6 Ne hein metaneb en dutun is kezukileman ne nezineg dan is ed-umew te,

‘Heini en sikan is ebpengesawa;

sinuǥunga niw en sikandin.’

7 Ne nepukew haazà is sepulù he raǥa ne midsusi zan is menge sulù dan ne mibpurungan dan.

8 Ne zutun migkaǥi haazà is menge tulebung dutun te menge memetau te,

‘Beǥayi key te gas su egkengeevukan en is kenami he menge sulù.’

9 Ne midtavak haazà is memetau te,

‘Kenà egkehimu su kenà egkampet kenitew te langun is gas he neuwit dey.

Hendiyè kew te tindahan wey kew mekepemasa te gas.’

10 Ne zutun migenat haazà is menge tulebung su ebpemasa zan te gas,

ne hein nehaus dan en nekeuma sikan is ebpengesawa.

Ne haazà is lelima he menge raǥa he memetau,

miduma zan kandin te edseled dutun te valey he zutun is eseweey.

Ne hein nekeseled dan en dutun ne midlekevan haazà is baley.

11 Ne netegteǥaad dutun nekeuma zaan haazà is menge zuma zan he raǥa;

ne ziyè dan dà te ǥawas is egkaǥi te,

‘He Nengazen,

he Nengazen,

puwasi key.’

12 Ne midtavak haazà is ebpengesawa te,

‘Kenè ku sikiyu egkekilala.’ ”

13 Ne ke si Jesus te,

“Iring dutun,

kinahanglan he andam kew su wazè niw metueni ke hengkey he andew wey ke hengkey he uras is kedlikù ku.

14 Is kedhadì te Megbevayà ne iring daan te etew he edhipanew.

Te wazè pa sikandin megenat,

midtiǥum din is menge suluǥuen din su idsarig din kandan is selapì din wey zan ikepetiǥayun.

15 Mibahin din kandan sumalà is egkeveleveg te uman sevaha kandan te ebpetiǥayun.

Is sevaha,

mibeǥayan din te lelima he libu he pisus;

ne is sevaha,

mibeǥayan din te zezuwa he libu;

ne is sevaha pa,

nengkelibu he pisus is imbeǥey zin dutun.

Ne zutun migenat haazà is etew he edhipanew.

16 Ne sikan is suluǥuen he mibeǥayan te lelima he libu he pisus,

impetiǥayun din haazà is kandin,

ne netiǥayun te lelima pa he libu.

17 Iring din ded daan sikan is suluǥuen he mibeǥayan te zezuwa he libu he pisus,

su netiǥayun daan te zezuwa pa he libu.

18 Iyan,

sikan is suluǥuen he mibeǥayan te nengkelibu he pisus,

mid-awà dutun ne inleveng din diyà te tanà haazà is selapì dutun te egalen din.

19 Ne hein neuǥet dutun,

mid-ulì haazà is egalen dan su edsusiyen din haazà is selapì din.

20 Ne midtelavuk kandin sikan is suluǥuen din he mibeǥayan te lelima he libu he pisus ne indata zin haazà is selapì ragkes sikan is genansya he lelima he libu.

Ne ke sikandin te,

‘Mibeǥayan a kenikew te lelima he libu he pisus;

ne heini zed is genansya he lelima he libu he pisus.’

21 Ne migkaǥi haazà is egalen din te,

‘Utew meupiya is baal nu!

Metinumanen ka he suluǥuen!

Ne ǥeina te egkeseriǥan ka te zeisey he selapì idsarig ku kenikew is dekelà.

Seled ka zini wey ka mekeambit te kelipey ku.’

22 Ne midtelavuk daan kandin sikan is mibeǥayan din te zezuwa he libu he pisus ne ke sikandin te,

‘Datù,

mibeǥayan a kenikew te zezuwa he libu he pisus.

Ahaa nu,

heini zed daan is genansya he zezuwa he libu he pisus.’

23 Ne migkaǥi haazà is egalen din te,

‘Utew meupiya is baal nu!

Metinumanen ka he suluǥuen!

Geina te egkeseriǥan ka te zeisey he selapì,

idsarig ku kenikew is dekelà.

Seled ka zini wey ka medlipey te kelipey ku.’

24 Ne midtelavuk daan sikan is suluǥuen he mibeǥayan din te nengkelibu he pisus.

Ke sikandin te,

‘Datù,

netuenan ku he wazè nu kehizu su edreǥunen nu is kenè nu pinemula,

ne ebpenggenansya ka te wazè nu ipetiǥayun.

25 Ingkehandek ku sikew umba inleveng ku ziyà te tanà is selapì nu.

Ahaa nu;

heini zed sikan is selapì nu.’

26 Ne midtavak haazà is egalen din te,

‘Utew mezaat is baal nu!

Peǥulen ka he suluǥuen!

