2 Neehè dan he is duma zutun te menge sumusundan ni Jesus,

edsupaken dan is tuluuwen te menge Perisiyu su ebpemengaan dan he wazè dan mebpenlùlù te menge velad dan.

3 Su is menge Hudiyu,

lavew en is menge Perisiyu,

kenè dan egkaan ke kenè dan egkelùluan is menge velad dan su iyan haazà betasan he imbilinbilin te menge ǥin-epuan dan dengan.

4 Ne emun ebpekeulì dan he ebpuun te mirkadu ne ebpirikan dan edhunai te wahig is lawa zan ne human dan egkaan.

Ne mezakel pa is neleyaman dan he tuluuwen iring te kebpenlùlù te menge inumà wey menge kuzen wey menge edtengelan he ǥalang.

5 Ne tenged kayi haazà is menge Perisiyu wey menge menunudlù te kesuǥuan,

mid-insaan dan si Jesus te,

“Maan is midlipatan en te menge sumusundan nu is imbilinbilin he tuluuwen te ǥin-epuan tew su maan is tekew zan en egkaan ne kenè dan ebpenlùlù?”

6 Ne midtavak si Jesus te,

“Sikiyu is akal zà is kedtuu niw te Megbevayà,

utew hustu is Lalag te Megbevayà he insurat te tipehuna he ebpeneuven he si Esaias.

Netagnè kew zin su ke sikandin te,

9 Ne mid-uman megkaǥi si Jesus te,

“Utew kew metau te paaǥi te ked-engkezi niw te insuǥù te Megbevayà wey niw mepurungi te edtuman is kesuǥuan he mibeelan te etew.

10 Sikan is Lalag te Megbevayà he insuǥù kenitew zengan ni Moises,

edhenduen te,

‘Tehuza niw is amey niw wey iney niw.’

Ne migkaǥi zin daan dutun he,

‘Ke zuen edsulà te amey zin wey iney zin,

kinahanglan he edhimetayan.’

11 Ne iyan keniyu he ibpenurù is:

ke zuen etew he zuen din igketavang te iney zin wey amey zin,

edtuǥutan niw haazà is etew ke egkaǥi zutun te menge ǥinikanan din te,

‘kurban’,

he ke và dà egkeǥiya,

‘Heini is idtavang ku pezem keniyu,

kenè ku igkeveǥey su imbuwis ku ziyà te Megbevayà.’

12 Ne pinaaǥi zutun kenè niw idtuǥut he edtevangan dutun te etew is amey zin wey iney zin.

13 Ne pinaaǥi kayi te nepengevilin niw he menge vetasan,

ed-iniyuǥan niw is Lalag te Megbevayà ne kenà ebpulus diyan te keniyu.

Ne mezakel pa is menge ulaula niw he iring kayi.”

14 Ne impeuman ipeuvey ni Jesus is menge etew ziyà te kandin ne ke sikandin te,

“Langun te sikiyu,

pemineǥa niw heini is menge lalag ku ne sevuta niw he

15 is egkehimu he igkeepesi te Megbevayà te etew,

kenà iyan is keuyaǥan he ebpekeseled diyà te vèbè din,

minsan ke wazà sikandin mebpenlùlù,

kekenà,

iyan is menge lalag he egawas puun diyà te vèbè din.

16 Is minsan hentei keniyu,

sevuta niw heini is menge lalag ku.”

17 Ne hein mid-awà si Jesus dutun te menge etew ne midseled diyà te valey,

ne mid-insaan sikandin te menge sumusundan din ke hengkey is kehuluǥan duen te migkaǥi zin.

18 Ne ke si Jesus te,

“Iring kew ves te menge zuma he etew su maan is wazè niw ǥeina mesavut he is egkekaan te etew,

ne kenà egkehimu he igkeepesi kandin te Megbevayà

19 su is egkeenen din,

ne ziyè dà ebpekevayà te ǥetek din ne zutun ed-awà diyà te kandin;

kenà diyà ebpekevayà te ǥehinawa zin.”

(Ne pinaaǥi kayi te menge lalag ni Jesus,

egketuenan ta he is minsan hengkey he egkekaan,

idtuǥut kenitew he egkeenen tew.)

20-22 Ne migkaǥi si Jesus med-uman te,

“Is egkehimu he igkeepesi te Megbevayà te etew ne iyan is egawas he ebpuun diyà te ǥehinawa zin.

