Is Ked-iniyuǥi te Mezaat he Ulaula
13
Ne zutun he timpu zuen nemekeuma he menge etew ne mibpenudtul zan diyà te ki Jesus is mehitenged te menge etew he tigGeliliya he impehimetayan ni Gubirnedur Pilatu zutun te timpu te kebpelengesa zutun te menge etew te langgam diyà te simbahan he Valey te Megbevayà.
2 Ne migkaǥi kandan si Jesus te,
“Kunaan niw vuwa ke lavew pa he mekesesalà haazà is menge tigGeliliya,
kenà is menge zuma zan he tigGeliliya,
ne tenged dutun intuǥut te Megbevayà he edhimetayan sikandan.
3 Kenà heeyan iyan!
Su egkeǥiyen ku keniyu he emun kenè niw ed-iniyuǥan is menge ulaula niw he memezaat,
ebpatey kew zaan is langun,
iring kandan.
4 Ne isipa niw zaan is sepulù wey walu he menge etew he nemematey hein nepilayan sikandan te metikang he valey ziyà te Siluwi.
Kunaan niw vuwa ke iyan kandan ingkepilayi su utew lavew sikandan he mekesesalà kenà te langun he menge zuma zan he tigHiruselim.
5 Kenà daan.
Egkeǥiyen ku keniyu he emun kenè niw ed-iniyuǥan is memezaat he menge ulaula niw ne ebpatey kew zaan is langun iring kandan.”
Is Kayu he Igira
6 Ne zuen en maan sempità he impezineg ni Jesus kandan.
Ibpenurù din he emun wazà mahalin is ulaula te etew ne edsilutan sikandin te Megbevayà.
Ke sikandin te,
“Duen etew he zuen din pinemula he kayu he igira ziyà te pemuleey zin.
Sevaha he andew zutun mid-ehè din haazà is kayu ke zuen en beǥas din he igira.
Iyan,
wazà mebeǥas haazà is kayu.
7 Ne migkeǥiyan din is impeelima zin dutun te kayu,
ke sikandin te,
‘Nemenu vuwa heini is kayu he kenè en ebeǥasbeǥas?
Su tetelu en he tuig is kebperetenga ku ke ebeǥas ne kenè en iyan ebeǥas.
Pilaya nu nasì su ebpekehenung dà kayi te zuma he pinemula.’
8 Iyan,
migkaǥi haazà is impeelima zutun te,
‘Kenè te pa zè pa,
Anggam,
ebpilayen su ebpeseseǥazen te pa seled te sengetuig.
Edhiǥewanan ku pa is pelingut ne ebukbukan ku pa te pelambù te pinemula.
9 Ne emun ebeǥas te ilis he tuig ne meupiya,
ne emun kenà ebeǥas ne ebpilayen ku.’ ”
Is Kebewii Zuen te Nevekut
10 Ne sevaha he andew he Sebadu,
diyà si Jesus ebpenurù te simbahan te menge Hudiyu.
11 Ne zuen dutun te simbahan bahi he nevekut su midlalung te mezaat he mulin-ulin.
Ne menge sepulù en wey walu he tuig haazà is kegkevekut din ne kenè en iyan egkevulug egkeketeng te minsan deisey zà.
12 Ne zutun te kegkeahaa ni Jesus kandin,
mid-umew zin ne ke sikandin te,
“Ayà,
egkeulian ke en keniyan te zaru nu.”
13 Ne midsamsam ni Jesus is peka zutun te vahi ne zutundutun ne neketeng is peka zin.
Ne nekezaligdalig haazà is bahi te Megbevayà.
14 Ne is egalen dutun te simbahan,
utew nepauk dutun te kebpemawì ni Jesus dutun te Andew te Kedhimeley.
Ne ke sikandin diyà te menge etew te,
“Seled te heenem he andew is kedterebahu tew te sengesimana.
Emun ebpevawì kew zutun he timpu ne meupiya,
iyan,
kenè kew pevawì guntaan te Andew te Kedhimeley!”
15 Ne midtavak kandin si Jesus te,
“Tarù is menge ulaula niw!
Ke zuen baka ne emun kenà ne kudà te minsan hentei keniyu,
kenà egkehimu he kenè din edhekazan haazà emun Andew te Kedhimeley,
kekenà,
edhekazan din ne edtuyuken din pehendiyà te wahig su ibpeinum din.
16 Ne heini ǥuntaan is bahi he kevuwazan daan ni Abraham,
ne mibakus ni Setanas te sepulù en wey walu he tuig,
ne kenè niw ves ebpehekazan kayi te Andew te Kedhimeley!”
17 Ne haazà is tavak ni Jesus,
utew ingkeeled te menge kuntada zin.
Ne is duma zutun he mezakel he menge etew,
utew zan nengelipey te langun he menge egkengein-inuwan he mibeelan din.
Healing on the Sabbath
Is Ked-iseg Kebmahabet te Edhedian te Megbevayà
18 Ne impenurù en maan ni Jesus is selakew en maan he sempità,
ke sikandin te,
“Hengkey is meupiya he ebpetug-iringan te kebmezakel te menge etew he edhedian te Megbevayà?
19 Is kebmezakel zan te edhedian te Megbevayà,
ne iring te pinemula he utew zeisey is lisu zin.
Ibpemula heini te etew ziyà te kamet din ne ke edtuvù ne edekelà ne egkehimu he iring kezekelà te kayu ne egkeletunan te menge tagbis ne egkeseselaǥan dan is menge subpang din.”
