3 Egkesuat pezem sikandin he mekeahà ki Jesus,

iyan,

kenè din egkeahà geina te nepurung en si Jesus melinguti te menge etew ne mevavà daan he etew si Sekiyu.

4 Ne iyan mid-ulaula ni Sekiyu is:

mibpelelaǥuy ziyà te egkehunaan ne mibpemenahik te kayu he egngezanan te sikemur he egkeseǥazan ni Jesus su wey zin mepurungi te ed-ahà si Jesus ke edsaǥad dutun.

5 Ne hein nekeuma si Jesus dutun te puun te kayu he mibpemenehikan ni Sekiyu ne midteren ne midlingahà ne ke sikandin te,

“He Sekiyu,

gaanggaan ke en penaug keniyan su kinahanglan he ziyan a ebpemenahik te valey nu ǥuntaan.”

6 Ne zutun ne migaanggaan mebpenaug si Sekiyu ne midlimùlimù ki Jesus he utew egkelipey.

7 Ne hein nezineg haazà te menge etew is lalag ni Jesus diyà te ki Sekiyu ne wazè dan mesuati ne pesikaǥi sikandan te,

“Maan is ebpemenahik si Jesus diyà te valey te etew he utew mesinupaken te Megbevayà?”

8 Ne si Sekiyu,

hein nekeuma zan engki Jesus diyà te valey zin ne midhitindeg sikandin is egkaǥi te,

“Ibeǥey ku is ketengà kayi te ketiǥeyunan ku ziyà te menge ayuayu.

Ne minsan hentei he etew he nelimbungan ku zengan,

ne id-ulì ku ziyà te kandin is keheepat egketakep haazà is nekuwa ku.”

9 Ne migkaǥi si Jesus diyà te kandin te,

“Sikew wey menge zuma nu zini te valey,

edlibriyen kew ǥuntaan te Megbevayà te silut tenged te menge salè niw su mid-iringan niw ǥuntaan is kepuun niw he si Abraham su midtuu kew te Megbevayà.

10 Ne siak is Kakey te Menusiyà,

iyan inhendini ku te kelibutan su wey ku melibri te silut is langun he nemekesuwey te hustu he ibayà.”

11 Ne haazà is menge etew he nemekezineg dutun te menge lalag ni Jesus,

impezineg din pa kandan is sempità.

Uvey zan en te inged he Hiruselim ne tenged dutun kunaan te menge etew ke ebpuunè en si Jesus edhadì.

12 Ne tenged dutun migkaǥi zin heini is sempità.

Ke sikandin te,

“Duen sevaha he prinsipi he midtawag te lavew he hadì diyà te sengeǥinhedian su edhimuwen sikandin he hadì dutun te kandin he inged.

Ne emun egketapus haazà ne human ebpekeulì.

13 Ne hein meǥaan en sikandin edhipanew pehendiyà te sengeǥinhedian,

mid-umew zin is sepulù te menge suluǥuen din ne kada sevaha zutun,

mibeǥayan din te selapì.

Ne neked-iiring is kezekelà te selapì he imbeǥey zin te kada sevaha.

Ne migkaǥi sikandin diyà te kandan te,

‘Heini ve is selapì he ibpiyal ku keniyu,

ne iyan kew en metau te ked-iseg din kedekelà taman te kenè e pa ebpekeulì dini,’

ke sikandin.

14 Iyan,

is menge meǥinged dutun te inged te prinsipi,

ne ingkeepes dan sikandin,

ne hein migenat en,

duen midsuǥù dan he ibpetelukun kandin wey zan ikepesayud is lavew he hadì dutun te ebeyaan te prinsipi he kenè dan igkesuat he iyan mekehadì kandan haazà is prinsipi.

15 Ne minsan pa zutun nehimu ǥihapun he hadì haazà is prinsipi ne zutun te kebpekeulì din ne segugunè din mid-umew sikan is sepulù he impetipig din te selapì su ed-ahaan din ke sengemenu is uswag te selapì te kada sevaha.

