6 Ne sevaha pa zutun he andew he Sebadu,

midseled si Jesus duen te simbahan te menge Hudiyu ne nenurù sikandin.

Ne zuen dutun etew he minatey is menge uǥat te kewanan he velad din.

7 Ne zuen dutun menge etew he Perisiyu wey menge menunudlù te kesuǥuan.

Ne mibentayan dan si Jesus su ed-ehaan dan ke ebewian din be haazà is etew zutun te andew su Andew te Kedhimeley.

Iyan ibpurungi zan ibentayi ki Jesus su wey zan mekeahà te paaǥi te kedsumbunga zan kandin he midsupak din is Andew te Kedhimeley.

8 Ne si Jesus,

netuenan din ke hengkey is netaǥù diyà te isip dan ne migkeǥiyan din haazà is etew he nezeetan is belad din te,

“Mama,

hitindeg ka ne uvey ka zini.”

Ne midhitindeg haazà is etew ne mid-uvey ziyà te ki Jesus.

9 Ne migkaǥi si Jesus diyà te menge Perisiyu wey menge menunudlù,

ke sikandin te,

“Hengkey is isip niw?

Hendei zapit is intuǥut kenitew zuen te kesuǥuan tew he ed-ul-ulahan tew kayi te Andew te Kedhimeley?

Iyan be is kedtavang te etew he edlised wey ke ebpesipelahan be is etew?

Iyan be is kedtavang te etew su wey kenà mebpatey wey ke edhimetayan be?”

10 Ne mibpenlangulangu si Jesus dutun te langun he menge etew ne migkeǥiyan din haazà is etew he nezeetan is belad din te,

“Ketenga nu,

Mama,

is belad nu.”

Ne migketeng dutun te etew is belad din ne segugunà neulii.

11 Ne zutun,

ne utew nengepauk haazà is menge Perisiyu wey haazà is menge menunudlù te kesuǥuan ne mibpelelelaǥè dan ke hengkey is ed-ul-ulahan dan ki Jesus.

12 Ne sevaha he andew zutun midhendiyà si Jesus te vuvungan su ed-ampù diyà te Megbevayà.

Ne mid-ampù sikandin dutun te tivuuk he kezukileman.

13 Ne hein nepawà dutun ne miburun din is menge sumusundan din ne mibpilì din dutun is sepulù wey zezuwa ne migeraran din haazà he menge epustul.

14 Is menge etew he nengepilì din dutun iyan ensi Simon he sikan is migeraran din ki Pedro,

wey sikan is hazi ni Simon he si Andres,

si Santiago wey si Juan,

si Felipe wey si Bartolome,

15 si Mateo wey si Tomas,

si Santiago he anak ni Alpiyu wey sevaha he etew he egngezanan ded daan ki Simon he nevantug tenged te utew mezesen sikandin he edtuman te imbilinbilin he kesuǥuan,

16 ne elin daan si Hudas he anak te sevaha he etew he egngezanan daan ki Santiago wey is sevaha pa he egngezanan ki Hudas he tigKeriyuti.

Heini he Hudas,

iyan kes mid-akal ki Jesus.

17 Ne hein neipus ni Jesus is kebpilia zin kandan midtupang sikandin duma haazà is nengepilì din.

Midteren dan dutun te patag ne nengevurun dutun is mezakel he menge sumusundan din wey is medmezakel he menge etew he ebpemuun diyà te menge inged he sakup te Hudiya wey ziyà te inged he Hiruselim.

Ne zuen daan menge etew he ziyà ebpemuun te menge inged he Tiru wey Sidun he ziyà te veyvey te zaǥat.

Iyan tuyù dutun te menge etew is ebpemineg dan te kebpenurù ni Jesus wey ebpemevawì daan sikandan kandin te menge zaru zan.

18 Ne mibewian din is langun he menge etew he ebpenlelungen te menge mezaat he mulin-ulin zutun ne nengeulian sikandan.

19 Ne mezakel zutun te menge etew is egkesuat he egawed diyà te ki Jesus,

su zuen gehem he ebpuun diyà te kandin ne pinaaǥi zutun egkengeulian is langun te sikandan.

20 Ne mibpenlangulangu si Jesus diyà te menge sumusundan din ne migkaǥi sikandin te,

“Utew kew zeyzey is menge ayuayu su iyan kew en edhedian te Megbevayà!

