Ochnac vin̈aj Joacaz reyal
36
Ix lajvi chiꞌ axo masanil ebꞌ anima ix acꞌanoch vin̈aj Joacaz yuninal vin̈aj Josías chiꞌ reyal dꞌa Jerusalén sqꞌuexuloc vin̈ smam chiꞌ. 2 Ayic ix schaanel yich vin̈ yacꞌan reyal, 23 abꞌil sqꞌuinal vin̈, oxen̈ej ujal ix yacꞌ reyal vin̈. 3 A vin̈ sreyal Egipto ix icꞌanel vin̈ dꞌa reyal chiꞌ. Ix yacꞌanoch qꞌuen tumin vin̈ sreyal Egipto chiꞌ dꞌa yibꞌan̈ ebꞌ aj Judá chiꞌ yic syacꞌan 75 quintal qꞌuen plata ebꞌ yedꞌ oxeꞌ arroba qꞌuen oro. 4 Axo vin̈aj Eliaquim yucꞌtac vin̈aj Joacaz chiꞌ ix ochcan reyal dꞌa Judá chiꞌ yuj vin̈ sreyal Egipto chiꞌ. Ix qꞌuexchaj sbꞌi vin̈aj Eliaquim chiꞌ yuj vin̈, Joacim ix sbꞌiejcan vin̈, axo vin̈aj Joacaz chiꞌ, ix icꞌjibꞌat vin̈ yuj vin̈ sreyal Egipto chiꞌ.Ochnac vin̈aj Joacim reyal
5 Ayic ix och vin̈aj Joacim chiꞌ reyal, 25 abꞌil sqꞌuinal vin̈, 11 abꞌil ix yacꞌ reyal vin̈ dꞌa Jerusalén. Palta te chuc tas ix scꞌulej vin̈ dꞌa yichan̈ Jehová Dios. 6 Axo vin̈aj Nabucodonosor sreyal Babilonia ix javi yacꞌ oval yedꞌ vin̈, ix tzecꞌji vin̈ dꞌa qꞌuen cadena, ix icꞌjibꞌat vin̈ dꞌa Babilonia chiꞌ. 7 An̈ejtonaꞌ ix yicꞌbꞌat juntzan̈ yamcꞌabꞌ yic scajnubꞌ Jehová vin̈aj Nabucodonosor chiꞌ, ix yacꞌanoch vin̈ dꞌa yol stemplo sdiosal dꞌa Babilonia chiꞌ.
8 A jantacto yabꞌixal vin̈aj Joacim chiꞌ yedꞌ tastac te yajbꞌentac ix scꞌulej vin̈ yedꞌ juntzan̈xo chucal ix scꞌulej vin̈, aycan bꞌaj tzꞌibꞌabꞌilcan yabꞌixal ebꞌ sreyal Israel yedꞌ ebꞌ yic Judá. Axo vin̈aj Joaquín yuninal vin̈ ix ochcan reyal sqꞌuexuloc.
Icꞌbꞌilbꞌat vin̈aj Joaquín dꞌa Babilonia
9 Ayic ix schaanel yich vin̈aj Joaquín yacꞌan reyal, 18 abꞌil sqꞌuinal vin̈. Oxeꞌ ujal yedꞌ lajun̈exo cꞌual ix yacꞌ reyal vin̈ dꞌa Jerusalén, te chuc tas ix scꞌulej vin̈ dꞌa yichan̈ Jehová.
10 A dꞌa bꞌabꞌel uj yic jun abꞌil chiꞌ, ix yal vin̈aj Nabucodonosor to tzꞌicꞌjibꞌat vin̈aj Joaquín chiꞌ dꞌa Babilonia yedꞌ juntzan̈ yamcꞌabꞌ te caro stojol ay dꞌa scajnubꞌ Jehová. Axo vin̈aj Sedequías ix acꞌjioch reyal dꞌa Judá yedꞌ dꞌa Jerusalén sqꞌuexuloc vin̈aj Joaquín chiꞌ. A vin̈aj Sedequías chiꞌ, scꞌabꞌ yoc sbꞌa vin̈ yedꞌ vin̈aj Joaquín chiꞌ.
Ochnac vin̈aj Sedequías reyal
11 A vin̈aj Sedequías chiꞌ, 21 abꞌil sqꞌuinal vin̈ ayic ix schaanel yich vin̈ yacꞌan reyal, 11 abꞌil ix yacꞌ reyal vin̈ dꞌa Jerusalén. 12 Te chuc tas ix scꞌulej vin̈ dꞌa yichan̈ Jehová. Maj sna sbꞌa scꞌool vin̈ yuj scachnabꞌil ix schec Jehová yal vin̈ schecabꞌ aj Jeremías. 13 Ijan ix yiqꞌuel sbꞌa vin̈ dꞌa vin̈aj Nabucodonosor yalani, aton bꞌaj ix yacꞌ stiꞌ vin̈ dꞌa yichan̈ Dios to junn̈ej ix yutej spensar vin̈ yedꞌ vin̈. Juneln̈ej ix yacꞌ pitbꞌoquel spensar vin̈, majxo yal scꞌool vin̈ ix meltzaj dꞌa Jehová sDiosal Israel.