16 Ne migkaǥi is nehuna te,

‘Hadì,

kesepulù metakep is selapì nu.’

17 Ne midtavak haazà is hadì te,

‘Utew meupiya heeyan.

Meǥied ke ves iyan.

Ne ǥeina te egkeseriǥan ka te minsan deisek he selapì ne iyan suhul ku kenikew is iyan ku sikew ibpezumala te sepulù he inged.’

18 Ne migkaǥi haazà is ikezuwa he suluǥuen te,

‘Hadì,

kelelima metakep is selapì nu.’

19 Ne midtavak haazà is hadì te,

‘Iyan ku sikew ibpezumala te lelima he inged.’

20 Ne zutun mid-uvey haazà is iketelu he suluǥuen ne ke sikandin te,

‘Heini zed sikan is selapì nu he impiyal nu kedì.

Midtegteǥaman ku tengesa ne intaǥù ku

21 su ingkehandek ku sikew,

su is egkekaǥi nu ne idteǥel nu,

ne ebperateng ka te uswag te ibpiyal nu te zuma nu.

Ne iring ded daan te ibpepemula nu su ebperetengen nu is abut.’

22 Ne midtavak haazà is hadì te,

‘Lalung ke ves he suluǥuen!

Heeyan dà te menge lalag nu ne mibpesavut he nekesalè ke en kediey.

Su netuenan nu ves he is egkekaǥi ku,

ne idteǥel ku,

ne is ibpiyal ku,

ne ebperetengen ku is uswag din,

ne is ibpepemula ku ne ebperetengen ku is abut din.

Ne utew venar heeyan.

23 Ne maan is wazè nu ipeutang is selapì ku wey mebpursintuwi wey medekelà is egkekuwa ku kayi te kedlikù ku?’

24 Ne zutun migkaǥi haazà is hadì diyà te menge etew he ebpemenhithitindeg dutun te,

‘Kuwaa niw is selapì diyà te kandin ne iveǥey niw ziyà te nekepeuswag te kesepulù metakep!’

25 Ne migkaǥi zan te,

‘Duen en kandin su kesepulù metakep sikan is uswag te impetipiǥan nu kandin.’

26 Ne midtavak haazà is hadì te,

‘Benar is egkeǥiyen ku keniyu he sikan is egkeseriǥan te insarig kandin,

ed-umanan pa.

Iyan,

sikan is kenà egkeseriǥan,

edhewien pa ziyà te kandin minsan is deisek he insarig kandin.’

27 Ne mid-uman megkaǥi haazà is hadì te,

‘Ne sikan is menge etew he kenè dan egkesuat he iyan a mekehadì kandan,

ne uwita niw zini ne penhimetayi niw sikandan dini te etuvangan ku.’ ”

28 Ne hein neipus ni Jesus te egkaǥi haazà is sempità ne midlaus dan is edhipanew petekezeg diyà te Hiruselim.

29 Ne hein uvey zan en diyà te inged he Bitpagi wey ziyà te inged he egngezanan te Bitanya he ebpeketekezeg dutun te vuvungan he egngezanan te Ulivuwan,

ne midsuǥù ni Jesus is dezuwa te menge sumusundan din.

30 Ke sikandin te,

“Hendutun kew te inged he egkeumahan tew ne emun ebpekeuma kew zutun,

ne egkeehè niw is intagkes he asnu he nati he wazè pa meuntuzi.

Hekazi niw ne uwita niw zini.

31 Ne ke zuen ed-insà keniyu ke maan is edhekazan niw,

kaǥi kew te,

‘Egkinehenglanen heini te Nengazen tew he si Jesus.’ ”

32 Ne haazà is midsuǥù din,

hein nekeuma zan dutun ne wazè en medhehelinà sumalà is nekaǥi ni Jesus.

Ne neehè dan haazà is asnu zutun.

