Is Ketenged ni Jesus
20
Ne sevaha he andew zutun ne midlikù si Jesus diyà te zekelà he simbahan he egngezanan te Valey te Megbevayà ne mibpenurù din is menge etew,
ne impesavut din kandan is Meupiya he Tudtulanen.
Ne zutun mibeyaan sikandin te punuan te menge memumuhat wey menge menunudlù te kesuǥuan wey is menge ebmeǥurangen te menge Hudiyu,
2 ne mid-insè dan kandin te,
“Heini is langun he ed-ul-ulahan nu zini te simbahan,
hengkey is ketenged nu te ked-ulaula kayi,
wey hentei is mibeǥey kenikew te ketenged wey nu meulaula?”
3 Ne midtavak si Jesus te,
“Duen daan id-insè ku keniyu,
ne huna kew tavak te insè ku.
4 Hentei is mibeǥey ki Juan Megbebewtismu te ketenged te kebpemewtismu.
Megbevayè be wey ke etew zà?”
5 Ne zutun mibpein-inseey zan is egkaǥi te,
“Emun egkeǥiyen tew he impenaub ki Juan te Megbevayà ne id-insè din ke maan is wazè tew tuuwi si Juan.
6 Ne emun egkeǥiyen tew he isip dà te etew,
ne egkepeukan kiw te menge etew.
Ne edtulengen kiw zan te vatu wey kiw zan mehimetayi su is menge etew,
edtuuwan dan he ebpeneuven si Juan te Megbevayà.”
7 Ne zutun iyan dà ingketavak dan ki Jesus is,
“Kenè dey egketuenan.”
8 Ne migkaǥi si Jesus diyà te kandan te,
“Kenè ku zaan egkeǥiyen keniyu ke hengkey is ketenged ku te kebaal kayi te langun.”
Annas Questions Jesus's Authority
Is Sempità Mehitenged te Menge Etew he Impeelima te Perasan
9 Ne zutun impezineg ni Jesus te menge etew is sempità su ibpesavut din kandan is keaǥi te ed-ul-ulahan te Megbevayà.
Ke sikandin te,
“Duen etew he zuen din bevesukà he mibpemulaan din te menge ǥawed he paras.
Ne mibpeelimahan din te menge etew ne midhipanew ziyà te sengeǥinhedian ne neuǥet sikandin dutun.
10 Ne hein tiraǥun en dutun,
midsuǥù din is suluǥuen din diyà te impemeelima zin su wey meveǥayi sikandin te vahin din dutun te paras.
Iyan,
hein nekeuma haazà is suluǥuen ne mibpemuǥel zutun te menge ed-elima ne impeulì dan he wazà beǥayi.
11 Ne haazà is teǥiǥaked,
midsuǥù en maan te sevaha pa he suluǥuen din he impehendutun din te menge impeelima zin.
Ne mibpemuǥel zan ded maan haazà,
ne mid-eled-eled dan,
ne impeulì dan he wazà daan beǥayi.
12 Ne mid-uman en maan medsuǥù haazà is teǥiǥaked te sevaha pa maan he suluǥuen din ne mibuǥel zan en maan haazà taman te nengepelian ne zutun midsegseg dan sikandin.
13 Ne migkaǥi haazà is teǥiǥaked te perasan te,
‘Hengkey is ed-ul-ulahan ku?
Iyan is:
iyan ku en edsuǥuen is mahal ku he anak su kenè dan egkeaku te ebpesipala sikandin,
kekenà,
edtehuzen dan.’
14 Iyan,
hein naahà dutun te menge impeelima te perasan haazà is anak te teǥiǥaked ne mibpevitbitiyereey zan te,
‘Na!
Iyan en heini sikan is anak din;
kuwa kew en su edhimetayan tew ne iyan kiw ebpekeangken kayi te perasan!’
15 Ne migewezan dan ne mid-uwit dan diyà te ǥawas te perasan ne midhimetayan dan.”
Ne zutun migkaǥi med-uman si Jesus te,
“Ne ǥeina te iyan haazà mid-ulaula zutun te impemeelima te perasan,
hengkey is ed-ul-ulahan kandan dutun te teǥiǥaked?
16 Iyan is:
ebeyaan din haazà is menge etew ne ebpenhimetayan din,
ne ebpeelimahan din haazà is perasan din te selakew en maan he menge etew.”
