2 Ne ziyà te pirisuwan midtudtulan si Juan Megbebewtismu mehitenged te menge egkein-inuwan he mibeelan ni Jesu Kristu,

ne midsuǥù ni Juan is menge sumusundan din wey zan meinsai si Jesus.

3 “Keleduwi key,”

egkaǥi haazà is menge suǥù ni Juan diyà te ki Jesus,

“ke iyan ke ve kes migkaǥi ni Juan he netagnà is kebpekeuma zin dini te kelibutan wey ke zuen pe be ebpeebuten dey.”

4-6 Ne midtavak si Jesus te,

“Likù kew en ziyà te ki Juan ne tudtula niw ziyà te kandin is nengeehè niw he mid-ulaula ku wey is nengezineg niw he egkeǥiyen te menge etew.

Iyan niw tudtula kandin he tenged kedì ebpemekeehè en is menge lakap,

ne ebpemekehipanew en is menge piang,

nengeulian en is menge it-iten wey ebpemekezineg en is menge vengel.

Mibanhew ku is nemematey wey impesavut ku ziyà te menge egkengeayuayu is Meupiya he Tudtulanen.

Utew deyzey is etew he kenà eduwazuwa he iyan a sikan is midsuǥù te Megbevayà.”

7 Ne hein nekeǥenat en haazà is menge sumusundan ni Juan,

migkaǥi si Jesus diyà te mezakel he nengetiǥum he menge etew,

ke sikandin te,

“Hein midhilesung niw si Juan diyà te tanà he wazà duen ed-ubpà he etew,

hengkey is inhilesunga niw kandin?

Iyan be ed-ahaan niw is etew he iring te sagbet he egkengewaleng te keramag?

Kenà iyan haazà su kenà egkehalinhalin is gehinawa ni Juan.

8 Midhilesung niw ve is etew he utew meupiya is bisti zin?

Kenà daan,

su is menge etew he iring dutun,

diyè dà egkaahà te turuǥan te hadì.

9 Ne hengkey is inhilesunga niw?

Ed-ehè kew ve te etew he ebpeneuven te Megbevayà?

Iyan haazà tutuu he ed-ahaan niw su ebpeneuven iyan si Juan.

Iyan,

kenà te ebpeneuven dà

10 su pinaaǥi ki Juan netuman en kes netagnà diyà te insurat he Lalag te Megbevayà su migkaǥi zutun is Megbevayà te,

‘Iyan heini kes etew he edsuǥuen ku.

Ibpehuna ku sikandin kenikew wey zin mehiǥewani is ibayè nu.’ ”

11 Ne mid-uman megkaǥi si Jesus te,

“Tentenuzi niw he si Juan Megbebewtismu,

wazè pa etew he nekelavew kandin,

iyan,

ke edhadì keuzemà is Megbevayà he ziyà te langit,

is minsan hentei he etew zutun he ebpezumazuma te Megbevayà,

minsan utew minus is pid-etawan din,

ne lavew pa kenà si Juan guntaan.

12 Puun pa zutun te kebpesavut ni Juan taman en guntaan,

is Megbevayà he ziyà te langit,

edteǥel he mekehadì,

ne edteǥel zaan is menge etew wey zan mekepehadì kandin.

13 Su is kedhadì te Megbevayà,

netagnà dengan te langun he ebpeneuven te Megbevayà wey netagnà daan ni Moises su egkeehè ta ziyà te kesuǥuan he imbilinbilin din.

Ne netagnà daan ni Juan.

14 Ne emun edtuu kew te impesavut dan,

egketuenan niw he iyan en si Juan si Elias su midtagnè dan is kebpekelikù ni Elias.

15 Heini is nezineg niw,

sevuta niw.

16 Sikiyu is menge etew ǥuntaan,

iyan ebpetug-iringan ku keniyu is menge vatà.

Su is menge vatà,

ne ebpememimpinuu zan diyà te tiyenggiyan is ebevaleyvaley.

