Is Kepituwan Wey Zezuwa he Midsuǥù ni Jesus
10
Ne hein neipus heini,
duen daan kepituwan wey zewuwa he menge maama he nepilì te Nengazen he si Jesus su ibpehuna zin ibpehipanew te tigduwazuwa ziyà te langun he menge inged he ebpemeyaan din daan.
2 Ne migkaǥi sikandin diyà te kandan te,
“Mezakel pezem is edawat te Meupiya he Tudtulanen.
Iring sikandan te kamet he nelutuan en.
Utew meluag is kamet,
iyan,
deisey kiw zà is ebpemenlegtey.
Iampù niw ziyà te Nengazen he suǥua zin pa ziyà te kamet din is duma pa he ebpekelegtey.
3 Genat kew en,
iyan,
andam kew su edsuǥuen ku sikiyu ziyà te menge etew he kumekaid.
Iring kew te menge nati he kerehidu ne sikandan ne iring te menge erimaung.
4 Kenè kew med-uwit te selapì,
wey kempilù,
wey sepatus he ed-ilisan niw.
Ne kenà utew meluǥayad is kedlelaǥi niw te etew he egkeuma niw ziyà te zalan.
5 Ne ke hendei is baley he ebpemenehikan niw ne penelehuzan kew.
Kaǥi kew te,
‘Sikiyu is meǥinged kayi,
tuvazi kew te Megbevayà.’
6 Ne emun dait he edtuvazan is etew zutun dekelà is tuvad te Megbevayà kandan.
Ne emun kenà,
ne kenà sikandan edleusan edtuvazi te Megbevayà.
7 Ne haazà is baley he zuen etew he egalewǥalew keniyu,
ne zutun kew pundu taman te kegenat niw.
Ne zewata niw is minsan hengkey he ibpekaan dan wey ibpeinum dan keniyu su iring te suhul zan keniyu.
Dait is edterebahu he edsuhulan.
Kenè kew en penhalinhalin pa maan diyà te zuma pa he menge valey.
8 Ne emun ebpekeuma kew ziyà te inged ne zuen egalewǥalew keniyu,
minsan hengkey is keenen dan he ibpekaan dan keniyu,
ne keena niw.
9 Pemewii niw is egkengezeruwan dutun te inged.
Ne keǥiyi niw is menge etew zutun he meǥaan en is timpu te kedhedii kandan te Megbevayà.
10 Iyan,
emun ebpekeuma kew ziyà te inged ne wazà egalewǥalew keniyu zutun,
ne peehè kew te menge etew zutun,
ne ke sikiyu te,
11 ‘Minsan is menge eliyavuk kayi te inged niw he nemendeket te menge paa zey,
edtektaken dey en wey niw metueni he edsilutan kew te Megbevayà.’
Ne ke sikiyu zaan te,
‘Kinahanglan he metueni niw he meǥaan en is timpu te kedhadì te Megbevayà.’
12 Egkeǥiyen ku keniyu,”
ke si Jesus,
“he lavew pa is idsilut te Megbevayà dutun te inged emun egkeuma keuzemà is andew te kedsilut,
kenà te silut din dengan diyà te menge lalung he etew he meǥinged diyà te inged he Suduma.”
Is Kedhukumi te Kenà Edtuu
13 Ne mid-uman megkaǥi si Jesus te,
“Mekehizuhizu kew keuzemà is menge tigKurasin!
Mekehizuhizu kew zaan keuzemà is menge tigBitsayda.
Su is menge egkein-inuwan he impeehè ku ziyan te inged niw te menge Hudiyu,
angin ke midhimu ku haazà diyà te menge inged he Tiru wey Sidun he kenà menge Hudiyu is meǥinged dutun,
su nekekukumbalè dan en pezem te saku ne nepen-evuwan dan en is ulu zan he tuus te ed-iniyuǥan dan is memezaat he ulaula.
14 Kenè niw lipati he zutun keuzemà te andew te kedsusi te Megbevayà te menusiyà,
lavew is silut din keniyu kenà te menge etew ziyà te Tiru wey Sidun.
15 Ne sikiyu zaan,”
ke si Jesus,
“is menge tigKepirnaum,
iyan egkesuatan niw pezem is deliǥa kew te minsan hentei,
iyan,
igketimbag kew ziyà te Impirnu.”
