Is Hangyù te Valu he Vahi
18
Ne zuen en maan sempità he impezineg ni Jesus te menge sumusundan din.
Ibpesavut din kandan dutun he kinahanglan he kenè dan bungasa te layun ked-ampù ne kenà daan med-engked he edsarig te Megbevayà.
2 Ne ke sikandin te,
“Duen huwis diyà te sengeinged;
ne haazà is huwis,
ne kenà egkehandek te Megbevayà ne wazè din daan kedtahud te minsan hentei he etew.
3 Ne zutun te inged ne zuen daan balu he vahi he layun ebpehendutun te huwis su edhangyù he ebpetavang.
Ke sikandin dutun te huwis te,
‘Tevangi a kenikew su wey kenà meileg te kuntada ku is menge azen ku.’
4 Ne neuǥet en haazà he kenà edseǥipaan dutun te huwis is hangyù dutun te vahi.
Ne ǥeina te neuǥet en is layun kedlikùlikù dutun te vahi he edhangyù diyà te kandin,
ne neisip dutun te huwis is,
‘Minsan wazè ku kehandek te Megbevayà ne wazè ku zaan kedtahud te minsan hentei etawa,
5 edtevangan ku nasì heini is bahi su wey mekeengked is ed-uringer kedì.’ ”
6 Ne ke si Jesus te,
“Isipa niw is mid-ulaula zutun te huwis he kenà pezem metazeng is kedhusey zin.
7 Su emun nehimu he midtevangan din haazà is bahi,
iyan pe be kenà tevangi te Megbevayà sikiyu is menge nengepilì din he etew he ebpenigudu ed-ampù diyà te kandin te mezukilem wey maandew.
8 Egkeǥiyen ku keniyu he utew meǥaan is kedtevangi zin keniyu.
Kenà ebungasen is Megbevayà he edtavang keniyu.
Iyan,
keuzemà emun edlikù a is Kakey te Menusiyà dini te kelibutan mezelag dà is etew zutun he neketuu kedì.”
Is Ampù te Perisiyu wey Menunukut te Vuhis
9 Ne sengeandew maan dutun ne impezineg ni Jesus is sempità.
Ne heini is sempità,
ne iyan egkesuǥat is menge etew he kunaan dan ke iyan dan dà memeupiya is ulaula ne edsudien dan is langun he menge zuma he etew.
10 Ne ke si Jesus te,
“Duen dezuwa he etew he midhendiyà te zekelà he simbahan he Valey te Megbevayà su ed-ampù dan.
Ne is sevaha zutun,
ne Perisiyu,
ne is sevaha,
ne menunukut te vuhis.
11 Ne midhitindeg haazà is Perisiyu ne mid-ampù pinaaǥi te ǥehinawa zin,
ke sikandin te,
‘Megbevayà,
ebpeselamat a kenikew su kenà a iring te zuma.
Kenà a leǥezen;
kenà a ebpenlimbung;
kenè ku edselselaan is esawa ku.
Ebpeselamat a zaan kenikew su kenà a iring keniyà te limbungan he menunukut te vuhis.
12 Kezezuwa a edsalang te kegkaan te sengesimana ne ibeǥey ku ziyà te kenikew is ikesepulù he vahin te langun he egketiǥeyunan ku!’
ke sikandin.
13 Iyan,
haazà is sevaha he etew he menunukut te vuhis,
ne mibpekeziyù sikandin is ebpekezuzungul ne egkepenempaling din is kumeng din su utew neseeng.
Ne mid-ampù sikandin diyà te Megbevayà he egkaǥi te,
‘Megbevayà,
ikehizu a utew kenikew is sevaha he etew he mekesesalà!’ ”
14 Ne ke si Jesus dutun te,
“Benar is egkeǥiyen ku he haazà is menunukut te vuhis,
hein mid-ulì diyà te valey zin ne wazè en isipa te Megbevayà is salè din su nepesaylu en.
