5 Ne mid-uman megkaǥi si Jesus te,

“Penenglitan is sevaha keniyu,

duen emiǥu zin he edhendutun te kandin te metaneb en is kezukileman ne ke sikandin te,

‘He Geli,

ipesambey e pa kenikew te egkekaan.

6 Su zuen meǥeliyug ku he ziyà ebpuun te meziyù ne wazè ku igkepeǥana kandin.’

7 Ne zutun,

edtavak sikandin dutun te valey zin te,

‘Es!

egkepeǥulan ad he ed-enew su midlekevan ku en heeyan is gemawan ne nemekelipezeng en heini is menge anak ku kayi te hulid ku.

Ne kenè e en ebpekeenew he ebeǥey ziyan te kenikew te egkekaan.’

8 Ne haazà,”

ke si Jesus,

“minsan ke kenà sikandin egkesuat he ed-enew he edtavang te emiǥu zin,

iyan,

ke kenà ed-engked haazà is edhangyù,

ebpeketeǥel sikandin ebpekeenew ne ibeǥey zin kandin is langun he kinahanglan din.

9 Ne venar is egkeǥiyen ku keniyu he penigudu kew vuyù diyà te Megbevayà ne ebeǥayan kew zin;

penigudu kew pen-ahà ne ibpeturedu zin keniyu is ebpen-ahaan niw;

penigudu kew penelehuzan ne ebpuwasan kew zin.

10 Su is langun he ebuyù diyà te Megbevayà,

ebpekezawat;

ne sikan is ebpen-ahà,

ebpeketuredu;

ne sikan is ebpenelehuzan,

ebpuwasan daan te Megbevayà.

11 Sikiyu is menge ǥinikanan,

ke zuen ebuyuen te anak niw he pait,

ne kenà egkehimu he uled is ibeǥey niw.

12 Ne emun impis is ebuyuen din,

kenà daan egkehimu he venayew is ibeǥey niw.

13 Ne sikiyu is menusiyà he kenà memetazeng,

emun meupiya is ibeǥey niw ziyà te menge anak niw,

iyan pe be is Amey tew he Megbevayà diyà te langit kenà mebeǥey keniyu te Waǥas he Mulin-ulin ke ebuyuen niw.”

14 Ne zuen timpu he mibewian ni Jesus is maama he midhimu he emew te mezaat he mulin-ulin he edlalung kandin.

Ne hein impaawà ni Jesus haazà is mezaat he mulin-ulin ne segugunà nekekaǥi haazà is maama.

Ne utew nengeinuinu is langun he menge etew he nengetiǥum dutun.

15 Iyan,

duen dutun migkaǥi te,

“Iyan mibeǥey kandin te ǥehem te kebpenegseg te menge mezaat he mulin-ulin si Endedaman,

sikan is egalen te menge mezaat he mulin-ulin.”

16 Ne zuen pa zutun menge etew he egezaman dan si Jesus.

Midhangyù dan he ibpeehè din is egkein-inuwan su ed-ahaan dan ke tutuu ve he midsuǥù sikandin te Megbevayà.

17 Iyan,

netuenan ni Jesus ke hengkey is seled te ǥehinawa zan ne migkaǥi sikandin te,

“Penenglitan ke zuen hadì ne ebpetebtebekà is menge sakup din ne meǥaan egkeawà is gehem din te kedhadì.

Ne ke zuen edlingahaan te sengepemilya ne ebpekungkuntedahà is menge sakup din,

ne egkevengkag haazà is pemilya.

18 Ne emun egketebek ni Setanas is menge sakup din egkezeetan is gehem din.

Kenà egkehimu is migkaǥi niw he pinaaǥi te ǥehem ni Endedaman egkezaag ku is menge sakup din.

19 Emun iyan igkesegseǥa ku te menge mezaat he mulin-ulin is gehem he ebpuun diyà te ki Setanas ne hendei ves ebpuun is gehem te menge zuma niw he ebpenegseg te mezaat he mulin-ulin?

Pinaaǥi te menge ulaula te menge sumusundan niw egketuusan he nengesayep kew.

20 Su heini is gehem ku te kebpemuǥew te mezaat he mulin-ulin,

ne ziyà ebpuun te Megbevayà.

Ne pinaaǥi kayi egketuusan niw he iyan en heini sikan is timpu te kedhadì te Megbevayà.”

21 Ne zutun impesavut ni Jesus he lavew he mekeǥeǥehem sikandin kenà si Setanas is egalen te menge mezaat he mulin-ulin.

Ke si Jesus te,

“Ke zuen mezesen he etew he nepurung meǥumeeni ne ebentayan din is baley zin,

wazà ebpekeaǥew te menge azen din.

