2 Ne zutun,

duen menge Perisiyu he mid-uvey ziyà te ki Jesus su ebpengahaan dan is paaǥi te kedsumbunga kandin.

Ke sikandan te,

“Idtuǥut be te kesuǥuan is ked-engkezi ta te esawa ta?”

3 Ne insà daan is intavak ni Jesus dutun,

ke sikandin te,

“Hengkey man is insuǥù kenitew ni Moises he egkevasa ta zuen te kesuǥuan mehitenged te kebpekidsuwey?”

4 Ne midtavak dan te,

“Intuǥut ni Moises diyà te maama he suwayi zin is esawa zin,

asal kinahanglan he ebeǥayan dutun te maama is esawa zin te kemetuuzan he midsuwayan din.”

5 Ne ke si Jesus diyà te kandan te,

“Umba intuǥut ni Moises is kedsuwayi niw te esawa niw su ǥeina te edsumpeliten niw is penurù,

6 iyan,

is Megbevayà,

dutun te kedlimbaǥa zin te menusiyà,

mibeelan din is maama wey vahi.

7 Umba ed-ewaan te maama is amey zin wey iney zin su ebpekidsevaha te esawa zin.

8 Ne sikandan is teleesawa,

kuwinta kenè en maan dezuwa he etew,

kekenà,

nesevehe en sikandan.

9 Ne zutun haazà is dezuwa he etew he midsevaha te Megbevayà,

kenè en egkehimu he ebpekedsuwey,”

ke si Jesus.

10 Ne is menge sumusundan ni Jesus,

hein diyè dan en maan te valey he midetengan dan,

in-uman dan iinsà kandin is kebpekidsuwey te esawa.

11 Ne ke si Jesus diyà te kandan te,

“Ke zuen maama he ebpengesawa te sengevevahi su mid-engkezan din is esawa zin,

ebpekesalà sikandin dutun te mid-engkezan din he esawa.

12 Ne is bahi zaan,

ke ebpekidsuwey te esawa zin ne ebpeesawa te sengememaame en,

ebpekesalà sikandin dutun te midsuwayan din he esawa zin.”

13 Ne zutun,

duen menge etew he ebpen-uwit diyà te ki Jesus te menge zezeisey he vatà su ebpezepenetan dan te palad ni Jesus,

iyan,

midawey haazà te menge sumusundan din.

14 Ne hein netuenan ni Jesus haazà is mid-ulaula te menge sumusundan din,

wazè din ikesuat,

ne ke sikandin diyà te kandan te,

“Ipehendini niw te kediey heeyan is menge vatà ne kenè niw zewaya su is etew he zuen din kedsarig he iring te kedsarig te vatà ne iyan ebpekepahadì te Megbevayà.

15 Benar is egkeǥiyen ku keniyu he ke zuen etew he kenà iring is kedsarig din te Megbevayà te kedsarig te zeisey he vatà,

ne kenà egkehedian haazà is etew te Megbevayà.”

16 Ne zutun midsekepu zin haazà is menge vatà ne mibpendepenetan din te palad din is menge purù dan ne midtuvazan din sikandan.

17 Ne zutun te edlaus en edhipanew ensi Jesus,

nekesaut kandan is sevaha he maama ne midluhud haazà diyà te etuvangan ni Jesus.

Ne ke sikandin te,

“He Menunudlù,

utew meupiya is menge ulaula nu.

Hengkey is ed-ul-ulahan ku wey a meveǥayi te untung he wazà pidtemanan?”

18 Ne midtavak si Jesus te,

“Maan is egkaǥi ka he meupiya is ulaula ku te sebsevaha zà is meupiya is menge ulaula zin ne iyan is Megbevayà.

19 Netuenan nu en sikan is menge suǥù te Megbevayà he imbilinbilin kenitew he iyan is:

kenè ka mebunù;

kenè nu selselai is esawa nu;

kenè ka mebpenakew;

kenè ka medtarùtarù diyà te hukmanan;

kenè ka medlimbung;

ne tehuza nu is amey nu wey iney nu.”

20 Ne midtavak haazà is maama ziyà te ki Jesus te,

“Menunudlù,

is langun keniyan,

mibenteyanan ku ne wazè ku mesupak puun pa te vatè e pa.”

