4 Ne sikiyu is menge emiǥu ku,

iyan egkeǥiyen ku keniyu is:

kenè kew mahandek te menge etew zà duen su iyan dà egkepatey zan is lawa niw,

iyan,

is gimukud niw,

kenè dan egkepatey.

5 Egkeǥiyen ku keniyu ke hentei is engayan he igkehandek niw.

Iyan niw ikehandek is Megbevayà su kenè din iyan dà egkepatey is lawa niw su zuen din keǥehem he ebpeketimbag te ǥimukud niw ziyà te Impirnu.

Uya,

iyan niw sikandin ikehandek!”

6 Ne ke si Jesus te,

“Duen tagbis he egkepemasa te etew is lelima he vuuk te dezuwa zà he tumbaǥa.

Ne minsan pa zutun,

is Megbevayà,

kenè din id-awà diyà te isip din is minsan sevaha kandan.

7 Ne iyan kew pe be is minsan ke edtigselimbahan te ebilang is bulvul niw ne netuenan din en is kezakel.

Umba,

kenè kew mahandek su lavew kew he mahal ziyà te kandin kenà te minsan utew mezakel he menge tagbis.”

8 “Utew venar is egkeǥiyen ku,”

ke si Jesus,

“he sikan is etew he egkaǥi ziyà te menge etew he iyan a egalen din,

ne siak is Kakey te Menusiyà,

ed-engkenen ku zaan sikandin diyà te etuvangan te menge velinsuǥuen te Amey ku he Megbevayà he ziyà te langit.

9 Ne sikan is etew he egkaǥi ziyà te menge etew he kenà a iyan egalen din,

ne kenè ku zaan sikandin ed-engkenen diyà te etuvangan te menge velinsuǥuen te Amey ku he ziyà te langit.

10 Ne sikan is edsumpalit kedì te Kakey te Menusiyà,

ne egkepesaylu pa;

iyan,

sikan is edsumpalit te Waǥas he Mulin-ulin,

kenè en egkepesaylu.

11 Ne emun tenged te kedtuu niw kedì ed-uwiten kew te menge etew ziyà te menge simbahan dan su edhukuman kew zan ne emun ed-imbistigahan kew zaan diyà te etuvangan te menge hadì wey huwis,

kenè kew meseeng ke hengkey is idtavak niw kandan wey ke hengkey is paaǥi niw zutun.

12 Su is Waǥas he Mulin-ulin,

iyan ebpenurù keniyu zutun he timpu;

ne egketaǥù diyà te ǥehinawa niw is ibpekaǥi zin keniyu.”

13 Ne zuen sevaha he maama zutun te nengevurun he menge etew.

Ke sikandin te,

“Datù,

iyan ka metau te kakey ku he vehini e zin te menge azen he kevilin dey te amey zey he minatey en.”

14 Ne midtavak si Jesus te,

“Wazè ku kelavet keniyan su kenà a iyan edhusey keniyu.”

15 Ne migkaǥi si Jesus diyà te menge etew te,

“Purungi niw ventayi is ulaula niw su wey wazà keleleǥed diyan te keniyu.

Su is ibmeupiya te untung te etew,

kenà ebpuun te mezakel he menge azen.”

16 Ne zutun impezineg ni Jesus kandan is sempità.

Ke sikandin te,

“Duen etew he utew egketiǥayun su zuen tanè din he utew uuzaran.

17 Ne neisip dutun te etew is,

‘Hengkey is ed-ul-ulahan ku kayi te langun he uzar ku?

Su kenà egkeamin kayi te menge budiga ku ne wazè en egketeǥuan ku.’

18 Ne ke sikandin te,

‘Edrundusen ku heini is menge budiga ku ne ed-uman a ebevaley te utew zekelà su wey ku zuen meteǥui te langun he egkeraǥun ku wey zuma pa he menge azen ku.

19 Ne zutun,

geina te utew meupiya is kebpekesavuk ku he etew,

kenà ad maan edterebahu su naazen ku en is minsan hengkey he egkinehenglanen ku taman te pira pa he tuig.

Ne tenged kayi ebperenggey e zà is ebpurung egkaan,

ed-inum,

wey edlipeylipey,’

ke sikandin.

20 Iyan,

dutun migkaǥi ziyà te kandin is Megbevayà te,

‘Utew ka tulebung he etew!

Guntaan dà te mezukilem egkeumuran ke en ne ebpatey kad,

ne hentei vuwa is ebpekeangken te langun he menge azen nu he intaǥù nu keniyan te valey nu?’ ”

21 Ne mid-uman megkaǥi si Jesus diyà te mezakel he menge etew,

ke sikandin te,

“Iring kayi te sepian he etew is minsan hentei he edtipig te zekelà he ketiǥeyunan,

iyan,

wazà diyà te kandin is minsan hengkey he igkesuat te Megbevayà.”

