Is Telaan ni Jesus Duen te Menge Sumusundan Din
9
Ne midtiǥum ni Jesus sikan is sepulù wey zezuwa he menge sumusundan din.
Ne kada sevaha kandan,
mibeǥayan din te ǥehem su wey zan mevewii is egkengezeruwan wey ikepemeǥuwè is menge mezaat he mulin-ulin.
2 Ne zutun ne impehipanew zin sikandan su wey zan ikepesavut is Meupiya he Tudtulanen te keaǥi te kedhadì te Megbevayà ne wey zan daan mekepemawì te minsan hengkey he egezamen te etew.
3 Ne midteleenan din sikandan he ke sikandin te,
“Kenè kew uwit te menge azen niw te kedhipanew niw;
minsan tuked,
ne kenè niw uwita;
kenè kew kekempilù,
kenè kew lulutù,
kenè kew uwit te selapì,
ne minsan is ed-ilisan,
ne kenè niw zaan uwita.
4 Ke hendei is baley he zuen egalewǥalew keniyu ne zutun kew zà uliulì taman te kegenat niw.
5 Ne emun duen inged he wazà dutun etew he egalewǥalew keniyu,
ne ewai niw ne penektaka niw is menge eliyavuk diyà te menge paa niw he iyan laǥuy he edsilutan sikandan te Megbevayà.”
6 Ne zutun migenat haazà is menge sumusundan ne mibpesusuwayè dan ne midtukid dan is menge inged te ebayà te ebpenudtul te Meupiya he Tudtulanen ne mibpemewian dan daan is egkengezeruwan diyà te kada inged.
Is Isip ni Hirudis Mehitenged ki Jesus
7 Ne heini is nengeulaula eni Jesus,
nezineg ni Gubirnedur Hirudis diyà te prubinsya he Geliliya ne ingkesamuk te ǥehinawa zin su zuen egkaǥi he iyan si Jesus si Juan Megbebewtismu he nevanhew.
8 Ne zuen daan egkaǥi he mibpeetew mebpeuman si Elias,
kes ebpeneuven dengan te Megbevayà,
ne iyan en si Jesus.
Ne zuen daan egkaǥi he nevanhew is sevaha zuen te menge ebpeneuven dengan ne iyan si Jesus.
9 Neisip ni Hirudis is:
“Si Juan,
ne mibpepungelan ku en te ulu,
iyan,
hentei etawa heini is egkeǥiyen dan?”
Ne mibpen-ahà sikandin te paaǥi wey zin maahà si Jesus.
Is Kebpekeenà te Lelima he Libu he Menge Etew
10 Ne mid-ulì sikan is sepulù wey zezuwa he epustul ni Jesus ne midtudtul zan kandin is langun he mid-ulaula zan.
Ne zutun miduma zin sikandan he iyan dan dà pehendiyà te inged he Bitsayda.
11 Ne netuenan te nerivurun he mezakel he menge etew he midhipanew ensi Jesus ne nemenelukun dan.
Ne migalewǥalew sikandan ni Jesus ne impesavut din kandan is mehitenged te kedhadì te Megbevayà ne mibpemewian din daan is menge etew zutun te minsan hengkey he ebpenggezamen dan.
12 Ne hein mahapun en mid-uvayan si Jesus te sepulù wey zezuwa he menge sumusundan din.
Ke sikandan te,
“Ipeǥenat nu en is menge etew wey zan mekehendiyà te menge unayan wey menge inged su wey zan mekepen-ahà te egkekaan dan wey egkehizeǥaan dan su wazà egkekuwa zan dini te wazà duen ed-ubpà he etew.”
13 Iyan,
midtavak si Jesus te,
“Iyan kew mebeǥey te egkekaan dan.”
Ne midtavak haazà is menge sumusundan din te,
“Lelelima zà he vuuk he supas wey zezuwa he zezeisek he pait is naazen tew he egkeenen.
Kela ke egkesuatan nu he edhipanew key te kebpemasa te ibpekaan tew kayi te utew mezakel he menge etew,”
egkaǥi zan.
14 Menge lelima he libu he menge maama is nengetiǥum dutun ne zuen daan menge vahi wey vatà.
Ne migkaǥi si Jesus diyà te menge sumusundan din te,
“Ipemepinuu niw sikandan he mebpundukpunduk he tigkelimahan is sengepunduk.”