22 Iyan,

ke zuen tuwas pa he mezesen he ebpekeuma,

egkezaag din haazà is nehuna,

ne ed-eǥawan din te menge ǥumaan he iyan edseriǥan dutun te etew ne ebpeneltelazen din haazà is netavan din diyà te menge sakup din.”

23 Ne mid-uman megkaǥi si Jesus te,

“Sikan is kenè ku zuma,

ne kuntada ku;

sikan is kenà edtavang kedì,

ne edsanggen kediey.

24 Ke ed-awà is mezaat he mulin-ulin he ebpuun diyà te etew he edlelungen din,

diyà ebayà te memaza he tanà su ebpen-ahà te egkeubpaan din.

Ne emun wazè din egkeahà,

egkaǥi sikandin te,

‘Edlikù a nasì diyà te neubpaan ku.’

25 Ne edlikù ne egkeehè din haazà is neubpaan din he midtines en is menge vutang dutun,

ne nepurung melumpiyuwi.

26 Ne zutun edlikù edhipanew su ebpengakat te pitu he zuma zin he menge mezaat he mulin-ulin he tuwas pa he memezaat kenà sikandin.

Ne ed-ahuk dan ne ed-ubpè dan dutun te etew.

Ne zutun ed-iseg pa ebmezaat is kebpekesavuk dutun te etew,

kenà te nehuna he kebpekesavuk din.”

27 Ne zutun hein neipus ni Jesus haazà is migkaǥi zin ne zuen dutun bahi he midhabet megkaǥi te,

“Dekelà is kelipey te vahi he mid-anak kenikew wey nekepesusu kenikew!”

28 Iyan,

midtavak si Jesus te,

“Lavew pa he zekelà is kelipey te etew he ebpemineg te Lalag te Megbevayà ne ebpezumdumahan din!”

29 Ne zutun hein egkengehasekhasek en is utew mezakel he menge etew he ed-uvey ziyà te ki Jesus,

migkaǥi sikandin diyà te kandan te,

“Sikiyu is menge etew ǥuntaan,

utew mezaat is menge ulaula niw.

Egkesuatan niw he meehè niw is singyal he ebpuun te Megbevayà diyà te langit he tuus he midsuǥù e zin,

iyan,

iyan dà singyal he ibpaahà keniyu is iring te impeulaula zengan duen te tipehuna he ebpeneuven he si Jonas.

30 Su si Jonas,

hein nekeuma sikandin dengan diyà te inged he Ninivi,

impeehè din is singyal he tuus te silut te Megbevayà diyà te menge tigNinivi.

Ne iring din ded daan,

siak is Kakey te Menusiyà,

egkehimu is penurù ku he tuus te meǥaan en is ed-ul-ulahan keniyu te Megbevayà.

31 Keuzemà te andew te kedhukum te Megbevayà,

sikan is tipehuna he bai he ebpuun te inged he Siba,

edsewayen kew zin is menge etew ǥuntaan su utew meziyù is midhipenawan din te kebpemineg dà te penurù ni Hadì Sulumun te utew metau.

Ne ǥuntaan,

duen lavew pa kenà si Sulumun dini te keniyu ne wazè niw zewata is penurù din.

32 Keuzemà te andew te kedhukum te Megbevayà,

edsewayen kew is menge etew ǥuntaan te menge tigNinivi zengan su hein nezineg dan is penurù ni Jonas,

mid-iniyuǥan dan is memezaat he ulaula.

Ne ǥuntaan duen ebpeneuven he lavew pa kenà si Jonas dini te keniyu,

ne sikiyu mulà,

wazè niw zewata is penurù din.”

33 Ne mid-uman megkaǥi si Jesus te,

“Wazà etew he edtemteman din is sulù ne id-eles din,

ne emun kenà,

ne ebpelengkevan din te revan,

kekenà,

diyè din idsavuk te sevukà,

ne emun duen etew he edseled ne egketeyawan.

34 Is mata te etew,

ne iring te sulù diyà te lawa zin su emun merayag is ked-ehè din,

35 Iring din ded daan is sulù te isip te etew,

36 he ulaula zin,

ne henduen be te utew merayag is egkeulaula zin iring te egketeyawan sikandin te sulù.”

37 Ne hein nekeipus dutun si Jesus is ebpenurù ne zuen sevaha zutun he Perisiyu he mid-umbita kandin te kegkaan diyà te valey zin.

Ne midhendiyà si Jesus ne migkaan.

38 Ne naahà dutun te Perisiyu he migkaan si Jesus he wazè din lùlui is belad din.

Ne utew sikandin neinuinu su nesupak ni Jesus is betasan te menge Perisiyu.

