Is Kepekeena te Heepat he Libu he Menge Etew
8
Ne nepipira pa he menge andew zutun nengeamur-amur en maan diyà te ki Jesus is utew mezakel he menge etew.
Ne hein neeminan dan en te lutù,
mid-umew ni Jesus is menge sumusundan din,
ne ke sikandin te,
Marcos 8:1-21
2 “Kehizu kayi te menge etew su tetelu en he kezukileman is wazè dan medsuwey kenitew ne wazè dan en egkekaan.
3 Ne emun ibpeulì ku sikandan te wazè dan mekekaan kela ke luyahi sikandan diyà te zalan,
su is duma kandan ne meziyù is ed-ubpaan.”
4 Ne midtavak haazà is menge sumusundan din te,
“Meziyù heini te menge valey.
Ne wazè tew egkekuwaan te ibpekaan kayi te utew mezakel he menge etew.”
5 Ne ke si Jesus te,
“Pira he vuuk is supas niw?”
Ne ke sikandan te,
“Pitu he vuuk.”
6 Ne migkeǥiyan ni Jesus haazà is menge etew he mebpememinuu zan diyà te tanà,
ne migkuwa zin haazà is pitu he vuuk he supas ne mibpeselematan din te Megbevayà,
ne zutun mibpenevìtevì din.
Ne minsan pa zutun kenà egkeamin haazà is edtevien din.
Ne indata zin dutun te menge sumusundan din wey zan ikepemeǥey zutun te menge etew.
7 Ne zuen daan dutun pira he leǥas he zeisek he pait ne hein nepeselematan din en insuǥù din he ipemeǥey zaan haazà dutun te menge etew.
8 Ne pudu nengehantey haazà is menge etew he nemekekaan dutun.
Ne is nesamà dutun te menge tinevì he supas wey pait,
ne pitu he vinevey.
9 Menge heepat he libu is kezakel zutun te menge etew he nengehantey zutun.
10 Ne impemeulì ni Jesus sikandan.
Ne zutun,
si Jesus wey is menge sumusundan din,
mid-untud dan te avang ne midhendiyè dan te tanà he Delmenuta.
Is Ebpen-ahà te Singyal
11 Ne hein nekeuma zan en,
midhendiyà te ki Jesus is menge Perisiyu ne mibpekidlewanè dan kandin.
Migkeǥiyan dan sikandin he mebpaahà sikandin te singyal he egkein-inuwan he tuus he suǥù sikandin te Megbevayà.
Umba migkaǥi zan haazà su egezaman dan sikandin.
12 Ne haazà,
inmesakit te ǥehinawa ni Jesus ne ke sikandin diyà te kandan te,
“Sikiyu is menge zuma ku he menge Hudiyu,
maan is egkinahanglan kew he mekeehè kew te egkein-inuwan he singyal ne human kew edtuu?
Benar utew is egkeǥiyen ku keniyu he wazà singyal he ibpaahà keniyu.”
13 Ne zutun mid-ewaan eni Jesus haazà is menge etew.
Mid-untud dan en maan te avang su edlayun dan dutun te ranew.
Is Ketudluanan te Menge Perisiyu Wey is ki Hirudis
14 Sengevuuk dà he supas is dutun te kandan su nelipat is menge sumusundan din he ed-uwit te supas he egkelutù dan.
15 Ne zutun duen sempità he impezineg kandan ni Jesus.
Ibpesavut din he likayi zan is menge mezaat he vetasan te menge etew.
Ke sikandin te,
“Andam kew wey niw melikayi is tapey te menge Peresiyu wey is tapey te menge sakup ni Hadì Hirudis.”
16 Wazè dan mesavut he kenà iyan is tapey te supas egkeǥiyen din ne mibpelelelaǥè dan te,
“Iyan ingkeǥiya zin kayi su wazè kiw mekeuwit te lutù tew he supas.”
17 Ne netuenan ni Jesus ke hengkey is diyà te isip dan ne ke sikandin te,
“Maan is egkesemukan kew te wazè kew mekeuwit te supas?
Kenè kew pe bes ebpekesavut?
Henduen te wazè niw isip.
18 Duen niw mata,
iyan,
henduen be te kenè kew ebpekeahà.
Duen niw telinga ne henduen be te kenè kew ebpekezineg.
Nengelipatan niw ve sikan is mid-ulaula ku?
19 Su hein mibpenevìtevì ku sikan is lelima he vuuk he supas he impekaan duen te lelima he libu he menge maama,
pira he vinevey is nengepenù niw te nengesamà he menge tinevì he supas?”
Ne zutun midtavak dan te,
“Sepulù wey zezuwa.”
20 Ne mid-uman med-insà si Jesus te,
“Ne hein mibpenevìtevì ku sikan is pitu he vuuk he supas he impekaan duen te heepat he libu he menge etew,
pira he vinevey zutun is nengepenù niw te nengesamà he tinevì?”
Ne midtavak dan te,
“Pitu he vinevey.”
21 Ne migkaǥi si Jesus diyà te kandan te,
“Ne egkesavut niw human buwa he kenà supas is igkeseeng tew.”