15 Ne zutun impemepinuu zan haazà is langun he menge etew.
16 Ne migkuwa zutun ni Jesus haazà is lelima he supas wey haazà is dezuwa he pait ne midlingahà diyà te langit ne mibpeselematan din te Megbevayà.
Ne mibpenevìtevì din.
Ne minsan pa zutun kenà egkeamin haazà is edtevien din.
Ne imbeǥey zin diyà te menge sumusundan din haazà is nengetevì wey zan ikepemeǥey zutun te menge etew.
17 Ne is kada sevaha zutun te menge etew,
nekekaan ne nahantey.
Ne haazà is egkeenen,
ne nesemaan pa te sepulù wey zezuwa he vinevey is nehimes he menge tevì te supas te menge sumusundan din.
Jesus Feeds 5,000
Is Migkaǥi ni Pedro Mehitenged ki Jesus
18 Sengeandew zutun ne ed-ampù si Jesus he sebsevaha zin diyà te Megbevayà ne is menge sumusundan din,
diyè dan te uvey zin.
Ne ke sikandin diyà te kandan te,
“Hentei e kun sumalà te ked-isipa kediey te menge etew?”
19 Ne midtavak dan te,
“Iyan ke kun si Juan Megbebewtismu he nevanhew,
ne zuen daan egkaǥi te iyan ka si Elias,
ne zuen pa egkaǥi te sevaha ka zuen te menge tipehuna he ebpeneuven te Megbevayà.”
20 Ne migkaǥi si Jesus te,
“Ne sikiyu zaan,
hentei e man sumalà is ked-isipa niw kediey?”
Ne midtavak si Pedro te,
“Iyan ka sikan is mibpilì te Megbevayà he ibpahadì din te menusiyà.”
21 Ne zutun mibpeketelteleenan sikandan ni Jesus he kenè dan tudtula haazà diyà te minsan hentei.
Is Kegkeǥiya ni Jesus te Kemetayen Din
22 Ne ke sikandin daan te,
“Siak is Kakey te Menusiyà,
kinahanglan he mezakel is menge kemeresayan he ibpaantus kediey.
Edsumpeliten a te menge ebmeǥurangen te menge Hudiyu wey te menge punuan he memumuhat wey te menge menunudlù te kesuǥuan.
Edhimetayan e zan ne seled te tetelu he andew zutun egkevanhew a.”
Peter Declares Jesus to be the Christ
23 Ne mid-uman si Jesus megkaǥi diyà te kandan te langun,
ke sikandin te,
“Ke zuen egkesuat he edsundan kedì ne kinahanglan he iawè din diyà te isip din is kandin he paaǥi ne tianga zin te kada andew is krus din,
he ke và dà egkeǥiya,
kinahanglan he edtumanen din is menge suǥù ku minsan pa ke iyan ibpatey zin.
Ne human ebpekesunud kedì.
24 Su ke zuen etew he egkenuǥunan din is untung din,
ebpatey ǥihapun.
Iyan,
ke zuen etew he minsan ibpatey zin pa is kedsunud din kedì,
id-ulì te Megbevayà diyà te kandin is untung din ne kenè en sikandin ebpatey te wazà pidtemanan.
25 Minsan ke maangken pa te etew heini is tivuuk he kelibutan,
wazà pulus diyà te kandin ke kenà sikandin egkeveǥayan te untung he wazà pidtemanan ne edsilutan pa sikandin.
26 Is minsan hentei he igkeeled e zin wey igkeeled din is ibpenurù ku,
siak is Kakey te Menusiyà,
igkeeled ku zaan sikandin keuzemà ke edlikù a he zekelà is gehem te ked-anlag ku wey edsun-uzan ad te mekeǥeǥehem he anlag te Amey ku he Megbevayà wey te anlag te menge velinsuǥuen te Megbevayà.
27 Tentenuzi niw heini,”
ke si Jesus,
“duen menge zuma tew kayi he kenà ebpatey taman te timpu he ibpaahà kandan te Megbevayà is keǥehem din te kedhadì.”
Is Kegkahalin te Paras ni Jesus
28 Ne menge sengesimana puun dutun te kegkaǥi kayi ni Jesus,
miduma zin ensi Pedro,
si Santiago,
wey si Juan ne midtekezeg dan te vuvungan su wey mekeampù diyà te Megbevayà.
29 Ne zutun te ked-ampù ni Jesus,
netik-ew mahalin is dagwey zin ne mibpengenamag te keputì is ugelingen din ne ebpekesirang te mata.
