Is Kebewii te It-iten
8
Ne midtupang si Jesus ne utew mezakel he menge etew is nemenduma kandin.
2 Ne zutun,
duen it-iten he mid-uvey ziyà te kandin.
Ne heini is it-iten,
midluhuzan din si Jesus ne migkaǥi te,
“He Zatù,
emun meupiya zà te ǥehinawa nu netuenan ku he egkeulian a kenikew kayi te utew meremerik he egezamen ku.”
3 Ne midampà sikandin ni Jesus te egkaǥi te,
“Utew meupiya te ǥehinawa ku.
Meulii ka.”
Ne zutundutun nehanewhanew zutun te etew haazà is it-it din.
4 Ne migkeǥiyan ni Jesus te,
“Pemineg ka,
Mama,
kenè nu tudtula ziyà te minsan hentei,
kekenà,
pehendiyè ka ǥuntaan te memumuhat he midhimu te Megbevayà wey zin maahà he neulian ka;
ne tumana nu sikan is pemuhat he insuǥù dengan ni Moises te it-iten,
su wey metueni te langun he neulian ka iyan.”
Is Kebewii Zuen te Suluǥuen te Kepitan
5 Ne zutun midhendiyà si Jesus te inged he Kepirnaum.
Ne te kedseled din dutun te inged,
duen etew he kenà Hudiyu he kepitan te nenggatus he sundaru he mid-uvey ki Jesus
6 he egkaǥi te,
“Datù,
diyà te valey ku egkezeruwan is suluǥuen ku.
Minatey is divaluy he lawa zin ne merasey utew is egezamen din.”
7 Ne migkaǥi si Jesus te,
“Edhendiyan a ne ebewian ku wey sikandin meulii.”
8 Ne midtavak haazà is kepitan te,
“Kenà,
Datù,
su,”
ke sikandin,
“tenged te lavew ka kedì,
kenà a zait he ebiǥatbiǥat pa maan kenikew he edhendiyà te valey ku.
Utew ka mekeǥeǥehem ne minsan ke egkaǥi ke zà te,
‘Meulii sikandin,’
ne egkeulian en is suluǥuen ku.
9 Netuenan ku heini su iring te zuen ebayàbayà kedì,
ne zuen daan menge sundaru he ebeyveyaan ku.
Ne edsuǥuen ku is sevaha he medhipanew ne edhipanew en.
Ne edtewaǥen ku is sevaha he medhendini ne edhendini en;
ne edsuǥuen ku zaan is suluǥuen ku ke zuen ebpeveelan ku ne ebeelan din en.
Ne iring din ded daan diyan te kenikew su is egkeǥiyen nu ne egkehimu en.”
10 Ne te nezineg ni Jesus heini,
ne utew neinuinu ne ke sikandin diyà te menge etew he nemenduma kandin te,
“Wazè ku pa meuma is etew he kevuwazan ni Israyil he iring kayi he utew mezesen is kedtuu zin.
11 Ne kenè niw lipati heini is egkeǥiyen ku he mezakel he etew he kenà menge Hudiyu he ziyà ebpemuun te meziyù,
diyà te zapit te edsilaan wey ziyà te zapit te edsenlepan,
ne ebpekidtuǥen dan keuzemà ki Abraham wey ki Isaak wey ki Hakub diyà te ginhedian te Megbevayà.
12 Iyan,
mezakel zaan he kevuwazan ni Israyil he midteǥenahan pezem te Megbevayà te ginhedian din,
iyan,
igketimbag sikandan diyà te merusirem he utew meziyù te ed-ubpaan te Megbevayà.
Ne ebpemekekulahì dan is ebpemekengingitel he utew zan ebpemekedsendit.”
13 Ne zutun migkeǥiyan ni Jesus kes kepitan te,
“Ulì ka;
ne sumalà is midtuuwan nu iyan daan ed-ul-ulahan ku.”
Ne zutundutun neulian haazà is suluǥuen kayi te kepitan.
Is Kebewii te Menge Etew
14 Ne midhendiyà si Jesus te valey ni Pedro ne zutun neehè din is enuǥang he vahi ni Pedro he edetengen ne kenè en ebpekeenew.
15 Ne midampà ni Jesus is belad dà dutun te meritan ne zutundutun neulian.
Ne mid-enew haazà is meritan ne midsuba sikandin te ibpekaan din engki Jesus.
16 Ne hein mahapun dutun duen nemenelavuk ki Jesus he mezakel he menge etew he ebpen-uwit te mezakel he ebpenlelungen te menge mezaat he mulin-ulin.
Ne mibpemewian ni Jesus sikandan pinaaǥi zà te lalag din ne nengeulian en sikandan.