Su ziyà te ǥehinawa zin ebpuun is memezaat he isip,

is kedhilavet te kenè din esawa,

kebpenakew,

kebpemumunù,

kegkesina,

kebpesipala,

kebpenlimbung,

is memahawag he ulaula,

kegkeima,

kedèdeeti te zengeg te menge zuma zin,

kebpelavew zin wey is kedlalunglalung.

23 Heini is memezaat he ulaula,

diyà ebpuun te ǥehinawa te etew ne iyan igkeepesi kandin te Megbevayà.”

24 Ne mid-awà si Jesus dutun te prubinsya he Geliliya ne midhendiyà te menge inged he uvey te inged he Tiru.

Ne te kebpekeuma zin dutun ne mibpemenahik diyà te sevaha he valey.

Ne kenè din pezem egkesuatan he metueni te menge etew ke hendei sikandin medateng,

iyan,

wazà haazà iyan mehitavù is egkesuatan din su segugunà nekeeneb haazà is tudtul te kebpekeuma zin.

25 Ne zuen dutun sevaha he vahi he zuen din anak he raǥaraǥa he edlelungen te mezaat he mulin-ulin.

Ne hein nezineg din he nekeuma si Jesus ne midhendutun ne midluhud diyà te etuvangan din.

26 Ne midhangyù he vewii ni Jesus is anak din he edlelungen te mezaat he mulin-ulin.

Ne haazà is bahi,

ne kenà Hudiyu su tigPinisya ziyà te prubinsya he Sirya.

Is kineǥiyan din ne Gerisyahanen.

27 Ne migkeǥiyan sikandin ni Jesus te,

“Idhuna ibpekaan is menge vatà su kenà meupiya ke egkuwaan ta is egkeenen te menge vatà ne idsamak te menge asu.”

Ne iyan ibpesavut ni Jesus dutun is:

edhunaan din te edtavang is menge Hudiyu,

ne human is kenà menge Hudiyu.

28 Ne migkaǥi haazà is bahi te,

“Benar,

Datù,

heeyan,

iyan,

is asu,

egkehimu zaan he ebpenelisimen din is egkengeulug he mumu puun dutun te egkeenen te vatà.”

29 Ne si Jesus,

migkaǥi ziyà te kandin te,

“Geina te iyan heeyan lalag nu,

ulì ke en su is anak nu,

mid-ewaan en sikandin te mezaat he mulin-ulin.”

30 Ne hein nekeuma haazà is bahi ziyà te valey zin,

neehè din he edhidhizeǥà haazà is anak din he mid-ewaan en te mezaat he mulin-ulin he edlalung kandin.

31 Ne zutun te ked-ulì ni Jesus,

ne ziyà sikandin mebayà te inged he Tiru wey ziyà te prubinsya he Dikepulis,

ne human diyà te ranew he Geliliya.

32 Ne zuen menge etew he mid-uwit dan diyà te ki Jesus is etew he vengel wey ngulit pa ke egkaǥi.

Ne midhangyù dan si Jesus he zempaa zin haazà wey meulii.

33 Ne zutun mid-aǥak ni Jesus haazà is bengel he ngulit su idsivey zin dutun te menge etew ne intiyuk din is tezù din dutun te telinga te vengel ne midhames din te ileb din is tezù din ne indazas din dutun te zilà te etew.

34 Ne midlingahà si Jesus diyà te langit ne migeǥehinawa te mezalem ne ke sikandin te,

“Ipata!”

he ke và dà egkeǥiya,

“Mepuwasi!”

35 Ne zutundutun nepuwasan is kedineg dutun te etew ne naawà is kegkevisekeg te zilè din ne metandang en is kegkaǥi zin.

36 Ne zutun migkeǥiyan ni Jesus is menge etew zutun he kenè dan penudtula haazà is neehè dan he mibeelan din,

iyan,

nasì wazà meeren is tudtul zan mehitenged dutun te neehè dan.

37 Utew zan haazà ingkeinuinu ne ke sikandan te,

“Utew meupiya is kebeeli zin kayi te langun su edhimuwen din minsan is kenà ebpekezineg he mekezineg ne sikan is kenà ebpekekaǥi ne ebpekekaǥi!”