30 Ne netekewtekew mekepeǥawaǥawa is dezuwa he maama he ebpekidlalag kandin he iyan si Moises wey si Elias,
kes menge tipehuna he ebpeneuven te Megbevayà.
31 Midsun-uzan daan sikandan te mekeǥeǥehem he anlag,
ne iyan imbitiyara zan ki Jesus is mehitenged te meǥaan din en kedhimuwa te suǥù te Megbevayà su edhimetayan sikandin diyà te Hiruselim.
32 Ne si Pedro wey is menge zuma zin,
ne nemekelipezeng dan ne hein nepukew zan neehè dan is mekeǥeǥehem he anlag ni Jesus wey haazà is dezuwa he maama he zuma ni Jesus.
33 Ne hein ed-awè en diyà te kandin haazà is dezuwa,
migkaǥi si Pedro te,
“Nengazen,
utew meupiya te zini key.
Ebeelan dey is tetelu he lawig;
sevaha is kenikew,
sevaha zaan is ki Moises,
ne sevaha is ki Elias.”
Wazà metentenuzi ni Pedro he nengekaǥi zin heini is lalag.
34 Ne zutun te kemulu pa egkaǥi si Pedro,
neselikuvungan sikandan te ǥapun ne utew zan nengehandek is tetelu he sumusundan dutun te kegkeselikuvungi kandan te ǥapun.
35 Ne nezineg dan is midtik-ew megkaǥi he ebpuun dutun te ǥapun te,
“Iyan heini Anak ku he mibpilì ku he ibpahadì.
Pemineǥa niw is menge lalag din.”
36 Ne hein mid-engked haazà is egkaǥi ne iyan dà maan dutun si Jesus neehè dan.
Ne puun dutun he timpu wazè pa minsan sevaha he etew he midtudtulan dan te neehè dan.
The Transfiguration
Is Kedsegseǥa te Mevurut he Mezaat he Mulin-ulin
37 Ne hein mid-ilis he andew,
midtupang dan dutun te vuvungan ne utew mezakel he menge etew is nemenelavuk ki Jesus.
38 Ne zuen maama zutun he nengumew ki Jesus,
ke sikandin te,
“He Zatù,
ahaa nu pa kedì heini is anak ku he maama.
Sebsevaha heini he anak ku!
39 Ahaa nu su edlelungen te mezaat he mulin-ulin ne emun ebpekeume en is edlalung kandin ne ebpeketik-ew ebpekeerang ne egkerkeren ne eburvuraan is bèbè din ne edsiguduwan sikandin ed-eyuwa te edlalung kandin taman te egkevuǥel is lawa zin ne egkeuǥet sikandin ed-engkezi te mezaat he mulin-ulin.
40 Midhangyù a ziyà te menge sumusundan nu he vewii zan,
iyan,
wazè dan meulii.”
41 Ne zutun migkaǥi si Jesus te,
“Sikiyu is menge etew ǥuntaan,
utew zekelà is menge sayep niw;
wazè niw iyan kedtuu te Megbevayà.
Utew ves egkeuǥet is kebpekiduma ku keniyu!
Utew ves egkeuǥet is kebpekeantus ku keniyu ne human kew edtuu.
Ihengkayi nu heeyan is anak nu.”
42 Ne hein uvey en haazà is batà diyà te ki Jesus,
ne neumahan en maan dutun te edlalung kandin ne nepiley sikandin ne migkerker te utew mezesen.
Ne migkeǥiyan ni Jesus haazà is mezaat he mulin-ulin he ewai zin haazà is edlelungen din.
Ne zutundutun neulian haazà is batà.
Ne migkaǥi si Jesus dutun te amey te vatà te,
“Kuwaa nu en heini is anak nu.”
43 Ne langun he menge etew zutun,
ne utew nengeinuinu tenged dutun te nehimu ni Jesus pinaaǥi te zekelà he ǥehem te Megbevayà.
Jesus Heals Boy from Evil Spirit
Is Ikezuwa he Kegkeǥiya ni Jesus te Kemetayen Din
Ne zutun te kemulu pa egkeinuinu is menge etew zutun te langun he ed-ul-ulahan ni Jesus,
ne migkaǥi sikandin diyà te menge sumusundan din te,
44 “Kenè niw lipati heini is egkeǥiyen ku keniyu,
duen timpu keuzemà he siak is Kakey te Menusiyà,
ibpalad a ziyà te menge kuntada ku,”
ke sikandin.
45 Ne is menge sumusundan din,
wazè dan dutun mesavut is ibpesavut ni Jesus.
