5 Dutun te menge zuma ni Jesus duen egkaǥi ziyà te kandin he utew mekempet haazà is simbahan he Valey te Megbevayà su mideyzeyanan pinaaǥi te menge mahal he menge vatu he imbevaley zutun wey pinaaǥi te utew meupiya wey mahal he menge inhalad te menge etew ziyà te Megbevayà.

Ne zutun migkaǥi si Jesus te,

6 “Egkeuma is andew he langun kayi te egkeehè niw ne egkezeetan.

Wazà keuzemà minsan sevaha he vatu he ebpekeuntud diyà te sevaha su egkewaǥey heeyan is langun he vatu;

wazà egkesamà keniyan te nesevukan din su is langunlangun keniyan ne egketempag.”

7 Ne mid-insaan dan si Jesus,

ke sikandan te,

“Datù,

keǥiyi key ke keenu egkehitavù heini is langun wey ke hengkey is egkeulaula he tuus he iyan en timpu he egketuman heini is langun he migkaǥi nu ǥeina?”

8 Ne midtavak si Jesus te,

“Mebpekevantey kew wey kew kenà mekesundan te teruen he etew su mezakel is ebpemenlepew he egamit te ngazan ku he egkaǥi is kada sevaha zutun he iyan sikandin sikan is mibpilì te Megbevayà he ibpahadì.

Ne egkaǥi zaan te,

‘Iyan en heini timpu te kedlimasa te Megbevayà te menusiyà,’

ke sikandan.

Iyan,

kenè niw tuuwi su tarù.

9 Ne emun egkezineg niw ziyà te uvey niw is meǥurub tenged te ǥira ne egkezineg niw zaan is tudtul te menge ǥira ziyà te meziyù he tanà ne kenè kew mahandek su kinahanglan he egkeulaula is iring kayi,

iyan,

kenà iyan heini tuus he egketapus en heini is timpu.”

10 Ne mid-uman megkaǥi si Jesus te,

“Su ebpekidtebek is sengeinged te zuma zin he inged,

ne egira is sengeǥinhedian te zuma zin he ǥinhedian.

11 Egkehitavù diyà te minsan hendei is menge mezesen he linug wey mepait he vitil ne ziyà te mezakel he menge inged ebpekeeneb is daru.

Ne zuen egkeehè niw he utew igkeinuinu wey mekehandekhandek he singyal he ebpuun te langit.

12 Iyan,

kayi te kenè pa heini egketuman ne edekepen kew te menge etew ne ebpesipelahan kew zan.

Ibpeetuvang kew zan te menge punuan te menge simbahan te menge Hudiyu ne egkestiguwen kew zan.

Ibpeetuvang kew zaan te menge hadì wey menge gubirnedur tenged te kedsundan niw kediey.

13 Iyan en heini paaǥi te kebpekepesavut niw te Meupiya he Tudtulanen.

14 Heǥeta niw is isip niw he zaan he kenè kew mesemuki ke hengkey is idtavak niw te menge insè dan keniyu.

15 Su iyan e en metau te idtavak niw te menge insè dan.

Ne ibeǥey ku zutun keniyu is ketau te ked-isip-isip wey kew meketavak.

Ne zutun haazà is menge kuntada niw,

kenè dan ebpeketavak te ketezengan niw ne kenè dan daan ebpekepeǥintarù te tutuu he egkeǥiyen niw.

16 Ne zutun he timpu minsan is menge ǥinikanan niw,

is tempezè niw en te pused,

is menge kezuzumahi niw,

wey is menge emiǥu niw,

ne ebpalad dan keniyu ziyà te menge hukmanan.

Ne zuen duma keniyu he egkehimetayan dan.

17 Egkuntedahan kew te langun he menge etew tenged te sumusundan ku sikiyu.

18 Ne minsan pa zutun,

wazà egkelaga ziyà te keniyu.

19 Hamen kew is edsarig kediey su pinaaǥi kayi egkeangken niw is untung he wazà pidtemanan.”

20 Ne mid-uman megkaǥi si Jesus te,

“Ne emun egkeehè niw heini is inged he Hiruselim he egkelingutan en te menge kuntada niw he sundaru ne egketuenan niw he meǥaan en egkezeeti.

21 Ne zutun,

sikan is menge etew he zini te prubinsya he Hudiya,

ne mebpelaǥuy zan pehendiyà te menge vuntud.

