2 Ne mezakel is impenurù ni Jesus kandan pinaaǥi te menge sempità.

3 Ke sikandin te,

“Duen etew he midhendiyà te pemuleey zin su ebpemula.

4 Ne zutun te kebpemula zin,

duen benì he nengeulug diyà te zalan,

ne heini migkaan te menge tagbis.

5 Duen daan benì he nengeulug he nemekeuntud diyà te utew menipis he tanà he nekeapid dutun te menge vatu.

Ne haazà,

petuluy zà midtuvù su menipis haazà is tanà.

6 Asal hein mid-andew,

neǥangu petuluy haazà is menge pinemula su mevavew zà is nesenevan te zalid dan.

7 Ne zuen daan dutun benì he nengeulug diyà te tanà he menge zuǥiyen is menge sagbet dutun.

Ne mibmemelayat haazà is sagbet ne mibpengulembezan haazà is menge pinemula ne wazà mekepemeǥas.

8 Ne zuen daan benì dutun he ziyà mengeulug te meupiya he tanà ne haazà,

midtuvù,

ne midekelà ne nemeǥas mulà.

Duen dutun menge pinemula he mibeǥas te tigketluan,

ne zuen daan mibeǥas te tigkeneman.

Ne zuen daan mibeǥas te tignenggatus.”

9 Ne mid-uman megkaǥi si Jesus te,

“Kinahanglan he sevuta niw heini is nezineg niw.”

10 Ne hein wazè en utew etew zutun su iyan dan dà is menge sepulù wey zezuwa he sumusundan ni Jesus wey is kenà utew mezakel he menge etew,

mid-insaan dan si Jesus ke hengkey is ibpesavut din dutun te menge sempità.

11 Ne ke si Jesus te,

“Sikiyu is menge sumusundan ku,

ibpesavut en keniyu te Megbevayà sikan is in-eles dengan mehitenged te kedhadì din,

iyan,

is menge zuma he menge etew,

ibpenurù kandan pinaaǥi te menge sempità.

13 Ne mid-uman megkaǥi si Jesus te,

“Egkesavut niw ve heini is sempità he migkaǥi ku?

Emun kenè niw heini egkesavut kenè niw zaan egkesavut is duma he menge lalag ku he pinaaǥi te sempità.

14 Duen te sempitè ku,

is kehuluǥan te kebpemula te etew,

ne iyan is kedsengyawa te Lalag te Megbevayà.

15 Ne is benì,

ne iyan is Lalag te Megbevayà he zuen nemekezineg duen,

iyan,

midlepew si Setanas ne midhimu zin he melipati zuen te nekezineg sikan is lalag he nezineg dan.

16 Ne sikan is benì he ziyà meketanà te menipis he tanà he zivavew te vatu,

ne iyan is Lalag te Megbevayà he is nemekezineg duen,

ne utew zan egkesuati te ebpemineg,

ne edtuuwan dan.

17 Iyan,

kenà egkeheǥet is kedtuu zan ne kenà egkeuǥet,

ke egkeumahan sikandan te samuk wey ke kemeresayan be tenged te kedewata zan te Lalag te Megbevayà,

edlikù dan diyà te zaan he ulaula zan.

18 Ne sikan is benì,

he ziyà mengeulug te tanà he zuǥiyen is menge sagbet dutun,

ne iyan is Lalag te Megbevayà he nezineg te menge etew,

19 iyan,

egkelipatan dan tenged te menge seeng dan kayi te kelibutan wey te kegkesuat dan te selapì wey te mezakel pa he menge azen,

ne kenà ebpulus diyà te kandan is Lalag te Megbevayà.

20 Ne sikan is benì he ziyà meketanà te meupiya he tanà,

iyan is Lalag te Megbevayà he nezineg te menge etew ne midtuu zan;

ne is Lalag te Megbevayà,

ne ebpulus diyà te kandan.

Is duma,

ne ebpulus te zeisek diyà te kandan,

ne is duma,

ne ebpulus te malù dekelà,

ne is duma,

ne ebpulus te utew zekelà diyà te kandan.”

21 Ne mid-uman megkaǥi si Jesus diyà te kandan te,

“Ke edtemtem is etew te sulù,

kenà egkehimu he ebpelengkevan din te revan wey ke idsihung din be te vangkù he hizeǥaan su idsavuk din diyà te selevukà.