Wazà ipesavut te Megbevayà kandan su wey kenè dan metueni.
Ne wazè dan mekeaku he ed-insà kandin ke hengkey is kehuluǥan dutun.
Is Lavew Zuen te Menge Sumusundan
46 Sevaha he andew zutun ebpelewlewanà is menge sumusundan ke hentei is lavew kandan.
47 Ne netuenan ni Jesus ke hengkey is diyà te isip dan,
ne tenged dutun,
migkuwa zin is batà ne impehitindeg din diyà te uvey zin
48 ne ke sikandin te,
“Is etew he tenged te kedtuu zin kedì,
edewaten din ne ebpurungan din heini is deisek he vatà,
ne nezawat e zin en daan.
Ne is minsan hentei he edawat kediey,
nezawat din en daan is Amey ku he Megbevayà he midsuǥù kedì.
Su is minsan hentei keniyu he ebpevayàbayà te menge zuma zin,
iyan sikandin tutuu he lavew keniyu.”
Is Kenà Kuntada ni Jesus
49 Ne zutun migkaǥi si Juan te,
“Duen etew he neuma zey he ebewian din is menge etew he edlelungen te mezaat he mulin-ulin ne egemiten din is gehem te ngazan nu te kebpemawì.
Ne midawey zey su kenà ebpekiduma kenitew.”
50 Ne migkaǥi si Jesus diyà te kandin te,
“Kenè niw zewaya is ed-ulaula te iring dutun su is etew he kenè tew kuntada,
ne edtavang kenitew.”
Is Inged he Wazà Medawat ki Jesus
51 Ne hein egkeuvayan en is andew te kebpeewaa ki Jesus dini te kelibutan su ed-ulì en diyà te langit ne netivuuk is gehinawa zin te kedhendiyà te Hiruselim ne zutun migenat dan.
52 Duen menge etew he impehuna ni Jesus ne migenat dan ne midhendiyè dan te inged diyà te prubinsya he Semarya su edteǥenahan dan is egkinehenglanen eni Jesus.
53 Iyan,
is menge meǥinged dutun,
wazè dan ikesuat he edtuluy si Jesus su netuenan dan he Hudiyu sikandin he ziyà ebpetandang te inged he Hiruselim.
54 Ne hein netuenan ni Santiago wey ni Juan he wazà edawat kandan dutun te inged,
migkeǥiyan dan si Jesus te,
“Egkesuatan nu ve he ebuyù key te hapuy he ebpuun te langit he ibpetanà dini su wey meǥerà heini he menge etew?”
55 Iyan,
si Jesus,
midsinaru ziyà te kandan ne midawey zin sikandan.
56 Ne midlaus dan diyà te zuma he inged.
Is Ebpemenduma Pezem ki Jesus
57 Ne zutun te kedhipanew zan,
duen etew he migkaǥi ziyà te ki Jesus te,
“Eduma a kenikew minsan hendei ka ebpevayà.”
58 Ne migkaǥi si Jesus diyà te kandin te,
“Is laku,
ne zuen surung he egkeubpaan din,
ne is menge tagbis,
ne zuen kandan he salag,
iyan,
siak,
is migeraran te Kakey te Menusiyà,
ne wazà hustu he egkehimelayan ku.”
59 Ne migkaǥi si Jesus diyà te sevaha he etew,
ke sikandin te,
“Sundan ka kedì.”
Iyan,
migkaǥi haazà is migkeǥiyan din te,
“Datù,
ed-ulì e zè pa su kenè e pa ebpekezuma kenikew taman te kenè pa egketapus is umur te amey ku.
Ne emun igkeleveng ku en ne human a eduma kenikew.”
60 Ne midtavak si Jesus dutun te etew te,
“Iyan nu ipeleveng te menge minatey sikan is wazà mekezawat te untung he wazà pidtemanan su iyan ku ibpeveelan kenikew is kebpenudtul te Meupiya he Tudtulanen te kedhedii te Megbevayà te menge etew.”
61 Ne zuen pa zutun sevaha he etew he egkaǥi zaan diyà te ki Jesus te,
“Datù,
edsundan a kenikew,
iyan,
ed-ulì e pa su ibpesayud ku is bevelayan ku.”
62 Ne midtavak si Jesus te,
“Emun ed-eradu ka he layun ka edlilingey ne kenà heeyan meupiya.
Iring din ded daan is etew he edsundan kedì wey zuen din igkelilingey ne kenà sikandin dait he edhedian te Megbevayà.”