33 Ne hein edhekazan dan en haazà is asnu ne migkaǥi is menge teǥiǥaked dutun te,

“Maan is edhekazan niw heeyan?”

34 Ne midtavak dan te,

“Egkinehenglanen heini te Nengazen tew he si Jesus.”

35 Ne zutun mid-uwit dan diyà te ki Jesus haazà is asnu.

Ne mibelhenan dan haazà te menge kumbalè dan ne impeuntud dan sikandin.

36 Ne zutun tenged te ibpaahà te menge etew is dekelà he kedtahud dan ki Jesus,

impendempas dan is menge impenamput dan diyà te ibayè din.

37 Ne hein edtupang dan en dutun te vuvungan he Ulivuwan su uvey zan en diyà te inged he Hiruselim,

ne langun dutun te menge sumusundan din he nemenduma kandin,

utew zan nengelipey he edhabet edalig te Megbevayà tenged te langun he nengeehè dan he menge egkengein-inuwan he mibeelan ni Jesus.

38 Ke sikandan is edalig te,

“Deliǥa is hadì he ebpekeuma he midsuǥù te Nengazen!

Melinew en is kedepitè tew te Megbevayà!

Deliǥa is Megbevayà diyà te langit!”

39 Ne zutun te mezakel he menge etew he nengetiǥum dutun,

duen menge Perisiyu.

Ne migkaǥi zan diyà te ki Jesus te,

“Dewaya nu heeyan is menge sumusundan nu.”

40 Ne zutun midtavak si Jesus te,

“Kenà egkehimu su emun ed-engked dan is ebpendalig ne iyan edsambey he ebpendalig is langun keniyan te menge vatu su utew kinahanglan guntaan he zuen ebpendalig.”

41 Ne midlaus ensi Jesus pehendutun te inged he Hiruselim ne hein neehè din en haazà is inged ne midsineǥawan din su utew sikandin nehizu te menge meǥinged dutun.

42 Ke sikandin te,

“Angin pezem ke netuenan niw zà ke hengkey is hustu he ed-ul-ulahan su wey zuen kelinew ziyan te inged niw,

iyan,

kenè niw en guntaan egketuenan!

43 Ne zuen andew he zutun egkeumahan kew te menge kuntada niw ne egkelingutan kew ne edtebeken kew zan ne kenè kew ebpekeǥawas dutun.

44 Ne edèdeetan dan is menge valey niw wey kutè niw ne langun niw te menge etew,

ne egkeǥerà ne wazà edresik keniyu.

Ne is menge vatu he imbevaley keniyan,

wazà minsan sevaha he ebpekeuntud diyà te sevaha su egkewaǥey is langun.

Ne egkeulaula heini su wazè niw seǥipaa he iyan heini sikan is timpu te kegkehizu keniyu te Megbevayà.”

45 Ne hein nekeuma si Jesus diyà te Hiruselim ne midlaus sikandin diyà te zekelà he simbahan he egngezanan te Valey te Megbevayà.

Ne midseled sikandin dutun ne impemeawè din is menge etew he ebpememelegyà dutun.

46 Ne ke sikandin diyà te kandan te,

“Awè kew kayi su zuen insurat he Lalag te Megbevayà he edhenduen te,

‘Is baley ku,

ne egngezanan he Valey he Elempuanan.’

Ne sikiyu,”

ke si Jesus,

“nasì niw veeli he ubpeey te ebpemenlimbung.”

47 Igenat dà dutun ne kada andew ne ebpenurù si Jesus dutun te zekelà he simbahan.

Ne is menge punuan dutun te menge memumuhat te Megbevayà,

wey is menge menunudlù te kesuǥuan,

wey is ebmeǥurangen te menge Hudiyu,

ne egkesuatan dan pezem si Jesus te edhimatey.

48 Iyan,

kenè dan egkeǥaanggaan te edhimatey sikandin su is langun he menge etew,

ne utew zan egkengevenari he ebpememineg kandin.