Is Kebewii te Suluǥuen te Kepitan
7
Ne hein nekeipus dutun si Jesus he ebpenurù te menge etew ne midhendiyà sikandin te inged he Kepirnaum.
2 Ne zuen dutun etew he kenà Hudiyu he kepitan te nenggatus he sundaru he zuen din suluǥuen he maama he utew zin minahal.
Ne heini is suluǥuen ne egketigbak is egkezeruwan su edluwàluwè en te ǥehinawa.
3 Ne hein neventuǥan haazà is egalen din mehitenged ki Jesus,
midsuǥù din is pira he vuuk te ebmeǥurangen te menge Hudiyu wey zan mehengyui si Jesus he medhendutun su wey zin mevewii haazà is suluǥuen dutun te kepitan.
4 Ne mibeyaan dutun te menge ebmeǥurangen si Jesus ne midhangyù dan kandin,
ke sikandan te,
“Engayan he tevangi nu sikandin
5 su sikitew is menge Hudiyu,
ne mahal ziyà te ǥehinawa zin;
mibpehitindeg sikandin te sevaha he simbahan tew.”
6 Ne zutun miduma si Jesus kandan ne hein ebpelingguma zan en dutun te valey te egalen te menge sundaru ne impesinuǥung din ensi Jesus te menge zuma zin wey zan mekaǥi ziyà te ki Jesus is lalag din he edhenduen te,
“Datù,
kenè nu en semuka is gehinawa nu te kedhendini te valey ku su kenà a zait he ebigatbigat kenikew he medhendini ke pa maan.
7 Su utew zekelà is pid-etawan nu ne minsan is kedsinuǥung ku kenikew,
ne kenà a zait.
Utew ka mekeǥeǥehem ne minsan ke egkaǥi ke zà te,
‘Meulii sikandin,’
ne egkeulian en is suluǥuen ku.
8 Netuenan ku heini su iring te zuen ebayàbayà kedì ne zuen daan menge sundaru he ebeyveyaan ku.
Ne edsuǥuen ku is sevaha he medhipanew ne edhipanew en.
Ne edtewaǥen ku is sevaha pa he medhendini ne edhendini en.
Ne edsuǥuen ku zaan is suluǥuen ku ke zuen ebpeveelan ku ne ebeelan din.
Ne iring din ded daan diyan te kenikew su is egkeǥiyen nu ne egkehimu en.”
9 Ne te nezineg ni Jesus heini,
ne utew neinuinu.
Ne midlingì ne migkaǥi ziyà te mezakel he menge etew he nemenduma kandin te,
“Wazè ku pa meuma is etew he kevuwazan ni Israyil he iring kayi he utew mezesen is kedtuu zin!”
10 Ne mid-ulì haazà is menge midsuǥù dutun te egalen te menge sundaru ne hein nekeuma zan diyà te valey,
neulian en haazà is suluǥuen te kepitan.
Is Kebenhawa te Anak te Valu
11 Ne nepiraan pa maan dutun midhendiyà si Jesus te inged he egngezanan te Nain.
Ne utew mezakel is menge etew he nemenduma kandin ragkes te menge sumusundan din.
12 Ne hein ebpekeuma zan en dutun te idselang dutun te inged ne nesinuǥung dan is menge etew he ebpuun dutun te inged he edlanting te minatey su idleveng dan.
Maama haazà is minatey he iyan dà anak dutun te meritan he valu.
Mezakel is menge etew zutun te inged he miduma zutun te vahi he eduma te edleveng.
13 Ne is Nengazen he si Jesus,
hein neehè din haazà is bahi he edsineǥew ne midtavang is gehinawa zin ne migkeǥiyan din haazà is bahi te,
“Ayà,
kenè ka sineǥew.”
14 Ne mibeyaan din is edlentingen ne migewezan din.
Ne nemeketeren haazà is edlanting dutun te minatey ne migkeǥiyan ni Jesus haazà is edlentingen te,
“Mama,
enew ka!”
15 Ne zutundutun mid-enew haazà is minatey ne mibpekidlalag kandan.
Ne migkeǥiyan ni Jesus haazà is iney zutun te nevanhew he kuwaa zin en haazà is anak din.
16 Ne is langun he nemekeahà dutun,
ne utew zan nengehandek ne nezalig dan is Megbevayà,
ke sikandan te,
“Heini en te kenitew is utew lavew he ebpeneuven te Megbevayà!”
Ne ke sikandan daan te,
“Mibulus en is Megbevayà su wey kiw melibri is menge nengepilì din he etew!”
17 Ne haazà is tudtul te mid-ulaula ni Jesus,
ne segugunà nekeeneb diyà te tivuuk he menge inged te prubinsya he Hudiya wey ziyà te zuma pa he menge inged he nekepeǥilid dutun.
John the Baptist in Prison
Si Jesus Wey si Juan Megbebewtismu
18 Ne hein nezineg te menge sumusundan ni Juan Megbebewtismu is tudtul mehitenged kayi te langun,
midtudtulan dan si Juan.
