Is Ebayàbayà te Andew te Kedhimeley
12
Ne wazà utew meuǥet dutun,
ne andew he Sebadu.
Ne iyan haazà he andew,
insuǥù dengan te Megbevayà te menge Hudiyu he wazà etew he ibpevaal zutun te andew su iyan Andew te Kedhimeley.
Ne zutun he andew ingkevayà eni Jesus is pemuleey.
Ne zutun egkengevitil is menge sumusundan din ne mibpengetu zan te menge trigu ne migkaan dan is beǥas dutun.
2 Ne naahà haazà te menge Perisiyu ne migkeǥiyan dan si Jesus te,
“Ahaa nu is menge sumusundan nu su edsupaken dan is insuǥù kenitew te Megbevayà su maan is midlegtey zan kayi te Andew te Kedhimeley.”
3 Ne midtavak si Jesus te,
“Kenà egkehimu he wazè niw mevasa ziyà te ingkesurat dengan kes mid-ulaula ni Hadì David.
Sikandin wey is menge sundaru zin,
nengevitil zan.
4 Ne wazà sikandin mekesalà minsan te midseled diyà te Valey te Megbevayà ne sikandin wey is menge sakup din,
migkaan dan is egkeenen he insavuk diyà te etuvangan te Megbevayà.
Ne supak te kesuǥuan haazà is kegkeena zan dutun su iyan dà ebpekekaan dutun he egkeenen is menge memumuhat.
5 Kenà daan egkehimu he wazè niw mevasa ziyà te ingkesurat ni Moises he is menge memumuhat diyà te Valey te Megbevayà,
emun Andew te Kedhimeley kenè dan edhimeley,
ne minsan pa zutun kenè dan ebpekesalà.
6 Tutuu heini is egkeǥiyen ku keniyu he zuen nekeuma kayi te keniyu he lavew pa kenà is Baley te Megbevayà.
7 Duen daan insurat he Lalag te Megbevayà he egkaǥi te,
‘Kenà iyan mahal zini te ǥehinawa ku is menge pemuhat niw,
kekenà,
iyan is kegkehizu niw te zuma niw.’ ”
Ne mid-uman megkaǥi si Jesus te,
“Ke hustu is kedsevuta niw kayi te ingkesurat,
wazè niw ǥeina mesewayi is wazè din salà.
8 Su siak is migeraran he Kakey te Menusiyà,
iyan a zuen keǥehem te egkaǥi ke hengkey is hustu he ed-ul-ulahan te etew emun Andew te Kedhimeley.”
Is Kebewii Zuen te Minatey is Menge Uǥat Diyà te Zivaluy he Velad Din
9 Ne mid-awà si Jesus dutun,
ne midhendiyà te sevaha he simbahan.
10 Ne zutun te seled te simbahan,
duen etew he minatey is menge uǥat te zivaluy he velad din.
Duen daan dutun menge etew he ebpen-ahà te paaǥi he ikesumbung dan si Jesus he nekesupak te kesuǥuan.
Ne mid-insaan dan sikandin te,
“Emun Andew te Kedhimeley,
ke ebewian ta is egkezeruwan wey meulii,
ebpekesupak ki ve te kesuǥuan?”
11 Ne midtavak si Jesus te,
“Ke zuen kerehidu te minsan hentei kenitew ne egkeulug diyà te vitu te Andew te Kedhimeley,
kenà egkehimu he kenè din igaun puun dutun te vitu minsan ke Andew te Kedhimeley.
12 Ne is etew,
lavew pa he mahal kenà te kerehidu.
Ne tenged dutun kenè ki ebpekesupak te kesuǥuan ke edtevangan ta is etew minsan ke Andew te Kedhimeley.”
13 Ne zutun migkeǥiyan ni Jesus haazà is etew he minatey is menge uǥat te zivaluy he velad din te,
“Ketenga nu,
Mama,
is belad nu.”
Ne migketeng dutun te etew is belad din ne zutundutun neulian haazà he wazà pigeyanan din iring dutun te zivaluy he velad din.
14 Ne mid-awà dutun is menge Perisiyu ne mibpelelelaǥè dan ke hengkey is paaǥi he mehimu zan he mepatey si Jesus.
Si Jesus is Pinilì te Megbevayà
15 Ne hein netuenan ni Jesus is ed-isipen dutun te menge Perisiyu,
mid-awà sikandin dutun,
ne zuen mezakel he menge etew he nemenduma kandin.
Ne neulian din is langun dutun he nengezeruwan,
16 ne migkeǥiyan din sikandan he kenè dan tudtula te zuma haazà is mid-ulaula zin.
