Is Limbungan he Sineriǥan
16
Ne impezineg en maan ni Jesus is menge sumusundan din te selakew pa maan he sempità.
Ke sikandin te,
“Duen sepian he etew he impezumala zin is sevaha he suluǥuen din te menge ketiǥeyunan din.
Ne zuen daan etew he midsumbung dutun te sepian he haazà is impezumala,
ne ebpenggestuwen din is selapì dutun te egalen din.
2 Ne hein nezineg haazà dutun te sepian,
ne midtawag din haazà is suluǥuen din ne migkeǥiyan din te,
‘Tutuu heini is sumbung mehitenged kenikew.
Iulì nu kediey is langun he insarig ku kenikew su kenè en egkehimu he iyan ka ibpezumala kayi te menge ketiǥeyunan ku.’
3 Ne neisip dutun te suluǥuen is,
‘Id-awè e ves kayi te terebahu ku.
Hengkey is meupiya he ed-ul-ulahan ku?
Su siak,
ne kenè e en ebpekehimu he edterebahu te meveǥat iring te kegkalut ne egkeeled a he ebpemumuyù te limus.
4 A,’
ke sikandin,
‘iyan heini ed-ul-ulahan ku su wey zuen duma ku he egkepeveyaan ku ke egkeawè e en kayi te terebahu ku.’
5 Ne zutun midtawag din te tigselimbaha is langun he nekeutang dutun te egalen din.
Ne ke sikandin diyà te nehuna te,
‘Pira is kenikew he utang diyà te egalen ku?’
6 Ne midtavak haazà is mid-insaan te,
‘Nenggatus he lata te lana.’
Ne migkaǥi haazà is suluǥuen te,
‘Heini zed is listahan te utang nu.
Pinuu ka kayi ne is insurat nu kayi he utang nu ne ilisi nu te kelimahan dà he lata.’
7 Ne nekeuma is sevaha zutun.
Ne mid-insaan dutun te suluǥuen ke pira is kandin he utang,
ne midtavak sikandin te nengkelibu he vinevey he trigu.
Ne migkeǥiyan sikandin te suluǥuen te,
‘Heini zed is listahan te utang nu.
Pinuu ka kayi ne ilisi nu te walu he ǥatus dà he vinevey.’
8 Ne zutun,”
ke si Jesus,
“hein nezineg haazà dutun te egalen din ke hengkey is mid-ulaula zutun te suluǥuen din,
ne nekekaǥi te,
‘Hey,
utew metau sikandin su ebpeneǥane en sikandin he zaan te keuyaǥan din keuzemà.’ ”
Ne ke si Jesus te,
“Is menge etew he kenà ebpemineg te menge lalag te Megbevayà,
utew metau te paaǥi te kegkezeyzey zan.
Iyan,
is menge etew he sakup te Megbevayà,
kenè dan bes mulà utew metau te paaǥi wey mezeyzey sikandan keuzemà diyà te langit.
9 Umba,”
ke si Jesus,
“egkeǥiyen ku keniyu he ǥemita niw is ketiǥeyunan niw zini te kelibutan wey metevangi is egkengeayuayu ne emun egkeuma haazà is timpu keuzemà he kenè niw en egkeǥamit is menge azen niw,
edsuhulan kew te Megbevayà diyà te langit.
10 Benar is egkeǥiyen ku keniyu he emun egkeseriǥan ka te zeisek he azen,
egkeseriǥan ka zaan te zekelà he azen.
Ne emun limbungan ka te minsan deisek dà,
ne wey ke pe be kenà medlimbung duen te zekelè en he ebpeǥewezan kenikew.
11 Emun kenè ka egkeseriǥan he ibpeǥawed te menge ketiǥeyunan he kayi te kelibutan,
ne kenè ke en iyan ibpeǥawed te Megbevayà te menge tutuu he ketiǥeyunan diyà te langit.
12 Ne emun kenè ka egkeseriǥan he ibpeǥawed te menge azen te zuma,
kenè ke en iyan ebeǥayan dutun te tutuu he azen he ziyà te langit.”
13 Ne mid-uman megkaǥi si Jesus te,
“Is uripen,
kenà egkehimu he zezuwa is teǥiuripen kandin.
Su emun dezuwa is ebayàbayà kandin,
edtehuzen din is sevaha ne egkepeukan din is sevaha.
Ne emun kenà,
ne egkeepesan din is sevaha,
ne ebmahalen din is sevaha.
Ne iring din ded daan emun iyan mahal ziyà te ǥehinawa nu is ketiǥeyunan,
su kenà egkehimu he mahal zaan diyà te ǥehinawa nu is Megbevayà.”
Menge Lalag ni Jesus
14 Ne zuen dutun menge Perisiyu he iyan dekelà diyà te ǥehinawa zan is selapì.
Ne hein nezineg dan haazà is penurù ni Jesus ne midsumpalit dan sikandin.
15 Ne zutun migkaǥi si Jesus diyà te kandan te,
“Iyan kew sikan is henduen be te meupiya is ulaula ke ziyà te etuvangan te menge etew,
iyan,
wazà mekeeles te Megbevayà ke hengkey is diyà te isip niw.