Ne ebpeum-umawè dan is egkaǥi te,

17 ‘Edtemburan dey sikiyu ne kenè kew edsayew,

ne edlelendag key ne kenè kew zaan edtampu.’

18 Su hein neehè niw si Juan is edsalang egkaan ne kenà daan ed-inum te vinu,

ne migkaǥi niw he midsuukan sikandin te mezaat he mulin-ulin.

19 Ne siak is Kakey te Menusiyà,

wazà a medsalang megkaan ne mid-inum a mulà te vinu ne neinuinu kew ne migkaǥi niw he vuleǥuk a wey pereinum te vinu.

Ne ke sikiyu zaan he emiǥu a te menge lalung he etew iring te menunukut te vuhis wey menge mesinupaken.

Iyan,”

ke si Jesus,

“egketuusan ta he utew metau is Megbevayà pinaaǥi te egkeveelan din.”

20 Ne zutun,

is menge meǥinged kayi te menge inged he mibpaahaan ni Jesus te mezakel he egkengein-inuwan,

midsawey zin su wazè dan iniyuǥi is memezaat he ulaula.

21 Ne ke sikandin te,

“Mekehizuhizu kew is menge tigKurasin!

Mekehizuhizu kew zaan is menge tigBitsayda.

Su is menge egkein-inuwan he impeehè ku ziyan te inged niw te menge Hudiyu,

angin ke midhimu ku heini ziyà te menge inged he Tiru wey Sidun he kenà menge Hudiyu is meǥinged dutun,

su nekekukumbalè dan en pezem te saku ne nepen-evuwan dan is ulu zan he tuus te ed-iniyuǥan dan en is memezaat he ulaula.

22 Kenè niw lipati he zutun keuzemà te andew te kedsusi te Megbevayà te menusiyà,

lavew is idsilut din keniyu kenà te menge etew ziyà te Tiru wey Sidun.

23 Ne sikiyu zaan,”

ke si Jesus,

“is menge tigKepirnaum,

iyan egkesuatan niw pezem is deliǥa kew te minsan hentei,

iyan,

igketimbag kew ziyà te Impirnu.

Su is egkengein-inuwan he impeehè ku ziyan te inged niw,

angin ke ingkepaahà dengan diyà te menge tigSuduma su kenà egkezezeetan te Megbevayà is inged dan,

ne kemulu pa pezem guntaan.

24 Kenè niw lipati he keuzemà te andew te kedsusi te Megbevayà te menusiyà,

lavew is silut din keniyu kenà te menge tigSuduma.”

25 Ne zutun mid-ampù si Jesus he egkaǥi te,

“Amey ku he Nengazen te langit wey tanà,

dekelà is kebpeselemati ku kenikew su is in-eles nu wey kenà mesavut te menge uluwanen wey uvag en memetau,

impesavut nu en diyà te menge etew he wazè dan menge hanew.

26 Umba ebpeselematan ku su midhimu nu heini te iring kayi tenged te iyan egkesuatan nu tenged te ǥaǥew nu.”

27 Ne mid-uman megkaǥi si Jesus diyà te menge etew te,

“Is minsan hengkey,

insarig kediey te Amey ku he Megbevayà.

Wazà nesayud kedì te Anak te Megbevayà,

kekenà,

iyan dà is Amey ku he Megbevayà.

Ne wazà daan nesayud te Amey ku he Megbevayà,

kekenà,

iyan e zà is Anak din wey sikan is menge etew he mibpengelinteuwan ku he mesayud dan kandin.

28 Hendini kew te kediey,

sikiyu is langun he nengeveley tenged te ked-uwit te menge meveǥat he ulaula su ibpehimeley ku sikiyu.

29 Beeli niw is idsuǥù ku keniyu ne pepenurù kew kedì ne ebpekehimeley kew su kenà a eengeren ne kenà a ebpenlupig te minsan hentei.

30 Is kedì he idsuǥù keniyu,

melemu;

ne kenà mereǥen is ebpeveelan ku keniyu.”