17 Umba nekaǥi zin heini su egketuman sikan is Lalag te Megbevayà he netagnà dengan ni Esaias he edhenduen te,
18 “Iyan heini suluǥuen he pinilì ku.
Iyan sikandin utew ku minahal ne utew ku egkesuati is menge vaal zin.
Ebpeulinan ku sikandin te Waǥas he Mulin-ulin,
ne is metazeng he kukuman ku,
edtudtulen din diyà te tivuuk he menusiyà.
19 Ne kenà sikandin ebpekidlawan;
kenà daan ebpemensag;
kenà daan egkezineg sikandin he edikursu ziyà te menge kersada te inged.
20 Kenè din edlekaan is meluya is kedtuu zin kandin.
Su edtevangan din is minsan hentei,
minsan sikan is deisek is kedsarig din kandin.
Kenà ed-engked ebpenudtul taman te ebpekeeneb diyà te minsan hendei is metazeng he ulaula.
21 Ne ebpekesarig kandin is menge etew
ziyà te langun he menge nasud.”
Is Lavew ki Setanas
22 Ne zutun duen nemekeuma he menge etew he zuen miduma zan he maama he nelakap wey neemew tenged te midsuukan sikandin te mezaat he mulin-ulin.
Ne mibewian haazà ni Jesus ne segugunà nekekaǥi wey nekeahà.
23 Nengeinuinu is mezakel he menge etew zutun ne ke sikandan te,
“Kela ke iyan sikandin kes netagnà he kevuwazan ni Hadì David.”
24 Ne zuen menge Perisiyu zutun ne hein nezineg dan haazà migkaǥi zan te,
“Umba zuen gehem din he ebpekeulì te edlelungen te mezaat he mulin-ulin su iyan mibeǥey kandin te ǥehem si Endedaman,
sikan is egalen te menge mezaat he mulin-ulin.”
25 Iyan,
nesavut ni Jesus is diyà te isip dan,
ne ke sikandin diyà te kandan te,
“Ke zuen hadì,
ne ebpetebtebekà is menge sakup din,
meǥaan egkeawà is gehem din te kedhadì.
Ne ke zuen edlingahaan te sengevelayan ne emun kenà ne sengezetuan,
ne ebpekungkuntedahà haazà is menge sakup dutun ne egkevengkag haazà is edetuan din.
26 Umba,
ke pinaaǥi te ǥehem ni Setanas egkezaag ku is gehem ni Setanas,
egketebek din bes is menge sakup din ne egkezezeetan din is gehem din.
27 Emun iyan ibpenegseg ku te menge mezaat he mulin-ulin is gehem he ebpuun diyà te ki Setanas ne hendei ves ebpuun is gehem te menge zuma niw he ebpenegseg te mezaat he mulin-ulin?
Pinaaǥi te menge ulaula te menge sumusundan niw egketuusan he nengesayep kew.
28 Su heini is gehem ku te kebpemuǥew te mezaat he mulin-ulin,
ne ziyà ebpuun te Waǥas he Mulin-ulin he Megbevayà.
Ne pinaaǥi kayi egketuusan he iyan en heini sikan is timpu te kedhadì te Megbevayà.
29 Nezaag ku en si Setanas umba igkepaawè ku is menge sakup din,
su wazà minsan hentei he ebpekeseled te valey te mezesen he etew wey zin maaǥew is menge azen dutun te mezesen he etew,
emun kenè din egkehunà egkevakus haazà is mezesen he etew.
Kinahanglan he ebekusen din edhunai,
ne human din egkeaǥew is menge azen dutun te mezesen he etew.
30 Sikan is kenè ku zuma,
kuntada ku;
sikan is kenà edtavang kedì,
edsanggen kediey.
31 Umba,
egkeǥiyen ku keniyu he egkepesaylu pa is etew te minsan hengkey he salè din wey minsan hengkey he mezaat he egkeǥiyen din,
iyan,
sikan is edsumpalit te Waǥas he Mulin-ulin,
kenà egkepesaylu.
32 Sikan is edsumpalit kedì te Kakey te Menusiyà,
egkepesaylu pa;
iyan,
sikan is edsumpalit te Waǥas he Mulin-ulin,
kenè en egkepesaylu te wazè din pidtemanan.
Is Beǥas te Pinemula
33 Is kayu he wazè din erat,
ne meupiya is beǥas din.
Ne is kayu he zuen din erat,
ne mezaat is beǥas din.
Egkekilala is kayu pinaaǥi te veǥas din.
