Is Kebewii te Etew he Midsuukan te Menge Mezaat he Mulin-ulin
5
Ne nekezunggù ensi Jesus diyà layun dutun te ranew,
ne iyan haazà is nezungguan dan tanà te menge etew he Geresinen.
Marcos 5:1-20
2 Ne zutun te kedrenà ni Jesus dutun te avang,
midsinuǥung sikandin te etew he ziyà ebpuun te menge surung he penlevengà.
Midsuukan haazà te menge mezaat he mulin-ulin
3 umba ziyà ed-ubpà te menge penlevengà.
Ne utew mezesen sikandin ne tenged dutun kenè en egkevakus te minsan kedina.
4 Su neuǥet en,
layun ebekusen is menge velad din wey paa zin,
iyan,
kada kebekusa kandin dutun,
ne edrupeten din is pusas he ibpusas kandin,
ne ebpemidtawen din dà is kedina he ibakus kandin.
Wazè en ebpekeeǥen kandin tuus te utew mezesen.
5 Umba,
te maandew wey mezukilem,
dutun sikandin edriǥuriǥu te menge penlevengà wey menge vuntud ne edtulung ebpengulahì ne ebpemelian din is lawa zin te vatu.
6 Ne hein nepentawan dutun he etew si Jesus diyà te meziyù,
mibpelelaǥuy is edsinuǥung ki Jesus ne mid-azap kandin.
7-8 Ne si Jesus,
migkeǥiyan din haazà is mezaat he mulin-ulin te,
“Awè ka keniyan te etew!”
Ne zutun nengulahì haazà is etew he ke sikandin diyà te ki Jesus te,
“Ey!
Sikew is anak te utew lavew he Megbevayà,
ebmenuwen a kenikew?
Edhengyuen ku kenikew he peseriǥa a kenikew he kenè e pa kenikew siluti su kayi ki te etuvangan te Megbevayà!”
9 Ne mid-insaan ni Jesus haazà is etew te,
“Hentei is ngazan nu?”
Ne midtavak dutun haazà is mezaat he mulin-ulin te,
“Iyan ngazan ku si Liblibuwen su utew key mezakel is nemenuuk kayi te etew.”
10 Ne haazà is mezaat he mulin-ulin,
mibpenigudu medhangyù sikandin diyà te ki Jesus he kenè din segseǥa sikandan diyà te meziyù he tanà.
11 Ne te uvey zutun duen utew mezakel he menge vavuy he ebpemenuwal ziyà te kelendiǥan.
12 Ne sikan is menge mezaat he mulin-ulin,
midhangyù dan diyà te ki Jesus te,
“Ipehendutun key te menge vavuy wey key mekesuuk diyà te kandan.”
13 Ne midtuǥutan ni Jesus sikandan.
Ne zutun nemengguwà haazà is menge mezaat he mulin-ulin puun dutun te etew ne midsuuk sikandan duen te menge vavuy.
Haazà is menge vavuy,
menge zezuwa he libu sikandan,
ne nemelelaǥuy zan petupang dutun te utew mesilid he kelendiǥan ne mid-agbur zan diyà te ranew zutun ne nengelened dan maamin.
14 Ne zuen menge maama he ebpemen-elima zutun te menge vavuy,
ne nemenhendiyè dan te inged is ebpemelelaǥuy wey ziyà te menge uvey zutun he unayan su ibpesavut dan ke hengkey is nehitavù.
Ne hein nezineg haazà te menge etew,
ne nemenhendiyè dan te ki Jesus su ed-ahaan dan ke hengkey is neulaula.
15 Ne hein nemekeuma zan,
neehè dan kes midsuukan te edliblibuwen he menge mezaat he mulin-ulin.
Neehè dan dutun he midsul-ub en te ugelingen ne hustu en is ked-isip-isip din ne tenged dutun utew zan en nengeinuinu.
16 Ne is menge etew he zutun he zaan,
midtudtul zan dutun te menge etew is neulaula zutun te midsuukan te menge mezaat he mulin-ulin wey is neulaula zuen te menge vavuy.
17 Ne haazà is menge etew,
midhengyuan dan si Jesus he med-awè en dutun te menge inged dan.
18 Ne hein ed-untud en si Jesus duen te avang,
sikan is etew he neulian te kedsuuki kandin te menge mezaat he mulin-ulin,
midhangyù sikandin he eduma ki Jesus.
19 Iyan,
wazà medtuǥut si Jesus he meduma kandin haazà is etew,
kekenà,
migkeǥiyan din te,
“Ulì ke en ne tudtula nu te kezuzumahi nu is utew zekelà he utew meupiya he midhimu te Nengazen diyà te kenikew wey is hizu zin kenikew.”
20 Ne zutun migenat haazà is etew,
ne midtukid din is menge inged diyà te prubinsya he Dikepulis,
ne mibpenudtul zin is langun he meupiya he midhimu ni Jesus diyà te kandin.
Ne nengeinuinu is langun he menge etew zutun.
Is Minatey he Vatà Wey kes Bahi he Zeruwanen
21 Ne midlayun ensi Jesus he ed-untud te avang.
Ne hein nekezunggù dan nengeamur-amur zutun te veyvey is utew mezakel he menge etew he mid-uvey zan diyà te kandin.