14 An̈ejtonaꞌ masanil ebꞌ vin̈ yajal dꞌa Judá chiꞌ, ebꞌ vin̈ sacerdote yedꞌ masanil ebꞌ anima, ix te qꞌue val chaan̈ ebꞌ scꞌulan chucal te yajbꞌentac. A val sbꞌeybꞌal juntzan̈xo chꞌoc chon̈abꞌil ix sbꞌeybꞌalej ebꞌ, ix yixtanel scajnubꞌ Jehová ebꞌ, aton jun sicꞌbꞌilel yuuj dꞌa Jerusalén chiꞌ. 15 A Jehová sDiosal ebꞌ yedꞌ smam yicham ebꞌ, ix schecn̈ejcot ebꞌ schecabꞌ yic tzul cachji ebꞌ, yujto tzꞌocꞌ scꞌol dꞌa schon̈abꞌ yedꞌ dꞌa scajnubꞌ chiꞌ. 16 Palta ton̈ej ix stzetzej ebꞌ schecabꞌ Dios chiꞌ ebꞌ, malaj yelcꞌoch tas ix yal ebꞌ dꞌa sat ebꞌ. Ix bꞌuchvaj ebꞌ dꞌa ebꞌ schecabꞌ Dios chiꞌ, masanto ix em val yoval scꞌol Jehová dꞌa yibꞌan̈ schon̈abꞌ chiꞌ, majxo yal-laj yoch vaan.
Ix macꞌjiem lan̈naj scajnubꞌ Jehová
17 Ix lajvi chiꞌ, ix checjicot vin̈ sreyal ebꞌ aj Babilonia chiꞌ yuj Jehová, ix javi vin̈ yacꞌ oval yedꞌ ebꞌ aj Judá chiꞌ. Ix miljicham ebꞌ quelemtac dꞌa qꞌuen espada dꞌa yamaqꞌuil scajnubꞌ Dios. Man̈xa jabꞌoc snivancꞌolal ebꞌ dꞌa ebꞌ quelemtac chiꞌ yedꞌ dꞌa ebꞌ ix cobꞌestac, dꞌa ebꞌ icham anima man̈xa yip. Ix acꞌjioch ebꞌ smasanil dꞌa yol scꞌabꞌ vin̈ rey chiꞌ yuj Jehová. 18 Masanil yamcꞌabꞌ yic scajnubꞌ Dios, nivac yedꞌ cotac, jantacn̈ej tas ay dꞌa scajnubꞌ chiꞌ yedꞌ masanil sbꞌeyumal vin̈ rey yedꞌ yic ebꞌ vin̈ ayoch yajalil yedꞌ vin̈ rey chiꞌ, pilan ix yicꞌbꞌat vin̈aj Nabucodonosor chiꞌ dꞌa Babilonia. 19 Ix sn̈usancantzꞌa scajnubꞌ Dios chiꞌ ebꞌ, ix smacꞌancanem lan̈naj smuroal Jerusalén chiꞌ ebꞌ. Ix sn̈usantzꞌa spalacio vin̈ rey ebꞌ, ix smacꞌanpoj masanil tas caro stojol ebꞌ.
20 Axo ebꞌ maj miljoccham dꞌa oval chiꞌ, ix icꞌjibꞌat ebꞌ dꞌa Babilonia chiꞌ. Ix ochcan ebꞌ checabꞌoc dꞌa vin̈aj rey Nabucodonosor chiꞌ yedꞌ dꞌa ebꞌ yin̈tilal vin̈, masanto ayic ix acꞌji ganar Babilonia chiꞌ yuj ebꞌ aj Persia. 21 Icha val chiꞌ ix aj yelcꞌoch tas ix schec Dios yal vin̈aj Jeremías schecabꞌ. Icha chiꞌ ix aj yicꞌan yip lum luum, yujto 70 abꞌil man̈xalaj mach ix munlaj dꞌa sat luum.
A jun checnabꞌil yacꞌnaquelta vin̈aj Ciro
22 Ayic bꞌabꞌel abꞌil yoch vin̈aj Ciro reyal dꞌa Persia, ix elcꞌoch slolonel Jehová albꞌilcanel yuj vin̈aj Jeremías schecabꞌ. A Jehová ix acꞌan sna vin̈aj rey Ciro chiꞌ, yuj chiꞌ ix yaqꞌuelta jun checnabꞌil vin̈. Ix schecan vin̈ alchajel dꞌa masanil yol smacbꞌen, ix schecanpax vin̈ pucchaj uum, syalan icha tic: 23 A in Ciro in tic sreyal in Persia, a in sval icha tic: A Jehová sDiosal satchaan̈, aꞌ ix acꞌanoch masanil nación dꞌa sat luum tic dꞌa yol in cꞌabꞌ. Aꞌ ix alan dꞌayin to tzin bꞌoqꞌue scajnubꞌ dꞌa Jerusalén dꞌa yol yic Judá. Yuj chiꞌ, yaln̈ej mach ex schon̈abꞌ ex Jehová, colvajocabꞌ Jehová e Diosal chiꞌ eyedꞌoc. A ticnaic meltzajan̈ec dꞌa Jerusalén chiꞌ, xchi vin̈.