2 Ne zuen menge kuntada ni Jesus dutun ne mibentayan dan si Jesus su ed-ahaan dan ke ebewian din haazà is etew zutun te andew su Andew te Kedhimeley haazà.

Su emun ebewian ni Jesus haazà is etew ne idsumbung dan he midsupak din is Andew te Kedhimeley.

3 Ne migkeǥiyan ni Jesus haazà is etew he nezeetan is belad din te,

“Hengkayi ka,

Mama,

te teliwazà.”

4 Ne zutun mid-insaan din haazà is menge kuntada zin te,

“Hendei zapit is intuǥut kenitew zuen te kesuǥuan tew he ed-ul-ulahan tew kayi te Andew te Kedhimeley?

Iyan be is kedtavang te etew he edlised wey ke ebpesipelahan be is etew?

Iyan be is kedtevangi ta te etew su wey kenà mebpatey wey ke edhimetayan te ve is etew?”

Ne wazè dan meketavak dutun.

5 Ne te ebpenlangulangu si Jesus dutun te mezakel he menge etew,

utew zin egkepeuki sikandan ne utew zaan mibmesakit is gehinawa zin su haazà is menge etew,

wazè dan kehizu.

Ne zutun migkeǥiyan din haazà is etew he nezeetan is belad din te,

“Ketenga nu,

Mama,

is belad nu.”

Ne migketeng dutun te etew haazà is belad din ne segugunà neulii.

6 Ne is menge Perisiyu,

nemen-awè dan dutun te simbahan.

Ne sikandan wey is menge sakup te upakat he midtukud ni Hadì Hirudis,

mibpelelelaǥè dan ke hengkey is paaǥi he mehimu zan he mepatey si Jesus.

7 Ne zutun mid-awà si Jesus wey is menge sumusundan din ne midhendiyè dan te veyvey te ranew.

Ne nemenduma ki Jesus is utew mezakel he menge etew he ebpuun diyà te prubinsya he Geliliya.

Ne is duma kandan,

diyà ebpemuun te prubinsya he Hudiya,

8 wey ziyà te inged he Hiruselim,

wey ziyà te prubinsya he Idumiya,

wey ziyà te tanà he zehipag te wahig he Hurdan wey ziyà te menge inged he siringan dutun diyà te inged he Tiru wey Sidun.

Utew mezakel he menge etew is midhendiyà te ki Jesus su nezineg dan is menge tudtul mehitenged te menge egkengein-inuwan he mibeelan din.

9 Ne migkeǥiyan ni Jesus is menge sumusundan din he megkuwa zan te avang su wey zin meuntuzi emun egkelipitlipit sikandin te utew mezakel he menge etew.

10 Mezakel is nengeulian din en he egkengezeruwan ne tenged kayi,

is egkengezeruwan dutun,

ebpenlietliet dan en is edteǥel ed-uvey diyà te ki Jesus wey zan mekezampà kandin su wey zan meulii.

11 Ne is menge mezaat he mulin-ulin,

hein neehè dan si Jesus,

ne nemenluhud sikandan diyà te etuvangan din is ebpemengulahì he egkaǥi te,

“Iyan ka iyan kes Anak te Megbevayà!”

12 Ne zutun midawey ni Jesus haazà is menge mezaat he mulin-ulin ne migkeǥiyan din sikandan he kenè dan ipesavut he Anak sikandin te Megbevayà.

13 Ne zutun midtekezeg si Jesus diyà te vuvungan dutun ne mid-umew zin sikan is nengepilì din he mehimu he sineriǥan din.

Ne mid-uvey zan diyà te kandin.

14 Ne intezù ni Jesus dutun is sepulù wey zezuwa he medumazuma kandin wey zin ikepehipanew sikandan te kebpesavut te Meupiya he Tudtulanen.