21 Utew kew zeyzey is egkengevitil ǥuntaan su ebpekehentayen kew keuzemà te Megbevayà!

Utew kew zeyzey is egkengeseeng guntaan su egkengelipey kew keuzemà.

22-23 Utew kew zeyzey emun egkuntedahan kew te menge etew ne kenè kew zan edewaten he zuma zan,

ne ebpeel-elezan kew zan,

ne egkeǥiyen kew zan he memezaat is ulaula niw tenged te midsundan kew kedì te Kakey te Menusiyà.

Iyan heini kes mid-ulaula zengan te menge kepuun dan diyà te menge ebpeneuven te Megbevayà.

Medlipey kew utew emun egkehitavù heini ziyan te keniyu su utew zekelà is suhul keniyu te Megbevayà he ebpeebuten niw ziyà te langit.

24 Iyan,

kehizu niw te menge sepian guntaan su emun egkehanew is menge ketiǥeyunan niw wazè en duma pa he igkelipey niw keuzemà.

25 Kehizu niw te layun egkengehantey ǥuntaan su zuen timpu keuzemà he egkengevitil kew!

Kehizu niw te egkengelipey ǥuntaan su zuen timpu keuzemà he utew kew egkengeseeng.

26 Kehizu niw te edtehuzen guntaan te langun he menge etew su iyan heeyan mid-ulaula zengan te menge kepuun dan diyà te menge kenà tutuu he ebpeneuven te Megbevayà.

Umba edtehuzen kew te menge etew su iring kew zutun te menge kenà tutuu he ebpeneuven ne edsilutan kew zaan te Megbevayà.

27 Iyan egkeǥiyen ku keniyu te menge sumusundan ku he ebpemineg kediey ǥuntaan is:

kinahanglan he kenà mezaat is gehinawa niw ziyà te menge kuntada niw,

kekenà,

purungi niw is egkengeepes keniyu.

28 Penubtuvazi niw te meupiya is ebpenrawak keniyu.

Iampù te Megbevayà is ebpesipala keniyu.

29 Emun duen etew he edtebpien din is enaping nu,

ne keǥiyi nu he egkehimu pa ke elin din edtebpien is divaluy.

Ne emun duen etew he edluwasen din is kumbalè nu ne keǥiyi nu te egkehimu pa ke elin din egkuwaan is kemising nu.

30 Emun duen ebuyù diyà te kenikew,

iveǥey nu ziyà te kandin is ebuyuen din,

ne emun duen etew he ed-eǥawen din is menge azen nu ne kenè nu hewia.

31 Is meupiya he egkesuatan nu he ed-ul-ulahan te zuma ziyà te kenikew,

ne iyan nu ul-ulaha ziyà te kandan.

32 Kenè nu isipa he edsuhulan ka te Megbevayà emun iyan nu zà igkesuat is menge etew he igkesuat ke zan daan su minsan is menge mesinupaken he etew,

ne igkesuat dan daan is menge etew he egkesuat kandan.

33 Ne ke iyan nu zà ebpurungan is menge etew he ebpurungan ke zan daan,

kenè nu isipa he edsuhulan ka te Megbevayà su minsan is menge mesinupaken he etew,

ne ebpurungan dan daan is ebpurung kandan.

34 Ne emun iyan nu zà ibpeutang is etew he netuenan nu he ebpekevayad te ibpeutang nu kandin,

kenè nu isipa he edsuhulan ka te Megbevayà su minsan is menge mesinupaken he etew,

ibpeutang dan is menge zuma zan he mesinupaken emun egketuenan dan he ebpekevayad dutun te ibpeutang.

35 Iyan penurù ku keniyu is:

kenà imezaat te ǥehinawa niw is menge kuntada niw,

kekenà,

meupiya is ul-ulaha niw ziyà te kandan.

Ke zuen etew he ed-utang keniyu,

kenè niw itaǥù diyà te ǥehinawa niw he kinahanglan he beyazi kew zin.

Emun edtumanen niw heini,

igkepeehè niw he menge anak kew te utew lavew he Megbevayà.

Ne utew zekelà is suhul zin keniyu su minsan is menge etew he memezaat is ulaula wey is menge kenà ebpeselamat kandin,

egkehizuwan din sikandan gihapun.