Ne mibpemewian din daan is langun he nengezeruwan ne nengeulian.
17 Umba mid-ulaula zin heini su egketuman dutun kes netagnà dengan ni Esaias he ebpeneuven te Megbevayà,
he egkaǥi te,
“In-awè din is menge zaru tew
ne mibewian din is menge ebpenggezamen tew.”
Is Ebpemenduma Pezem ki Jesus
18 Ne sevaha he andew zutun naahà ni Jesus is mezakel he menge etew he nengetiǥum.
Ne migkeǥiyan din is menge sumusundan din te,
“Edhendiyè kiw te zehipag.”
19 Ne zutun mid-uvey kandin is sevaha he menunudlù te kesuǥuan.
Ke sikandin diyà te ki Jesus te,
“He Menunudlù,
eduma a kenikew minsan hendei ka ebpevayà.”
20 Ne migkaǥi si Jesus diyà te kandin te,
“Is laku ne zuen surung he egkeubpaan din,
ne is tagbis,
duen din salag,
iyan,
siak is migeraran te Kakey te Menusiyà,
minsan hendei e zà memekehizegà su wazà ed-ubpaan ku.”
21 Ne zutun duen sevaha he sumusundan ni Jesus he migkaǥi te,
“Datù,
ed-ulì e zè pa su kenè e pa ebpekezuma kenikew taman te kenè pa egketapus is umur te amey ku.
Ne emun igkeleveng ku en ne human a eduma kenikew.”
22 Ne midtavak dutun si Jesus te,
“Kenà,
su iyan edleveng te menge minatey sikan is wazà mekezawat te untung he wazè din pidtemanan.
Iyan,
sikew mula,
duma ka kediey.”
Is Kedewaya ni Jesus te Keramag
23 Ne zutun,
mid-untud si Jesus te zekelà he avang ne miduma kandin is menge sumusundan din.
24 Ne hein diyè dan en te lawed,
ne midtekewtekew mebpengeramag te utew mevendes ne egkeselikuvungan en te vaǥel haazà is avang.
Iyan,
nekelipezeng dutun si Jesus.
25 Ne mid-uvayan sikandin te menge zuma zin su ebpukawen dan.
“Tevangi key,
Datù,”
ke sikandan,
“su egkelavu en heini is avang ne egkengeǥerè kiw en.”
26 Ne migkaǥi si Jesus,
“Maan is egkehandek kew?
Maan is kenè kew ebpekesarig kediey?”
Ne mid-enew si Jesus ne migkeǥiyan din haazà is keramag wey haazà is menge vaǥel he med-engked dan.
Ne zutun mibmelinew utew.
27 Nengeinuinu is langun he menge zuma zin.
“Hengkey he etawa heini?”
ke sikandan,
“su minsan is keramag wey menge vaǥel ne ebpemineg kandin!”
Is Kebewii Zuen te Menge Etew he Midsuukan te Menge Mezaat he Mulin-ulin
28 Ne nekezunggù dan diyà te zehipag te ranew diyà te tanà he sakup te inged he Gedara.
Ne zuen midsinuǥung ki Jesus dutun he zezuwa he etew he ziyà ebpuun te menge surung te pangpang he penlevengà.
Midsuukan haazà is dezuwa te menge mezaat he mulin-ulin he ebpekekaid ne tenged kayi egkengehandek is menge etew he ebayà dutun.
29 Ne mibensaǥan dan si Jesus,
ke sikandan te,
“Sikew is Anak te Megbevayà,
edsilutan key ve kenikew te wazè pa meuma is midtelaan he timpu?”
30 Ne zutun te uvey,
duen mezakel he menge vavuy he ebpemenuwal.
31 Midhangyù ki Jesus haazà is menge mezaat he mulin-ulin,
ke sikandan te,
“Emun edsegseǥen key kenikew,
tuǥuti key he mekesuuk key keniyà te menge vavuy.”
32 Ne midtavak si Jesus te,
“Egkehimu.”
Ne mid-awè dan ne midsuukan dan haazà is menge vavuy.
Ne is langun he menge vavuy,
nemelelaǥuy zan petupang dutun te utew mesilid he kelendiǥan ne mid-agbur zan diyà te ranew zutun ne nengelened dan maamin.
33 Ne zuen menge etew he ebpemen-elima zutun te menge vavuy,
ne nemenhendiyè dan te inged is ebpemelelaǥuy ne midtudtulan dan is menge etew ke hengkey is nehitavù duen te midsuukan te mezaat he mulin-ulin wey kes menge vavuy.
34 Ne hein netuenan heini te menge meǥinged mibeyaan dan si Jesus.
Ne hein neuma zan,
midhengyuan dan he med-awà sikandin dutun te inged dan.