Is Ketudluanan Mehitenged te Kedsawey
7
“Kenè kew medsawey te zuma niw ne kenè kew zaan edsewayen te Megbevayà.
2 Su is idsawey niw te zuma niw ne iyan daan idsawey keniyu te Megbevayà.
Is kezekelà te idsawey nu te zuma nu,
iyan daan kezekelà te idsawey kenikew te Megbevayà.
3 Sikew is layun edsawey te zuma nu,
maan is edsawey ka te salà te zuma nu he iring dà te pesek he nekeahuk diyà te mata zin?
Ne sikew,
duen nu salà he iring kezekelà te vatang he nekevuta te mata nu ne ebpesegdanen nu.
4 Ne egkeǥiyan nu pa sikandin he id-awè nu haazà is nekepesek kandin,
iyan,
nepesek mulà is kenikew he mata te vatang ne ebpesegdanen nu!
5 Utew tarù is ulaula nu!
Ihuna nu iawà is batang he nekepesek kenikew ne human ka ebpekeahà.
Ne zutun melemu nu zà igkeawà haazà is nekepesek te zuma nu.”
6 Ne zutun insempità ni Jesus is menge etew he kenà egkesuat he ebpemineg te Lalag te Megbevayà.
Ke sikandin te,
“Kenè niw iveǥey te asu is butang he mahal ziyà te Megbevayà su kela ke keǥata kew zin.
Ne kenè niw zaan isawed is menge mahal he ebelieǥen diyà te etuvangan te menge vavuy su egketekutakan dan dà.
Is Kebuyù Diyà te Megbevayà
7 Penigudu kew vuyù diyà te Megbevayà ne ebeǥayan kew zin;
penigudu kew pen-ahà ne ibpeturedu zin keniyu is ebpen-ahaan niw.
Penigudu kew penelehuzan ne ebpuwasan kew zin.
8 Su is langun he ebuyù diyà te Megbevayà ebpekezawat.
Ne sikan is ebpen-ahà,
ebpeketuredu;
ne sikan is ebpenelehuzan,
ne ebpuwasan daan te Megbevayà.
9 Ne sikiyu is menge ǥinikanan,
ke zuen ebuyuen te anak niw he egkeenen kenà egkehimu he vatu is ibeǥey niw.
10 Ne emun ebuyù keniyu te pait,
kenà daan egkehimu he uled is ibeǥey niw.
11 Ne sikiyu is menusiyà he kenà memetazeng,
emun meupiya is ibeǥey niw ziyà te menge anak niw,
iyan pe be is Amey tew he Megbevayà diyà te langit kenà meupiya is ibeǥey zin diyà te minsan hentei keniyu ke ebuyù ziyà te kandin.
12 Is egkesuatan niw he ed-ul-ulahan te menge zuma niw ziyà te keniyu,
iyan niw zaan ul-ulaha ziyà te kandan.
Iyan heini hustu he kedtumana te kesuǥuan he imbilinbilin ni Moises.
Iyan daan heini kes impenurù dengan te menge ebpeneuven te Megbevayà.
Is Dalan Pehendiyà te Langit wey Is Pehendiyà te Impirnu
13 Diyè kew ikul te meliǥet he pultahan he idselang pehendiyà te untung he wazè din pidtemanan su meluag mulà is pultahan wey melemu he ed-ikulen is dalan he ibpehendiyà te Impirnu,
ne mezakel he etew is ed-ikul zutun.
14 Meliǥet mulà is pultahan wey mereǥen he ed-ikulen is dalan he ibpehendiyà te untung he wazè din pidtemanan ne mezelag dà is ed-ikul kayi.
Is Beǥas te Pinemula
15 Likayi niw is menge ebpeneuven kun te Megbevayà he tarù is ibpenurù dan.
Henduen be te hustu sikandan he tumutuu te Megbevayà,
iyan,
ebpekezezaat is ibpenurù dan.
16 Egketuusan niw he teruen sikandan pinaaǥi te ulaula zan su is banag,
kenà ebeǥas te paras ne is seǥà,
kenà ebeǥas te igira.
17-18 Is kayu he wazè din erat,
meupiya is beǥas din;
kenà ebpemeǥas te mezaat.
Is kayu he zuen din erat,
mezaat is beǥas din;
kenà ebpemeǥas te meupiya.
19 Is kayu he mezaat is beǥas din,
ne ebpilayen ne ebinsulan.
20 Iring din ded daan is menge ebpeneuven kun te Megbevayà he tarù is ibpenurù dan su edsilutan sikandan te Megbevayà.
Ne egketuusan niw he teruen sikandan tenged te menge ulaula zan he mezaat.
Is Kenà Ebpekeragkes te Edhedian te Megbevayà
21 Su zuen menge etew he ebpengumew-umew kedì te,
‘Nengazen,
he Nengazen!’
Iyan,
kenà langun te sikandan ebmehimuwen he mehedii te Amey ku he Megbevayà he ziyà te langit,
kekenà,
iyan dà sikan is edtuman te egkesuatan te Megbevayà.
22 Ne zutun keuzemà te andew te kedsilut,
mezakel is ebpehizuhizu zini te kedìey he egkaǥi te,
‘He Nengazen,
pinaaǥi te ǥehem nu neketagnè key,
ne nengeulian dey is ebpenlelungen te mezaat he mulin-ulin,
ne mezakel is menge egkein-inuwan he nengehimu zey.’
23 Ne iyan tavak ku kandan dutun is:
‘Kenè ku sikiyu egkekilala.
Sikiyu is memezaat is ulaula,
awà kew kayi!’
Is Dezuwa he Mibevaley
24 Ne minsan hentei he nekezineg kayi te langun he sambag ku ne ebpezumdumahan din,
iring sikandin te etew he uluwanen,
su heini is uluwanen,
diyà mebevaley te zivavew te zekelà he vatu.
25 Ne mibegyuwan.
Mid-uzan te mereǥes ne midalem is menge wahig ne utew mevendes is keramag,
iyan,
wazà merundus haazà is baley su ziyà benguna te zivavew te zekelà he vatu.
26 Ne is minsan hentei he ebpemineg dà kayi te sambag ku ne kenè din ebpezumdumahan,
iring sikandin te etew he tulebung.
Heini is tulebung,
ne ziyà mebevaley te pantad.
27 Ne mibegyuwan daan;
ne midalem haazà is wahig ne mibpengeramag te mevendes ne nerundus haazà is baley zin ne nepurung mewaǥey.”