16 Ne zutun migkeǥiyan din haazà is menge sumusundan din te,
“Is minsan hentei he etew he ebpemineg te ibpenurù niw,
ne iring te iyan e zin nepemineg.
Ne sikan is etew he kenè kew zin edseǥipaan,
ne iring te iyan a wazè din seǥipaa.
Ne sikan is etew he kenà edseǥipà kedì,
ne iyan wazè din seǥipaa is Megbevayà he midsuǥù kedì.”
Is Kedlikù Duen te Kepituwan Wey Zezuwa
17 Ne nepipira pa he andew zutun hein nemekeulì sikan is kepituwan he midsuǥù,
utew zan nengelipey su ke sikandan diyà te ki Jesus te,
“Minsan is menge mezaat he mulin-ulin ne ebpemineǥen key zan ke ibpaawè dey sikandan pinaaǥi te ǥehem te ngazan nu!”
18 Ne zutun migkeǥiyan sikandan ni Jesus te,
“Si Setanas,
is egalen te menge mezaat he mulin-ulin,
neehè ku is kegkezaaǥa niw kandin ne utew meǥaan su iring te kilat he ebpuun te langit.
19 Tentenuzi niw heini he mibeǥayan ku sikiyu te ǥehem he minsan ke ebpekeǥiek kew te uled wey venayew ne kenè kew edhereǥen.
Ne kenè kew zaan egkezaag te ǥehem te ukag tew he si Setanas ne wazà minsan hengkey he ebpekekaid keniyu.
20 Iyan,
kenè niw iyan ikelipey is kebpemineǥa keniyu te menge mezaat he mulin-ulin,
kekenà,
ikelipey niw is menge ngazan niw he impelista te Megbevayà diyà te langit.”
Is Kebpengumew-umew ni Jesus
21 Ne zutun midlipey si Jesus te Waǥas he Mulin-ulin ne mid-ampù diyà te Megbevayà,
ke sikandin te,
“Amey ku he Nengazen te langit wey tanà,
dekelà is kebpeselemati ku kenikew su is in-eles nu su wey kenà mesavut te menge uluwanen wey uvag en memetau ne impesavut nu en diyà te menge etew he wazè dan menge hanew.
Amey ku,
umba ebpeselematan ku su midhimu nu heini te iring kayi su iyan egkesuatan nu tenged te ǥaǥew nu.”
22 Ne zutun mid-uman megkaǥi si Jesus diyà te menge etew te,
“Is minsan hengkey,
insarig kediey te Amey ku he Megbevayà.
Wazà nesayud kedì te Anak te Megbevayà,
kekenà,
iyan dà is Amey ku he Megbevayà.
Ne wazà daan nesayud te Amey ku he Megbevayà,
kekenà,
iyan e zà is Anak din wey sikan is menge etew he mibpengelinteuwan ku he mesayud dan kandin.”
23 Ne midsineruwan ni Jesus is menge sumusundan din hein iyan dan dà,
ne ke sikandin te,
“Deyzey kew he menge etew su nemetmetahan niw en heini is langun he edhimuwen ku.
24 Su tutuu is egkeǥiyen ku keniyu he kenà pira zà is menge ebpemeneuven te Megbevayà dengan wey menge hadì dengan he egkesuat pezem he mekeahà kayi te nengeehè niw ǥuntaan,
iyan,
wazà ipaahà kandan.
Ne egkesuatan dan daan he ebpemineǥen heini is nengezineg niw ǥuntaan,
iyan,
wazà ipepemineg kandan.”
Is Sempità Mehitenged te Meupiya he Etew he TigSemarya
25 Ne zutun duen sevaha he etew he menunudlù te menge kesuǥuan te menge Hudiyu he midhitindeg su egezaman din edekepa is ketezengan ni Jesus pinaaǥi te menge insà,
ne ke sikandin te,
“He Zatù,
hengkey is ed-ul-ulahan ku wey a meveǥayi te untung he wazà pidtemanan?”
The Good Samaritan (Luke 10:25-37)
26 Ne midtavak si Jesus te,
“Hengkey is nekaǥi te kesuǥuan te Megbevayà he imbilinbilin ni Moises?
Hengkey is kedsevuta nu te nengevasa nu?”
27 Ne midtavak haazà is etew te,
“Is Megbevayà he Nengazen tew,
kinahanglan he iyan tew sikandin ebmahalen dini te ǥehinawa tew.