36 Iring te nehizu kenitew is Amey tew he Megbevayà,

mehizu kew zaan te zuma niw.

37 Kenè kew medsawey te zuma niw ne kenè kew zaan edsewayen te Megbevayà.

Is duma niw he nekesalà,

kenè niw keǥiya he meupiya ke edsilutan su wey kenè kew mesiluti te Megbevayà.

Mebmepeseyluwen kew te zuma niw ne ebpeseyluwen kew te Megbevayà te menge salè niw.

38 Mebeǥey kew ziyà te menge zuma niw ne is Megbevayà,

ebeǥayan kew zin daan.

Is kezekelà te ibeǥey niw ne iyan daan kezekelà te ibeǥey keniyu te Megbevayà.

Ne is ibeǥey zin keniyu,

ne utew subra su henduen te utew edhesheseka wey utew ebpenpenua ne egkepeuluwan pa.”

39 Ne impezineg ni Jesus is sempità,

ke sikandin te,

“Is etew he lakap,

kenà egkehimu he ed-aǥak te sengelelakap daan,

su pudu zan is dezuwa,

egkeulug diyà te vitu.

40 Is ebpepenurù,

kenè din isipa he lavew sikandin he edtehuzen kenà te ebpenurù kandin.

Ne emun wazè en igkepenurù kandin te ebpenurù,

human ebpekedrepeng sikandan is ebpepenurù wey is ebpenurù.”

41 Ne mid-uman megkaǥi si Jesus te,

“Sikew is layun edsawey te zuma nu,

maan is edsawey ka te salà te zuma nu he iring dà te pesek he nekeahuk te mata zin.

Ne sikew,

duen nu salà he iring kezekelà te vatang he nekevuta te mata nu ne ebpesegdanen nu?

42 Ne egkeǥiyan nu pa sikandin he id-awè nu haazà is nekepesek kandin,

iyan,

nepesek mulà is kenikew he mata te vatang he ebpesegdanen nu!

Utew tarù is ulaula nu!

Ihuna nu iawà is batang he nekepesek kenikew ne human ka ebpekeahà.

Ne zutun melemu nu zà igkeawà haazà is nekepesek te zuma nu.”

43 Ne ke si Jesus en maan te,

“Is kayu he wazè din erat,

meupiya is beǥas din ne kenà ebpemeǥas te mezaat.

Is kayu he zuen din erat,

mezaat is beǥas din ne kenà ebpemeǥas te meupiya.

44 Egketuusan is kada kayu pinaaǥi te veǥas din,

su is banag ne kenà ebpemeǥas te paras ne is seǥà ne kenà ebeǥas te igira.

45 Ne iring din ded daan te etew,”

ke si Jesus,

“su emun meupiya is ulaula zin he etew,

memeupiya zaan is nemeketaǥù diyà te ǥehinawa zin;

meupiya zaan is kebpemèbè din.

Iyan,

ke mezaat is ulaula zin he etew,

memezaat daan is nemeketaǥù diyà te ǥehinawa zin,

ne mezaat daan is kebpemèbè din.

Su is egketaǥù te ǥehinawa te etew,

iyan daan egkekaǥi zin.”

46 Ne mid-uman megkaǥi si Jesus te,

“Maan is egkeǥiyen niw he iyan a egalen niw,

iyan,

kenè niw edtumanen is menge sambag ku keniyu.

47 Is minsan hentei he sumusundan ku he nekezineg te menge sambag ku ne ebpezumdumahan din,

egkeǥiyen ku keniyu he

48 iring sikandin te etew he ebevaley te melig-en diyà te zivavew te zekelà he vatu.

Memezalem is bangbang din he mibpesekan din te tukud.

Ne nepasad haazà is baley ne mibagyu ne midalem is wahig ne nesuǥat haazà is baley te meseleg he wahig,

iyan,

wazà merundus su neviǥeran man.

49 Ne is etew he ebpemineg dà te menge sambag ku,

iyan,

kenè din ebpezumdumahan,

ne iring sikandin te etew he ebevaley ziyà te pantad.

Ne hein nepasad din haazà is baley zin ne mibagyu ne nesuǥat haazà is baley zin te utew meseleg he wahig ne nerundus haazà is baley he nepurung mewaǥey.”