22 Ne migkaǥi si Jesus diyà te menge sumusundan din te,

“Ne tenged kayi egkeǥiyen ku keniyu te menge sumusundan ku he kenè kew meseeng te egkeenen he igkeuyag niw.

Ne kenè kew zaan meseeng te ugelingen he idsun-ud te lawa niw.

23 Su mibeǥayan kew te Megbevayà te ǥehinawa wey lawa he mahal utew;

ne wey pe be kenà mehimu he ebeǥayan kew zin daan te egkeenen wey ugelingen?

24 Isipa niw is menge uwak;

kenè dan ebpemula;

kenè dan edraǥun ne wazè dan daan lawig he ederengdengan dan.

Ne minsan pa zutun ebpengelintau is Megbevayà te egkekaan dan.

Ne iyan kew pe be is etew he lavew pa he mahal ziyà te kandin kenà is menge uwak!

25 Ne minsan sengemenu is kegkenuǥuni te etew te untung din,

wazà minsan hengkey he paaǥi he egkesumpatan din te minsan deisey zà.

26 Ne emun pinaaǥi te kegkeseeng niw wazè niw egkehimu te minsan kayi te utew zeisey he ebeelan,

hengkey is pulus te kedseengseeng niw pa maan te zuma he ebeelan?

27 Ahaa niw is menge kevukazan ke hengkey is kedtuvù dan.

Kenè dan edterebahu ne kenè dan daan ebpengavel.

Ne minsan pa zutun,

egkeǥiyen ku keniyu he minsan si Hadì Sulumun dengan he utew sepian wey nevantug,

ne wazà mekesusuluwan is kezagwey te menge bisti zin te kezagwey kayi te menge kevukazan.

28 Is sagbet,

ne wazè din bali;

egkeehè ta ǥuntaan ne kenè en utew egkeuǥet ne egkeǥangu en,

ne ebinsulan en.

Iyan,

ke edhimuwen te Megbevayà he mekempet minsan heini is menge sagbet,

iyan kew pe be kenè din daan meveǥayi te igkeuugelingen!

Maan is utew zeisek is kedsarig niw kandin?

29 Kenè kew meseeng!

Kenè niw iyan isipa ke hengkey is egkekaan niw wey egkeinum.

30 Su is iring keniyan,

ne iyan igkengeseeng te menge etew he wazà medtuu te tutuu he Megbevayà,

iyan,

sikiyu mulà,

kenè niw ikeseeng is iring dutun su is Amey niw he Megbevayà,

netuenan din he egkinehenglanen niw heini is langun.

31 Iyan niw ul-ulaha is ibpeulaula keniyu te Megbevayà he iyan edhadì keniyu ne ibeǥey zin diyà te keniyu is langun he egkinehenglanen niw.

32 Sikiyu is menge sumusundan ku,

kenè kew mahandek.

Minsan pa te zeisey kew zà,

is Amey niw he Megbevayà,

egkesuatan din he medhadì kew iring te edhadì daan sikandin.

33 Ivelegyè niw is langun he azen niw ne ipemeǥey niw is halin diyà te menge egkengeayuayu.

Pinaaǥi kayi egkehimu he zuen ketiǥeyunan niw ziyà te langit.

Is menge azen niw ziyà te langit,

ne kenà egkezeetan ne kenà egketerinan su wazà ebpenakew ne wazà ipes he ebpekeketket.

34 Ne ke hendei is egketeǥuan te ketiǥeyunan niw ne zutun daan is gehinawa niw.”

35 Ne impezineg en maan ni Jesus is sempità,

ke sikandin te,

“Andam kew he zaan su wey kenè kew metingkemed te minsan hengkey.

Iringi niw is suluǥuen he edtaǥad te egalen dan he ebpuun te eseweey he midtelavuk din.

36 Su haazà is menge suluǥuen,

ne layun dan ed-andam ne kenè dan ed-evukan is sulù dan ne emun ebpekeuma haazà is egalen dan ne ebpenelehuzan diyà te pultahan ne petuluy zan egkepuwasi.

37 Utew meupiya is kegeǥehinawa zutun te menge suluǥuen emun ebpekeuma haazà is egalen dan ne zaan dan neendami haazà is kebpekeuma zin.

Benar is egkeǥiyen ku he haazà is egalen dan,

ibpepinuu zin sikandan diyà te lemisahan ne iyan sikandin ebpekaan kandan.

38 Utew egkengelipey sikandan ke ebpekeuma is egalen dan he kemulu zan pa sikandin edteǥazi minsan ke liwazè en is kezukileman wey minsan ke egkepkepawè en be.”

39 Ne ke si Jesus maan te,

“Kenè niw heini lipati he emun egketuenan te teǥivaley ke keenu ebpekeuma is tekawen ne ebpekepurung sikandin ebpekevantey ne kenà ebpekeseled dutun te valey zin haazà is tekawen.

40 Ne sikiyu zaan,

kinahanglan he mebpekevantey kew su siak is Kakey te Menusiyà,

ebpekeuma a te uras he wazè niw isipa he ebpekeuma a.”