Ne hein nezineg dutun te menge etew he ebpemineg ki Jesus ne utew zan neseeng ne ke sikandan te,
“Kenà heeyan ed-ul-ulahan te Megbevayà!”
17 Iyan,
midtengtengan ni Jesus sikandan ne ke sikandin te,
“Emun iyan egkeisip niw he kenà heini ed-ul-ulahan te Megbevayà hengkey is kedsevuta niw zuen te insurat dengan he Lalag te Megbevayà he edhenduen te,
‘Sikan is batu he idhiman te valey,
mid-engkezan te menge pandey su kunaan dan ke wazè din pulus,
iyan,
nehimu heini ǥuntaan he vatu he iyan dà ebpekepurung te valey.’ ”
Ne impelaus ni Jesus is lalag din te,
18 “Ne haazà he vatu,
ne emun egkeuluǥan te etew ne egkepurung egkerupet is egkeulug dutun.
Iyan,
ke zuen etew he egkeuluǥan dutun te vatu ne egkepurung egkeapug is lawa zutun te egkeuluǥan.”
Is Kebayad te Vuhis Diyà te Hadì te Ruma
19 Ne zutun,
is menge menunudlù te kesuǥuan wey menge punuan te menge memumuhat te Megbevayà,
nesavut dan he iyan din sikandan egkeǥiyen dutun te sempità,
ne ed-isipen dan dutun pezem edekepa si Jesus,
iyan,
nahandek dan te mezakel he menge etew.
Parable of the Vineyard and Tenants
20 Umba,
puun dutun ne ebpengahaan dan ke ebmenmenuwen dan te kedekepa sikandin.
Duen menge sinuhulan dan he ibpepeniid dan ki Jesus.
Ne zuen daan menge insà kayi te etew ki Jesus he uvag kun menge hustu he insà.
Ne iyan tuyù dan is:
emun ebpekesupak si Jesus te kesuǥuan dan pinaaǥi te menge tavak din ne egkehimu he ibpalad sikandin diyà te gubirnedur he Rumanu wey mehukumi sikandin.
21 Ne haazà is menge etew he ibpepeniid ki Jesus,
migkaǥi zan diyà te kandin te,
“He Zatù,
netuenan dey he wazè nu ibpelavi he minsan hentei he etew ne tutuu is egkeǥiyen nu wey hustu is kebpenurù nu te ebpeveelan kenitew te Megbevayà.
22 Hengkey is isip nu?
Ebpekesupak ki ve te kesuǥuan tew ke ebayad ki te vuhis diyà te hadì tew ziyà te inged he Ruma?”
23 Ne netuenan ni Jesus is mezaat he ed-ul-ulahan dan ne ke sikandin diyà te kandan te,
24 “Ipeehè niw kediey is selapì he ibayad niw te vuhis.”
Ne hein naahà ni Jesus haazà ke sikandin te,
“Hentei ki zagwey kayi wey hentei ki ngazan heini is nekesurat kayi?”
Ne ke sikandan te,
“Dagwey wey ngazan te hadì diyà te inged he Ruma.”
25 Ne ke si Jesus te,
“Ne emun kandin,
ne iyan egkesuatan din,
iveǥey niw ziyà te kandin;
ne iveǥey niw zaan diyà te Megbevayà is kandin he azen.”
26 Ne haazà is menge etew he ibpepeniid ki Jesus,
wazè dan dutun te etuvangan te menge etew neǥewezan te intavak ni Jesus he igkehimuwa zan kandin te edakep.
Umba,
wazè en nekaǥi zan,
ne utew zan nengeinuinu te tavak din kandan.
Paying Taxes to Caesar
Is Ketudluanan Mehitenged te Kegkevanhew
27 Ne zutun mid-uvey ziyà te ki Jesus is menge Sedusiyu.
Ne is menge Sedusiyu,
iyan kes menge Hudiyu he edtuu he kenà egkengevanhew keuzemà is minsan hentei.
Ne migkaǥi zan diyà te ki Jesus,
28 ke sikandan te,
“Menunudlù,
impenurù dengan ni Moises he penenglitan,
ke zuen maama he zuen din esawa ne ebpatey haazà is maama he wazà mevuwad,
kinahanglan he ebpemeluwen te suled dutun te maama haazà is ipag din su wey mevuwad haazà is minatey pinaaǥi kandin.
