Is Ketudluanan Mehitenged te Kebpeengkezà
19
Ne hein ingkepenurù en ni Jesus haazà is langun,
mid-awà sikandin diyà te prubinsya he Geliliya ne midhendiyà te Hudiya,
diyà layun te wahig he Hurdan.
2 Utew mezakel he menge etew is nemenduma kandin,
ne mibewian din is egkengezeruwan dutun ne nengeulian.
3 Duen menge Perisiyu zutun he midhendiyà te kandin su ebpengahaan dan te paaǥi sikandin wey zan ikesumbung.
Ne mid-insaan dan sikandin te,
“Intuǥut be te kesuǥuan is ked-engkezi ta te esawa ta minsan ke wazè ta utew ketezengan?”
4 Ne midtavak si Jesus te,
“Wazè niw ves mevasa sikan is insurat he Lalag te Megbevayà
5 he edhenduen te,
‘Dengan te kedlimbaǥa te Nengazen te langun,
mibeelan din is maama wey vahi.
Tenged kayi ed-ewaan te maama is amey zin wey iney zin ne ebpengesawa te vahi ne zutun egkesevaha sikandan.’
6 Ne tenged kayi,”
ke si Jesus,
“kenè en maan dutun dezuwa he etew haazà is teleesawa,
kekenà,
sevaha zà,
ne tenged kayi zaan kenà egkehimu he ipedsuwey te etew is midsevaha te Megbevayà.”
7 Ne mid-uman med-insà is menge Perisiyu te,
“Ne maan is intuǥut ni Moises diyà te maama he veǥayi zin dà is esawa zin te kemetuuzan te kebpekidsuwey emun egkesuatan din he meengkezi zin haazà is esawa zin?”
8 Ne midtavak si Jesus te,
“Intuǥut ni Moises is kedsuwayi niw te esawa niw su ǥeina te edsumpeliten niw is penurù,
iyan,
dengan te kedlimbaǥa te langun,
wazà ituǥut heini te Megbevayà is kebpekedsuwey te teleesawa.
9 Ne tenged kayi egkeǥiyen ku keniyu he ke zuen maama he ed-engkezan din is esawa zin he wazà sikandin is maama selselai zutun te esawa zin ne ed-uman ebpengesawa,
ne haazà he maama,
ebpekesalà dutun te nehuna he esawa zin tenged dutun te kebpengesawa zin.”
10 Ne zutun migkaǥi is menge sumusundan ni Jesus te,
“Emun iyan bes heini egkeulaula te telteleesawa meupiya pa ke kenà ebpees-eseweey is etew.”
11 Ne midtavak si Jesus te,
“Duen menge etew he imbanglis kandan te Megbevayà is kenà ebpekeesawa emun maama,
ne kenà egkeesawa emun bahi;
ne meupiya iyan haazà diyà te kandan,
iyan,
kenà meupiya te langun.
12 Su kenè en ed-iring-iring is ketezengan te etew ke maan is kenè dan ebpengesawa wey egkeesawa.
Is duma,
kenà ebpekeesawa wey egkeesawa su iyan en haazà kegkeetew-etew zan;
ne is duma zaan tenged te migkapun;
ne is duma pa,
kenà ebpekeesawa wey egkeesawa su wey zan metuman is insuǥù kandan te Megbevayà tenged te kedhadì din.
Sikan is ebpekezawat te kenè din kebpengesawa,
wey ke kenè din kebpeesawa,
ne meupiya ke edewaten din en.”
Si Jesus wey kes Dezeisey he Menge Vatà
13 Duen menge vatà he mid-uwit te menge etew ziyà te ki Jesus wey zin mezepeneti te palad din wey mepenubtuvazi.
Ne midawey heini te menge sumusundan din.
14 Iyan,
migkaǥi si Jesus dutun te,
“Ipehendini niw te kediey heeyan is menge vatà;
ne kenè niw zewaya su is etew he zuen din kedsarig he iring te kedsarig te vatà ne iyan ebpekepahadì te Megbevayà.”
15 Ne midepenetan din haazà is menge vatà ne mibpenubtuvazan din ne hein nepasad din haazà,
ne mid-awà dutun.