34 Iring din ded daan kayi te keniyu.
Wazà meupiya he egkekaǥi niw su memezaat is ulaula niw.
Iring kew te menge uled su ebpekekaid kew!
Is diyà te ǥehinawa te etew,
iyan edlepew ziyà te vèbè din.
35 Is etew he meupiya is ulaula zin,
ne meupiya zaan is kebpemèbè din.
Is etew he mezaat is ulaula zin,
ne mezaat daan is kebpemèbè din.
36 Egkeǥiyen ku keniyu he zutun keuzemà te andew te kedsusi,
ed-insaan te Megbevayà is minsan hentei,
ke maan is nekekaǥi sikandin te wazà pulus he menge lalag.
37 Su pinaaǥi te menge lalag he nenggawas diyà te vèbè niw ne zutun egkeahà keuzemà ke egkesilutan kew ve wey ke kenà.”
Is Ebpen-ahà te Egkein-inuwan
38 Ne zutun migkaǥi ziyà te ki Jesus is menge menunudlù te kesuǥuan wey menge Perisiyu te,
“He Menunudlù,
ipeehè key kenikew te singyal.”
39 Ne midtavak si Jesus te,
“Sikiyu is menge etew ǥuntaan,
utew mezaat is menge ulaula niw.
Wazè en diyà te gehinawa niw is kebmahala te Megbevayà.
Maan is ed-ehè kew te singyal?
Iyan dà singyal he ibpaahà keniyu is iring duen te singyal he impeulaula zuen te tipehuna he ebpeneuven he si Jonas.
40 Su nekeseled si Jonas diyà te ǥetek te zekelà he pait seled te tetelu he andew.
Ne iring din ded daan,
siak is Kakey te Menusiyà,
ebpekeseled a ziyà te zizalem te tanà seled te tetelu he andew.
41 Keuzemà te andew te kedhukum te Megbevayà,
edsewayen kew is menge etew ǥuntaan te menge tigNinivi zengan su hein nezineg dan is penurù ni Jonas,
mid-iniyuǥan dan is memezaat he ulaula zan.
Ne ǥuntaan duen ebpeneuven he lavew pa kenà si Jonas dini te keniyu,
ne sikiyu mulà,
wazè niw zewata is penurù din.
42 Keuzemà te andew te kedhukum edsewayen kew zaan duen te singyuda zengan he ziyà ebpuun te inged he Siba su utew meziyù is midhipenawan din te kebpemineg dà te penurù ni Hadì Sulumun te utew metau.
Ne ǥuntaan duen ebpenurù he lavew pa kenà si Sulumun dini te keniyu ne sikiyu mulà,
wazè niw zewata is penurù din.
43 Ke ed-awà is mezaat he mulin-ulin he ebpuun diyà te etew he edlelungen din,
diyà ebayà te memaza he tanà su ebpen-ahà te egkeubpaan din.
Ne emun wazè din egkaahà,
44 egkaǥi si kandin te,
‘Edlikù a nasì diyà te neubpaan ku.’
Ne edlikù ne egkeehè din haazà is neubpaan din he wazà taǥù ne midtines en is menge vutang dutun ne nepurung melumpiyuwi.
45 Ne zutun edlikù edhipanew su ebpengakat te pitu he zuma zin he menge mezaat he mulin-ulin he tuwas pa he memezaat kenà sikandin.
Ne ed-ahuk dan ne ed-ubpè dan dutun te etew.
Ne zutun ed-iseg pa ebmezaat is kebpekesavuk dutun te etew kenà te nehuna he kebpekesavuk din.
Iring dutun is egkeulaula te menge etew ǥuntaan su ed-iseg ebmezaat is kebpekesavuk dan.”
Is Mesipeg Diyà te ki Jesus
46 Ne te kemulu pa ebpekidlalag si Jesus dutun te menge etew,
nekeuma is iney zin wey menge hazi zin he maama.
Ne edtaǥad dan ki Jesus diyà te ǥawas su zuen egkeǥiyen dan kandin.
47 Ne migkeǥiyan si Jesus te etew zutun te,
“Ahaa nu is iney nu wey menge hazi nu zutun su zuen dan kun egkeǥiyen kenikew.”
48 Ne migkaǥi si Jesus te,
“Duen ku pa ibpaahà keniyu he iney ku wey menge suled ku.”
49 Ne zutun intezù din is menge sumusundan din te migkaǥi te,
“Heini zed is iney ku wey menge suled ku.
50 Su is minsan hentei he edtuman te egkesuatan te Amey tew he ziyà te langit,
iyan daan iney ku,
menge suled ku he maama,
wey suled ku he vahi.”