Ne is menge etew kayi te inged he Hiruselim,

ne kinahanglan he mebpelaǥuy zan daan.

Ne sikan is menge meǥinged te menge unayan dini te uvey,

ne kenè dan med-aput dini te inged.

22 Su iyan en haazà sikan is timpu he netagnà dengan he zutun edsilutan te Megbevayà is menge kuntada zin he etew.

Ne insurat heini zuen te ebpemeneuven dengan te Megbevayà.

23 Ne zutun he andew,

kehizu utew te menge vahi he memeǥingey wey ebpemenleǥimu su utew zan egkengereǥenan he ebpelaǥuy!

Utew gerabi he kemeresayan is egkehitavù kayi te inged su edsilutan en te Megbevayà is menge Hudiyu.

24 Su heini is menge Hudiyu,

is duma kandan,

ne egkepatey zutun te ǥira,

ne is samà,

ne edekepen ne ed-uwiten diyà te menge meziyù he inged.

Ne zutun,

heini is Hiruselim he inged te menge Hudiyu,

ne edtekutakan te menge etew he kenà menge Hudiyu taman te ebpengelinteuwan te Megbevayà he mekeengked dan.

25 Ne zutun duen egkeehè niw he singyal ziyà te andew,

vulan,

wey menge vituen.

Ne zini te kelibutan ne ebpekehuyab is gehinawa te tivuuk he menusiyà su egkezineg dan dutun is utew subra he kedselenuhug te zaǥat wey ebpemeteltelukuney he menge zezekelà he vaǥel.

26 Ne zuen en dutun menge etew he egkengevidtawan te kegkehandek su egkengeseeng ke hengkey en is egketemanan te langun he ebpeebuten he egkengehitavù dini te kelibutan su egkengehuyung is minsan hengkey he merayag diyà te langit.

27 Ne zutun,

siak is Kakey te Menusiyà,

egkeahà a ziyà te menge ǥapun is ebpekeuma he utew zekelà is gehem ku wey utew merayag is ked-anlag ku.

28 Ne emun egkepuun en heini egkengetuman is langun he migkaǥi ku,

ne andam kew wey keǥalew kew su meǥaan en is kedlibriya keniyu te Megbevayà.”

29 Ne impezineg kandan ni Jesus is sempità,

ke sikandin te,

“Isipa niw is menge kayu,

lavew en is kayu he igira

30 su zini te kenita emun ebpeneringsing en is subpang din ne ebpenlumbey en,

egketuenan ta he meǥaan en is gulavung.

31 Ne iring din ded daan,

emun egkeehè niw he egkengetuman en is langun kayi,

egketuenan niw he meǥaan en is kedhedii te Megbevayà te menusiyà.

32 Tenuzi niw is egkeǥiyen ku keniyu he emun egkeehè niw he egkengetuman en heini,

kenè kew pa egkeamin ebpatey taman te kenè pa egkengetuman heini is langun.

33 Egkehanew is langit wey tanà,

iyan,

is migkaǥi ku,

ne kenà mulà egkehanew te minsan keenu.”

34 Ne ke si Jesus te,

“Uram kew wey kew kenà kayi zà egketaman te kegkebibu wey kebpemenginum wey te kedlaǥud niw te menge kelibutanen he menge kinahanglan niw.

Su emun kenè kew ed-uram ne egketik-awan kew egkesaut te andew te kedlimasa te Megbevayà te menusiyà.

Ne egkeiring kew te egketelebpì he rumat.

35 Su iring keǥaan kayi is kegkeuma kayi te andew te tivuuk he menusiyà.

36 Umba,

mebpekevantey kew,

ne layun kew ampù,

su pinaaǥi zà te ked-ampù ne edlig-enan kew te Megbevayà ne kenè kew egkekeizan kayi te langun he egkengeseǥazan niw,

ne human kenè kew zutun egkeeled ke ebpekeetuvang kew kedì,”

ke si Jesus.

37 Ne kada andew zutun ne ebpenurù si Jesus diyà te simbahan he Valey te Megbevayà.

Ne te kada mezukilem ne edhendiyà sikandin te vuvungan he egngezanan te Ulivuwan su zutun sikandin edhizeǥà.

38 Ne is langun he etew zutun te inged,

ne edselemselem dan edhendutun te Valey te Megbevayà su ebpemineg dan te menge penurù din.