19 Ne zutun midtawag ni Juan is dezuwa te menge sumusundan din ne midsuǥù din diyà te ki Jesus.
Iyan insuǥua zin dutun su ibpeinsè din ke iyan en be iyan si Jesus sikan is netagnà dengan is kebpekeuma zin dini te kelibutan he impesavut ni Juan wey ke zuen pe be ebpeebuten he liyu ki Jesus.
20 Ne hein nekeuma zan diyà te ki Jesus migkaǥi zan te,
“Iyan impekehendini zey te kenikew su midsuǥù key ni Juan Megbebewtismu su ibpeinsè din ke iyan ke en be iyan kes impesavut din he ibpehendini te Megbevayà wey ke zuen pe be ebpeebuten liyu kenikew?”
21 Ne zutun he andew,
mezakel is menge etew he nengeulian ni Jesus te menge zaru wey ebpenggezamen dan.
Impemeǥuwè din dutun te menge etew is menge mezaat he mulin-ulin he ebpenlalung kandan ne midhimu zin he mekeahà is mezakel he menge lakap.
22 Ne migkeǥiyan ni Jesus haazà is menge suǥù ni Juan te,
“Likù kew en diyà te ki Juan ne tudtula niw ziyà te kandin is nengeehè niw he mid-ulaula ku wey ke hengkey is nezineg niw he migkaǥi ku.
Iyan niw tudtula kandin he tenged kedì ne ebpemekeehè en is menge lakap ne ebpemekehipanew en is menge piang;
nengeulian en is menge it-iten wey ebpemekezineg en is menge vengel.
Mibanhew ku is nemematey wey impesavut ku ziyà te menge egkengeayuayu is Meupiya he Tudtulanen.
23 Utew zeyzey is etew he kenà eduwazuwa he iyan a sikan is midsuǥù te Megbevayà.”
24 Ne hein migenat en haazà is menge suǥù ni Juan ne migkaǥi si Jesus diyà te mezakel he nengetiǥum he menge etew,
ke sikandin te,
“Hein midhilesung niw si Juan diyà te tanà he wazà duen ed-ubpà he etew,
hengkey is inhilesunga niw kandin?
Iyan be ed-ahaan niw is etew he iring te sagbet he egkewaleng te keramag?
Kenà iyan haazà su kenà egkehalinhalin is gehinawa ni Juan.
25 Midhilesung niw ve is etew he utew meupiya is bisti zin?
Kenà daan,
su is menge etew he memeupiya is bisti wey utew meupiya is kebpekesavuk,
ne ziyè dà egkeahà te turuǥan te hadì.
26 Ne hengkey is inhilesunga niw?
Ed-ehè kew ve te etew he ebpeneuven te Megbevayà?
Iyan haazà tutuu he ed-ahaan niw su ebpeneuven iyan si Juan.
Iyan,
kenà te ebpeneuven dà
27 su iyan daan si Juan sikan is kegketuman te netagnà he insurat he Lalag te Megbevayà su migkaǥi zutun is Megbevayà te,
‘Duen etew he edsuǥuen ku.
Ibpehuna ku sikandin kenikew wey zin mehiǥewani is ibayè nu.’ ”
Ne mid-uman megkaǥi si Jesus te,
28 “Tentenuzi niw he si Juan Megbebewtismu,
wazà minsan hentei he etew te minsan keenu he timpu he nekelavew kandin,
iyan,
ke edhadì keuzemà is Megbevayà,
is minsan hentei he etew zutun he edhedian te Megbevayà,
minsan utew minus is pid-etawan din,
lavew pa sikandin kenà si Juan guntaan.”
29 Ne hein nezineg heini is menge penurù ni Jesus te langun he menge etew zutun wey te menge mesinupaken he menge menunukut te vuhis,
migkaǥi zan he utew hustu is menge ulaula te Megbevayà.
Umba migkaǥi zan heini su iyan si Juan kes mibpemewtismu kandan.
30 Iyan,
is menge Perisiyu wey is menge menunudlù te kesuǥuan te menge Hudiyu,
wazè dan mulà pezumdumahi is egkesuatan te Megbevayà he ibpeulaula kandan ne wazè dan daan mebpebewtismu ki Juan.
31 Ne mid-uman megkaǥi si Jesus te,
“Sikiyu is menge etew ǥuntaan,
iyan ebpetug-iringan ku keniyu is menge vatà.
32 Su is menge vatà,
ne ebpememimpinuu ziyà te tiyenggiyan is ebevaleyvaley.
Ne ebpeum-umawà sikandan is egkaǥi te,
‘Edtemburan dey sikiyu ne kenè kew edsayew,
ne edlelendag key ne kenè kew zaan edtampu.’
33 Ne hein neehè niw si Juan Megbebewtismu,
is edsalang egkaan,
ne kenà daan ed-inum te vinu ne migkaǥi niw he midsuukan sikandin te mezaat he mulin-ulin.
34 Ne siak is Kakey te Menusiyà,
wazà a medsalang megkaan ne mid-inum a mulà te vinu ne nengeinuinu kew ne migkaǥi niw he vuleǥuk a wey pereinum te vinu.