39 Ne migkaǥi si Jesus diyà te kandin te,

“Sikiyu is menge Perisiyu,

ebpurungan niw ebentayi is menge vetasan niw,

iyan,

diyà te isip niw wey ǥehinawa niw ne zuen keheheramham wey kelelalung.

Iring kew te vasu wey pinggan he nelumpiyuwan diyà te ǥawas,

iyan,

meremerik is diyà te seled.

40 Menge wazè niw isip!

Is Megbevayà he midlimbag din is gawas te lawa niw,

midlimbag din daan is gehinawa wey isip niw.

Ne kinahanglan he lumpiyu is gehinawa niw wey isip niw iring te ǥawas te lawa niw.

41 Ne sumalà is egkehimu niw,

beǥayi niw is menge egkengeayuayu ne human egkehimu he egkelumpiyuwan kew egkepurungi.

42 Kehizu niw te menge Perisiyu su ibeǥey niw te Megbevayà is ikepulù he vahin minsan te menge perehemut te egkeenen iring te yirbebuyna wey vawing wey is langun he menge edlumbayen,

iyan,

is metazeng he ulaula wey is kebmahala niw te Megbevayà diyà te ǥehinawa niw,

ne wazè niw isipa.

Kinahanglan he iveǥey niw is ikepulù,

iyan,

kenè niw zaan ipeliyu heini is menge lavew pa he suǥù.

43 Kehizu niw te menge Perisiyu su emun diyè kew te simbahan egkesuatan niw he ibpepinuu kew ziyà te menge pinuuwà te menge egalen.

Ne emun diyè kew te tiyenggiyan,

utew ibmeupiya te ǥehinawa niw ke edtehuzen kew te menge etew.

44 Kehizu niw te menge Perisiyu su iring kew te menge leveng he kenà egketuusan ne egkeǥiekan te etew,

wazè dan metueni he meremerik haazà is neǥiekan dan.”

45 Ne zutun duen menunudlù te kesuǥuan dutun he migkaǥi ziyà te ki Jesus te,

“Datù,

heeyan is menge lalag nu,

ne nesuǥat key zaan keniyan.”

46 Ne ke si Jesus te,

“Sikiyu zaan is menge menunudlù te kesuǥuan,

kehizu niw zaan su utew mezakel is mereǥen he tulumanen he ibpetuman niw te menge etew,

iyan,

wazà minsan hengkey he idtavang niw kandan wey zan meketuman dutun te ibpetuman niw kandan.

47 Mekehizuhizu kew utew keuzemà su mideyzeyanan niw is mibpenlevengan duen te ebpemeneuven dengan te Megbevayà,

iyan,

menge kevuwazan kew te nememunù kandan.

48 Is menge kepuun niw,

ne iyan mibunù,

ne midhimasad niw haazà is mezaat he mid-ulaula zan su iyan kew midayandayan te midlevengan;

mid-ulaula niw heini he tuus te egkesuatan niw is mezaat he vaal te menge kepuun niw.

49 Is Megbevayà he utew metau,

migkaǥi sikandin dengan te,

‘Ibpehendiyan ku pa te kandan is ebpemeneuven wey is menge epustul.

Ne edhimetayan dan is duma ne is duma ebpesipelahan dan.’

Umba migkaǥi heini te Megbevayà su netuenan din he sikiyu is menge Hudiyu,

nesevaha is gehinawa niw te ǥehinawa te menge kepuun niw.

50 Umba sikiyu is menge etew ǥuntaan,

elin kew zaan edsilutan te kebpemunua te langun he menge ebpemeneuven te Megbevayà he nengevunù dengan

51 puunè pa te kedhimetayi ki Abel pehendiyà te kedhimetayi ki Zacarias he mibunù diyà te pid-elangan te simbahan he Valey te Megbevayà wey vangkù he pemuhatà.

Benar is egkeǥiyen ku he sikiyu is menge etew ǥuntaan,

elin kew zaan edsilutan tenged kayi!

52 Mekehizuhizu kew keuzemà sikiyu is menge menunudlù te kesuǥuan su ed-elangan niw is menge etew wey zan kenà metueni is hustu he ibpevayà pehendiyà te Megbevayà.

Kenè kew egkesuat he ed-ikul te hustu he ibayà,

iyan,

ed-eǥenen niw is etew he egkesuat he ed-ikul zutun!”

53 Ne hein mid-awà si Jesus dutun te valey te Perisiyu,

midreǥenreǥen sikandin te menge Perisiyu wey menge menunudlù te kesuǥuan.

Mezakel is menge insè dan kandin su edteǥelen dan sikandin wey meketavak

54 su ebpengahaan dan is paaǥi wey mehimu si Jesus he igkesumbung dan.