Iyan sikandin mahal zini te ǥehinawa tew,
isip tew,
kedsavut tew,
wey tivuuk he ulaula tew.
Ne kinahanglan daan he ebpurungan tew is duma tew;
ed-isipen tew sikandin he iring en te kenitew he ǥehinawa.”
28 Ne zutun migkaǥi si Jesus diyà te kandin te,
“Benar is nekaǥi nu.
Ne iyan ul-ulaha nu ne ebeǥayan ka te untung he wazà pidtemanan.”
29 Iyan,
haazà is menunudlù te kesuǥuan,
egkesuatan din pezem he meisip ni Jesus he hustu is menge ulaula zin,
umba migkaǥi sikandin te,
“Hentei is nekaǥi he zuma ku?”
30 Ne ke si Jesus te,
“Duen sevaha he etew he Hudiyu he midhipanew ebpuun diyà te inged he Hiruselim he sebsevaha zin su edtupang pehendiyà te inged he Hiriku.
Ne ziyà te zalan neuma sikandin te menge tulisan ne mibuǥel zan sikandin ne midlevasan dan,
ne wey zan ewai hein deisek dà is gehinawa zin.
31 Ne te kegkeipus dutun te menge tulisan,
nekeuma zutun is Hudiyu he memumuhat te Megbevayà,
iyan,
hein neehè din haazà is midruug he nekehidhizeǥà,
mid-eliǥu zin ne midlaus te hipanew zin.
32 Ne iring din ded daan is nekesunud he nekeuma zutun.
Hudiyu zed daan he kevuwazan ni Levi he edtavangtavang te menge memumuhat diyà te simbahan he Valey te Megbevayà,
iyan,
hein neehè din haazà is nekehidhizeǥà ne mid-eliǥu zin daan ne midlaus te hipanew zin.
33 Ne wazà utew meuǥet ne nekeuma zutun daan is sevaha he kenà Hudiyu su tigSemarya.
Ne hein neehè din haazà is nekehidhizeǥà he midruug ne utew sikandin nehizu.
34 Ne mid-uvayan din ne mibewian din te lana wey vinu is menge palì dutun ne mibukusan din te manggad.
Ne zutun mibitbit din ne in-untud din te kudè din ne mid-uwit din diyà te valey he hulevungà te menge etew ne zutun mibpurungan din elimahi.
35 Ne te nepawà dutun ne mibeǥey te selapì dutun te teǥiǥaked te valey ne migkaǥi te,
‘Elimahi nu kedì heini is midruug te tulisan ne emun duen selapì nu pa he egkeǥastu nu kandin he liyu kayi te ibeǥey ku,
ne zutun te kedlikù ku ne ed-ilisan ku ziyan te kenikew.’ ”
36 Ne ke si Jesus diyà te menunudlù te,
“Hentei zutun te tetelu he etew is nehimu he hustu he zuma zutun te midruug te menge tulisan?”
37 Ne midtavak haazà is menunudlù te,
“Iyan nehimu he hustu he zuma zutun te midruug te menge tulisan haazà is nehizu kandin he etew ne midtavang kandin.”
Ne ke si Jesus te,
“Iyan haazà ul-ulaha nu is iring dutun.”
Parable of the Good Samaritan
Si Marta Wey si Maria
38 Ne hein midlaus ensi Jesus,
ne nekeuma zan diyà te sevaha he inged he zuen dutun bahi he egngezanan ki Marta.
Impepemenahik ni Marta si Jesus dutun te valey zin.
39 Ne zuen dutun hazi ni Marta he egngezanan ki Maria.
Ne mibpinuu si Maria ziyà te uvey ni Jesus su ebpurung ebpemineg te menge penurù ni Jesus.
40 Ne si Marta,
ne iyan dà sikandin diyà te avu su ebaal te egkekaan dan ne mezakel is igkesamuk din he ebeelan din.
Ne zutun mid-uvey sikandin diyà te ki Jesus he ke sikandin te,
“Meupiya ve te ǥehinawa nu he iyan e zà egkeviyuviyu he ebaal te egkekaan tew?
Suǥua nu si Maria he uǥupi e zin.”
41 Iyan,
migkaǥi si Jesus te,
“Marta,
utew mezakel is igkesemuki nu he kenà utew ebpulus.
42 Sevaha zà is dekelà is pulus din he iyan mibpilì ni Maria ne kenà heini igkeawà diyà te kandin.”