29 Ne zengan duen pitu he menge maama he teltelehazi.
Mibpengesawa haazà is kakey,
iyan,
minatey he wazà med-anak.
30 Ne mibpemalu zutun te ikezuwa haazà is ipag dan ne minatey zaan he wazà mevuwad.
31 Ne iring din ded daan haazà is iketelu.
Ne henduen dà duen su naamin haazà is pitu ikevalu zutun te vahi ne wazà mevuwad.
32 Ne te huziyan dutun minatey zaan haazà is bahi.
33 Ne keuzemà te kegkevanhew te menge etew,
hentei is hustu he esawa zutun te vahi?
Su haazà is pitu he teltelehazi,
pudu zan man nekeesawa kandin.”
34 Ne migkaǥi si Jesus te,
“Is menge etew kayi te kelibutan,
ne ebpees-eseweey,
35 iyan,
haazà is menge etew he ed-isipen te Megbevayà he zait he ebenhawen he ibpeubpà diyà te langit,
kenè dan mulà keuzemà diyà te langit ebpees-eseweey.
36 Iyan dan kenà ibpees-eseweey su iring dan en te menge velinsuǥuen te Megbevayà ne kenè dan en ebpatey.
Menge anak dan en te Megbevayà su nevanhew zan en.
37 Ne pinaaǥi te insurat dengan ni Moises,
egkesavut ta he egkengevanhew is menge minatey su minsan te neuǥet en dutun he minatey si Abraham,
si Isaak,
wey si Hakub,
dutun te insurat ni Moises mehitenged te sagbet he egkeregreg migkaǥi sikandin he is Megbevayà,
ne iyan ed-ezapen ni Abraham wey si Isaak wey si Hakub,
38 he ke và dà egkeǥiya,
kemulu zan pa ed-ezapen is Megbevayà,
minsan te minatey zan en.
Su is langun he menge minatey,
kemulu zan pa uuyag diyà te Megbevayà.”
39 Ne zutun migkaǥi is duma he menge menunudlù te kesuǥuan,
ke sikandan te,
“Utew venar heeyan is migkaǥi nu.”
40 Umba nekaǥi zan heini su kenè dan en ebpekesukul pa maan he ed-insà ki Jesus.
Is Hadì he Mibpilì te Megbevayà he Kevuwazan ni David
41 Ne migkaǥi si Jesus diyà te kandan te,
“Maan is egkehimu he ibpenurù te menge menunudlù te kesuǥuan he sikan is edteǥazan he ibpahadì,
ne kevuwazan dà ni Hadì David?
42 Su ziyà te libru he Salmo,
duen insurat ni Hadì David he edhenduen te,
‘Migkaǥi is Megbevayà diyà te Nengazen ku te,
“Kayi ka pinuu te zapit te egkekewanan ku
43 taman te kenè ku pa ibpeluhud diyà te kenikew
is menge kuntada nu.” ’ ”
44 Ne impelaus ni Jesus haazà is lalag din,
ke sikandin te,
“Emun migkaǥi ni David he Nengazen din sikan is ebperetengen he ibpahadì,
ne egkehimu ve he kevuwazan dà duen ni David?”
Is Menge Etew he Uvag Edsunud te Megbevayà
45 Ne zutun te kemulu pa ebpemineg te lalag ni Jesus haazà is mezakel he menge etew,
ne ke sikandin diyà te menge sumusundan din te,
46 “Andam kew limbe wey kew kenà mekeiring te menge menunudlù te kesuǥuan su iyan dà egkesuatan dan is kedhiphipanew he memelayat is kemisula he edtehuzen sikandan te menge etew emun diyè dan te mirkadu.
Ne emun diyè dan te simbahan egkesuatan dan he iyan sikandan ibpepinuu ziyà te ebpepinuuwan te lavew he menge etew.
Ne egkesuatan dan daan he utew zan metahud ke edtelavuk dan te keemuran.
47 Ne heini is menge menunudlù te kesuǥuan,
edlimbungan dan is menge valu he vahi wey zan maangken is menge valey zutun te menge vahi.
Ne utew meluǥayad is ked-ampù dan he iyan idtambun dan te mezaat he vaal zan.
Utew edekelà is silut te Megbevayà kandan keuzemà.”