en keniyu heini is langun he egkehitavù te wazè pa meulaula.

24 Ne emun egkeiwas haazà is timpu te kemeresayan,

kenè en edsilà is andew ne kenè en daan ed-anlag is bulan.

25 Ne egkengeulug is menge vituen diyà te langit ne egkengehuyung is menge kedesenan diyà te hewhewanan.

26 Ne zutun,

siak is Kakey te Menusiyà,

egkeahà a ziyà te menge ǥapun is ebpekeuma he utew zekelà is gehem ku wey utew merayag is ked-anlag ku.

27 Ne zutun edsuǥuen ku is menge velinsuǥuen ku pehendiyà te heepat he pesaǥì kayi te kelibutan.

Ne edtiǥumen dan is menge pinilì ku he etew he ebpuun te minsan hendei kayi te lumpad te kelibutan.

28 Isipa niw heini is impenurù ku keniyu pinaaǥi te sempità he kayu he igira.

Dini te kenita,

emun ebpeneringsing en is subpang din ne ebpenlumbey en,

egketuenan ta he meǥaan en is gulavung.

29 Ne iring din ded daan,

emun egkeehè niw he egkengetuman en is langun kayi te migkaǥi ku,

egketuenan niw he meǥaan a ebpekelikù.

30 Tenuzi niw is egkeǥiyen ku keniyu:

he emun egkeehè niw he egkengetuman en heini kenè kew pa egkeamin ebpatey taman te kenè pa egkengetuman heini is langun.

31 Egkehanew is langit wey tanà,

iyan,

heini is migkaǥi ku,

kenà mulà egkehanew te minsan keenu.

32 Is Amey tew he Megbevayà,

iyan dà nesayud ke keenu egketuman heini is langun.

Ne ǥawas kandin wazè en nesayud te andew wey uras ke keenu heini egkehitavù.

Is menge velinsuǥuen te Megbevayà diyà te langit,

wazè dan mesayud wey minsan siak is Anak te Megbevayà,

wazà a zaan mesayud.

33 Ne tenged kayi,

mebpekevantey kew ne taǥamtaǥam kew su kenè niw heini egketuenan ke keenu.

34 Su iring a te sevaha he etew he midhipanew he wazè din teleena ke keenu ed-ulì.

Is menge suluǥuen din ne impevantey zin te menge azen din.

Ne mibpemeǥayan din is kada sevaha kandan te ketengdanan he ed-ul-ulahan dan dutun te kedhipanew zin.

Ne migkeǥiyan din is etew he impevantey zin te ǥemawan he kenà sikandin medlipezeng.

35 Umba,

purungpurung kew su wazè niw metueni ke keenu a ebpekeuma is teǥiǥaked te valey,

ke mahapun be,

ke liwazè be te kezukileman,

wey ke egkepkepawè be wey ke edsilè en be is andew.

36 Kinahanglan he kenè ku sikiyu egkeumahan he nekelipezeng dutun te kedtekewtekew ku kedlikù.

37 Heini is egkeǥiyen ku keniyu,

egkeǥiyen ku zaan diyà te langun he etew he mebpekevantey is kada sevaha.”