Is Kebewii Zuen te Lakap Diyà te Bitsayda
22 Ne nekeuma zan diyà te inged he Bitsayda ne zuen menge etew zutun he mid-uwit dan diyà te ki Jesus is sevaha he lakap.
Ne midhengyuan dan si Jesus he zempaa zin haazà wey meulii.
Marcos 8:22-38
23 Ne mid-aǥak ni Jesus haazà is lakap pehendiyà te ǥawas dutun te inged.
Ne mid-ilevan ni Jesus is menge mata zutun te lakap ne midampè din,
ne mid-insaan din ke zuen be egkeehè din.
24 Ne nenlangulangu haazà is lakap ne ke sikandin te,
“Egkeehè ku is menge etew he henduen be te menge kayu he ebpenhiphipanew.”
25 Ne zutun mid-umanan dempaa ni Jesus haazà is mata zutun te lakap.
Ne zutun mibpurung mebpenlangulangu haazà is lakap ne egkemelmeleǥan din en is menge etew te ed-ahà su mibmeupiye en is mata zin.
26 Ne migkeǥiyan ni Jesus haazà is etew he medtandang en med-ulì ne kenè en mebpenuluytuluy pa maan minsan dutun te inged.
Is Migkaǥi ni Pedro Mehitenged ki Jesus
27 Ne zutun,
midlaus si Jesus wey is menge sumusundan din su edhendiyè dan te menge inged he ziyà te uvey te inged he Sisarya Pilipus.
Ne zutun te ziyè dan te zalan mid-insaan din is menge sumusundan din te,
“Hentei e kun sumalà te ked-isipa kediey te menge etew?”
28 Ne midtavak dan te,
“Duen egkaǥi he iyan ka si Juan Megbebewtismu he nevanhew ne zuen daan egkaǥi he iyan ka sikan is tipehuna he si Elias,
ne egkaǥi is duma pa he sevaha ka zuen te menge tipehuna zengan he ebpeneuven te Megbevayà.”
29 Ne zutun mid-insaan din sikandan te,
“Ne sikiyu zaan,
hentei e man sumalà is ked-isipa niw kediey?”
Ne zutun midtavak si Pedro te,
“Iyan ka sikan is mibpilì te Megbevayà he ibpahadì din te menusiyà.”
30 Ne zutun migkeǥiyan sikandan ni Jesus he kenè dan tudtula haazà diyà te minsan hentei.
Is Kegkeǥiya ni Jesus te Kemetayen Din
31 Ne zutun impesavut ni Jesus te menge sumusundan din is imbanglis kandin.
Ke sikandin te,
“Siak is Kakey te Menusiyà,
mezakel is menge kemeresayan he ibpaantus kediey.
Edsumpeliten a te menge ebmeǥurangen te menge Hudiyu wey te menge punuan he memumuhat wey te menge menunudlù te kesuǥuan.
Edhimetayan e zan ne seled te tetelu he andew zutun egkevanhew a.”
32 Ne mibpurungan din seysaya is egkeulaula zin.
Ne hein nezineg ni Pedro haazà,
ne insivey zin si Jesus ne migkeǥiyan din te kenà haazà egkehimu is egkeulaula ni Jesus.
33 Ne zutun midsineruwan ni Jesus haazà is menge sumusundan din ne migkeǥiyan din si Pedro te,
“Sikew is ed-iring ki Setanas,
awè ka zini te kediey,
su wazà diyà te isip nu is egkesuatan te Megbevayà,
kekenà,
iyan diyà te isip nu is egkesuatan te etew!”
34 Ne zutun impeuvey ni Jesus diyà te kandin is menge etew wey menge sumusundan din.
Ne ke sikandin te,
“Ke zuen egkesuat he edsundan kedì,
kinahanglan he iawè din diyà te isip din is kandin he egkesuatan he menge ulaula,
ne tianga zin is krus din,
he ke và dà egkeǥiya,
kinahanglan he edtumanen din is menge suǥù ku minsan pa ke iyan ibpatey zin.
Ne human ebpekesunud kedì.
35 Su ke zuen etew he egkenuǥunan din is untung din,
ebpatey ǥihapun.
Iyan,
ke zuen etew he minsan ibpatey zin pa ne edsunud kedì wey edsangyew te Meupiya he Tudtulanen,
id-ulì te Megbevayà diyà te kandin is untung din ne kenè en sikandin ebpatey te wazà pidtemanan.
36 Minsan ke maangken pa te etew is tivuuk he kelibutan,
wazà pulus diyà te kandin ke kenà sikandin ebeǥayan te untung he wazà pidtemanan.
37 Su wazà minsan hengkey he azen he igkeliwè din wey zin maangken is untung he wazà pidtemanan.
38 Is minsan hentei he igkeeled e zin wey igkeeled din is ibpenurù ku kayi te timpu he mezakel is menge etew he lalung wey edsumpalit te Megbevayà,
siak is Kakey te Menusiyà,
igkeeled ku zaan sikandin keuzemà ke edlikù a he edumahan a te menge velinsuǥuen ku wey edsun-uzan ad te mekeǥeǥehem he anlag te Amey ku he Megbevayà.”