Ne migkaǥi si Jesus med-uman te,

“Emun duen duma nu he nekesalà kenikew,

ne keǥiyi nu wey sembaǥi nu,

ne emun ibmesakit haazà te ǥehinawa zin ne ebuyù te pesaylu,

ne peseyluwa nu.

4 Ne minsan kepipitu pa sikandin mekesalà kenikew te sengeandew,

ne kepipitu zaan sikandin ebuyù te pesaylu ziyà te kenikew,

ne peseyluwa nu sikandin.”

5 Ne migkaǥi haazà is menge epustul diyà te ki Jesus te,

“Heǥeta nu is kedtuu zey.”

6 Ne midtavak si Jesus te,

“Emun duen kedtuu nu he minsan iring dà kezekelà te sengevuuk he lisu te mustasa he utew zeisek ne egkekeǥiyan nu heini is dekelà he kayu te,

‘Awè ka keniyan ne halin ka ziyà te zaǥat.’

Ne iyan dà haazà,

ne ebpezumazuma kenikew.”

7 Ne migkaǥi en maan si Jesus te,

“Penenglitan,

ke zuen suluǥuen te sevaha keniyu ne iyan baal zin is ed-eradu ne emun kenà ne ed-elima te menge ayam nu.

Ne emun sikan pa ed-ulì te mahapun,

kenà egkehimu he egkeǥiyan nu te,

‘Huna ka kaan ne human a.’

8 Kenà,

su iyan egkeǥiyen nu is,

‘Penlùlù ke pa ne subai a kenikew wey a mekekaan.

Ne wey ka mekekaan ke egkeipus a he egkaan.’ ”

9 Ne mid-uman megkaǥi si Jesus te,

“Ne haazà is suluǥuen,

ne kenà igkezeliǥi kandin is kedtuman din su ketengdanan din is kedtuman te menge suǥù kandin te egalen din.

10 Ne iring kew zaan dutun.

Ne emun egkepasad niw is ebpeveelan keniyu te Megbevayà,

ne itaǥù niw ziyà te isip niw he menge suluǥuen kew zà te Megbevayà ne midtuman niw zà is menge suǥù din keniyu.”

11 Ne zutun te kebpehendiyè en ni Jesus te inged he Hiruselim ne ziyà sikandin mebayà te pid-elangan te menge prubinsya he Semarya wey Geliliya.

12 Ne nekeuma sikandin diyà te sevaha he inged ne zuen dutun sepulù he maama he it-iten he nemeninuǥung kandin.

Ne tenged te it-iten sikandan wazè dan uvayi si Jesus,

kekenà,

diyè dan dà te meziyù.

13 Ne mid-umew zan ki Jesus te,

“He Zatù Jesus,

ikehizu key kenikew!”

14 Ne hein neehè din sikandan ne migkaǥi sikandin te,

“Hendiyè kew en te menge memumuhat te Megbevayà wey zan maahà he nengeulian kew.”

Ne nemenhipanew zan ne zutun te kegenat dan nengeulian segugunà sikandan.

15 Ne is sevaha zutun,

hein neehè din he wazè en it-it din,

midlikù diyà te ki Jesus is ebpempemensag is edalig te Megbevayà.

16 Ne midluhud diyà te etuvangan ni Jesus ne utew zekelà is kebpeselemati zin kandin.

Ne haazà is neulian,

ne kenà Hudiyu su tigSemarya he etew.

17 Ne migkaǥi si Jesus diyà te kandin te,

“Kenè be sepulù kew man is nengeulian?

Maan is wazà mekelikù is siyew he menge zuma nu?

18 Maan is iyan ke zà is tigSemarya midlikù he edalig te Megbevayà?”

19 Ne migkeǥiyan ni Jesus te,

“Mama,

hitindeg ke en ne hipanew kad.

Is kedsarig nu te Megbevayà ne iyan nekelibri kenikew te silut.”

20 Sengeandew zutun ne zuen menge Perisiyu he mid-insà ki Jesus te,

“Keenu egketuman is egkeǥiyen nu he kedhedii te Megbevayà te menusiyà?”

Ne midtavak si Jesus te,

“Kenà egkeahà te etew is kegketuman din

21 su kenà egkehimu he zuen etew he ebpekekaǥi te,

‘Ahaa niw su heini en!’