Ne ke sikiyu te emiǥu a te menge lalung he etew iring te menunukut te vuhis wey menge mesinupaken.
35 Iyan,”
ke si Jesus,
“pinaaǥi te menge ulaula te menge etew he tutuu is kedsarig dan te Megbevayà egketuusan ta he utew metau sikandin.”
Hein Diyà si Jesus te Valey ni Simon he Perisiyu
36 Ne zuen dutun Perisiyu he mid-umbita zin si Jesus he ibpekaan diyà te valey zin.
Ne midhendiyà si Jesus.
Ne hein nekeuma en si Jesus dutun,
ne mibpinuu is egkaan.
37 Ne zutun he inged duen bahi he mezaat is dengeg din.
Ne hein netuenan kayi te vahi he zutun egkaan si Jesus te valey te Perisiyu,
midhendutun sikandin is ed-uwit te meputì he pelenahan he vatu he elebastru he midteǥuan te mehemut he agwa he mahal utew.
38 Ne mid-uvayan din si Jesus ne midluhud diyà te uvey te paa zin ne mibpeniǥis is luhè din ne nengeulug diyà te paa ni Jesus.
Ne mibpunasan din te vulvul zin ne midhezekan din.
Ne zutun mibusbusan din haazà is paa ni Jesus duen te agwa he utew mehemut.
39 Ne naahà heini zutun te Perisiyu he mid-umbita ki Jesus,
ne neisip din is,
“Angin ke tutuu he ebpeneuven heini te Megbevayà ne kenà ebpekeeles kandin is meremerik he ulaula kayi te vahi ne wazè din pezem ituǥut he meǥewezi is lawa zin kayi te vahi.”
40 Ne zutun impezineg ni Jesus dutun te Perisiyu heini is lalag,
ke sikandin te,
“He Simon,
duen egkeǥiyen ku kenikew.”
Ne ke si Simon te,
“Hengkey?”
41 Ne ke si Jesus te,
“Iyan heini is sempità.
Dengan duen sevaha he etew he ebpeutang te selapì.
Ne zuen dutun dezuwa he etew he nekeutang diyà te kandin.
Is sevaha,
ne lelima he ǥatus is neutang din ne is sevaha,
ne kelimahan dà is kandin he neutang.
42 Ne hein kenà ebpekevayad haazà is dezuwa he utangan,
ne migkaǥi haazà is neutangan dan he kenè dan en beyazi haazà is utang dan.”
Ne mid-uman megkaǥi si Jesus te,
“Hendei zapit dutun te zezuwa he etew he nekeutang is lavew he utew mahal diyà te ǥehinawa zin haazà is neutangan dan?”
43 Ne ke si Simon te,
“Iyan buwa lavew he utew zekelà is gehinawa zin te etew he neutangan dan sikan is dekelà is utang din he wazè en peveyazi kandin.”
Ne ke si Jesus te,
“Benar,
su iyan sikandin utew lavew he zekelà is gehinawa zin dutun te etew he neutangan dan.”
44 Ne midsinaru si Jesus dutun te vahi ne migkeǥiyan din si Simon te,
“Sikan is sempitè ku,
ne iring kayi te vahi.
Su mibpemenahik a zini te valey nu,
iyan,
minsan pa te iyan betasan tew is ebeǥey ki te ibpepenlùlù te paa te meǥeliyug ta ne wazà a kenikew veǥayi.
Ne heini is bahi mulà,
midlùlùan din is menge paa ku te menge luhè din ne midterepuwan din te menge vulvul zin.
45 Ne minsan te iyan betasan tew te kegalewǥalew is kedhezeki ta te meǥeliyug ta,
ne wazà midhazek kedì te kebpekeuma ku.
Ne heini is bahi,
puun pa te kebpekeuma ku midtulungan din hezeki is menge paa ku.
46 Ne wazè nu zaan itisi is ulu ku te lana,
iyan,
heini is bahi,
mahal he mehemut he agwa is imbusbus din dini te menge paa ku!
47 Umba migkaǥi ku heini kenikew su egketuusan ta kayi te vahi he mezakel is menge ulaula zin he mezaat he nengepesaylu en te Megbevayà su utew a mahal ziyà te ǥehinawa zin.
Ne ke zuen etew he zeisek dà is menge ulaula zin he mezaat he nepesaylu te Megbevayà,
wazè din utew ǥehinawa te Megbevayà.”
48 Ne zutun migkeǥiyan ni Jesus haazà is bahi te,
“Bayi,
nepesaylu en te Megbevayà is menge salè nu.”
49 Ne is menge etew zutun he egkaan duma ki Jesus,
neisip dan is,
“Hentei heini etawa he minsan is menge salà,
ne ebpeseyluwen din en?”
50 Ne mid-uman megkaǥi si Jesus dutun te vahi,
ke sikandin te,
“Na,
ulì ke en,
Bayi,
ne mebmelinawen en is kebpekesavuk nu.
Nelibri ke en te silut tenged te midsarig ka te Megbevayà.”
Sinful Woman Forgiven