The Kingdom of God as a Mustard Seed
20 Ne mid-uman megkaǥi si Jesus te,
“Hengkey pa is meupiya he ebpetug-iringan te kebmezakel te menge etew he edhedian te Megbevayà?
21 Is kebmezakel zan te edhedian te Megbevayà,
ne iring daan te tapey.
Su ke zuen bahi he ebaal te supas,
egkuwaan din haazà is tapey ne idsahug din te sengebisin he erina.
Ne ed-ensak haazà is tapey zutun te erina ne edtulin haazà is erina.”
Is Kenà Ebpekeragkes te Menge Etew he Edhedian te Megbevayà
22 Midhipanew si Jesus pehendiyà te inged he Hiruselim ne zutun te kedhipanew zin ne mibpenuluytuluy ziyà te zuma pa he menge inged su ebpenurù te menge etew.
23 Ne zuen mid-insà kandin te,
“Datù,
deisey zè be is menge etew he ebeǥayan te untung he wazà pidtemanan?”
Ne midtavak si Jesus te,
24 “Himuwa niw is taman te egkehimu niw wey kew mekeseled te meliǥet he ǥemawan he idselang dutun te valey he iyan is untung he wazà pidtemanan su egkeǥiyen ku keniyu he mezakel is egkesuat pezem he edseled dutun,
iyan,
kenè dan ebpekeseled.
25 Su edlekevan te teǥivaley haazà is gemawan.
Ne emun diyè kew pa te ǥawas ebpenelehuzan kew is egkaǥi te,
‘Puwasi key kenikew!’
Ne iyan dà idtavak dutun te teǥiǥaked is,
‘Kenè ku egketuenan ke hentei kew wey ke hendei kew ebpuun.’
26 Ne zutun edtavak kew te,
‘Dengan migkaan key wey mid-inum key zuma kenikew ne mibpenurù ka ziyà te inged dey!’
27 Ne edtevaken kew zin te,
‘Kenè ku iyan egketuenan ke hentei kew wey ke hendei kew ebpuun.
Sikiyu is memezaat is ulaula,
awè kew en dini.’
28 Ne zutun,”
ke si Jesus,
“utew zekelà he erang niw ne ebpemekengingitel kew tenged te utew ibmesakit pezem te ǥehinawa niw su kenè kew ebpekeragkes dutun te edhedian te Megbevayà,
ne ziyà te seled,
ne egkeehè niw is menge kepuun niw zengan,
ensi Abraham wey sikan is anak din he si Isaak wey sikan is apù din he si Hakub wey elin daan dutun is langun he ebpemeneuven te Megbevayà.
29 Mezakel zaan dutun is menge etew he kenà menge zuma niw he Hudiyu he ebpemuun diyà te heepat he pesaǥi kayi te kelibutan.
Ne ebpemekepinuu sikandan dutun te keemuran te langun he edhedian te Megbevayà.
30 Duen guntaan menge etew he kunaan niw ke egkengehuziyan su kenà menge zuma niw he Hudiyu,
iyan,
emun egkeume en haazà he andew ne iyan sikandan egkehuna te langun he edhedian te Megbavayà.
Ne zuen daan menge etew ǥuntaan he kunaan niw ke egkengehuna,
iyan,
emun egkeume en haazà he andew ne iyan sikandan egkengehuziyan te langun.”
Is Hizu ni Jesus te Menge TigHiruselim
31 Ne zutun daan he andew ne zuen menge Perisiyu he midhinguma zan si Jesus,
ne ke sikandan te,
“Laus ke en ne kenè ke en tuluy zini te kenami su edhimetayan ke kun ni Hadì Hirudis.”
32 Ne migkaǥi si Jesus diyà te kandan te,
“Si Hirudis,
haazà is utew metau he ed-akal,
keǥiyi niw sikandin he kenè e pa ed-awà dini su ǥuntaan wey keeselem ebpenegseǥen ku pa is menge mezaat he mulin-ulin he ebpenlalung te menge etew,
ne ebewian ku is egkengezeruwan.
Ne mekezuwa pa ǥuntaan ne human egkeipus heini is menge vaal ku zini.
33 Iyan,
egkeǥiyen ku keniyu he kinahanglan he ednaneynaney e zè pa edlaus guntaan wey keeselem wey te mekezuwa pa su kenà egkehimu he edhimetayan a zini su is ebpeneuven te Megbevayà,
ne kenà tekew en edhimetayan ke kenà diyà te seled te inged he Hiruselim.”
34 Ne zutun netenuzan ni Jesus is menge ulaula te menge meǥinged te Hiruselim ne ke sikandin te,
“Igkeseeng ku sikiyu is menge meǥinged diyà te Hiruselim su ebpemunuen niw is ebpemeneuven te Megbevayà ne is menge suluǥuen te Megbevayà he ibpehendiyàn,
ebpenulengen niw te vatu he edhimetayan niw.
Utew zekelà is suat ku pezem he ed-uyemuwen ku sikiyu;
ke và dà manuk,
iring a te upa he edlekupan din is menge piyak din ne kenè kew ebpelekup.
35 Ne ǥuntaan,
utew mekevulungbulung heini is simbahan niw su mid-iniyuǥan kew en te Megbevayà.
Su egkeǥiyen ku he kenà ad maan keniyu egkeahà taman dutun te timpu keuzemà he ebpekekaǥi kew te,
‘Deliǥa is nekeuma he midsuǥù te Nengazen.’ ”