21 Ne si Jesus,

midtengtengan din haazà is etew su ingkehizu zin ne ke sikandin te,

“Duen nu pa kurang;

iyan is:

ulì ka ne ivelegyè nu is langun he azen nu,

ne is halin,

ipemeǥey nu ziyà te egkengeayuayu ne edsepian ka ziyà te langit.

Ne ke egkeipus nu heeyan,

likù ka zini wey ka mekesundan kediey.”

22 Ne hein nezineg dutun te etew haazà is migkaǥi ni Jesus,

ne utew mibmesakit is gehinawa zin ne mid-awà dutun is utew neseeng su zekelà is ketiǥeyunan din.

23 Ne zutun mibpenlangulangu si Jesus diyà te menge sumusundan din ne ke sikandin diyà te kandan te,

“Utew mereǥen te sepian he etew is kebpesakup din te Megbevayà wey mehedii sikandin te Megbevayà,”

ke sikandin.

24 Ne is menge sumusundan din,

hein nezineg dan haazà is migkaǥi ni Jesus,

utew zan ingkeinuinu.

Ne mid-uman megkaǥi si Jesus te,

“Utew mereǥen te etew is kebpesakup din te Megbevayà wey sikandin mehedii.

25 Kenè din egkehimu su melemu pa te langgam he kemilyu is kedseled din diyà te vudsi te raǥum kenà te sepian he etew te kebpesakup din te Megbevayà wey sikandin mehedii.”

26 Ne hein nezineg haazà te menge sumusundan din,

mid-iseg is kegkeinuinu zan.

Ne ke sikandan te,

“Emun kenà egkehimu te sepian,

ne kenè bes egkehimu te minsan hentei is ked-angken te untung he wazà pidtemanan.”

27 Ne zutun midtengtengan sikandan ni Jesus te egkaǥi te,

“Kenà iyan egkehimu te etew,

iyan,

egkehimu mulà te Megbevayà he ibpaangken din is etew te untung he wazà pidtemanan su egkehimu zin is langun.”

28 Ne zutun migkaǥi si Pedro te,

“Ahaa nu man,

mid-ewaan dey en is langun he menge azen dey wey key mekesunud kenikew.”

29 Ne migkaǥi si Jesus te,

“Kenè niw lipati he is minsan hentei he mid-ewaan din is baley zin,

is menge suled din he vahi wey maama,

is iney zin wey amey zin,

anak din,

wey menge tanè din su edsunud sikandin kediey wey idsangyew zin is Meupiya he Tudtulanen,

30 haazà he etew,

egkezawat din is kenenggatus edtekepa haazà is mid-ewaan din he menge valey,

menge suled din he maama wey vahi,

iney zin,

menge anak din,

wey menge tanà ne liyu zutun ibeǥey kandin keuzemà is untung he wazà pidtemanan.

Asal te zini pa sikandin te kelibutan,

egkeseǥazan din is memereǥen he pesipala kandin.

31 Mezakel is menge etew ǥuntaan he henduen be te zekelà is pid-etawan dan,

iyan,

utew minus is pid-etawan dan keuzemà.

Ne mezakel zaan is etew ǥuntaan he utew minus is pid-etawan dan,

iyan,

keuzemà,

dekelà is pid-etawan dan,”

ke sikandin.

32 Si Jesus wey is menge sumusundan din,

hein diyè dan en te zalan pehendiyà te inged he Hiruselim,

midhunahuna si Jesus.

Is menge sumusundan din,

ne nengeinuinu ne nesemukan is gehinawa zan su maan is edhendiyà si Jesus te Hiruselim.

Ne zuen daan menge etew he edtinundug ne nengehandek sikandan.

Ne zutun migkeǥiyan ni Jesus is sepulù wey zezuwa he menge sumusundan din he medtapid dan ne impesavut din dutun ke hengkey is egkehitavù kandin.

33 Ke sikandin te,

“Netuenan niw he edhendiyè kiw te Hiruselim ne emun ebpekeuma kiw zutun,

siak is Kakey te Menusiyà,

ibpalad a ziyà te menge punuan he menge memumuhat wey menge menunudlù te kesuǥuan.

Ne egkeuyun dan he ebpehimetayan a ne ibpalad e zan daan diyà te menge etew he kenà menge Hudiyu.

34 Ne is menge etew he kenà menge Hudiyu,

ed-iringen e zan te velvelayen;

ebpengilevan e zan,

ne ebuǥelen e zan ne edhimetayan e zan ne seled te iketelu he andew zutun ebenhawen a te Megbevayà.”