Is ed-isipen te etew he utew mahal,
ne wazè din bali ziyà te Megbevayà.
16 Is kedtumana te kesuǥuan he imbilinbilin dengan ni Moises wey is kedtumana te menge lalag he insurat te menge ebpeneuven dengan te Megbevayà,
ne impesavut heini taman dà te timpu ni Juan Megbebewtismu.
Puun dutun iyan ibpesavut diyà te langun he menge etew is Meupiya he Tudtulanen te keaǥi te ǥinhedian te Megbevayà.
Ne edteǥel is minsan hentei wey meǥaan pezem sikandan mekeseled dutun te ǥinhedian.
17 Iyan,
kenà egkehimu he edhelinen is kesuǥuan he imbilinbilin ni Moises.
Egkehanew pa is langit wey tanà,
iyan,
is minsan deisek dà he ibpenurù te kesuǥuan ne kenà egkehalin.”
18 Ne elin daan migkaǥi ni Jesus is,
ke sikandin te,
“Ke zuen maama he ebpengesawa te sengevevahi su mid-engkezan din is esawa zin,
ebpekesalà sikandin dutun te mid-engkezan din he esawa.
Ne ebpekesalà daan is maama he ebpengesawa zutun te vahi he mid-engkezan te esawa zin.”
Sikan is Sepian Wey si Lazaro
19 Ne mid-uman megkaǥi si Jesus te,
“Duen sevaha he etew he sepian utew.
Ne haazà is sepian,
utew menge mahal he manggad is idsun-ud din.
Ne kada andew ne iyan dà ibpekaan kandin is utew mahal wey metaam he egkeenen.
20 Ne zuen daan sevaha he etew he egkeayuayu he egngezanan ki Lazaro.
Ne haazà si Lazaro,
ne neeneb is lawa zin te vekukang.
Ne kada andew zutun ne idhated sikandin te menge zuma zin dutun te vunsuzan te valey zutun te sepian
21 su ebperateng he ebeǥayan sikandin te minsan menge mumu zà he egkengeulug dutun te lemisahan te sepian wey mahantey is getek din dutun.
Ne is menge asu zutun,
ne ebpemendilaan dan haazà is menge vekukang ni Lazaro.
22 Ne wazà utew meuǥet dutun ne minatey haazà is ayuayu he si Lazaro ne mid-angey sikandin te menge velinsuǥuen te Megbevayà ne insavuk dan diyà te uvey ni Abraham te kepuun te menge Hudiyu.
Ne zutun daan he timpu ne minatey zaan haazà is sepian he etew ne inleveng sikandin.
23 Ne mid-uwit sikandin diyà te Iveyaan.
Ne zutun ne utew sikandin nerasey ne hein nekelingahà,
neehè din si Abraham,
iyan,
utew meziyù.
Ne neehè din daan si Lazaro zutun te uvey ni Abraham.
24 Ne mid-umew sikandin diyà te ki Abraham,
ke sikandin te,
‘He Apù Abraham,
kehizuwi a kenikew!
Ipehengkayi nu pa si Lazaro wey zin egkepetiǥisi te wahig heini is bèbè ku su utew e en nerasey kayi te hapuy!’
25 Iyan,
midtavak ni Abraham haazà is mid-umew te,
‘Apù,
tentenuzi nu he hein uuyag ke pa,
ne mid-em-eminan nu en is kedlipeylipey nu.
Iyan,
si Lazaro mulà,
ne neem-eminan din en is kemeresayan.
Ne ǥuntaan,
si Lazaro,
edlipayen;
ne sikew,
edresayen.
26 Ne ikezuwa zin daan ne kawangkawang heini is pid-eletan tew.
Ne wazà ebpekelayun dini he ebpuun diyan;
ne iring din ded daan dini te kenami su wazà ebpekelayun pehendiyan he ebpuun dini.’
27 Ne zutun mid-uman megkaǥi haazà is sepian te,
‘Ne emun iyan heeyan,
Apù,
ne iyan dà edhengyuen ku is ipelikù nu si Lazaro ziyà te valey te amey ku
28 su zuen lelima he hazi ku he maama.
Ne kinahanglan he metueni zan he zaan wey zan kenà mekehendini te ubpeey te ebpenresayen.’
29 Ne midtavak si Abraham te,
‘Duen diyà te kandan menge surat he impesurat te Megbevayà ki Moises wey te ebpemeneuven te Megbevayà dengan.
Egkehimu he ebpemineǥen haazà dutun te menge hazi nu.’
30 Ne midtavak haazà is sepian te,
‘Kenè dan,
Apù,
haazà ebpemineǥen,
iyan,
emun duen minatey he egkevanhew he edhendiyà te kandan,
ne ed-iniyuǥan dan is memezaat he ulaula zan.’
31 Ne migkaǥi zutun si Abraham te,
‘Emun kenè dan ebpemineǥen is menge surat ni Moises wey te ebpemeneuven te Megbevayà dengan,
kenè dan daan ebpemineg minsan ke zuen egkevanhew he minatey he edhendiyà te kandan.’ ”