41 Ne zutun,

mid-insà si Pedro,

ke sikandin te,

“Heini is sempità he migkaǥi nu,

iyan key zè be kenikew ebpenuruen is menge sumusundan nu,

wey ke elin be is menge etew?”

42 Ne midtavak is Nengazen te,

“Sikan is suluǥuen he uluwanen wey metinumanen,

iyan ibpevayàbayà te egalen din te menge zuma zin he suluǥuen.

Ne iyan ebpekaan te menge zuma zin he suluǥuen dutun te uras te kegkaan.

43 Emun ed-ulì haazà is egalen din,

utew zekelà is kelipey zutun te suluǥuen ke egkeahà te egalen din he midtuman din is langun he ebpeveelan kandin.

44 Egkeǥiyen ku keniyu he is suluǥuen he metinumanen,

idsarig kandin is langun he menge azen te egalen din.

45 Iyan,

kehizu zin ke iyan diyà te isip din is menaney pa ed-ulì haazà is egalen din ne ebpemuǥelen din is menge zuma zin he suluǥuen he maama wey vahi ne iyan dà baal zin is egkaan wey ed-inum ne egkelangut.

46 Su zutun te andew he wazè din peebuta wey te uras he wazè din metueni,

ebpekeulì haazà is egalen din.

Ne haazà is suluǥuen,

ebeelan diyà te kandin is iring te ebeelan diyà te menge suluǥuen he kenà egkeseriǥan ne edhimetayan sikandin te egalen din.

47 Ne sikan is suluǥuen he netuenan din en is ibpeveelan kandin te egalen din,

iyan,

wazà med-andam ne wazà medtuman te ibpeveelan kandin te egalen din,

ne kenà sikandin ed-uraman te ebuǥel zutun te egalen din.

48 Ne sikan is suluǥuen he wazè din pa metueni is ibpeveelan kandin te egalen din,

iyan,

duen mid-ulaula zin he igkepeuki kandin te egalen din,

ne kenà utew sikandin ebuǥelen.”

Ne mid-uman megkaǥi si Jesus te,

“Is etew he zekelà is insarig kandin,

dekelà daan is ebperetengen diyà te kandin.

Ne emun utew pa zekelà is insarig kandin ne utew en daan dekelà is ebperetengen diyà te kandin.”

49 Ne migkaǥi si Jesus te,

“Iyan ku impehendini su wey dini te kelibutan duen hapuy,

50 Duen ibewtismu kedì he iyan is dekelà pa he menge kemeresayan he egkeulaula ku he wazè pa mengetuman.

Henduen a te ed-utuk te langit taman te kenè ku pa heini egkeliyu.

51 Kunaan niw vuwa ke iyan impehengkayi ku te kelibutan is wey wazè en samuk te menusiyà.

Iyan kenà!

Su heini is kebpekehendini ku,

ne zuen kebpemekedsusuwey te ǥehinawa te menge etew.

52 Puun guntaan tenged kedì emun duen lelima he etew ziyà te sengepeningaan,

egkevahin sikandan.

Ebpekigkuntada is tetelu te zezuwa.

Ne iring din ded daan ebpekigkuntada haazà is dezuwa zutun te tetelu.

53 Ebpekigkuntada is maama te anak din he maama ne is anak,

ne ebpekigkuntada te amey zin.

Ne is bahi,

ne ebpekigkuntada te anak din he vahi ne is anak din,

ne ebpekigkuntada zaan te iney zin.

Ne ke zuen bahi,

ne ebpekigkuntada te ambey zin.

Ne egkuntedahan daan sikandin te ambey zin.”

54 Ne migkaǥi med-uman si Jesus diyà te menge etew te,

“Dini te kenitew ke egkeehè niw is kivel ziyà te edsenlepan ne ke sikiyu te,

‘Ed-uzan heini,’

ne ed-uzan iyan.

55 Ne emun ebpengeramag he ebpuun te zapit te zivavà ne ke sikiyu te,

‘Ebmeinit utew ǥuntaan,’

ne ed-andew iyan.

56 Tarù is ulaula niw!

Su emun ed-ahaan niw is langit wey tanà egketuenan niw ke hengkey is egkehitavù te timpu,

iyan,

kenè niw uvag egkesavut ke hengkey is ed-ul-ulahan guntaan te Megbevayà pinaaǥi kedì.”

57 Ne ke si Jesus te,

“Deyzey ke ed-isipen niw is hustu he ed-ul-ulahan.

58 Penenglitan duen etew he idsumbung kew zin,

ne ed-uwiten kew zin diyà te hukmanan.

Himuwa niw is taman te egkehimu niw su wey kew kandin mebpekidhusey te kenè kew pa ebpekeetuvang te huwis.

Su emun ebpekeetuvang kew en te huwis,

kela ke izata kew zin diyà te pulis ne egkepirisu kew.

59 Ne zutun kew ebpekeubpà taman te kenè niw pa egkeǥempusan is multa keniyu.”