15 Ne mibeǥayan din sikandan te ǥehem wey zan mevuǥew is menge mezaat he mulin-ulin he edlalung te menge etew.

16-19 Iyan heini menge ngazan te sepulù wey zezuwa he etew he nengepilì ni Jesus:

si Simon he migeraran din ki Pedro,

wey si Santiago he anak ni Sibidiyu wey is hazi ni Santiago he si Juan.

Heini is dezuwa,

migeraran din ki Buwenirgis,

he ke và dà egkeǥiya,

mezilapet he etew.

Ne elin daan dutun si Andres,

si Felipe,

si Bartolome,

si Mateo,

si Tomas,

si Santiago he anak ni Alpiyu,

wey si Tediyu.

Ne elin daan si Simon is sevaha te upakat dengan he egngezanan te Kenenista.

Ne elin daan mibpilì ni Jesus si Judas he tigKeriyuti,

sikan is mid-akal kandin.

Ne neipus haazà is kebpilia ni Jesus kandan,

ne mid-ulì sikandin.

20 Ne zutun ensi Jesus,

wazè dan en timpu minsan te kegkaan su utew mezakel is menge etew he nengeamur-amur ziyà te kandin.

21 Ne hein nezineg te menge kezumahan ni Jesus is egkeulaula zin ne mibeyaan dan sikandin su kunaan dan ke neliveg.

22 Ne zuen dutun menge menunudlù te kesuǥuan he ebpuun diyà te inged he Hiruselim ne ke sikandan te,

“Heini he etew,

mid-ulinan sikandin ni Endedaman,

sikan is egalen te menge mezaat he mulin-ulin,

ne tenged kayi igkepeǥuwè din puun te menge etew is menge mezaat he mulin-ulin.”

23 Ne zutun,

migkeǥiyan ni Jesus haazà is menge etew he med-uvey zan diyà te kandin ne zuen menge sempità he impenurù din kandan.

Ke sikandin te,

“Kenà egkehimu he ebuǥawen ni Setanas is duma zin he mezaat he mulin-ulin.

24 Penenglitan ke zuen hadì ne ebpetebtebekà is menge sakup din,

meǥaan egkeawà is gehem din te kedhadì.

25 Ne ke zuen edlingahaan te sengevelayan ne ebpekunkuntedahà is menge sakup din,

meǥaan egkevengkag is upakat dan.

26 Umba ke egkuntedahan ni Setanas is menge sakup din,

kenà egkeuǥet is keǥehem din te kebayàbayà,

kekenà,

meǥaan egkeawà ne egkehanew.

28 Tentenuzi niw heini,”

ke si Jesus,

“he egkepesaylu pa te Megbevayà is menge etew te minsan hengkey he menge salè dan wey minsan hengkey he kedsumpalit dan kandin,

29 iyan,

sikan is edsumpalit te Waǥas he Mulin-ulin,

kenè en egkeawà diyà te kandin haazà is salè din ne kenè en egkepesaylu te minsan keenu.”

30 Umba migkaǥi ni Jesus haazà su is menge menunudlù,

migkaǥi zan he mezaat he mulin-ulin is Waǥas he Mulin-ulin he ed-ulin ki Jesus.

31 Ne nekeuma zutun is iney ni Jesus wey is menge hazi ni Jesus he menge maama.

Ne ziyè dan dà te ǥawas dutun te valey ne migkeǥiyan dan is menge etew he ipeǥawas dan si Jesus.

32 Ne utew mezakel is menge etew he ebpememinuu zutun he nekeliǥuy ki Jesus.

Ne migkeǥiyan si Jesus te menge etew te,

“Diyà te ǥawas is iney nu wey menge hazi nu ne ibpeliǥawang ke zan.”

33 Ne migkaǥi si Jesus te,

“Duen ku pa ibpaahà keniyu he iney ku wey menge suled ku.”

34 Ne nenlangulangu si Jesus dutun te menge etew he nekelingut kandin ne ke sikandin te,

“Heini zed is iney ku wey menge suled ku

35 su is minsan hentei he edtuman te egkesuatan te Megbevayà,

iyan daan iney ku wey menge suled ku he maama,

wey menge etevey ku.”