Ne emun kenà,

ne ‘Dutun sikan is ibpahadì te Megbevayà!’

Su,”

ke si Jesus,

“diyè dà te ǥehinawa te etew sikan is kedhedii kandin te Megbevayà ne kenà egkeahà te mata.”

22 Ne migkaǥi si Jesus diyà te menge sumusundan din te,

“Egkeuma is andew he utew zekelà pezem diyà te ǥehinawa niw he meǥaan metuman is timpu te kedlikù ku te Kakey te Menusiyà,

iyan,

kenè pa egkehitavù.

23 Ne emun duen egkaǥi keniyu he ziyà a is Kakey te Menusiyà te uvey wey ke ziyà a te meziyù ne kenè kew mebpemineg.

24 Su is kedlikù ku,

ne iring te kilat he ebpeketayew te tivuuk he tanà,

ne egkeahà te minsan hentei.

25 Iyan,

siak is Kakey te Menusiyà,

kinahanglan he egkehuna pa egkeuma is kedresaya kedì,

wey is kenà kedewata te menge etew te menge penurù ku.

26 Ne keuzemà te timpu te kedlikù ku zini te kelibutan,

ebpekeiring is menge ulaula te menge etew zutun duen te menge ulaula zengan te menge etew zuen te timpu ni Noe.

27 Su zengan te keazen pa ni Noe,

iyan dà neisip te menge etew is kegkebibu ne migkaan dan ne mid-inum dan ne mibpees-eseweey zan taman te midseled ensi Noe zuen te utew zekelà he avang he egngezanan te arka ne hein midlapey is daǥat nengelened maamin haazà is menge etew.

28 Ne elin daan egkeiringan te timpu te kedlikù ku,

is timpu zengan te keazen pa ni Lut.

Su zutun wazà rintas te kegkebibu te menge etew te kebpemengaan wey kebpemenginum.

Mibpenigudu zan he ebpememasa wey ebpememelegyà wey ebpememula wey ebpemevaley.

29 Ne haazà he andew te ked-awà ni Lut dutun te inged din he egngezanan te Suduma,

is langun he menge etew he meǥinged dutun,

ne nelimas te hapuy wey esupri he mid-ulug te Megbevayà ebpuun te langit.

30 Iring ded dutun keǥaan is kegketik-ew te kedlikù ku te Kakey te Menusiyà keuzemà.

31 Ne zutun he andew,”

ke si Jesus,

“sikan is etew he egkeserengà diyà te ǥawas te valey zin,

ne ziyè pa te seled is menge azen din ne kenè en medseled dutun te valey te kegkuwa te minsan hengkey.

Ne iring din ded daan is etew he egkeserengà diyà te pemuleey zin;

wazè en kinahanglan he medlikù sikandin diyà te valey zin.

32 Tentenuzi niw ke hengkey is nehitavù duen te esawa ni Lut.

33 Sikan is etew he egkenuǥunan din is untung din kenà is kedsundan din kedì,

ne nasì kenà ebpekeangken te untung he wazà pidtemanan.

Ne sikan is etew he kenè din egkenuǥunan is untung din tenged te kedsundan din kedì,

ebeǥayan sikandin te untung he wazà pidtemanan.

34 Ne zutun he timpu emun egketuman is kedlikù ku te mezukilem ne ke zuen ebpehulizey he zezuwa he etew ne egkuwaan is sevaha ne is sevaha ne egketaǥak.

35 Ne iring ded daan dutun su ke zuen zezuwa he vahi he ebpeuǥupà te kebpenggaling,

ne egkuwaan te menge velinsuǥuen ku is sevaha ne egketaǥak is sevaha.

36 Ne iring din ded daan ke zuen dezuwa he etew he ebpeuǥupey ziyà te pemuleey,

su egkuwaan is sevaha ne is sevaha ne egketaǥak.”

37 Ne zutun mid-insà ki Jesus is menge sumusundan din,

ke sikandan te,

“Hendei heini egkehitavù?”

Ne midtavak si Jesus te,

“Ke hendei is minatey ne zutun daan is menge tagbis he egkaan te nemahù,”