22 Ne iring din ded daan is minsan hengkey he in-eles guntaan ne ibpeǥawaǥawa zed keuzemà ne is minsan hengkey he penurù ku he kenè niw egkesavut guntaan ne egkesavut niw keuzemà.

23 Kinahanglan he sevuta niw heini is nezineg niw.”

24 Ne mid-uman megkaǥi si Jesus te,

“Purungi niw pemineǥa is penurù ku keniyu su sumalà is kebpurung niw kebpemineg,

ibeǥey keniyu te Megbevayà is kedsavut,

asal zekelè pa is ibpesavut din keniyu.

25 Su is etew he edewaten din is ibpesavut kandin te Megbevayà,

ed-umanan pa te Megbevayà is kedsavut din,

iyan,

is etew he kenè din edewaten is ibpesavut te Megbevayà,

id-awà diyà te kandin is deisek he nesavut din en.”

26 Ne impelaus ni Jesus is egkeǥiyen din,

ke sikandin te,

“Is kedekelà te edhedian te Megbevayà,

ne iring te etew he mid-ezek te venì diyà te pemuleey zin.

27 Wazè din hanew ke egkemenumenu haazà is kedtuvù dutun te pinemula zin,

kekenà,

ebpeseseǥazen din dà.

Edlipezeng sikandin te mezukilem ne ebaal te maandew ne kada andew edtuvù ne edekelà haazà is menge pinemula zin.

28 Su iyan idtuvù te pinemula haazà is tanà.

Edtuvù haazà is pinemula ne edlepew is dahun din ne human edlepew is beǥas din ne zutun human egkeayun te kegkelutui.

29 Ne emun egkelutuan en haazà,

edreǥunen dutun te teǥitanà su iyan en tiraǥun.”

30 Ne mid-uman megkaǥi si Jesus te,

“Hengkey is meupiya he ebpetug-iringan tew te kedhadì te Megbevayà?

Hengkey is meupiya he egemiten tew he sempità?

31 Is ked-iseg kebmahabet te edhedian te Megbevayà,

ne iring te pinemula he utew zeisek is lisu zin he ibpemula haazà diyà te tanà.

32 Ne edtuvù ne edekelà ne egkehimu he iyan utew zekelà te langun he menge pinemula.

Dezekelà is menge subpang din ne ebpekesesalag is menge tagbis dutun.”

33 Pinaaǥi te mezakel he menge sempità impesavut ni Jesus is Lalag te Megbevayà diyà te kandan sumalà is netuenan din he egkesavut dan.

34 Pudu menge sempità is impezineg ni Jesus diyà te menge etew,

iyan,

emun iyan dan dà te menge sumusundan din,

ne ibpesavut din kandan is kehuluǥan dutun te menge sempità he penurù din.

35 Ne hein midsanlep en is andew zutun,

migkeǥiyan ni Jesus is menge sumusundan din te,

“Edhendiyè kiw te ziyà layun.”

36 Ne zutun mid-ewaan dan is mezakel he menge etew ne is menge sumusundan ni Jesus,

mid-untud dan duen te avang he sikan is mibpinuuwan ni Jesus ne migenat dan.

Ne zuen daan duma zutun he menge etew he nemen-aavang is eduma kandan.

37 Ne hein diyè dan en te lawed ne midtekewtekew mebpengeramag te utew mevendes ne egkeselikuvungan en te vaǥel haazà is avang ne egketeǥuan en te wahig.

38 Ne si Jesus,

nekelipezeng diyà te huziyan he zulung dutun te avang he mid-uulunà.

Ne migunggel sikandin dutun te menge sumusundan din he ke sikandan te,

“Egkelavu kiw en!

Kenè nu ve ebeliyen ke egkeǥerè kiw?”

39 Ne zutun nepukew si Jesus ne mid-enew ne migkeǥiyan din haazà is keramag wey vaǥel he med-engked dan.

Ne mid-engked haazà is keramag ne mibmelinew utew haazà is wahig.

40 Ne migkeǥiyan din is menge sumusundan din te,

“Maan is egkengehandek kew?

Wazè niw pe be kedsarig kedi?”

41 Ne zutun,

utew nengeherati haazà is menge sumusundan din ne mibpein-inseey sikandan he egkaǥi is kada sevaha kandan te,

“Hengkey heini vuwa he etew?

Maan is minsan is keramag wey menge vaǥel ne ebpemineg kandin!”