35 Ne zutun mid-uvey ziyà te ki Jesus is dezuwa he anak ni Sibidiyu he si Santiago wey si Juan,

ne ke sikandan te,

“He Menunudlù,

duen dey idhangyù diyà te kenikew.”

36 Ne ke si Jesus te,

“Hengkey is egkesuatan niw?”

37 Ne ke sikandan te,

“Iyan edhengyuen dey he keuzemà ke ebpinuu ke en diyà te pinuuwè nu te kedhadì,

ipepinuu key zaan,

is sevaha ziyà te egkekewanan nu ne is sevaha ziyà te egkeǥivang nu.”

38 Ne midtavak si Jesus te,

“Wazè niw mesavut ke hengkey is edhengyuen niw.

Egkeantus niw ve is merasey he ibpaantus kedì?

Ne egketigker niw ve is kemereǥenan he ibpetigker kediey?”

39 Ne midtavak dan te,

“Uya egkeantus dey.”

Ne migkaǥi si Jesus te,

“Benar iyan he ibpaantus keniyu is iring te merasey wey is kemereǥenan he ibpaantus daan kediey,

40 iyan,

kenà a iyan ebpilì ke hentei is ibpepinuu ziyà te zapit te egkekewanan ku wey ziyà te zapit te egkeǥivang ku su iyan dà ebpekepinuu zutun is etew he midteǥenahan te Amey ku he Megbevayà.”

41 Ne hein nezineg haazà dutun te sepulù he zuma zan he sumusundan,

wazè dan ikesuat haazà is midhimu eni Santiago wey ni Juan.

42 Ne tenged dutun mid-umew ni Jesus sikandan langun ne ke sikandin te,

“Netuenan ta he is menge punuan te menge inged,

ne utew memevurut.

Edatùdatù dà sikandan is layun ebmandar te menge etew.

43 Iyan,

sikiyu mulà,

kenà egkehimu is iring kayi zini te keniyu.

Ke zuen sevaha keniyu he egkesuat he mekelavew,

kinahanglan he suluǥuen sikandin te langun he menge zuma zin.

44 Ne emun duen sevaha keniyu he egkesuat he iyan sikandin metikang te langun keniyu,

kinahanglan he mebpekevavà sikandin te langun keniyu.

45 Su siak is Kakey te Menusiyà,

kenè ku iyan inhendini te kelibutan is wey a metevangi te menusiyà,

kekenà,

wey a meketavang te menusiyà ne wey a zaan mebpehimatey su wey ku mevelukasi is mezakel he menge etew.”

46 Ne nekeuma zan diyà te inged he Hiriku,

ne hein ed-awà ensi Jesus wey is menge sumusundan din dutun,

utew mezakel is menge etew he nemenduma kandin.

Ne zuen lakap dutun he mekelilimus he egngezanan ki Bertimeo he anak ni Timiyu.

Ne ebpimpinuu haazà is mekelilimus dutun te kilid te zalan.

47 Ne hein nezineg din he iyan ensi Jesus he tigNeserit haazà is edsaǥad,

ne mibpekezaǥing sikandin is ed-umew te,

“He Jesus he kevuwazan te hadì dengan he si David,

kehizuwi a kenikew!”

48 Ne midawey haazà is lakap te mezakel he menge etew zutun te,

“Engked ka!”

Iyan,

nasì en ebpekezaǥing sikandin he egkaǥi te,

“He kevuwazan te hadì dengan he si David,

kehizuwi a kenikew!”

49 Ne zutun te kegkezineǥa ni Jesus kayi te ebpengumew,

midteren sikandin ne migkaǥi te,

“Ipehendini niw heeyan is etew.”

Ne zutun migkeǥiyan te menge etew haazà is lakap te,

“Na,

hitindeg kad su ibpehendiyè ke zin.”

50 Ne zutun midhitindeg sikandin ne midluwas din is divavew he kumbalè din ne midhendiyà te ki Jesus.

51 Ne mid-insaan sikandin ni Jesus te,

“Hengkey is egkesuatan nu he ebeelan ku?”

Ne midtavak haazà is lakap te,

“Iyan egkesuatan ku is mekeahà is menge mata ku.”

52 Ne ke si Jesus te,

“Is kedsarig nu kediey,

iyan igkeulii te menge mata nu.

Genat kad.”

Ne segugunà nekeahà haazà is menge mata zutun te lakap ne miduma sikandin ki Jesus dutun te hipenawan din.