Iyan,
kenà iring dutun haazà is gelbuwen he Perisiyu su is etew he kunaan din ke utew lavew sikandin diyà te etuvangan te Megbevayà,
ne ebminusen sikandin te Megbevayà,
iyan,
is etew he netuenan din he utew sikandin mekesesalà,
ne ibpelavew sikandin te Megbevayà.”
Parable of the Pharisee and Tax Collector
Si Jesus wey kes Dezeisey he Menge Vatà
15 Ne sevaha maan he andew ne zuen menge etew he mid-uwit dan is menge anak dan he zezeisey pa ziyà te ki Jesus wey zin mezepeneti te palad din wey mepenubtuvazi.
Ne is menge sumusundan ni Jesus,
midawey zan haazà is menge etew.
16 Iyan,
si Jesus,
mid-umew zin diyà te kandin haazà is menge vatà ne ke sikandin diyà te menge sumusundan din te,
“Ipehendini niw te kediey heeyan is menge vatà;
ne kenè niw zewaya su is etew he zuen din kedsarig he iring te kedsarig te vatà ne iyan ebpekepahadì te Megbevayà.
17 Benar is egkeǥiyen ku keniyu he ke zuen etew he kenà iring is kedsarig din te Megbevayà te kedsarig te zezeisey he vatà,
ne kenà egkehedian haazà is etew te Megbevayà.”
Sikan is Sepian he Egalen
18 Ne zuen timpu he zuen sevaha he punuan he Hudiyu he mid-insà ki Jesus te,
“He Zatù,
utew meupiya is menge ulaula nu.
Hengkey is ed-ul-ulahan ku wey a meveǥayi te untung he wazà pidtemanan?”
19 Ne midtavak si Jesus,
ke sikandin te,
“Maan is egkaǥi ka he meupiya is ulaula ku su sebsevaha zà is meupiya is menge ulaula zin ne iyan is Megbevayà.
20 Netuenan nu sikan is menge suǥù te Megbevayà he imbilinbilin kenitew he iyan is:
kenè nu selselai is esawa nu;
kenè ka mebunù;
kenè ka mebpenakew;
kenè ka medtarùtarù diyà te hukmanan;
ne tehuza nu is amey nu wey iney nu.”
21 Ne midtavak haazà is maama ziyà te ki Jesus,
ke sikandin te,
“Menunudlù,
is langun keniyan,
mibenteyanan ku ne wazè ku nesupak puun pa te vatè e pa.”
22 Ne hein nezineg ni Jesus haazà,
migkeǥiyan din te,
“Duen nu pa kurang;
iyan is:
ulì ka ne ivelegyè nu is langun he azen nu,
ne is halin,
ipemeǥey nu ziyà te egkengeayuayu ne edsepian ka ziyà te langit.
Ne ke egkeipus nu heeyan,
likù ka zini wey ka mekesundan kediey.”
23 Ne hein nezineg dutun te etew is sambag ni Jesus ne utew mibmesakit is gehinawa zin su zekelà is ketiǥeyunan din.
24 Ne zutun midtengtengan sikandin ni Jesus ne ke si Jesus te,
“Utew mereǥen te sepian he etew is kebpesakup din te Megbevayà wey mehedii sikandin te Megbevayà.
25 Kenè din egkehimu su melemu pa te langgam he kemilyu is kedseled din diyà te vudsi te raǥum,
kenà te sepian he etew te kebpesakup din te Megbevayà wey sikandin mehedii.”
26 Ne hein nezineg heini te menge etew,
ke sikandan te,
“Ne emun kenà egkehimu te sepian ne kenè bes egkehimu te minsan hentei is ked-angken te untung he wazà pidtemanan.”
27 Ne midtavak si Jesus te,
“Kenà iyan egkehimu te etew,
iyan,
egkehimu mulà te Megbevayà he meveǥayi sikandan te untung he wazà pidtemanan su egkehimu zin is langun.”