Marcos 5:21-43
22 Ne zutun nekeuma zaan is etew he egngezanan ki Hayru.
Pengulu si Hayru te sevaha he simbahan te menge Hudiyu.
Ne hein neehè din si Jesus ne mid-uvey sikandin diyà te kandin ne midluhud diyà te etuvangan din.
23 Ne midhengyuan din si Jesus te,
“Is anak ku he vahi he edraǥaraǥe en,
ne edluwàluwè en te ǥehinawa.
Edhengyuan ku sikew he hendiyè ka te valey ku wey nu penemsama wey meulii ne meuyag.”
24 Ne midumahan sikandin ni Jesus.
Ne zutun te ziyè dan te zalan egkengelipitlipit dan en su mezakel is nemenduma kandin he menge etew.
25 Ne zuen dutun bahi he utew en nerasey su midsepulù en wey zezuwa he tuig is kegkevusbusi kandin ne kenà ed-engked.
26 Ne haazà is daru zin,
ne mezakel en he ebpemenambar is midtambar zutun ne naamin en is selapì din he insuhul zin te ebpemenambar kandin,
iyan,
nasì dà sikandin egkeurat kada edtembari.
27 Nezineg dutun te vahi is tudtul mehitenged ki Jesus ne mibpenlietliet en daan sikandin dutun te mezakel he menge etew is edteǥel ed-uvey ziyà te egkeiniyuǥan ni Jesus su wey mekeǥawed te và dà kumbalà ni Jesus.
28 Su iyan diyà te ǥehinawa zin is:
“Minsan ke mekeǥawed e zà te kumbalè din ne egkeawè en heini is daru ku.”
29 Ne te neǥewezan din dutun is kumbalà ni Jesus,
ne mid-engked haazà is kegkevusbusi kandin ne netuenan din dutun he haazà is egezamen din,
ne naawè en diyà te kandin.
30 Ne si Jesus,
netuenan din dutun he zuen neulaula te ǥehem din ne midteren is ebpenlangulangu zutun te mezakel he menge etew is mid-insà te,
“Hentei is migawed te kumbalè ku?”
31 Ne migkaǥi is menge sumusundan din te,
“Es,
mezakel utew he menge etew is ebpenlietliet diyan te kenikew ne maan is ibpenginginsè nu pa maan ke hentei is migawed te kumbalè nu?”
32 Ne zutun,
ebpenlenglenguwen ni Jesus ke hentei is nekeǥawed dutun te kumbalè din.
33 Ne haazà is bahi,
utew nahandek su netuenan din en ke hengkey is nehitavù diyà te kandin dutun te kegewezi zin te kumbalà ni Jesus.
Ne mid-uvayan din si Jesus te egkerkeren ne midluhud diyà te etuvangan din ne midseysey zin is langun mehitenged dutun te zaru zin.
34 Ne zutun,
migkaǥi si Jesus te,
“Bayi,
umba neulian ka te zaru nu su midsarig ka kedì.
Ulì ke en ne mebmelinawen is kebpekesavuk nu ne kenè ke en maan mezeruwi.”
35 Ne te kemulu pa si Jesus egkaǥi zutun ne zuen nemekeuma he ebpuun diyà te valey ni Hayru.
Ne migkaǥi zan diyà te ki Hayru te,
“Kenè nu en bigbigata te eduma pa maan si Jesus su kenè niw en egkesepenan is gehinawa zuen te anak nu.”
36 Iyan,
si Jesus,
wazè din itetenged haazà is migkaǥi te menge etew,
kekenà,
migkaǥi ziyà te ki Hayru te,
“Kenè ka meseeng,
kekenà,
sarig ke zà kediey.”
37 Ne zutun iyan dà impelaus ni Jesus he eduma kandan ki Hayru,
si Pedro,
si Santiago,
wey si Juan he suled ni Santiago.
38 Ne hein nekeuma zan en dutun te valey ni Hayru,
ne naahà ni Jesus dutun he egkengeǥisaweg is menge etew,
ne nezineg din is ebpemenlelendag wey ebpemenineǥew.
39 Ne midseled ensi Jesus dutun te valey ne migkeǥiyan din sikandan te,
“Maan is egkengeǥisaweg kew?
Maan is ebpemenineǥew kew?
Wazà mebpatey heeyan is batà,
kekenà,
midlipezeng!”
40 Ne te kegkezineǥa zan dutun te migkaǥi ni Jesus ne và dan dà mid-engiti sikandin.
Ne zutun impaawà ni Jesus is menge etew zutun te valey.
Iyan dà wazè din ipaawà is amey wey iney zutun te vatà wey is tetelu he menge sumusundan din.
Ne miduma zin sikandan dutun te mibperey-asan te vatà.
41 Ne hein dutun dan en,
migewezan ni Jesus is belad dutun te vatà ne ke sikandin te,
“Telita kumi,”
he ke và dà egkeǥiya te,
“Bayi,
enew kad!”
42 Ne mid-enew haazà is batà ne segugunà midhiphipanew.
Menge sepulù en wey zezuwa is penuiǥen dutun te vatà.
Utew nengeinuinu is iney wey amey zutun te vatà.
43 Ne mibeleuzan sikandan ni Jesus he kenè dan penudtula ke hengkey is neulaula.
Ne migkeǥiyan din daan sikandan he ipekaan dan haazà is anak dan.