Netuenan nu ves he edreǥunen ku is kenè ku pinemula ne ebpenggenansya a te wazè ku ipetiǥayun?

27 Maan is wazè nu ipeutang heeyan is selapì ku wey mepursintuwi wey medekelà is bali zin wey ku mezawat kayi te kedlikù ku?’

28 Ne zutun migkaǥi sikandin diyà te selakew en he suluǥuen te,

‘Kuwaa nu heeyan is nengkelibu he pisus keniyan te kandin ne iveǥey nu ziyà te nekekuwa te sepulù he libu.

29 Su sikan is egkeseriǥan te insarig kandin,

ed-umanan pa.

Iyan,

sikan is kenà egkeseriǥan,

edhewien diyà te kandin minsan is deisek he insarig kandin.

30 Ne heini is wazè din pulus he suluǥuen,

itimbag niw ziyà te merusirem he utew meziyù diyà te ǥawas.

Dutun ne ebpekekulahì wey ebpekengingitel tenged te utew ebpekedsendit.’

31 Siak is Kakey te Menusiyà,

dutun te kedlikù ku he utew zekelà is gehem te ked-anlag ku wey edumahan ad te langun he menge velinsuǥuen ku,

ebpinuu ad is edhadì.

32 Ebpekeetuvang kedì is tivuuk he menusiyà.

Ne zutun edtepizen ku sikandan te zezuwa he vahin iring te kedtepiza te bekidu zuen te menge kambing wey menge kerehidu.

33 Idtapid ku is iring te menge kerehidu ziyà te zapit te egkekewanan ku,

ne sikan is iring te menge kambing,

idtapid ku ziyà te zapit te egkeǥivang ku.

34 Ne zutun,

siak is hadì,

ekeǥiyan ku is menge etew ziyà te zapit te egkekewanan ku te,

‘Sikiyu is midtuvazan te Amey ku he Megbevayà,

kayi kew su iyan kew edhedian ku.

Su is kedhadì ku keniyu,

inteǥana en dengan puun pa te kedlimbaǥa te kelibutan.

35 Su hein nevitil a,

impekaan a keniyu;

ne hein nemezahan a,

impeinum a keniyu;

minsan wazà a keniyu mekilala,

midawat a keniyu ziyan te valey niw.

36 Hein wazè ku ugelingen mibeǥayan a keniyu;

hein nezeruwan a,

mid-elimahan a keniyu.

Hein nepirisu a,

midlauy a keniyu.’

37 Ne ed-insaan a zutun te menge etew he metazeng he ziyà te zapit te egkekewanan ku te,

‘Nengazen,

keenu zey sikew maahà he nevitil wey nemezahan ne impekaan dey wey impeinum dey sikew?

38 Keenu zey sikew zewata ziyà te valey zey te wazè dey sikew mekilala?

Keenu ka megkinahanglan te ugelingen nu,

ne mibeǥayan dey sikew?

39 Keenu zey sikew melauy he egkezeruwan wey ziyà te pirisuan?’

40 Ne zutun,

siak is hadì,

edtavak a te,

‘Egkeǥiyen ku keniyu he ke mid-ulaula niw heini ziyà te minsan sevaha kayi te menge suled ku,

41 Ne zutun ekeǥiyan ku is menge etew he ziyà te zapit te egkeǥivang ku te,

‘Sikiyu is midrewakan te Amey ku he Megbevayà,

awè kew kayi!

Su zutun kew te regreg he wazè din pidtemanan he inteǥana he zaan ki Setanas he iyan idsilut kandin duma te menge velinsuǥuen din!

42 Su zengan nevitil a,

iyan,

wazà a keniyu ipekaan;

nemezahan a,

ne wazà a keniyu ipeinum.

43 Wazè ku egkepemenehikan ne wazà a keniyu zewata ziyà te valey niw.

Egkinahanglan a te ugelingen,

iyan,

wazà a keniyu meveǥayi.

Nezeruwan a,

ne ziyà a te pirisuan,

iyan,

wazà a keniyu leuya.’

44 Ne ed-insè dan te,

‘Nengazen,

keenu zey sikew maahà he egkevitil,

ebpekeinum,

wazà egkepemenehikan,

wazà ugelingen,

nezeruwan,

wey ziyà te pirisuan ne wazè dey sikew metevangi?’

45 Ne zutun edtavak a is hadì te,

‘Egkeǥiyen ku keniyu he ke wazè niw tevangi is minsan sevaha kayi te utew minus is pid-etawan din,

siak is wazè niw metevangi.’

46 Ne heini he menge etew,”

ke si Jesus,

“id-awà kayi su edsilutan sikandan te silut he wazè din pidtemanan;

iyan,

is menge metazeng mulà,

ebeǥayan sikandan te untung he wazè din pidtemanan.”