28 Ne zutun migkaǥi si Pedro te,
“Sikami,
mid-ewaan dey is langun he menge azen dey wey key mekesunud kenikew.”
29 Ne ke si Jesus te,
“Benar is egkeǥiyen ku he emun duen etew he mid-ewaan din is baley zin,
is esawa zin,
is menge suled din,
is menge ǥinikanan din,
wey is menge anak din su wey zin ikepesavut te menge etew is kedhedii kandan te Megbevayà,
30 ne utew zekelà is suhul te Megbevayà kandin te kemulu pa sikandin dini te kelibutan ne keuzemà te timpu te kedhukum te Megbevayà,
ebeǥayan sikandin te untung he wazà pidtemanan.”
Is Iketelu he Kegkeǥiya ni Jesus te Kemetayen Din
31 Ne zutun migkeǥiyan ni Jesus haazà is sepulù wey zezuwa he menge sumusundan din he medtapid dan ne ke sikandin dutun te,
“Netuenan niw he edhendiyè kiw te inged he Hiruselim ne emun ebpekeuma kiw zutun ne sikan is langun he insurat he nengetagnà te ebpemeneuven dengan te Megbevayà mehitenged kedì,
ne egkengetuman en.
32 Siak is Kakey te Menusiyà,
ne ibpalad a ziyà te menge etew he kenà menge Hudiyu ne haazà he menge etew,
ne edsumpeliten e zan,
ed-el-elezen e zan,
ne ebpengilevan e zan.
33 Ebuǥelen e zan,
ne human e zan edhimetayi.
Iyan,
seled te tetelu he andew zutun ne ebenhawen a te Megbevayà,”
ke si Jesus.
34 Iyan,
haazà is menge sumusundan din,
ne wazè dan mekesavut dutun te egkeǥiyen din.
In-eles kandan haazà is kehuluǥan dutun ne wazè dan metueni ke hengkey haazà is ibpesavut kandan ni Jesus.
Jesus Predicts His Death and Resurrection
Is Kebewii Zuen te Lakap
35 Ne hein uvey zan en diyà te inged he Hiriku ne zuen dutun lakap he ebpimpinuu ziyà te kilid te zalan ne iyan dà baal zin is edtepayà su ebpemumuyù te limus.
36 Ne hein nezineg dutun te lakap is dabekdabek te mezakel he menge etew he edsaǥad ne nekeinsà ke hengkey en haazà.
37 Ne zuen migkaǥi ziyà te kandin te,
“Iyan si Jesus he tigNeserit is edsaǥad.”
38 Ne hein nezineg din haazà,
ne mid-umew sikandin te,
“He Jesus he kevuwazan te hadì dengan he si David,
kehizuwi a kenikew!”
39 Ne haazà is menge etew he edhuhuna ki Jesus,
ne midawey zan haazà is etew wey med-engked sikandin,
iyan,
nasì en ebpekezaǥing sikandin he egkaǥi te,
“He kevuwazan te hadì dengan he si David,
kehizuwi a kenikew!”
40 Ne zutun midteren si Jesus ne migkaǥi he ipehendutun te kandin haazà is lakap.
Ne hein impeetuvang dan en ki Jesus ne migkaǥi si Jesus te,
41 “Hengkey is egkesuatan nu he ebeelan ku?”
Ne midtavak haazà is lakap te,
“Iyan egkesuatan ku is:
mekeahà is menge mata ku.”
42 Ne migkaǥi si Jesus te,
“Mekeehè ke en;
is kedsarig nu kediey,
ne iyan igkeulii te menge mata nu.”
43 Ne segugunà nekeahà haazà is lakap.
Ne zutun midumazuma en sikandin ki Jesus is utew nekezalig te Megbevayà.
Ne haazà is menge etew he nemekeahà dutun,
ne nemekezalig dan daan te Megbevayà.
Healing of Bartimaeus