Sikan is Sepian he Etew
16 Duen menguhed he etew he mid-uvey ziyà te ki Jesus he ed-insà te,
“He Menunudlù,
hengkey is meupiya he ed-ul-ulahan ku wey a meveǥayi te untung he wazà pidtemanan?”
17 Ne midtavak si Jesus te,
“Maan is id-insè nu kedì is meupiya he ed-ul-ulahan he sebsevaha zè man is ed-ulaula te meupiya ne wazè en duma,
kekenà,
iyan dà is Megbevayà.
Ke egkesuat ka he meveǥayi ka te untung he wazè din pidtemanan,
tumana nu is menge suǥù te Megbevayà.”
18 Ne mid-insà haazà is etew te,
“Hengkey he menge suǥù?”
Ne midtavak si Jesus te,
“Kenè ka mebunù;
kenè nu selselai is esawa nu;
kenè ka penakew;
kenè ka tarùtarù;
19 tehuza nu is amey nu wey iney nu;
wey purungi nu is duma nu;
isipa nu sikandin he iring te kenikew en he ǥehinawa.”
20 Ne migkaǥi haazà is etew te,
“Is langun keniyan,
ne mibentayan ku;
hengkey pa is kurang ku he ebpeveelan kedì?”
21 Ne migkaǥi si Jesus te,
“Emun edheǥeten nu pa,
ulì ka ne ivelegyè nu is langun he menge azen nu,
ne is halin,
ibpemeǥey nu ziyà te menge egkengeayuayu,
ne edsepian ka ziyà te langit.
Ne ke egkeipus nu heeyan likù ka zini wey ka mekesundan kediey.”
22 Ne hein nezineg heini zutun te menguhed he etew,
ne mid-ulì he utew mibmesakit is gehinawa zin su utew zekelà is ketiǥeyunan din.
23 Ne zutun migkaǥi si Jesus diyà te menge sumusundan din te,
“Utew mereǥen te sepian he etew is kebpesakup din te Megbevayà wey mehedii sikandin.
24 Egkeǥiyen ku keniyu he kenè din egkehimu.
Melemu pa te kemilyu is kedseled din diyà te vudsi te raǥum kenà te sepian he etew is kebpesakup din te Megbevayà wey sikandin mehedii.”
25 Ne hein nezineg heini te menge sumusundan din utew zan neinuinu,
ne ke sikandan te,
“Emun kenà egkehimu te sepian,
ne kenè bes egkehimu te minsan hentei is ked-angken te untung he wazà pidtemanan.”
26 Ne zutun midtengtengan sikandan ni Jesus te egkaǥi te,
“Kenà iyan egkehimu te etew;
iyan,
egkehimu mulà te Megbevayà he ibpaangken din is etew te untung he wazà pidtemanan su egkehimu zin is langun.”
27 Ne zutun migkaǥi si Pedro te,
“Ahaa nu man,
mid-ewaan dey is langun he menge azen dey wey key mekesunud kenikew.
Ne hengkey is idsuhul kenami?”
28 Ne midtavak dutun si Jesus te,
“Benar heini is egkeǥiyen ku,
siak is Kakey te Menusiyà,
mekeǥeǥehem a keuzemà te kedhadì ku emun egkeveǥu en is langun;
ne sikiyu is menge sumusundan ku,
egkehedian niw zaan is menge kevuwazan te sepulù wey zezuwa he anak ni Israyil.
29 Ne is minsan hentei he mid-ewaan din is baley zin,
menge suled din,
amey zin,
iney zin,
anak din,
wey tanè din su edsunud sikandin kediey,
egkezawat din is kenenggatus egketakep haazà is mid-ewaan din ne liyu zutun ibeǥey kandin is untung he wazà pidtemanan.
30 Iyan,
mezakel is menge etew ǥuntaan he henduen be te zekelà is pid-etawan dan,
iyan,
utew minus is pid-etawan dan keuzemà.
Ne mezakel zaan is etew ǥuntaan he utew minus is pid-etawan dan,
iyan,
keuzemà,
utew zekelà is pid-etawan dan,”
ke sikandin.